• Fa wʋzawʋ wʋ adɩlɛsɩ di egyima. Sɛ ekila na ɩlɛ́yɛ baaba kɛɛ ɛkɛva wʋzawʋ wʋ adɩlɛsɩ ekeli egyima a, sa ɔkʋla ɛfa Bulombunli Ayiyialɩyɛ Aliyia yɩ adɩlɛsɩ nɩ edi egyima, sɛ asafʋ nu mbanimbani nɩ bɛma ɔnwʋmɔ ɔhʋanɩ wʋ a. Naasʋ̃, mɩáfa Bɛtɩlɩ adɩlɛsɩ edi egyima KYƖ̃.

• Sɛ ezi enii ɔkʋ̃ nɩ yi dima a, fá di egyima. Eyi ɩlɛ́ma ikenyia adwɩnɩ kɛɛ ɛlɛ kɛlɛta nɩ ɔbɔɔ kualɛlilɛ be nwʋ ɛlawulo.

• Fá wʋ adwɩnɩ siye kezimɔ bɛkɛlɛ dɩyɛ, bɛkɩnga dɩyɛ, nɩɩ ndɛnɩ nwʋ mmɛla nɩ zʋ bʋwɔ. Ɩsɛ kɛɛ kɛlɛta nɩ ɔnwʋmɔ ɩtɩ, na íni mɔɔ ɩyɛ basabasa. Sɛ ɛvalɩ wʋ sa ɛhɛlɛlɩ a, íni kɛɛ ɩyɛ ɛzɩzɩbɛ kɛɛ bɛkɛɣɩnga. Íni kɛɛ ɛfa ndwokɔ mɔɔ ɩba azɩ sʋ̃maa anzɛnyɩɩ ɩkɔ sʋlɔ sʋ̃maa nɩ edi egyima.

Kɛlɛta mɔɔ bɛhɛlɛ kɛɛ ndianwʋ mɔɔ bɛva bɛhɩnla nwʋmɔ nɩ ɩda ndwokɔ abɔkɔ eyimmɔ ali. Iáhile kɛɛ ɩsɛ kɛɛ ekila mɛyɩ zʋ ɛkɛlɛ numɔ ndwokɔ nɩ pɛpɛɛpɛ wɔ mmɩlɩ bela mɔ ɛkɛhɛlɛ kɛlɛta ɛkɛma abiye wɔ wʋ azɩlɛ-sini nu nɩ. Yɛ́ nzɩnzanlɩyɛ wɔ wʋ kɛlɛta yi nu ma ɩ nɩɩ yi tile nu pɔkɔ, ɛkɛnɩ bʋwabɩlɛ, nɩɩ amamu nɩ iyiyia.