Jisusak Jehuwá nagkamchak najanamu aajakuí. Eke aentsmaga nugkanum akiintsukek nigka nayaimpinmaya wakan aajakuí. Nuaduí nigka aentsjaig betekchau aajakuí (Juan 8:23). Nayaimpinmag yaigkuí Apajuin ashí wají aidau najanbaunum. Apajuí chichame adaiwai nuna uchín “makichkiuch” nigki, Apajuí dekatkau tikich atsamunum imá niinak najanauwai tusa. Nuigtushkam tawai “chicham,” wagki Apají chichamen etsegtin asamtai (Juan 1:14). Ausata Proverbios 8:22, 23, 30; Colosenses 1:15, 16.

Apajuí niina uchijin awemauwai ju nugkanum. Nuaduí pujutin yapagtua María wakeen apusauwai, duka makichik muntsujut aentsú antiakchau judía aajakuí. Aatus asamtai Jisusa apajig aentsuk ajakchauwai (Lucas 1:30-35). Nigka miniuwai nugkanmak kampatun anentaiyai: 1) jintinjamatatus dekaskea nuna Apajuinun, 2) jintinjamatatus nii takasbaujin pegkegma nunú juwakmatai nuna aintus betek dakumkatnume utugchatnumash tusa, 3) sujukui niina pujutí pegkegma nuna “uwemtijamjatatus”. Ausata Mateo 20:28.

Uwemtikbauwa duka akikmatka akike aentsú pujutí uwemtikta nuuwai (Éxodo 21:29, 30, NM). Jaamu muumpamukesh ajiti tusag aentsnak Apajuik anentaimtu jakchauwai. Duka dekanui wagki Jehuwá ujakuí Adankan ame tunamakmek, —nunak taku tawai, ame umiashkumek— jakattame tusa. Nuaduí, tunamagchauwaitkuig, tuke jachau amainaitji (Génesis 2:16, 17; 5:5). Apajuí chichame tawai, jaamuk “nagkamdauwai”  ashí nugkanum Adánkan tudaujin. Tikich takuik, Adán inagkeatkiuwai nii weantun tudaujin, aatus nuniamui sujukui jaamunum. Duwi atsumnawai uwemtijamu atasa. Ausata Romanos 5:12; 6:23.

Yamai ¿ya nunash akikmatjamkash uwemtijamainaita jatanmash? Jaaku, umiaji suimak juaku jakati tujabauwa duka, tujash iik pegkegchauwaitag duwi, makichkish tikichi tudaujin akikmatmaitsui. Ausata Mateo 16:26.

Adanjai betekchau aajakuí, Jisusak pegkejam tuja makichkish tudaunak takaschauwai. Nunin asa nigka jakachui niina tudaujinig, imá pegkeg tikichin akikmatkatatus jakauwai. Apajuí awemauwai Uchijin mantamnati tusa aents aidau senchi aneamunum. Jisuschakam iwainmamkauwai anempamujin umijak Apajin tuja pujutin sujak agkanmitkagmatatus tudaunum jaamunmashkam. Ausata Juan 3:16; Romanos 5:18, 19.

Distá jujú video: ¿Por qué murió Jesús?

Ju nugkajui pujusa Jisus, etsagajui jau aidaun aantsag jakaunashkam inankiuwai, nuigtush yaigkuí waituidaunashkam aatus nuniak iwainmamkauwai atakea duwi dutikatta nuna imagnis Apajuin umijuidaun (Mateo 15:30, 31; Juan 5:28). Jisus jakamtaish Apajuí inankiuwai ataktú pujutí susa tujash wakan ema nayaimpinmaya (1 Pedro 3:18). Nuigtú Jisus dakasui Apajin untsujin ekemas Apu nugkanum adaitukti tusa (Hebreos 10:12, 13). Yamaik, Jisusak inamui nayaimpinum, nuigtú niina nemajin aidau etsejuinawai nunú yamajam chichaman ashí nugkanum. Ausata Daniel 7:13, 14; Mateo 24:14.

Shiig waamak, nunú Apu senchigtin ijinattawai aents pegkegchau aidaunak waitiamunashkam emegkaktatui. Ashí Jisusan dekaskeapita tusa umijuina nunú pujusagtinai shiig aneas nugkanum, duka pegkejush iwajamu atinai. Ausata Salmo 37:9-11.