Gyehova ɩnwʋ ndamɩ mɔɔ agyiahʋnlɩmaa bɛkã nɩ kɛɛ anyɩnlɩbʋlʋ odwokɔ. Na ise, ɩsɛ kɛɛ ohunɛ nɩɩ ɛyɩlɛ bɛfa bɔ nwʋ bɔfʋãmɩ bɔ nwʋ. (Mt 19:5, 6) Wɔ Nyamɩnlɩ yi mmenii nu nɩ, agyiahʋnlɩmaa sʋ̃maa wɔ ɛkɛnɩ mɔɔ bɔwɔ anyɩnlɩlelɛ. Naasʋ̃ agyiahʋnlɩ bela íni ɛkɛnɩ mɔɔ idi munli. Ɩyɛ a, ndwokɔ ɛzɩzɩbɛ itwodwu. Íni kɛɛ yenyia adwɩnɩ mɔɔ abiyemmɔ lɛ kɛɛ, sɛ agyiahʋnlɩmaa beyiyiaa ndwokɔ ɛzɩzɩbɛ a, yi munwa awudo yɛ lɛ agyiahʋnlɩ nu ɛdɩdɩlɛ nɩɩ oholɛwɔlɛ nɩ be kyɩ̃. Kɛ ɩkɛyɛ na Kilisiyiamaa agyiahʋnlɩmaa bɛahʋla bɛawɔ bɛ agyiahʋnlɩ nwʋ banɩ a?

Sunzú ahʋanɩ aditili anlu eyi nwʋ kila.

1. Twɩ̃ wʋ nwʋ wɔ nninyeni be mɔɔ ɩsɩkɛ agyiahʋnlɩ nɩ nwʋ, dɩkɛɛ abiye mɔɔ ɩ́dɩ wu hũ anzɛnyɩɩ wʋ yɩ mɔɔ ekehile yɩ nwʋ anyɩnlɩlelɛ wɔ ɔhʋanɩ be zʋ nɩɩ anyɩnlɩlelɛdɩyɛ mɔɔ ɛbɩlazɩkɛlɛ ɩwɔ numɔ nɩ.—Mt 5:28; 2Pit 2:14.

2. Hyɛ́ ɛ nɩɩ Nyamɩnlɩ bɔ ɔhɔnwʋvalɛ yi nu ɛzɩzɩbɛ, na ma ɛpɛ mɔɔ ɔwɔ kɛɛ ɛkɛyɛ mɔɔ ɩsɔ yɩ anyɩ nɩ ɩyɛ kezile wɔ wʋ agyiahʋnlɩ nu.—Ndw 97:10.

3. Kɔ́ ɔzʋlɔ wula subanɩ fʋlɔ nɩ, na yɛ nninyeni ngyɩkɩ̃ɩ̃ ngyɩkɩ̃ɩ̃ be fa da kunlumiba ali na ama wu hũ anzɛnyɩɩ wʋ yɩ yɩ anyɩ ale.—Kol 3:8-10, 12-14.

4. Bɛlá annidi ali behile bɔ nwʋ, na bɛyɩ bo nu bɔwɔ nkɔmmɔ.—Kol 4:6.

5. Sɛ ɛ nɩɩ wu hũ anzɛnyɩɩ wʋ yɩ benyiaa nna nu nkitanwʋlilɛ, yɛ́ yɩ wɔ ɔlɔlɛ nu.—1Kɔl 7:3, 4; 10:24.

Sɛ Kilisiyiamaa bedi bɛ agyiahʋnlɩ nni a, nɩ ikile kɛɛ bɛlɛ annidi bɛma Gyehova mɔɔ ɩdɩ agyiahʋnlɩ Ɩhyɩhyɛlɛvʋlɔ nɩ.

KILÁ VIDIYO MƆƆ ISE ƖSƐ KƐƐ “YEMINYIA YƐ NWƲ BAABA YEƔIANDI EƔIANDINLƐ NƖ”—FÁ NDƆLƆNWA YƖ NWƲ MMƐLA YƖ NƖ YƐ́ EGYIMA, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Ɩwɔ numɔ kɛɛ agyiahʋnlɩ ɩkɔhʋla ɩkɔhɔ bʋwɔ wɔ yɩ tʋwɔlɛ yɩ dɩyɛ, naasʋ̃ mɩnla ndwokɔ ɛzɩzɩbɛ yɛ ɩkɔhʋla ɩkɛɣa aɣinzi nɩ a?

• Mɩnla ɔhʋanɩ zʋ yɛ Bayɩbʋlʋ nu egyinalɛzʋ-ndwokɔ ɩkɔhʋla ɩkɔwʋwa bɛzabɛ mɔɔ bɛtɩ nɣanlɩ kɛɛ ɔlɔlɛ íni bɛ agyiahʋnlɩ nu nɩ a?

• Mɩnla mmɛla yɛ Gyehova ɩhyɩhyɛ ɩma agyiahʋnlɩ a?

• Sɛ agyiahʋnlɩ ɩkɔhɔ bʋwɔ a, mɩnla yɛ ɩsɛ kɛɛ agyiahʋnlɩmaa nɩ bo nu bela ɩyɛ a?