Jehuwá tujamui “aents nuwen ajapin aina nunashkam Apajuik kajejawai” tusa (Malaquías 2:15-16). Jujú umiamua juka imanai nuwenbaunum, ekagmamua nunú emegkawai kajitdaisa niniamunak. Kajitdaisa niniamua duka imanai anentak tuke atí tabaunum.

Yamai tsawanta juwi kajitdaisa niniamua duka megkaewai nuwedau aina nuwig, nuniau asamtai jimaja jujú dutikata.

APAJUÍ CHICHAME TAWAI: “Atumi pujutjuminish imagnisjum shiig pujuinakjum” (Filipenses 1:10). Aniau asamtai, Amina pujutjuminig iman amainai nuwenamuk. Puyatjumainaitme.

Jehuwá wakegawai imá niinak aneeti tusa nuwen atsa aishinashkam nuniak mai dakunkut pujustí tusa (Eclesiastés 9:9). Apajuí dekas tawai kuitamainai aishin aantsag nuwen, nuniakum egaktá wajuk shiijash pujumainaitme nunú (1 Corintios 10:24). Aishmag nuwajai akush amina anentaimin atsumam nunak dekamainai.

WAJÍ DUTIKMAINAITME:

• Takastá ashí tsawan ijuntsajum nuniakum mai antugdaikata.

• Anentaimsata jimajaitjum nui, imá amek anentaimtsuk.

APAJUÍ CHICHAME TAWAI: “Aents nuwan dutikachainjash tusa wakegas diyaushkam, anentainig tsanijimui” (Mateo 5:28). Aents nuwan anentaimas diiyauk tsanijinauwa numamtuk ekagmakujai betek wantinui tawai.

Jehuwá tawai juka imanai anentaibau kuitamainai tusa (Marcos 7:21). Jujú umiktasa kuitamainai ii diiyag duka (Mateo 5:29, 30). Betek pataetusam wemainaitme Job, tiuwai nuwa muntsugtanak diichu atajai tusa (Job 31:1). Tumainaitme diichu atajai tsanijinbau televicionnum jiina nunak tusam nuigtush papiinum. Pakijinawaipa tikich aents amina nuwem aishum achakuig.

WAJÍ DUTIKMAINAITME:

• Shiig dekamtikata tikich aidau ame ekagmat dakitam nunú nii ajantusam diiyau asam nuwem aishum aneamui.

• Nuwem aishumjai anentaimak waittsai kumpagmijai tsaniamua duka idaisata akastamkai.