Bayɩbʋlʋ ɩkã Kilisinyianɩ mmenyia okuwu anwɩ̃ be mɔɔ bekila asafʋ yɩ egyimalilɛ zʋ—“asafʋ yɩ nu mbanimbani nɩɩ azʋ̃mɩvʋlɔ.” (Fɩlɩpɩmaa 1:1, NW) Mbɔmɩ sʋ̃maa nɩ, asafʋ nu mbanimbani nɩɩ azʋ̃mɩvʋlɔ wɔ asafʋ bela nu. Mɩnla egyima yɛɛ asafʋ nu azʋ̃mɩvʋlɔ bɛyɛ mɔɔ yenyia ɔzʋlɔ mfasʋ a?

Bɔbʋwa asafʋ nu mbanimbani. Asafʋ nu azʋ̃mɩvʋlɔ nɩ bɛdɩ mmenii mɔɔ bɛnɩ Gyehova wɔ abusunwawɔlɛ mɔɔ numɔ ɩyɛ ɛzɩzɩbɛ, bɛdɩ mmenii mɔɔ bɔkʋla bɛfa bɔnwʋ betiã bɔzʋ, na bɛadwɩnɩ nu la ɛkɛnɩ, bonu be bɛdɩ mbavʋlɔ na ebiyemmɔ sʋ̃ bɛanyɩ ɩdɩ. Bedi egyima mɔɔ ɔnwʋmɔ ihyinyia mɔɔ mbɔmɩ sʋ̃maa nɩ ide anwʋzɩzɩbɛ wɔ asafʋ yɩ nu nɩɩ Bulombunli Ayiyialɩyɛ Aliyia nɩ nwʋ. Eyi ɩma asafʋ nu mbanimbani bɛfa bɛanyɩ bekyina ehilehilelɛ nɩɩ egyelalɛ zʋ.

Bɔbʋwa asafʋ yɩ. Asafʋ nu azʋ̃mɩvʋlɔ be bɛ egyima yɛ lɛ kɛɛ, bekele ngyɛvʋlɔ mɔɔ bɛba ayiyialɩyɛ bela tʋ nɩ. Ebiyemmɔ sʋ̃ bekila mahyini mɔɔ bɛtɩndɛlɩ numɔ na bɛfa bɔbɔ ndwomi nɩ ɩzʋ, bekila awuuku yɩ hyɛlɛ zʋ, bekila asafʋ yɩ ngʋndawulɛ zʋ, na bɛfa azɩlɛ sini yɩ nɩ hyɛlɛ mɔɔ bɛkɛhyɩhyɛ bɛkɛma mmeliyema yɩ nɩ sʋ̃ bowula ebiyemmɔ sʋ̃ bɛ sa. Akʋ̃ sʋ̃, bɔbʋwa wɔ Bulombunli Ayiyialɩyɛ Aliyia yɩ eziyeziyelɛ nwʋ. Asafʋ nu mbanimbani bɔkʋla bɛma bɔbʋwa mmeliyema mɔɔ bɛ alʋbɔ ɩhɔ anyunumi nɩ. Egyimalilɛ bela mɔɔ bɛkɛva bokowula asafʋ nu azʋ̃mɩvʋlɔ bɛ sa nɩ, bɔzʋ̃ bɛ ahʋnlɩnɩ nu bɛyɛ yɩ bʋwɔ na eyi ɩma asafʋ yɩ bɛ anyɩ ɩsɔ bɛ egyima ɛzɩzɩbɛ nɩ nɩɩ bɛ ɛpɛ mɔɔ bɔwɔ kɛɛ bɛkɛyɛ egyima ɛzɩzɩbɛ nɩ.—1 Timoti 3:13.

Bɛyɛ ehilalɛzʋdɩyɛ baaba kɛɛ Kɩlɩsinyianɩ mmenyia. Bɛyɩ asafʋ nu azʋ̃mɩvʋlɔ iluwa Kilisinyianɩ subanɩ baaba mɔɔ bɛda yɩ ali nɩ zʋ. Bɛhyɛ mmeliyema ɛzɩzɩbɛ mmɩlɩ mɔɔ bɛyɛ egyimalilɛ wɔ ayiyialɩyɛ yɩ tʋ nɩ. Iluwa ehilalɛzʋdɩyɛ mɔɔ bɛyɛ bɛma yɛ wɔ dasɩlɛlilɛ egyima yɩ nu nɩ ti, ɩma ɩbʋwa yɛ ma yɛyɛ sʋ̃maa. Iluwakɛɛ bɛnɩ asafʋ nu mbanimbani bɛyɛ ɔkʋ̃ nɩ ti, bɛhyɛ anyɩnlɩlelɛ nɩɩ ɔkʋ̃yɛlɛ nwʋ ɛzɩzɩbɛ. (Ɛfɩsɛsɩmaa 4:16) Mmɩlɩ ɩkɔ ɔzʋlɔ nɩ, bɛzabɛ sʋ̃ bɛba bɛfata kɛɛ bɔsʋ̃mɩ kɛɛ asafʋ nu mbanimbani.

• Aninyiammɔ yɛ lɛ Asafʋ nu azʋ̃mɩvʋlɔ a?

• Mɩnla ɔhʋanɩ zʋ yɛɛ azʋ̃mɩvʋlɔ bɔbʋwa ma asafʋ yɩ nɩ ɩyɛ egyima bʋwɔ a?