JINTIAMU 5
Wajuk pujumainaita shiig iina patayijai
“Dekaskenum wait anenkagtin, shiig anentaimkau, kakagchauch, ememachu, utugchat akuish katsunjajum pujakjum.” (Colosenses 3:12)
Aents nuwenkug yamajam pataa wegawai. Tuké ajantus diistatui dukujin apajijai aneamui, aniau asamtai aents íman puyatjusam diimaina duka nuwem aishumjai. Amina pataim juna dakitaush atatui. Tujash Apajuí chichame yaimpaktatui agkan pujamunum pataimijai shiig aneasam pujustatme nuwenamugmin.
1 WAJUK ANTUGDAIKAM PUJUMAINAITME PATAIMIJAI
APAJUÍ CHICHAME TAWAI: “Amina apa dukujai eme anentsam diistá” (Efesios 6:2). Muun akumesh tuké amina apa dukujai ajantusa diistatme. Tujash aneaku atá amina nuwem aishumshakam tsawantan sumamas kuitamainai dukujin apajijai. “Anejatnuk [...] tikichdau diisá wakegak kajé wekaechauwai.” Aniau asamtai kajekaipa niina patayijai shiig pujuinakuig (1 Corintios 13:4; Gálatas 5:26).
WAJÍ DUTIKMAINAITME:
-
Junin weantu tiipa: “Amina pataim tuké augmatjawai tusam” “Amina duku tuké kajeawai wi jutikag juna diisá”.
-
Kakanmamjatajum antugdaikatasajum nuwem aishumjai.
2 AME ANENTAIMAM DUKA YAPAJIAWAIPA
APAJUÍ CHICHAME TAWAI: “Aishmag nuwenkug makichik iyashik weawai. Nuniau asa apajinak niina dukujijai ukuak imá niina nuwejaig pujumainai” (Génesis 2:24). Nuwenaum nuwi nagkamas, apa dukujai puyatjupawai atumin, aniashkush nii waketatui umintukti tuké tusa.
Chichastá aishumjai nuwemjaigkesh wajuk ajagtusam tumainaitme diitak atumnak inapamainchauwai nuwenaum nuwin (Proverbios 15:1). Kakagchauch, waamak kajechu batag atanum jujú yaimpaktatui shiig pujamunum amina pataimijai “Pempeentunisjumek aneenidau asajum katsunjajum dakanistajum” (Efesios 4:2).
WAJÍ DUTIKMAINAITME:
-
Pataa aidau tuké iina pujukjin diisá pujuinakuig amina nuwem aishumjaigkesh chichastá jiyanitsuk.
-
Chichastajum Wajuk epegmainaita nunú pachisam utugchat.
