Yɛda oyuwadɩ be nu mɔɔ bɔbɔ mmɔdɩnɩ kɛɛ bɛkɛma yekowu baaba kɛɛ tanɩ nɩɩ tanɩ sʋ̃ kɛɛ baaba. (Ayɩ 5:20) Aɣɛlɛbɔ odwokɔ yɛ lɛ kɛɛ, abiyemmɔ bɛyɛ nninyeni be mɔɔ Gyehova ikyi, mɔɔ nyɛlɩyɛ tanɩ be dɩkɛɛ mmenyia mɔɔ bɛ nɩɩ mmenyia da nɩɩ mmaalɛ mɔɔ bɛ nɩɩ mmaalɛ da ɩkɩnla nwʋmɔ. Sukuulumaa nɩɩ mmenii mvʋlɔ bɔ mmɔdɩnɩ kɛɛ bɛkɛhyɛ ye nnwuakula nɩ ma bɛkɛyɛ bɛ nyɛlɩyɛ nɩ be. Kɛ ɩkɛyɛ na wʋaziyeziye wʋ nnwuakula nɩ ma bɛahʋla bɛagyina nhyɛ eyi anzɛnyɩɩ odwohilalɛ mɔɔ ɩdɩdɩ zɛ nɩ yi munwa?

Bʋwá wʋ nnwuakula ma bɔnwʋ Gyehova yɩ adwɩnɩ wɔ nninyeni nwʋ. (Lɛv 18:3) Kilehilé bɛ ngyɩkɩ̃ɩ̃ ngyɩkɩ̃ɩ̃ ma bɔnwʋ mɔɔ Bayɩbʋlʋ ɩkã ɩfalɩ nna nu nkitanwʋlilɛ nwʋ. Naasʋ̃ ma mɔɔ ɛkɛhã ekehile bɛ nɩ igyina ɔlʋbɔ mɔɔ beli nɩ zʋ. (Dit 6:7) Biziá wʋ nwʋ kɛɛ: ‘Asʋ̃ mihile mʋ nnwuakula ma bɔnwʋ nɣanlɩdɩlɛ mɔɔ bɛda yɩ ali wɔ ɔhʋanɩ baaba zʋ, sianti mɔɔ ihyinyia kɛɛ besiyeziye bɔ nwʋ ma ɩfata, nɩɩ sianti mɔɔ íni kɛɛ bɛma abiye ɔhʋanɩ ma ɩsʋzɔ bo nu nɩ a? Asʋ̃ mʋ nnwukula nɩ bezi mɔɔ ɩsɛ kɛɛ bɛyɛ mmɩlɩ mɔ abiye ɩlɛ pornography ikilee bɛ anzɛnyɩɩ ɩpɛ kɛɛ bɛyɛ dɩyɛ be mɔɔ Gyehova ikyi nɩ a?’ Sɛ bezi eyimmɔ daada a, ɩkɔwʋwa bɛ na ama bɛávalɩ atɩɩtɩɩ bela bɛaɣalɩ bɔ nwʋ zʋ. (Ɛɣɛ 27:12; Odw 7:12) Sɛ ekilehile wʋ nnwuakula nɩ a, nɩ ekile kɛɛ ɔdɔ wʋ agyiapadɩ eyi mɔɔ ɩtʋ bʋlɔ mɔɔ Gyehova ɩva wʋ nɩ baaba.—Ndw 127:3.

KILÁ VIDIYO MƆƆ ISE KYINÁ ALIYIA MƆƆ IKEGYINA ƐKƐNƖ PINDINYII—BƆ́ WƲ NNWUAKULA NWƲ BANƖ “WƆ TANƖ NWƲ,” NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla ti mɔɔ abiyemmɔ bɔtwɩnhwɩ̃ bɛ agyia azɩ kɛɛ bekehilehile bo nnwuakula nna nu nkitanwʋlilɛ nwʋ ndwokɔ a?

• Mɩnla ti mɔɔ ihyinyia kɛɛ awʋvʋlɔ ‘bɛtɩdɩ na bekilehile bo nnwuakula kɛmɔ ye Niibenyia ɩpɛ yɩ nɩ’ a?—Ɛfɩ 6:4

• Mɩnla yɛ Gyehova yɩ ahyɩhyɛdɩ ɩyɛ mɔɔ ɩkɔwʋwa awʋvʋlɔ ma bekehilehile bo nnwuakula nna nu nkitanwʋlilɛ nwʋ ndwokɔ a?—w19.05-TW 12, alɩka

• Mɩnla ti mɔɔ ɩsɛ kɛɛ ɛta ɛ nɩɩ wʋ nnwuakula bɔ ɔnwʋmɔ nkɔmmɔ ansaana ndwokɔ ɛzɩzɩbɛ be iadwodwu a?