Ɛhɛlɛlɛ Odwokɔ nɩ ɩkã ikile yɛ kɛɛ, yɛ nɩɩ Kilisinyiamaa mɔɔ bɛ alʋbɔ ɩhɔ anyunumi nɩ yeli kɛɛ ye nli mmɔ nɩɩ yɛ zɩ mmɔ na yɛ nɩɩ bɛzabɛ mɔɔ bɛ anyɩ ɩlɛ́tɩlɩ nɩ yeli kɛɛ ye mmenlima. (Kɩnga 1 Timoti 5:1, 2.) Mmeliyema mmenyia titili yɛ ɩsɛ kɛɛ bedi mmeliyema mmaalɛ nni a.

Íni kɛɛ eliyema benyia be ɩma eliyema baalɛ be ɩtɩ nɣanlɩ kɛɛ yɩ anyɩ ideli yɩ nwʋ mmɩlɩ mɔ ɩ́dɩ ɔzɔ anzɛnyɩɩ ɩyɛ dɩyɛ be ma ɩyɛ sɩ kɛɛ ikeɣike yi. (Dwb 31:1) Íni kɛɛ eliyema benyia sigyianii ɩfa eliyema baalɛ sigyianii yɩ nɣanlɩdɩlɛ idi nwɔwɩ, iluwa dɩyɛ be mɔɔ ɩkɛyɛ ma eliyema baalɛ nɩ ɩkɛdɩ nɣanlɩ kɛɛ yɩ anyɩ ideli yɩ nwʋ naasʋ̃ nɩ ɩ́dɩ ɔzɔ nɩ zʋ.

Sɛ mmeliyema mmaalɛ bebizia odwokɔ be anzɛnyɩɩ bɔtwɩ̃ adwɩnɩ besiye dɩyɛ be mɔɔ ihyinyia zʋ wɔ annidi nu a, ɩsɛ kɛɛ mbanimbani bɛfa anyɩnlɩlelɛ bosunzu nwʋmɔ. Ɩsɛ kɛɛ mbanimbani bɛma bɛ anyɩ ikũ mmaalɛ nwʋ, titili bɛzabɛ mɔɔ béni ohunɛmaa mɔɔ bɔkɔwɔ bɔ nwʋ banɩ nɩ.—Wu 2:8, 9.

KILÁ VIDIYO MƆƆ ISE DÁ ƆLƆLƐ MƆƆ ÍNI AWIELƖYƐ ALI WƆ ASAFƲ YI NU KILE​—BƐZABƐ MƆƆ BƐDƖ AHUNAVƲLƆ NƖƖ AƔINSAMAA NƖ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• Mɩnla ɔhʋanɩ zʋ yɛ asafʋ yɩ bɛlalɩ ɔlɔlɛ kanyɩɩ ali behileli Eliyema Baalɛ Myint a?

• Mɩnla ɔhʋanɩ zʋ yɛ ɔlɔlɛ mɔɔ asafʋ yɩ bɛlalɩ yɩ ali nɩ, ɩyɛlɩ dasɩlɛlilɛ kezile wɔ suwa ɛkɛnɩ a?

• Mɩnla ɔhʋanɩ zʋ yɛ ɔlɔlɛ mɔɔ asafʋ yɩ bɛlalɩ yɩ ali nɩ, ɩhanlɩ Eliyema Baalɛ Myint yɩ nnwuakula mmaalɛ nɩ a?

Mɩnla nninyeni pɔkyɩɩ be yɛ ɔkɔhʋla ɛkɛyɛ ɛkɛva ekehile kɛɛ, ɔdwɩnɩ wu mmeliyema mmaalɛ mɔɔ bɔwɔ wʋ asafʋ yi nu nɩ bɔ nwʋ a?