Ma yezuma pavʋlɔ be mɔɔ ileli yɩ ankɩlɩ yɩ nnwʋanlɩ nɩ nwʋ dɩyɛ. Nɩ pavʋlɔ nɩ yɩ ankɩlɩ yɛ lɛ ɔzʋ̃mavʋlɔ Pɔɔlʋ. Yézi pavʋlɔ nɩ yi dima dɩyɛ, naasʋ̃ yezi kɛɛ ɩyɛlɩ dɩyɛ be mɔɔ ide akɛnɣazɩzɩbɛ baaba. Asʋ̃ ɛkɛbɛyɩ kɛɛ ɔkɔnwʋ mɔɔ ɩyɛlɩ yɩ nɩ a?—

Nɩ Pɔɔlʋ ɩla fiyiadɩ wɔ Gyelusalamɩ. Nɩ bɛhyɩ yɩ iluwakɛɛ nɩ ɩkãã odwokɔba mɔɔ ɩfalɩ Gyisɛsɩ yɩ nwʋ nɩ ti. Nɩ mmenyia tanɩmaa be bekyi Pɔɔlʋ, meti bɛvalɩ ɩnwʋ adwɩnɩ tanɩ. Bɛhanlɩ kɛɛ: ‘Bɛma yɛhã yehile sogyia ebani nɩ kɛɛ, ɩma yɩ azogyiamaa yɩ nɩ bɛva Pɔɔlʋ bɛɣɩla kɔɔtʋ. Na sa yɛba yɛtɛ ɔhʋanɩ yɩ nwʋ, na sɛ Pɔɔlʋ ɩbadua numɔ a, nɩ yehũ yi!’

Pɔɔlʋ yɩ anlima baalɛ yɩ ɣa benyia nɩ, ɩdɩlɩ ɔzɔ odwokɔ yɩ nɩ. Mɩnla yɛ ɩkɛyɛ a? Ɩhɔlɩ fiyiadɩ ɛkɛnɩ, na ɩhɔ ɩhanlɩ ihileli Pɔɔlʋ. Ɛkɛnɩ la, Pɔɔlʋ ɩhanlɩ ihileli yɩ kɛɛ ɩhɔ ɩhã ɔzɔ odwokɔ tanɩ yɩ nɩ ihile sogyia ebani yɩ nɩ. Ekila a, nɩ ɩyɛ mɛlɛkɛ kɛɛ Pɔɔlʋ ɩwʋa nɩ ɩkɔhɔ na ɩ nɩɩ sogyia ebani nɩ adɩndɛ a?— Anhã, iluwakɛɛ nɩ sogyia ebani yɩ nɩ ɩdɩ enii titili. Naasʋ̃, nɩ Pɔɔlʋ ɩwʋa nɩ ɩwɔ akɛnɣazɩzɩbɛ na ɩ nɩɩ sogyia ebani yɩ nɩ dɩndɛnlɩ.

Nɩ sogyia ebani nɩ izi mɔɔ ɩsɛ kɛɛ ɩyɛ. Ɩyɩlɩ azogyiamaa kɛyɛ 500 kɛɛ bɔwɔ Pɔɔlʋ ɩnwʋ banɩ! Ɩhanlɩ ihileli bɛ kɛɛ, bɛva Pɔɔlʋ bɔhɔ Sizeliyia ohunluma nɩ la. Asʋ̃ Pɔɔlʋ inyianlɩ nnwʋanlɩ a?— Nyɛ, mmenyia tanɩmaa yɩ nɩ bɛ sa ákã yɩ! Bɛ adwɩnɩ tanɩ yɩ nɩ ɩáyɛ egyima.

Mɩnla yɛ ɔkɔhʋla okozuma wɔ odwokɔ eyi nu a?— Wʋzawʋ sʋ̃ ɔkɔhʋla ekenyia akɛnɣazɩzɩbɛ dɩkɛ Pɔɔlʋ ɩwʋa nɩ la. Ɩsɛ kɛɛ yenyia akɛnɣazɩzɩbɛ mmɩlɩ mɔɔ yɛkã Gyehova ɩnwʋ odwokɔ yekile mmenii mvʋlɔ nɩ. Asʋ̃ ekenyia akɛnɣazɩzɩbɛ na wʋahɔ ɔzʋlɔ wʋahã Gyehova ɩnwʋ odwokɔ a?— Sɛ ɛyɛ ɔzɔ a, ebiye a sa ede abiye nnwʋanlɩ.