Ashí atsumaji kuichik iina patayí atsumamu susatasa (Mateo 6:11). Apajuí chichame tawai, “Kuichkia juka yaijatui” (Eclesiastés 7:12, NM). Amainai utugchat kuichik pachisa chichastatabaunum iina patayijai, tujash tuké chichamainai nuwenamunum kuichik pachisa jiyanitsuk (Efesios 4:32). Chichastá mai pujusam wajuk kuichik gastaumainaitme nunú pachisam.

APAJUÍ CHICHAME TAWAI: “Atum ainajum anuiya, wajasá niimtai torre tutain yakí jiiká jegamkatatus wakegakug, ¿dekatkauk ekeemas anentaimainchaukait, ibau jegamainush kuichkish ajutuash, wajupa kuichkinak ashimkainja tusa?” (Lucas 14:28). Juka imanai betek anentaimsata Wajuk kuichik gastaumainaitme nunuí (Amós 3:3). Anentaimsata wají sumamainaitme nunuí wajupa gastaumainaitme nunú pachisam chichastá (Proverbios 31:16). Kuichik kuashat ajutjamkuish ashí wají sumakta tujamtsui. Kakanmamjata diwi wajasaig tusam, sumakta imá atsumamuk kuichik ajukjamu diisam (1 Tesalonicenses 4:11; Mateo 18:25).

WAJÍ DUTIKMAINAITME:

• Kuichik ampinkuig nantu abuetsaig chichastá amina nuwem aishumjai wajuk gastattame nunú.

• Kuichik jegashkuish chichastá eke tsawan jegatsaig Wajuk kuichik wajumchik gastaumainaitme nunú pachisam. Aniau asam sumamainchauwaitme yutai akik sujamu dekas ajamim ajaakmam yuwata.

APAJUÍ CHICHAME TAWAI: Anentaimsata ame wajukuitme nunú, “Imá Apajuí emtinig iwainmamkatasa nunitsuk, aents aidaush jutii shiig takainamun wainkatnume tabaunum” (2 Corintios 8:21). Titá amina nuwem aniashkumesh amina aishum wajupa ganame nunú nuigtú wajupa gastame kuichik.

Tuké chichastá amina nuwem aniashkumesh aishumjai eke gastautsuk kuichik (Proverbios 20:18). Chichastá kuichik pachisam nunú yaimpaktatui agkan pujutnum. Anentaimsata ame kuichik ganam duka imá aminuchui nuigtushkam uchigminui aantsag nuwemdauwai (1 Timoteo 5:8).

WAJÍ DUTIKMAINAITME:

• Chichastá nuwem aishumjai wajupa kuichik gastaumainitme makí makichkitijum.

• Eke utugchat jegatsaig kuichik pachisam chichastajum.