Abraham wegantu aents aidaun Apajuí ijumjauwai dutika susauwai chicham umiktinun. Nunú ijunjau aents aina nunak, adaikauwai Israel dita aidau kuitamkatin aajakú ainawai dekas emematbauwa nuna tuja Apajuí chichamenashkam (Éxodo 19:5, 6). Aatus umikbau asamtai, aents ashí nugkanmayash Apajuijai ijutkau amain asamtai. Ausata Génesis 22:18.

Apajuí etegkauwai Israel aents aidaunak mina pachitus etsegtujin atinme tusa. Jujú yaakat yaunchuk aajakua nunú pachisa augmatbauk iwainawai chicham umiamunum dita yaigbau ajakbauwa nuna (Deuteronomio 4:6). Aatus aajakú asamtai, ditai tikich aidaushkam yupichu dekamain aajakuí Apajuí dekaskea nunak. Ausata Isaías 43:10,12.

Yaakat etegkamu Israel aents aajakua duka megkaekauwai Apajuí anenkajinak, Jehuwá yapajiawai tikichin aents Jisukristu nemajin aidaun (Mateo 21:43; 23:37, 38). Aatus asamtai yamaik, dekas Jisukristu nemajuina nunuwai Jehuwan umijuinak etsegtuina duka niina pachisag tuja duka Israel aentsuk ainatsui. Ausata Takasbau 15:14, 17.

Jisus ijumjauwai niina saataiji aidaun etsegkatnume nuniak mina nemagtin ematnume ashí nugkanmayan tusa (Mateo 10:7, 11; 24:14; 28:19, 20). Yamai, inagnamu tsawantai pujag jujui, nunú etsegbauk imá shiig uminui. Jujú tsawanta juwi Jehuwá ijumui shiig kuashat aentsun ashí nugkanmayan Apajuí nemagbau dekaskea nuwi ijutkau atinme tusa (Iwainakbau 7:9, 10). Aatus ijunjau asag, dekas Jisukristu nemajuina duka ichichdayinawai pempeentunikiag. Tuja Ijunkush makichik jintiamunak ashí betek juinawai Apajuí chichamen. Ausata Hebreos 10:24, 25.

Jujú ijunja takaamuk nagkamnawai initaik mijan 1870 tin. Wajumak ijunjau Apajuí chichamen aujus weenak dekau ainawai dekaskea nunú kuashat tsawan kajimatkimua nuna. Nuigtush dekawajui Jisus ijumjauwa nuna etsegkatnume tusa. Aatus asamtai nagkamawajui ashí nugkanum etsegbaun Apajuí inamtai pachisag. 1931 tin jujú mijantin adaimakaju ainawai Apajuí chichamenian jukiag, Jehuwá etsegtin tawa nunak. Ausata Takasbau 1:8; 2:1, 4; 5:42.

Jisusa saataiji batsata nunú tsawantaik, ashí nugkanmaya Jisusa nemajin aidaunak yaijakajui takata diin inamin aina nunú, tuja Jisusnak duka Apu tujakajui (Takasbau 16:4, 5). Nujai betek yamai, Jehuwá etsegtin aidaunashkam yayawai takata diin inamin duka ijunjauwai Jisukristu nemajin anentai jukiu aidau tuja nunú aidau wekaetus diinawai ashí ijunjau muunta nuna kanawe yaig aidau ashí nugkanum awa nunashkam. Nuanuig agag jiinawai makí makichik chichamnum dutikak dapampawai ashí nugkanum 600 chichamai. Apajuí chichamenian nuigtush yayawai ijunjau takata diin anentai jukiaju aina duka 100.000 ijunjauwa nuna, tuja nuwig awai wekagas diin adaikamu unuimaju aneamui uwig Apajuinu kuitamtan. Ausata 1 Pedro 5:2, 3.

Jehuwá etsegtin aidauk shiig ijunjau ainawai yamajam chicham etsegku Jisusa nemajin ematnumag. Jisusa saataiji aajakujai betek, etsejuinawai jega jeganum (Takasbau 20:20). Nuigtushkam jintintuinawai Apajuí chichamen ya wakejus aneamui dekaata tuinawa nunú aidaun. Nuigtush imá ijutkamunmagkek ijutkau ainatsui; dekas pataa weenawai yatsut umaa akush aneniamui duwi apag adejatna nunú kuitamui ditanak (2 Tesalonicenses 1:3). Apajuí aentsji ijunjau asag imá senchi kakanmamainawai niina shiig awakatatus tuja nuniak yainawai niijai ijutkamu aidaunashkam, aatus nuniinak ashí pataa wegag shiig aneas pujuinawai nugkanmak. Ausata Salmo 33:12; Takasbau 20:35.