Apajuí ashí aents aina nuna ipawai nuniak minak segattajum nuniakum ijutkau atajum tusa (Salmo 65:2). Tujash nunak takug tatsui, ashí Apajuí segaji tuina nuna antugjai tusag. Apajuí chichame tawai aishmag nuwen puyatjus antujus diyaaku pujachiatak segamak “antugtamkachagtatui” tusa (1 Pedro 3:7). Kuashta imania Israel aents aidau pegkegchau takajakú ainawai, aatus nunidau asagmatai Apajuik antuju jakchauwai ditanak. Tujash, ya tudau pegkegchau takasú ayatkush atakek junichu atajai tawa nunak nigka antujui. Ausata Isaías 1:15; 55:7.

Distá jujú video: ¿Escucha Dios todas las oraciones?

Segamua duka ii emematbauwa nunuwai, nuaduí segamainaitji imá nigki Jehuwá (Mateo 4:10; 6:9). Nuigtush iik tudau pegkegchau ainaji, nunin asa Jisusa daajin segamainaitji iina tudaujin jakau asamtai (Juan 14:6). Jehuwá dakitawai agaja unuimatja duke pataká segamunak, imá pegkeg iina anentainia amainai segamuk. Ausata Mateo 6:7; Filipenses 4:6, 7.

Iina najapauwa duka antawai takamtak anentainum segamashkam (1 Samuel 1:12, 13). Nii ipapawai ashí tsawantai segattá tusa, duwi segamainai tsawaku kintamkuishkam, yujumak yuwakuish utugchat igkuamunmashkam. Ausata Salmo 37:5; Mateo 15:36.

Pujuinaji ijunja aents dekaskeapi tuinatsu nu aidaujai, nunú aidauk dushikinawai nii anagtamak agkan nugkanak ematjai tibaunash. Nuigtush nunin aina duka emegkaumainai Apajuijai ijutkau atasa kakanmabaunashkam (2 Timoteo  3:1, 4; 2 Pedro 3:3, 13). Aatus asamtai atsumnawai ijunbauwa duka tikich Jisukristu nemajin aidaujaish ichichdaijatasa. Ditashkam aantsag atsumaidau asamtai ichichtugtinme tusa. Ausata Hebreos 10:24, 25.

Ijuntsaiki akuik aents Apajuí aneena nujai iishkam tikiju dekaaptatji Apajuijai nuigtush. Jehuwá etsegtin aidaujai ijunbauk yaijatui tikich dekaskeapi tibauji aina nu diisá unuimatnum. Ausata Romanos 1:11, 12.

Duka nunimainaitme Apajuí chichamen nii pachisa ame unuimagbauwa nunú tuké anentaimtusmeke akum. Nuigtush anentaimsata takasbaujin, chichagtabaunmashkam antsamek anagtabaunmashkam. Aatus asamtai anentaimtusa segamujai yaimpaktatui shiig dekaatatabaunum Apajuí yachají anenkajijai. Ausata Josué 1:8; Salmo 1:1-3.

Imá nigki dekaskeapi Apajuí taku ijutkau atatji niijaig. Tujash dekaskeapi tabauk makichik iwakui nunin asa: atsumawai shiig ayujamu atatus tsawantai, nunin asamtai juka jumainai shiig anentaimsa niina chichame augbaunum. Ausata Mateo 4:4; Hebreos 11:1, 6.

Jehuwak puyatjawai ya niina aneawa nu aidaun. Nigka ayamjutpamainai kuashat utugchat dekaskeapi tabaunum igkuamunmashkam aantsag pujut nagkanchau dakamunmashkam (Salmo 91:1, 2, 7-10). Nuigtush yaimpawai jamamtuchu pujaku shiig dakujusa pujata nuna, tuja jintinjamui tuwaita dekas shiig aneasa pujutash nunashkam. Ausata Salmo 73:27, 28; Santiago 4:4, 8.