Apajuí wakegawai aents aidau shiig aneas pujustinme tusa duwi. Najanauwai nugkan tikich nui ayaa nunashkam aents aneamui. Waamak emegkaktatui waitiamu aina nunak wagki aents ashí nugkanmaya shiig aneas atakea duwi pujustinme tusa. Ausata Salmo 37:37.

Makichik apukesh emegkaumain dekapenatsui intibaun. Jatan aantsag jaamunashkam. Tujash awai pegkeg yamajam, dekas, pegkeg chicham ujaniamu: machik asag Apajuí emegkaktatui ashí apu aents aidaunak tuja nuniak nii Apu emamun apusatnai. Niina aentsji aidauk shiig aneas agkan jamamtuchu pujusagtinai. Ausata Isaías 33:24; Daniel 2:44; Iwainakbau 21:4.

Waitiamu ayatak wee tusa. Apajuí ijinatnai ashí nugkanmayan aents pegkegchaun (Salmo 37:9). ¿Wajutí dutikattawa nunash? Nuna, Apajuí chichame tiuwai yamai pujamunum kuashat waitiamu aentsun suwa nuna. Jujú nuniktinai tibau nagkaema duka iwainawai waamak Apajuí dutikatta nuna. Ausata 2 Timoteo 3:1-5.

Apajuí dekamainai niina chichame augku, duka makichik muun uchijin aneen papín agatug awetumaina imatikas umikbauwai. Nunin asa tujamui dekas shiig aneasa pujustatakuish yamai tuja pujut nagkanchauwanu jukitasaish atakea duwish wajukmainaita nuna. Duka dekaske ashí shiijak aneaschagtatui ame Apajuí chichame unuimataik, amek nunú dakitmitkajati tusamek tiipa. Atak tuke atina duka Apajuí wajuk ame dekaattame dutikam, betek nii wakeja nunú dutiksamek takakum imanik waitkagmainakuish antugtsuk wegakum jukitnaitme. Ausata Mateo 5:10-12; Iwainakbau 14:6, 7.