Uchi yama akiina nuwig itaawai shiig aneasa pujamun tujash itaawai anentaimak waitiamun dukují apajijai. Uchi kuitamkatatabaunmak tsawanta sukagtawai nuigtush utugchatai. Shiig ayamchamunum utugchatan itaawai nuwenamunum. Nuniau asam mai kakanmamainaitme uchi kuitamkatasam nuigtush kuitamkata nuwenamujum. ¿Wajuk yaimpamainaita Apajuí chichame tawa dusha utugchat epegtanmash?

APAJUÍ CHICHAME TAWAI: “Aents anejatnuk waitiakush katsuntug pujuwai [...], imá niinunak anentaimtú pujuchu, kajeta pujugchau [...]” (1 Corintios 13:4, 5). Ame dukug yama wegau asam, dekas shiig anentaime kuitamkatasam uchijum yama akiina nunú. Aniau asa anentaimas tumainai puyatjuktsui tusa, duwi kajimatkipa amina aishum. Wait anentsam titá atsumajame tusam yainkata uchi kuitabaunum tusam.

“Aishmag aidautigmeshkam nuwemjaig shiig antugdaikajum pujustajum” (1 Pedro 3:7). Ame yama apag wegau asam, antumainaitme yamai kuashat tsawan uchin kuitamu asa, kakanchamin dekapeawai kuashat takat ajamu asa. Nuniak amejai kajektatui, tujash nuniakuishkam waamak kajegkaipa, “Waugká aimtsuk, nuigtú kajeká aimkatasagmesh wakeyigpa” (Santiago 1:19). Anentaimsata nii tuna atsumawa nunú (Santiago 3:13).

WAJÍ DUTIKMAINAITME:

• Ame apag akumek: Yaintá nuwem uchi kuitabaunum kashishkam. Imanikam takasaipa tsawan nuwem uchigmijai ijuntsa pujamu ajutjamti.

• Ame dukug akumek: Amina aishum yaigtajame uchin tujamkuig ayú titá. Shiig kuitamchakuig jiyakaipa, jintintuata aneenkai wajuk kuitamainaita nunú.

APAJUÍ CHICHAME TAWAI: “Makichik iyashik weawai” (Génesis 2:24). Amina nuwenamugmin uchi akuig kajimatkipa, amina nuwem aishumjai nunismek amainaitme “makichik iyash weawai”. Kakanmamjatajum senchi aneeniakjum nuniashmak megkaemainai anentak.

See kuashat titá aishum yaimpa nunú. Shiig aneasa chichamunak “kajekbaunak imijiawai” (Proverbios 15:1). Aishmag nuwem senchi aneajame nuigtú puyatjajame tusa tumainai, nuigtush see kuashat tumainai jegá takau asamtai (Proverbios 31:10, 28).

“Makichkish imá niinunak egatsuk, tikichin pegkegnum yaimaina nuna egamain ainawai” (1 Corintios 10:24). Kakanmamjata nuwem aishumjai shiig aneasti tusam nuniakum see titá. Tsawan sumamasam chichastá nuigtush antugkata. Amina nuwem aishumjai tsaniakmek ame wakegamuk anenmamsaipa. Nuigtush anentaimsata nii wakegamujishkam. Apajuí chichame tawai: “Aishmagkush nuwentin, nuwash aishintin aidauk iyashnum tsanitnumag pempeentunikiajag dakitdaimain ainatsui” (1 Corintios 7:3-5). Jujú pachisjum chichastajum dekas. Antugdaika aneeniamu itaawai shiig aneasa pujamun nuwem aishumjai.

WAJÍ DUTIKMAINAITME:

• Tsawan agkan pujustá amina nuwem aishumjai.

• Iwaintukta aneamujum wají pegkejuch suwakum.

APAJUÍ CHICHAME TAWAI: “Amek uchuch asamek Apajuí chichamega duka dekauwaitme [...]” (2 Timoteo 3:15). Anentaimsata wajuk jintiintuaktame amina uchijum. Kajimatkipa uchi unuimamainai kuashat, eke akiintsukeshkam, wakeemin pujusá dekawai amina chichamjumin nuniak buchitui shiig aneak nuniashkush wake besemag dekapeak, jintintuata wakeeti yama akiina nui nagkamsam, tujash chichaman antashkuishkam, wakejus ausattawai tsakajá.

Anentaimsam tumainaitme mina uchijuk piipichi eke Apajuin pachisnuk jintinmainchauwaitjai tusam. Jehuwá segatá niijai pujusam (Deuteronomio 6:7). Niijai wasugkamkum nuigtush chichastá Apajuí najanamu pachisam (Deuteronomio 4:9). Uchijum muumpakta nuwi dekattawai, ame aneamun Jehuwá nuna wainak niishkam nunisag Apajuí aneettawai.

WAJÍ DUTIKMAINAITME:

• Jehuwá segatá dekat uchijum jintintuatasam.

• Pata patakam Chicham imana nunú amina uchijum piipichia nuwig jintintuata wamkes unuimagti tusam.