KILISINYIAMAA BƐ ƐBƖLAWƆLƐ
Kezimɔ Ɔkɔhʋla Ɔkɔwʋwa Wɔ Asianɩ Mɛda
Yɛkʋla yɛnwʋ yɩ kɛɛ aɣile asã yɩ, asianɩ ta si paa. Meti ɩsɛ kɛɛ bɛyɛ asianɩ nwʋ mmʋwalɩyɛ nhyɩhyɛlɩyɛ bʋwɔ. Eyi ti, Ɔhʋanɩhilelɛ Okuwu yi ma ɔhʋanɩ kɛɛ bɛhyɩhyɛ Asianɩ Nwʋ Mmʋwalɩyɛ Azʋkɔlɩyɛ wɔ Bɛtɩlɩ bela.
Sɛ mmeliyema mɔɔ bɔwɔ ɔzɔ azʋkɔlɩyɛ nɩ tɩ kɛɛ asianɩ be izi wɔ dɩka be a, ndɛndɛ la bɛ nɩɩ asafʋ nu mbanimbani mɔɔ bɔwɔ ɛkɛnɩ nɩ tɩndɛ na ama bɛanwʋ mmʋwalɩyɛ mɔɔ ɛlawulowɔlɛmaa nɩ hyinyia. Sɛ nninyeni mɔɔ ɩzɩkɛlɩ nɩ, ɛlawulowɔlɛmaa yɩ nɩ bɔlɔ́kʋla bekeli nwʋmɔ egyima a, Bɛtɩlɩ ma mmeliyema mɔɔ bɛfata nɩ ba di mmʋwalɩyɛ egyima yɩ anyunu. Ebiye a, ɔzɔ mmeliyema nɩ kɛhã kɛɛ ɛlawulowɔlɛmaa be bodu bɔ nwʋ bɛma, anzɛnyɩɩ bɔzʋ̃ bɛ ahʋnlɩnɩ nu bɛva nninyeni pɔkyɩɩ be bɛɣɩla. Ebiye a, ɔzɔ mmeliyema yɩ sʋ̃ bɛzabɛ bɔkɔdɔ na bɛahyɩhyɛ nninyeni be.
Mfasʋ sʋ̃maa wɔ nhyɩhyɛlɩyɛ eyi zʋ. Iluwakɛɛ ɩáma yɛyɛ egyima anwɩ̃ anwɩ̃, ɩáma nninyeni yɛ basaa na ɩáma yɛsɩkɛ ozukua nɩɩ nninyeni mvʋlɔ kɛmɔ sɛ mmeliyema yɩ bɛzabɛ la bedii nwʋmɔ egyima a, ankɩ ikezi nɩ.
Mmeliyema mɔɔ Bɛtɩlɩ ɩkɛyɩ bɛ nɩ kɔhʋla kehile ozukua nɩɩ mmeliyema dʋdʋ mɔɔ bekehyinyia na ama bɛahʋla bɛayɛ mmʋwalɩyɛ egyima nɩ. Sa bɔkʋla sʋ̃ bɛ nɩɩ twonwa yɩ nu ɛkɛnɩ mbanimbani mɔɔ bɔkɔhʋla bɔkɔwʋwa yɛ ma yɛkɛyɛ egyima yɩ ndɛndɛ nɩ di nkitanwʋ. Meti sɛ asianɩ be si a, íni kɛɛ abiyela fa yɩ pɛ kɔ dide mmeliyema bo ozukua, ɩfa nninyeni be mɔɔ isunzu kɛɛ mmeliyema yɩ kehyinyia anzɛnyɩɩ ɩkɔ dɩka mɔɔ asianɩ yɩ izi gyɩsɛ bɛma nwʋmɔ ɔhʋanɩ yɩ.
Naasʋ̃ sɛ asianɩ si a, yɛpɛ kɛɛ yɛ bʋwa. (Hib 13:16) Yɛdɔ ye mmeliyema yɩ! Meti mɩnla yɛ yɛkɔhʋla yɛkɛyɛ a? Mɔɔ ihyinyia paa nɩ, sa yɛkʋla yɛbɔ mpayɩ yɛma bɛzabɛ mɔɔ asianɩ ɩdʋ bɛ nɩɩ bɛzabɛ mɔɔ bɔbʋwa wɔ asianɩ nwʋ mmʋwalɩyɛ egyima yɩ nu nɩ. Sa yɛkʋla sʋ̃ yɛyɩ fʋtʋlɔ yɛbʋwa oyuwadɩ munwala egyima yɩ nɩ. Naasʋ̃ Bɛtɩlɩ azʋlɔtʋ titili yɛ bɔkɔhʋla bekehile dɩka pɔkyɩɩ mɔɔ yɛfa ɔzɔ fʋtʋlɔ azʋlɔtʋ nɩ yedi egyima a, ɩkɔwʋwa paa. Bɛyɛ ɔzɔ wɔ Ɔhʋanɩhilelɛ Okuwu yi bɔ ɔhʋanɩhilelɛ tʋ. Na sɛ yɛpɛ kɛɛ yɛkɔ yɛbʋwa a, sa yɛkʋla yɛhyɩhyɛ Local Design/Construction Volunteer Application (DC-50) fɔɔmɩ yɩ be.
KILÁ VIDIYO MƆƆ ISE NZULOYILƐ KEZILE BE MƆƆ IZILI WƆ BRAZIL, NA AKƲ̃ YƖ́ ODWOKƆƔIZIALƐ EYI YI MUNWA:
Mɩnla yɛ wʋ anyɩ ideli nwʋmɔ wɔ mmʋwalɩyɛ egyima mɔɔ Gyehova Dasɩvʋlɔmaa bɛyɛlɩ wɔ 2020 nzuloyilɛ mɔɔ izili wɔ Brazil yɩ mɛda a?
