Sɛ botu abiye wɔ asafʋ yi nu a, ɩbɔ asafʋ nɩ nwʋ banɩ na ɩtɩnyɩa enii mɔɔ ɩyɛ tanɩ mɔɔ iánu yɩ nwʋ nɩ sʋ̃. (1Kɔl 5:6, 11) Sɛ Gyehova ɩtɩnyɩa abiye na yede yetiã numɔ a, yɛfa yɛda yɛ ɔlɔlɛ ali. Sɛ botu abiye wɔ asafʋ yi nu a, yɩ mmusunwamaa, odwokɔlilɛ kɔmitii nɩɩ mmeliyema nɩ bedi ɛyɛkɛ baaba. Mɛyɩ, nɩ mɩnla ti mɔɔ botu abiye a, ikile ɔlɔlɛ a?

Sianti yɛ lɛ kɛɛ, yɛfa yɛda yɩ ali kɛɛ yɛdɔ na yɛwɔ annidi yɛma Gyehova yi dima nɩɩ yɩ nwanzanwanzayɛlɛ. (1Pit 1:14-16) Akʋ̃ sʋ̃, yɛfa yekile kɛɛ yɛdɔ enii mɔɔ bodu yɩ nɩ sʋ̃. Ɩwɔ numɔ kɛɛ ɛdɩnyɩanlɛ mɔɔ numɔ ɩyɛ sɩ nɩ ɩyɛ ɛyɛkɛ dɩyɛ, naasʋ̃ ɩma abiye ‘ɩtɩnɣɛ na inyia azʋ̃nudwolɩyɛ’ sʋ̃. (Hib 12:5, 6, 11) Sɛ yɛ nɩɩ abiye mɔɔ bodu yi anzɛnyɩɩ ɩhwɩ̃ yɩ nwʋ wɔ asafʋ yɩ nwʋ nɩ bɔ a, nɩ ikile kɛɛ yesii ɛdɩnyɩanlɛ mɔɔ Gyehova ɩlɛ ɩma yɩ nɩ ɔhʋanɩ. Kakɛ kɛɛ, Gyehova ɩtɩnyɩa yi mmenii “kezimɔ ɩfata.” (Gyɛ 30:11) Sɛ yede Gyehova yɩ ɛdɩnyɩanlɛ yetiã numɔ na yɛfa yɛ adwɩnɩ yesiye sunzuma ɔfʋã nu nninyeni zʋ a, sa yɛkʋla yenyia anwʋlazʋ kɛɛ eɣile be, sa isia ɩba yɛ Zɩ mɔɔ ɩwɔ ngokɛnwʋnlɛ nɩ yɩ pɛ dɔkʋ̃.—Ayɩ 1:16-18; 55:7.

KILÁ VIDIYO MƆƆ BƐYƐ YƖ DƖLAMA MƆƆ ISE FÁ AHƲNLƖNƖ MƆƆ IDI MUNLI DI GYEHOVA NƆHƲANLƐ, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Sɛ kuakula be iyiaki Gyehova yɩ ɔzʋ̃mɩnlɛ a, kɛ Kilisinyianɩ awʋvʋlɔ bɛtɩ nɣanlɩ bese a?

• Mɩnla ɔhʋanɩ zʋ yɛ asafʋ yɩ nɩ bɔkɔhʋla bɔkɔwʋwa bɛzabɛ mɔɔ bodu bo busunwanii wɔ asafʋ yi nu nɩ a?

• Mɩnla Bayɩbʋlʋ nu odwokɔ yɛ ɩma yɛnwʋ ehyinyianlɛ mɔɔ ihyinyia kɛɛ yɛkɛma ɔlɔlɛ mɔɔ yɛwɔ yɛma Gyehova nɩ ɩkɛyɛ sɩ ɩkɛdɛla yɛ abusunwamaa?

• Kɛ yɛkɛma nɔhʋanlɛ mɔɔ yekeli yɛkɛma Gyehova nɩ ɩkɛdɛla yɛ abusunwamaa bɛ dɩyɛ nɩ yekeze a?