Gyisɛsɩ ɩhanlɩ ihileli yɩ adʋwavʋlɔ nɩ mɔɔ kɛɛ: “Mʋnlʋmmɔ sʋ̃ bɛmá bɛ hanyɩɩ ɩda wɔ mmenii anyunu, na bɛanwʋ mʋnlʋmmɔ be egyima baaba na bɛahyɛ bɛ Zɩ mɔɔ ɩwɔ sʋlɔ nɩ animinyiamɩ.” (Matiyu 5:16) Iluwa eyi ti, yɛ lɛ nnɛ adwulusʋ nninyeni yedi egyima bʋwɔ paa mɔɔ Intanɛtɩ ɩkɩnla ɔnwʋmɔ. Yɛ Wɛbsayɩtɩ yɩzayɩ, jw.org, ɩdɩ dɩka mɔɔ ɔkɔhʋla ekenyia ndwokɔ mɔ ɩfalɩ Gyehova Dasɩvʋlɔmaa ye dedi nɩɩ yɛ egyimalilɛ azʋlɔtʋ nwʋ. Mɩnla yɛɛ ɔkɔnwʋ yɩ wɔ ɛkɛnɩ a?

Bayɩbʋlʋ yɩ munwalɩyɛ ma ndwokɔ mɔɔ bɛtaa bebizia. Ɔkɔhʋla ekenyia munwalɩyɛ ɛkɛma ndwokɔɣizialɛ be mɔɔ ɔnwʋmɔ ihyinyia mɔɔ mmenii bɛtaa bebizia. Bɛma ɔzɔ ndwokɔɣizialɛ yɩ nu ahyia nwʋ munwalɩyɛ wɔ Asʋ̃ Ɛkɛbɛyɩ Kɛɛ Ɔkɔnwʋ Nɔhʋanlɛ Nɩ a? kɛlɛta ɛɣalɛ yɩ nu wɔ yɛ wɛbsayɩtɩ yɩ zʋ wɔ ɛdɩndɛlɛ mɔɔ ɩbʋ 400 nu. Ɔkɔnwʋ New World Translation Bayɩbʋlʋ yɩ nɩ wɔ ɛdɩndɛlɛ mɔɔ ɩbʋ 100 nu nɩɩ awuuku mɔɔ yɛfa yesuma Bayɩbʋlʋ, mɔɔ Odwokɔba Mɔɔ Ɩzʋ Nyamɩnlɩ Yɩ Ɛkɛnɩ! blohyʋɔ yɩ, nɩɩ magezini mvʋlɔ azʋlɔtʋ mɔɔ igyĩ Bayɩbʋlʋ yɩ zʋ mɔɔ ɩɣa yɩ nɩ kɩnla ɔnwʋmɔ. Sa ɔkʋla ɛkɩnga awuuku eyi nu sʋ̃maa anzɛnyɩɩ etiye anzɛnyɩɩ ɔtwɩ̃ mɔɔ bɔbɔ betiye, PDF, anzɛnyɩɩ EPUB yɩ be wɔ wɛbsayɩtɩ yɩ zʋ. Sa ɔkʋla po etindimi nwukolɛ yɩ nɩ be na wʋava wʋahilehile abiye mɔɔ ɩanyɩ ideli Bayɩbʋlʋ yɩ nwʋ wɔ yɩzayɩ yɩ ɛdɩndɛlɛ nu! Awuuku nɩɩ nninyeni mvʋlɔ mɔɔ bɛyɛ yɩ vidiyo wɔ omumunlo ɛdɩndɛlɛ azʋlɔtʋ nu wɔ ɛkɛnɩ. Sa ɔkʋla ɔtwɩ̃ Bayɩbʋlʋ ɛɣɩngalɛ mɔɔ bɛyɛɛ yɩ dɩlama, dɩlama azʋlɔtʋ mɔɔ igyĩ Bayɩbʋlʋ yɩ zʋ, nɩɩ ndwomi ngɩnlɩma mɔɔ ɔkɔhʋla ekediye wɔ mmɩlɩ mɔɔ ede wʋ mʋnlɩ nɩ.

Nɔhʋanlɛ ndwokɔ mɔɔ ɩfalɩ Gyehova Dasɩvʋlɔmaa nwʋ. Nninyeni be sʋ̃ mɔɔ ɔkɔnwʋ yɩ wɔ Wɛbsayɩtɩ yɩ zʋ yɛ lɛ amanɩyɛwɔlɛ mvʋlɔ mɔɔ ɩɣa nɩɩ vidiyo mɔɔ ɩfalɩ yɛ oyuwadɩ munwatĩĩ egyimalilɛ nwʋ, ndwokɔ mɔɔ Gyehova Dasɩvʋlɔmaa beyiyia anzɛnyɩɩ ɩtʋdʋ bɛ, nɩɩ kezimɔ yɛbɔ mmɔdɩnɩ kɛɛ yɛkɔwʋwa mmenii mɔɔ asianɩ ɩdʋ bɛ nɩ. Sa ɔnwʋ ayiyialɩyɛ nɣezile mɔɔ yɛbɛayɛ nɩɩ yɛ egyimayɛlɛ nnɩka bɛ addɩlɛsɩ.

Iluwa eyi zʋ ti, yɛma yɛ nɔhʋanlɛ kɩnlanɩyɛ yɩ nɩ ɩyɛ hanyɩɩ ma ɩkɔɔ oyuwadɩ yɩ dɩka po mɔɔ ɩwɔ aɣinzi aɣinzi. Mmenii mɔɔ bɔwɔ azɩlɛ yɩ dɩka bela benyia ɔzʋlɔ mfasʋ̃, mɔɔ Antarctica manlɩ sʋ̃ ɩkɩnla ɔnwʋmɔ. Yɛ bɔ mpayɩ kɛɛ “Niibenyia [“Gyehova,” NW] Odwokɔ nɩ ɩkɛdɛlɛ ndɛndɛ” ɩkɔhɔ oyuwadɩ dɩka bela, na ɩahyɛ Nyamɩnlɩ animinyiamɩ.—2 Tɛsalonikamaa 3:1.

• Mɩnla ɔhʋanɩ zʋ yɛɛ jw.org ɩbʋwaa mmenii sʋ̃maa ma bokozuma Bayɩbʋlʋ nu nɔhʋanlɛ odwokɔ a?

• Mɩnla yɛɛ ɛpɛyɩ kɛɛ ɛpɩbɛyɩ wɔ yɛ Wɛbsayɩtɩ yɩ zʋ a?