JINTIAMU 5
¿Apajuish nugkanash wajuku atí tusaya wakejawa?
1. ¿Wagka Apajuish najanauwaita nugkanash?
Jehuwá najanauwai nugkanak aents aidau pujustinme tusa. Adánkan Evajai najanauwa nunak nagkamchak aentsun, nayaimpinum pujustinme tichauwai. Apajuí yaunchuk najankauwai wakan nayaimpinum pujusagtinak (Job 38:4, 7). Jehuwá apusauwai nagkamchak aents najanamujin aja pegkejush umikbaunum Edén tutainum (Génesis 2:15-17). Nuigtushkam, niina susauwai, tuja nii uchijí wegantunashkam, shiig aneas pujumaina nuna nugkanum. Ausata Salmo 37:29; 115:16.
Aatus asamtai, aja pegkegchia duka yaijush aajakuí nugkanmak. Adán Evajai uchijinak yujak weetai nujai betek diipataik, diipataik aja pegkejak jamagtin aajakuí nugkanak (Génesis 1:28). Nugkak tuke atinai aentsú pujutai, duwi tuke tsaikbau achatnai. Ausata Salmo 104:5.
Distá jujú video: ¿Por qué creó Dios la Tierra?
2. ¿Tujash wagka nugkash pegkegchichuita yamaish?
Wagki Adán Evajai intimjukiajui Apajuin duwi jiikí Edén ajapeam asauwai. Nunú nunikbauwai, aja pegkejush nagkamnak aajakua duka megkaekauwai, makichkish nunak betek emamainchau ainawai. Nuaduí, Apajuí chichame tawai, nugkak susamui aents pegkegchau aidau takaina nunú tusa (1 Juan 5:19). Ausata Génesis 3:23, 24.
Untsu, ¿duwiká Jehuwá umimainchauwait aentsdau anentaimtusbaujiya nuna? Kame duwi, nigka ashí senchigtinai tuja iman asa makichkish megkaekashtinai nii dutikatjai tusa anentaimsamunak (Isaías 45:18). Atakea duwik, Apajuí nagkamchak anentaimsamua aatus aentsuk pujuagtinai. Ausata Salmo 37:11, 34.
3. ¿Wajuk iwagnagtatua nugka pegkejash?
Jisus, Apajuí inamtain Apu emamua nu, iwajatnai nugkanak pegkejush. Ijuntuja wakan aina nujai, ijinaitnai ashí Apajuí shiwajinak maaniamu Armagedonnum, nuigtushkam epentinai Iwanchin 1.000 mijan. Apajuí aentsji aidauk nunú ijinbaunmak iwaaku nagkaemakiagtinai, nuigtush Jisus dekapatuatnai tuja kuitamkatnai, inagnamunmag shiig aneas pujut nagkanchaunum nugka pegkegchinum pujusagtinai. Ausata Iwainakbau 20:1-3; 21:3, 4.
4. ¿Wajutí nagkankattawa waitiamush?
¿Wajutí Apajuísh emegkaktatua pegkegchauwa nunash? Jisus juna pachis tiuwai “wantinkagtin” aidaun wajutí atatua nuna dekamtikatatus. Yamai pujuta duka kuashat aents aidaun uwakeawai, nu iwainawai dekas “nagkanbau jegattak waja [nuna]”. Ausata Mateo 24:3, 7-14, 21, 22.
Nunú 1.000 mijan Jisus inamtatanuig nugkanum nayaimpinum pujus, weetinai emegkaja waitiamu aidaun (Isaías 9:6, 7; 11:9). Nuigtushkam Apu, tuja sumo sacerdote, asa uyumaktinai esakagtatus tudau aidaun Apajuí aneena nudaun. Aatus asamtai, Jisusa daajin Apajuí emegkaktinai jatan muunpamun jaamunashkam. Ausata Isaías 33:24; Iwainakbau 21:4.
5. ¿Ya aidau pujusagtatua nugka pegkegnumash?
Jega ijuntaya nui dekaattame aents Apajuí aneedau tuja wakejus umijuidau
Aents umigkau Apajuin pujusagtatui nugka pegkegnumag. (1 Juan 2:17). Jisus ishiakui saataiji aidaun egaktajum aents shiig anentaimkau tuja jintintuatajum ditash Apajuí wait anenjamu atinme tusa. Yamaya juwi Jehuwá umiawai shiig kuashat aents pujustinme nugka pegkegnum tusa (Isaías 55:6). Nu aidauk ijunainawai jega ijuntai Jehuwá Etsegtin aidau emematuina ijunas nui Apajuin —ashí patayijai emematuinawai Apajuin— nuig unuimainawai pegkeg nuwentin atan tuja apag atanashkam aatus nuniamui yayawai pujutnum yamajam chichama duka. Ausata Miqueas 4:1-4.
