OZUMALƐDƖYƐ 10
Mɩnla Mfasʋ Yɛ Ekenyia Wɔ Gyehova Dasɩvʋlɔmaa Bɛ Ayiyialɩyɛ Tʋ a?
Asʋ̃ bɔdʋ salɛ bɔvʋlɔ wʋ kɛɛ ɔhɔ́ Gyehova Dasɩvʋlɔmaa bɛ ayiyialɩyɛ tʋ kyɩ̃ a? Sɛ ɔlɔ́kɔlɩ ɛkɛnɩ kyɩ̃ a, ebiye a eɣile mɔɔ ili bɔmʋnlɩ nɩ wu kunlu kodu ɛgyɩkɩ̃ɩ̃. Ebiye a ekeɣizia kɛɛ: ‘Mɩnla yɛ ɩkɔlɩ ɔzʋlɔ wɔ ɔzɔ ayiyialɩyɛ nɩ tʋ a? Mɩnla ti yɛ nwʋmɔ ihyinyia a? Mɩnla ti yɛ ɩsɛ kɛɛ mʋkɔ ebiye a?’ Wɔ dɩyɛzumanlɛ eyi nu nɩ, okozuma kɛɛ sɛ ɛ nɩɩ mmenii mvʋlɔ bɔ numɔ sʋ̃mɩ a, ɩkɔwʋwa wʋ na ɩkɔhwɩ̃ wʋ ikeɣike Nyamɩnlɩ sʋ̃.
1. Mɩnla ti yɛ Gyehova Dasɩvʋlɔmaa beyiyia numɔ bɔsʋ̃mɩ a?
Kila kezimɔ Bayɩbʋlʋ ɛhɛlɛlɛvʋlɔ be ɩhanlɩ sianti paa ti mɔɔ yeyia numɔ nɩ nwʋ odwokɔ: “Asafʋ kezile yi nu, yɛ mɩkɛyɩ Gyehova ayɛlɛ a.” (Ndwomi 26:12) Ɔzɔ sʋ̃ la yɛ nnɛ, sɛ Gyehova Dasɩvʋlɔmaa beyiyia numɔ a bɛ anyɩ ide baaba. Wɔ oyuwadɩ dɩka bela nɩ beyiyia numɔ dapɛnɩ bela bɔsʋ̃mɩ Nyamɩnlɩ, bɔtʋ ndwomi, na bɔbɔ mpayɩ. Akʋ̃ sʋ̃ ɔlʋbɔ bela, bɔkɔ ayiyialɩyɛ nɣezile azʋlɔtʋ bɔkɔ bɔsʋ̃mɩ.
2. Mɩnla yɛ okozuma wɔ yɛ ayiyialɩyɛ tʋ a?
Yɛ ayiyialɩyɛ yɩ igyĩ Nyamɩnlɩ Odwokɔ yɩ zʋ, ‘bekilehile numɔ ma numɔ ɩda ɛkɛnɩ bʋwɔ.’ (Kɩnga Nehɛmaya 8:8.) Sɛ ɛba yɛ ayiyialɩyɛ tʋ a, okozuma Gyehova nɩɩ yɩ subanɩ ngɩnlɩma yɩ nwʋ dɩyɛ. Sɛ ɛba nwʋ sʋ̃maa ɛfalɩ ɔlɔlɛ mɔɔ ɩwɔ ɩma wʋ nɩ nwʋ a, ɔkɔhwɩ̃ ekeɣike yɩ paa. Akʋ̃ sʋ̃ okozuma kezimɔ ɩkɔhʋla ɩkɔwʋwa wʋ ma ekenyia ɛbɩlawɔlɛ mɔɔ azʋ̃nudwolɩyɛ wɔ numɔ baaba.—Ayɩzaya 48:17, 18.
