JINTIAMU 9
Jehuwá emematta amina pataimijai
“Ememattajum Apajuí nayaimpin, nugkán, ashí najankauwa nunú.” (Iwainakbau 14:7)
Wajuk jintinjamae jujú papí, Apajuí chichame tuke au yaimpaktatui amina pataimijai. Jehuwá wakegawai shiig aneas pujustinme tusa. Aniau asamtai, nii dekatkau emematmak juna anagtamui, “dekatkauk Apajuí pegkegnum inapa nunuwá umigkatajum” (Mateo 6:33). Apajuí wakegawai mina kumpag atí tusa. Aniau asam tuké kakanmamjata niina kumpají atasam, jujú dutikakmek shiig aneasam pujustatme (Mateo 22:37, 38).
1 JEHUWÁ KUMPAJÍ SHIIG ATÁ
APAJUÍ CHICHAME TAWAI: “Dutikan wi atumin Apa atajai, tuja atum mina uchig, mina nawantug atajum, tiuwai Apu[Jehuwá] ashí senchigtina nunú” (2 Corintios 6:18). Apajuí wakegawai pegkeg kumpag ata nuna, tuké segamainaitme niijai ijutkau atasam. Dekas, Jehuwá ipapawai: “Tuke aujsagmeké atajum” (1 Tesalonicenses 5:17). Nii wakegawai utugchat ataish ashí ujatkati tusa puyatjupawai amina anentaimin anentaibauwa nuna (Filipenses 4:6). Amina pataimijai ijuntsam segataik, ditashkam unuimajagtatui Apajuí dekas pujawapi tusa amina pujutmin.
Apajuí segakum, nuigtushkam antugkata ¿wajuk? Apajuí chichame augkum nuigtush augtai papí aidau Apajuí pachis augmatu (Salmo 1:1, 2). Anentaimsata ame ausamu (Salmo 19:14). Apajuí antugkatatakuik imanai Jehuwá etsegtin aidau ijunaina nuwi wemainai tuké (Salmo 122:1-4).
Tikichia juka dutikmainai Jehuwá shiig kumpají atasa tikichish aents aidau ujamainai. Aan nagkaemasam dutikakmek senchi ijutkau atatme Apajuiyai (Mateo 28:19, 20).
WAJÍ DUTIKMAINAITME:
-
Tsawan sumamsam segatá Apajuí nuigtush Apajuí chichame ausata ashí tsawantai.
-
Yaintá pataim dekatkau Apajuí emematbaunum nuigtush wasugkabauwa nunuwá dutiktsuk.
2 IJUNTSAM SHIIG ANEASAM EMEMATTA PATAIMIJAI
APAJUÍ CHICHAME TAWAI: “Apajuijai ijutkau atajum, nuniagmin niishkam atumjai ijutkau atatui” (Santiago 4:8). Egaktá tsawan horajai ijunjam Apajuí ememattasam (Génesis 18:19). Nuigtushkam: ashí tsawantai aneaku atá Apajuí nuigtú jintintuata amina pataim Apajuí kumpají atí tusam. Apajuí chichame tawai: “Jintintajum [Jehuwá pachisam]. Dutikakjum atumi jeeminish, tuja jintá wekaekugmesh, kashi kanakjumesh, tsawaku nantakjumesh” (Deuteronomio 6:6, 7). Ame anentaibau Josuejai betek anentaibau amainai, nii tiuwai: “¡Wika mina pataag aidaujai Tuke pujuun umigkun ememattajai!” (Josué 24:15).
WAJÍ DUTIKMAINAITME:
-
Jujú dutikata programanum jintintuatasam makí makichik pataim ujaniamu utugchat diisam.
