Sɛ yɛyɛɛ siakehila anzɛnyɩɩ Bayɩbʋlʋ dɩyɛzumanlɛ a, ihyinyia kɛɛ yɛbʋwa ye ediyelɛmaa ma bɛtɩ ndwokɔ aditili nɩ tʋ. Sɛ yɛfa ndianwʋ yekilehile ndwokɔ aditili nu a, ɩkɔhʋla ɩkɛhã bɛ ahʋnlɩnɩ na ɩayɛ mɛlɛkɛ kɛɛ bɛkɛhakɛ.

Sɛ esiyeziyee wʋ nwʋ ɛkɛma siakehila anzɛnyɩɩ Bayɩbʋlʋ dɩyɛzumanlɛ a, áma ɛkã dɩyɛ bela nwʋ odwokɔ, mfomi yɩ́ ndwokɔ aditili mɔɔ ɛkɛbɛ kɛɛ ɛfa ndianwʋ ekilehile numɔ nɩ. Akʋ̃ fá ndianwʋ nzikalɛ mɔɔ ɩfalɩ mɔɔ yɛyɛ wɔ yɛ ɛbɩlawɔlɛ nu eɣile bela nɩ di egyima. (Mt 5:14-16; Mk 2:21; Lk 14:7-11) Má dɩka mɔɔ wʋ ediyelɛvʋlɔ nɩ ɩzʋ̃ nɩɩ mɔɔ izi nɩ ɩwʋwa wʋ adwɩnɩ nu. (Lk 5:2-11; Dwɔ 4:7-15) Sɛ ɔnwʋ kɛɛ ndwokɔ aditili be mɔɔ ehilehile yɩ ma ɩdɩ yɩ tʋ nɩ ɩhã yɩ ahʋnlɩnɩ a, ɩkɛma wʋ anyɩ ikele baaba.

KILÁ VIDIYO MƆƆ BƐYƐ YƖ DƖLAMA MƆƆ ISE NYIÁ ANYƖNLƖLELƐ WƆ ADƲWAVƲLƆYƐLƐ EGYIMA YI NU—TÚ MPƲNƖ WƆ WƲ EHILEHILELƐ NU—FÁ NDIANWƲ KILEHILE NDWOKƆ ADITILI YI NU, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla ti mɔɔ Bayɩbʋlʋ dɩyɛzumanlɛmaa be bekehyinyia mmʋwalɩyɛ na ama bɛadɩ Ɛhɛlɛlɛ Odwokɔ be tʋ a?

• Kɛ Anita ɩvalɩ ndianwʋ ihilehileli nɔhʋanlɛ odwokɔ mɔɔ ɩwɔ Wulomimaa 5:12 nu izeli a?

• Mɩnla tumi yɛ ndianwʋba ɩkɔhʋla ikenyia wɔ yɛ ediyelɛmaa nɩ bɔ zʋ a?

• Wɔ dasɩlɛlilɛ nu nɩ, mɩnla ti mɔɔ ɩsɛ kɛɛ yɛfa vidiyo azʋlɔtʋ nɩɩ ye nninyeni mɔɔ yɛfa yekilehile mɔɔ Gyehova yɩ ahyɩhyɛdɩ ɩva ɩma yɛ nɩ yedi egyima a?