3. Mɩnla ɔhʋanɩ zʋ yɛ mmenii mɔɔ ɛ nɩɩ bɛ kɔwɔ wɔ yɛ ayiyialɩyɛ tʋ nɩ ɩkɔhʋla ɩkɔwʋwa wʋ a?
Gyehova ɩkã ikile yɛ kɛɛ “yɛdwɩnɩ ɔhʋanɩ mɔɔ yɛkɔhʋla yekezizi yɛ ɔhɔnwʋmmɔ bɛ kɛnɣa, yɛlʋlɔ́ yɛ nwʋ nkʋ̃kʋ̃ nkʋ̃kʋ̃, na yɛwɔ́ ɛbɩla baaba. Dɩka mɔɔ yeyiyia numɔ yetiye Nyamɩnlɩ Odwokɔ nɩ nɩ, máma yeyiaki ɛkɛnɩ ɔhɔlɛ.” (Hibulumaa 10:24, 25) Wɔ yɛ ayiyialɩyɛ tʋ nɩ, ekeyiyia mmenii mɔɔ bɔdʋdɔ bɔ nwʋ baaba, mɔɔ bɛzabɛ sʋ̃ bɛ anyɩ ideli nwʋmɔ kɛɛ bokozuma Nyamɩnlɩ nwʋ dɩyɛ sʋ̃maa dɩkɛɛ wʋzawʋ la. Ɛkɛdɩ kɛɛ bɔbɔɔ Bayɩbʋlʋ nu nkɔmmɔ bɛfa bɛhyɛ bɔ nwʋ ɛzɩzɩbɛ. (Kɩnga Wulomimaa 1:11, 12.) Akʋ̃ sʋ̃, sa ɔkʋla ɛ nɩɩ mmenii sʋ̃maa mɔɔ bɔwɔ anyɩnlɩlelɛ ɩávalɩ nwʋmɔ kɛɛ beyiyia ndwokɔ ɛzɩzɩbɛ nɩ bɔ nkɔmmɔ. Eyimmɔ yɛ lɛ sianti azʋlɔtʋ mɔɔ ɩma Gyehova ɩpɛ kɛɛ yɛta yeyiyia numɔ nɩ be!
SUMÁ SƲ̃MAA
Pɩbɛ mɔɔ ɩkɔlɩ ɔzʋlɔ wɔ Gyehova Dasɩvʋlɔmaa bɛ ayiyialɩyɛ tʋ nɩɩ sianti mɔɔ ɩdɩ baaba kɛɛ yɛbɔ mmɔdɩnɩ yɛkɔ biye nɩ.
4. Gyehova Dasɩvʋlɔmaa bɛ ayiyialɩyɛ azʋlɔtʋ
Wɔ asʋ̃mavʋlɔ yɩ bɛ mmɩlɩ zʋ nɩ, nɩ Kilisinyiamaa mɔɔ bɔwɔ ɛkɛnɩ nɩ bɛta beyiyia numɔ bɔsʋ̃mɩ Gyehova. (Wulomimaa 16:3-5) Kɩnga Kolosiyiamaa 3:16, na akʋ̃ bozunzú odwokɔɣizialɛ eyi nwʋ:
-
Mɩnla ɔhʋanɩ yɛ tɩɩtɩɩ Kilisinyiamaa nɩ boluwalɩ ɔzʋlɔ bɔzʋ̃mɩnlɩ Gyehova a?
Nnɛ sʋ̃, Gyehova Dasɩvʋlɔmaa bɛta beyiyia numɔ wɔ dɩka mɔɔ bɔsʋ̃mɩ nɩ. Sɛ ɛpɛ kɛɛ ɔnwʋ mɔɔ ɩkɔlɩ ɔzʋlɔ wɔ bɛ ayiyialɩyɛ tʋ a, yɩ́ VIDIYO nɩ. Akʋ̃, kila asafʋ ayiyialɩyɛ nwʋ mfonyini nɩ, na bozunzú ndwokɔɣizialɛ mɔɔ ilili ɔzʋlɔ nɩ nwʋ.
-
Mɩnla nninyeni yɛ idi nsɛ wɔ mɔɔ ɩkɔlɩ ɔzʋlɔ wɔ Kɩndɔm Hɔɔlʋ nɩɩ mɔɔ ɛɣɩnganlɩ wɔ Kolosiyiamaa 3:16 yi nu a?
