Jehuwá * Apajuí nagkamchak nuwan aishmagjai najana nuweuwai. Apajuí chichame tawai nii najanauwai nagkamchak nuwan “dutika aishmagkun ejetiuwai”. Adán shiig dakunkut aneak tiuwai: “Juka mina iyashjuiya pagae juki najanamui” (Génesis 2:22, 23). Jehuwá yamaikishkam wakegawai nuwedau aidau shiig aneas pujustinme tusa.

Jimag aents nuwenkug anentaimainawai shiijap dakunkut pujustatja tusa. Tujash dekas aneeniamu akuish nuwedauk tuke utugchatan igkugtatui (1 Corintios 7:28). Jujú papiinum igkugtatme ichichkagtamu Apajuí chichame jintinjama nu, jujú umiakmek amina nuwemjai pataimijai shiig aneasam pujustatme (Salmo 18:20).

APAJUÍ CHICHAME TAWAI: Aishmagkui nuwa apujiya duka (Efesios 5:23).

Ame aishi asamin, Jehuwá wakegawai nuwem aneau asam shiig kuitamkata tusa (1 Pedro 3:7). Apajuí najanauwai nuwan aishijai yainikti tusa, nuniau asamtai Apajuí wakegawai aishmag ajantus diimainai nuwe aneamui tusa (Génesis 2:18). Aneemainai senchi nuwen aniau asa puyatjus umigmainai nii wakegamua nuna umitsuk (Efesios 5:25-29).

Ame nuwatkamu akumek, Jehuwá wakegawai shiig ajantus diimainai aishin tusa nuniak yaimainai takatan umiktí tusa (1 Corintios 11:3; Efesios 5:33). Yaigtá shiig aneasam nii dutikata tawa nunú (Colosenses 3:18). Juna umitaik aishum shiig aneastatui Jehuwajai (1 Pedro 3:1-6).

WAJÍ DUTIKMAINAITME:

• Iniasta yajai nuwenam pujame nunú wajina dutikmainaitja tusam pegkeg atasamesh aishum aniashkumesh nuwem. Tujama nunú antukam kakanmamsata nuniakum umikta.

• Waamak kajekaipa. Unuimaja antugdaika pujamuk tsawantan dukap juwawai.

APAJUÍ CHICHAME TAWAI: Juka imanai puyatjusam diimainuk dekas amina nuwem atsá aishum anentaima duka (Filipenses 2:3, 4). Kuitamdaikatajum nuwenau aidautigmek, aneaku atá Jehuwá wakegawai niina nemajuidauk aneenis ninimainai tuké tusa (2 Timoteo 2:24). Anentaimsata wajuk chichaktatme nunú, duwi Apajuí chichame ujapawai: “Pegkegnum aimawa nunú kajekbaunak imijiawai; untsu kajeká aimawa duka nuní senchi kajeamun inimui” (Proverbios 15:1). Jehuwá wakanji yaimpaktatui shiig chichamunum pegkegnum wait anenkagtutnum (Gálatas 5:22, 23; Efesios 4:29).

WAJÍ DUTIKMAINAITME:

• Apajuí segatá yaimpakti wamkesa kajekaig tusam dekatkau shiig anentaimsam chichamainaitme imana nunú nuwem aishumjai.

• Shiig anentaimjam kuitamsa titá wajuk tumainaitme nunú.

APAJUÍ CHICHAME TAWAI: Nuwenkug nuwa aishmagjai “makichik iyash wegawai” (Mateo 19:5). Tujash jimag aentsuitak makí makichik anentaibau ajuagtatui. Duwi juka imanai unuimag ijunas pujumaina nuna dita anentaibaunak (Filipenses 2:2). Ijuntsa pujamuk imanai atum dutikata tabaunmak. ¿Wajuk dutikaji? Unuimakum antumainaitme nuniakum dakunkut pujustatme. Idaisata Apajuí chichame jintinjamati shiig anentaimja atunisa takastatabaunum yaimpaktatui (Proverbios 8:32, 33).

WAJÍ DUTIKMAINAITME:

• Imanikmek chichasaipa wají pachismek nuwem aishumjai; aniashkumesh chichastá anentaimin anentaibau.

• Eke dutiktsuk anentaimsata nuniakum chichastá nuwem aishumjai.