KILISINYIAMAA BƐ ƐBƖLAWƆLƐ
Siyeziye Wʋ Nwʋ Ma Adimakɛlɛ Mɔɔ Wʋáhila Yɩ Ɔhʋanɩ
Mɩnla ti a? Iluwakɛɛ, sa yɛ nwʋ kʋla pa yɛ ɛzɩzɩbɛ ma bede yɛ betiã asʋpiti aɣilevile nu. Meti, dí nhyɩhyɛlɩyɛ mɔɔ ahyɩhyɛdɩ yɩ ɩyɛ nɩ mɛda nnɛ, na ama sɛ debe ɔzɔ si a, wʋanyia adimakɛlɛzalɛ mɔɔ ɩdɩ baaba. Ɔzɔ mɔɔ ɛkɛyɛ nɩ kehile kɛɛ obu nnwʋanlɩ nɩɩ Gyehova yɩ mmɛla mɔɔ ɩfalɩ mmegyia nwʋ nɩ.—Egy 15:28, 29.
Kɛ ekeziyeziye wʋ ekeze a?
-
Sunzú nwʋmɔ bʋwɔ na fa mpayɩwɔlɛ hyɩhyɛ durable power of attorney (DPA) kɛlɛta yɩ be. a Ɛlawulowɔlɛmaa mɔɔ bonluma nɩ kɔhʋla kɛhyɩhyɛ DPA kaadɩ yɩ be bɛkɛma bɔ nwʋ na bɛahyɩhyɛ Identity Card (ic) yɩ be sʋ̃ bɛama bo nnwuakula ngyɩkɩ̃ɩ̃ ngyɩkɩ̃ɩ̃. Sa benyia ebiye wɔ asafʋ awuuku zʋ ehilalɛvʋlɔ yɩ ɛkɛnɩ
-
Sɛ ɛɣɩnzɛɛ a, biziá asafʋ nu mbanimbani na bɛva Information for Expectant Mothers (S-401) yɩ be bɛma wʋ. Ndwokɔ mɔɔ ɩwɔ kɛlɛta yɩ nu nɩ, ɩkɔwʋwa wʋ ma ekezizi abɔkɔba falɩ wʋ adimakɛlɛzalɛ nwʋ wɔ mmɩlɩ mɔ ɛɣɩnzɛɛ nɩɩ wʋ awʋbɔ nu
-
Sɛ mmegyialelɛ nwʋ ndwokɔ ɩba wʋ adimakɛlɛzalɛ nu anzɛnyɩɩ bekele wʋ bekediã asʋpiti ɛkɛ a, di bɔmʋnlɩ bɔ wʋ asafʋ nu mbanimbani amanɩyɛ, na ma wʋ dɔkɩta yɩ ɩnwʋ yɩ kɛɛ, Gyehova Dasɩvʋlɔmaa bo nu be kɛɣa kegyela wʋ
Kɛ mbanimbani yi kɔhʋla kɔwʋwa wʋ keze a? Sa bɔkʋla bɔbʋwa wʋ ma ɛhyɩhyɛ wʋ DPA kɛlɛta yɩ. Naasʋ̃, pɔkɔzilɛ mɔɔ ɩfalɩ adimakɛlɛzalɛ nɩɩ ndwokɔ mɔɔ ɩsɛ kɛɛ abiyela si nwʋmɔ pɔkɔ mɛyɩ, belési bɛkɛma wʋ. (Wul 14:12; Gal 6:5) Sɛ mmegyia nwʋ odwokɔ be kodwodwu wɔ wʋ adimakɛlɛzalɛ yɩ nu a, bɔ mbanimbani yɩ amanɩyɛ na ndɛndɛ zʋ la bɔnlʋmmɔ sʋ̃ bɔkɔvʋlɔ Asʋpiti Nkitanwʋlilɛ Kɔmitii yi bɛkɛma wʋ.
Kɛ Asʋpiti Nkitanwʋlilɛ Kɔmitii nɩ kɔwʋwa wʋ keze a? Mmeliyema mɔɔ bɔwɔ nu nɩ, bɛdɩdɩ bɛ na ama bɛawʋwa alɔkɩtamaa nɩɩ bɛzabɛ mɔɔ bɔwɔ mmɛla nu nɩ na bɛanwʋ ye dedi wɔ mmegyia nwʋ. Sa bɔkʋla bɛ nɩɩ wʋ dɔkɩta nɩ sunzu adimakɛlɛzalɛ azʋlɔtʋ mɔɔ bɛáva mmegyia bedi egyima nɩ nwʋ. Sɛ nwʋmɔ ɩba ihyinyia a, sa bɔkʋla bɔbʋwa wʋ ma enyia dɔkɩta mɔɔ ikele wʋ pɔkɔzilɛ ikediã numɔ.
KILÁ VIDIYO MƆƆ ISE KEZIMƆ YEKEZI PƆKƆ BAABA WƆ MMEGYIA MƆƆ BƐFA BEDI EGYIMA WƆ AWUDOYƐLƐ NU, NA AKƲ̃ YƖ ODWOKƆƔIZIALƐ EYI YƖ MUNWA:
-
Mɩnla yɛ ozumanlɩ wɔ vidiyo yɩ nu mɔɔ ɩkɔwʋwa wʋ ma ekeziyeziye wʋ nwʋ ɛkɛma adimakɛlɛzalɛ mɔɔ mmegyia nwʋ odwokɔ kodwodwu wɔ numɔ nɩ a?
a Sa Ɔkʋla Enyia Anyɩnlɩlelɛ Daabaa! buuku yi ozumalɛdɩyɛ 39 nɩ kɔhʋla kɔwʋwa wʋ ma ekezizi abɔkɔ wɔ adimakɛlɛzalɛ mɔɔ mmegyia nwʋ odwokɔ kodwodwu wɔ numɔ nɩ nwʋ.