-
Wɔ vidiyo anzɛnyɩɩ mfonyini yi nu nɩ, ɔnwʋnlɩ dɩyɛ fʋlɔ be mɔɔ ɩfalɩ ayiyialɩyɛ yɩ nwʋ mɔɔ wʋ anyɩ ideli nwʋmɔ a?
Kɩnga 2 Kɔlɛntɩmaa 9:7, na akʋ̃ bozunzú odwokɔɣizɩalɛ eyi nwʋ:
-
Mɩnla ti yɛ bɛálile ozukua wɔ Gyehova Dasɩvʋlɔmaa bɛ ayiyialɩyɛ tʋ a?
Ɛ nɩɩ enii mɔɔ ɩ nɩɩ wʋ suma dɩyɛ nɩ, bozunzú mɔɔ ɩkɔhɔlɩ ɔzʋlɔ wɔ yɛ ayiyialɩyɛ mɔɔ ili ɛkɛnɩ nɩ nwʋ.
-
Ayiyialɩyɛ yɩ ɔfʋã ɛhɩnla dɩyɛ yɛ ekila a, wʋ anyɩ ikeleli nwʋmɔ paa anzɛnyɩɩ ɩkɔwʋwa wʋ a?
Ezi a?
Ɔkɔnwʋ dɩka nɩɩ mmɩlɩ mɔ bɛyɛ yɛ ayiyialɩyɛ azʋlɔtʋ nɩ wɔ oyuwadɩ munwala wɔ jw.org zʋ.
-
Wɔ yɛ ayiyialɩyɛ tʋ nɩ yetiye ndɛnɩ, yekila vidiyo, na bɛtɩdɩ yɛ ma yɛnwʋ kezimɔ yekehilehile. Yɛfa ndwomi nɩɩ mpayɩ yɛbɔ yɛ ayiyialɩyɛ tʋ, na yɛpɔ sʋ̃ a yɛyɛ ɔzɔ la
-
Wɔ yɛ ayiyialɩyɛ yɩ ɔfʋã be nɩ, bɔtʋ salɛ bɔfʋlɔ amɩyɛ mɔɔ yetiyee nɩ ma yɛtɩndɛ ebiye
-
Abiyela ɩkʋla ɩba ebiye—mmenyia, mmaalɛ, mbanimbani, nɩɩ nwuakula
-
Bɛálile ozukua bela wɔ yɛ ayiyialɩyɛ yɩ tʋ. Gyehova Dasɩvʋlɔmaa bɛ ayiyialɩyɛ tʋ nɩ bɛálile kɔlɛhyɛnɩ
5. Ide mmɔdɩnɩwɔlɛ na ama yɛahʋla yɛahɔ ayiyialɩyɛ azʋlɔtʋ
Sunzu Gyisɛsɩ nɩɩ yɩ abusunwa yɩ nwʋ kila. Sɛ nɩ bɔkɔhɔ ɔlʋbɔ bela ayiyialɩyɛ nɩ a, nɩ ɩsɛ kɛɛ betiyia kɛyɛ aɣile asã bɔzʋ̃ Nazɩlɛtɩ bɔkɔ Gyelusalamɩ. Na nɩ eyi sʋ̃ ɩdɩ ɔhʋanɩ mɔɔ avile wɔ numɔ. Kɩnga Luuku 2:39-42, na akʋ̃ bozunzú ndwokɔɣizialɛ eyimmɔ nwʋ:
-
Asʋ̃ osunzu kɛɛ ɔzɔ ɔhʋanɩ yɩ mɔɔ nɩ botua bɔkɔ Gyelusalamɩ nɩ, nɩ ide mmɔdɩnɩwɔlɛ a?
-
Mɩnla ti yɛ ebiye a ikehyinyia kɛɛ ɔbɔ mmɔdɩnɩ na ama wʋahʋla wʋahɔ ayiyialɩyɛ tʋ a?
