Ɔlɔlɛ ɩdɩ dɩyɛ be mɔɔ ɩkʋla ɩkã abusunwa ɩbɔ numɔ. Sɛ abusunwa be béni ɔlɔlɛ a, ɩkɛyɛ sɩ kɛɛ bɛkɛyɛ ɔkʋ̃ na azʋ̃nudwolɩyɛ ɩawʋwa bɛ avinli. Kɛ ɩkɛyɛ na ohunɛmaa, ɛyɩlɛmaa, nɩɩ awʋvʋlɔ bɛala ɔlɔlɛ ali wɔ abusunwa yi nu a?

Ohunɛ mɔɔ ɩwɔ ɔlɔlɛ nɩ ɩdwɩnɩ yɩ yɩ yɩ ahyinyiadɩ nwʋ, ide yɩ adwɩnɩhilelɛ itiã numɔ, na ɩtɩ yɩ nɣanlɩdɩlɛ tʋ. (Ɛfɩ 5:28, 29) Ɩfa abusunwa nɩ bɔ nnwʋnlamɩ nɩɩ sunzuma ɔfʋã nu ahyinyiadɩ ɩma bɛ, mɔɔ Abusunwa Ɔzʋ̃mɩnlɛ mɔɔ bɛkɛyɛ yɩ wɔ dapɛnɩ bela ɩkɩnla nwʋ. (1Tim 5:8) Ɛyɩlɛ mɔɔ ɩwɔ ɔlɔlɛ nɩ ɩkã yɩ nwʋ azɩ ɩma yi hũ na “idi yi hũ nni.” (Ɛfɩ 5:22, 33; 1Pit 3:1-6) Ɩsɛ kɛɛ bɛzabɛ anwɩ̃ yɩ munwala bɔzʋ̃ bɛ pɛ nu bɛfa tanɩ bɛkyɛ na bɛyɩ wɔ be ti nu. (Ɛfɩ 4:32) Awʋvʋlɔ mɔɔ bɔwɔ ɔlɔlɛ nɩ bɛ anyɩ ideli bo nnwuakula nɩ bo nu bela nwʋ na bekilehile bɛ ma bɔdɔ Gyehova. (Dit 6:6, 7; Ɛfɩ 6:4) Mɩnla ndwokɔ ɛzɩzɩbɛ yɛ bo nnwuakula nɩ beyiyia wɔ sukuulu nu a? Kɛ bedii bɛ atipɛnɩmaa bɛ nhyɛ zʋ bese a? Sɛ ɔlɔlɛ wɔ abusunwa be nu a, ɩma bo munwala bɛtɩ nɣanlɩ kɛɛ bɔwɔ banɩwɔlɛ na bɛ ahʋnlɩnɩ ɩtɔ bo kunlu.

KILÁ VIDIYO MƆƆ ISE DÁ ƆLƆLƐ MƆƆ ÍNI AWIELƖYƐ ALI WƆ WƲ ABUSUNWA NU, NA AKƲ̃ YƖ NDWOKƆƔIZIALƐ EYIMMƆ BO MUNWA:

• Kɛ ohunɛ mɔɔ ɩwɔ ɔlɔlɛ nɩ ikila na ɩdɔ yɩ yɩ ise a?

• Kɛ ɛyɩlɛ mɔɔ ɩwɔ ɔlɔlɛ nɩ idi yi hũ nni ise a?

• Kɛ awʋvʋlɔ mɔɔ bɔwɔ ɔlɔlɛ nɩ bɛfa Nyamɩnlɩ yɩ Odwokɔ nɩ bekilehile bo nnwuakula nɩ bese a?