-
Asʋ̃ osunzu kɛɛ nwʋmɔ ihyinyia kɛɛ ɔkɔ ayiyialɩyɛ wɔ mmɩlɩ po mɔɔ ɩyɛ sɩ ɩma wʋ a? Mɩnla ti a?
Bayɩbʋlʋ ɩkã kɛɛ nwʋmɔ ihyinyia paa kɛɛ yeyiyia numɔ yɛsʋ̃mɩ. Kɩnga Hibulumaa 10:24, 25, na akʋ̃ bozunzú odwokɔɣizialɛ eyi nwʋ:
-
Mɩnla ti yɛ ɩsɛ kɛɛ yɛta yɛkɔ ayiyialɩyɛ a?
ABIYEMMƆ BƐKÃ KƐƐ: “Ɔnwʋmɔ iáhyinyia kɛɛ ɛ nɩɩ mmenii mvʋlɔ keyiyia numɔ ansaana wʋazuma Nyamɩnlɩ nwʋ dɩyɛ.”
-
Mɩnla Bayɩbʋlʋ nu odwokɔ yɛ ɩma yɛnwʋ mɔɔ Gyehova ɩpɛ a?
YƖ DƆKƆWƆLƐ
Sɛ ɔkɔ ayiyialɩyɛ a, ɩkɔwʋwa wʋ ma okozuma Gyehova nwʋ dɩyɛ sʋ̃maa, ɩkɛhyɛ ɛ nɩɩ yɩ ɔhɔnwʋvalɛ nu ɛzɩzɩbɛ, na ɛ nɩɩ mmenii mvʋlɔ bɛawɔ numɔ bɛazʋ̃mɩ yɩ.
Kɛ Okowuwa Ekeze a?
-
Mɩnla ti mɔɔ Gyehova ɩhyɛ yɛ ɛzɩzɩbɛ kɛɛ yeyiyia numɔ a?
-
Mɩnla yɛ okozuma wɔ Gyehova Dasɩvʋlɔmaa bɛ ayiyialɩyɛ tʋ a?
-
Asʋ̃ osunzu kɛɛ ayiyialɩyɛ nɩ ɩkɔhʋla ɩkɔwʋwa wʋ wɔ ɔhʋanɩ fʋlɔ be zʋ a?
PƖBƐ́ SƲ̃MAA
Na sɛ wu kunlu tu kɛɛ ɔkɔhɔ ayiyialɩyɛ nɩ be sʋ̃ ɛ? Kila kezimɔ benyia be mɔɔ nɩ ɩtɩ nɣanlɩ zɔ nɩ akʋ̃ yɩ anyɩ ɩɣa ileli ayiyialɩyɛ nɩ nwʋ.
Kila kezimɔ abɩlantɩyɛ be yɩ anyɩ ilelili ayiyialɩyɛ nɩ nwʋ nɩɩ mɔɔ ɩyɛlɩ na ama ɩahʋla ɩahɔ ebiye eɣile bela.
Kila kezimɔ abiyemmɔ bɛtɩ nɣanlɩ wɔ ayiyialɩyɛ mɔɔ bɔkɔ nɩ nwʋ.
“Sianti Mɔɔ Ɩsɛ Kɛɛ Ɔkɔ Ayiyialɩyɛ Wɔ Kɩndɔm Hɔɔlʋ” (Ndwokɔ mɔɔ ɩwɔ jw.org zʋ)
Kila kezimɔ benyia be mɔɔ nɩ ɩva yɩ nwʋ ɩwɔ basabasayɛlɛmaa okuwu be nɩ yɩ ɛbɩlawɔlɛ ɩzɩnzanlɩ mmɩlɩ mɔ ɩhɔlɩ Gyehova Dasɩvʋlɔmaa bɛ ayiyialɩyɛ yɩ be nɩ.
“Dɩka Bela Mɔɔ Mʋkɔhɔ Nɩ, Nɩ Mɩfa Otui Mʋkɔ” (Ɔwɩɛnɩlɛ Aɣanɩ, July 1, 2014)
