Sɛ Bayɩbʋlʋ dɩyɛzumanlɛmaa bɔkɔzɔ Nyamɩnlɩ anyɩ a, ɩsɛ kɛɛ bɛhyɛ be dedi nu ɛzɩzɩbɛ. (Hib 11:6) Sa yɛkʋla yeduwa Sa Ɔkʋla Enyia Anyɩnlɩlelɛ Daabaa! buuku yi zʋ yɛbʋwa bɛ. Ɛhɛlɛlɛ ndwokɔ aditili, ndwokɔɣizialɛ mɔɔ itunwo adwɩnɩ, vidiyo azʋlɔtʋ mɔɔ ɩhyɛ ɛzɩzɩbɛ, mfonyini ngɩnlɩma nɩɩ nninyeni mɔɔ bosunzu nwʋmɔ bʋwɔ nɩ wɔ buuku yi nu. Sɛ yɛbʋwa bɛ ma benyia Kilisinyianɩ subanɩ ngɩnlɩma na bɛ nɩɩ Nyamɩnlɩ nyia abusunwawɔlɛ a, nɩ yɛlɛ nninyeni mɔɔ bɔkʋla bekyina sɩnɩ munwa nɩ yɛtʋʋ fapɩmɩ.—1Kɔl 3:12-15.

Ɩyɛ sɩ ɩma abiyemmɔ kɛɛ bekele bekeli kɛɛ sa bɔkʋla bɛfa Nyamɩnlɩ mɔɔ bɛánwʋ yɩ nɩ ɔhɔnwʋ. Meti ɩsɛ kɛɛ yɛbʋwa bɛ ma bɔnwʋ Gyehova na bede yi bedi.

KILÁ VIDIYO MƆƆ ISE SUMÁ “SA ƆKƲLA ENYIA ANYƖNLƖLELƐ DAABAA!” BUUKU NƖ FA HYƐ WƲ DEDI WƆ GYEHOVA NU ƐZƖZƖBƐ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• Kɛ ɩyɛ mɔɔ yɛnwʋ kɛɛ eliyema baalɛ nɩ iziyeziyeli yɩ nwʋ bʋwɔ ɩmanlɩ dɩyɛzumanlɛ nɩ a?

• Kɛ ɩvalɩ ndwokɔɣizialɛ mvʋlɔ ilili egyima ɩva ɩwʋwalɩ dɩyɛzumanlɛvʋlɔ yɩ ma ɩhanlɩ kezimɔ ɩtɩ nɣanlɩ wɔ Ayɩzaya 41:10, 13 nwʋ izeli a?

• Mɩnla ɔhʋanɩ zʋ yɛ vidiyo yi nɩɩ Ɛhɛlɛlɛ ndwokɔ yɩ ɩhanlɩ Bayɩbʋlʋ dɩyɛzumanlɛvʋlɔ yɩ a?

Mmenii sʋ̃maa bɛánwʋ mfasʋ mɔɔ ɩwɔ elelɛdɩyɛ nɩ zʋ, anzɛnyɩɩ bɛánwʋ kɛɛ ɩdɩ akyɛdɩ mɔɔ ɩzʋ̃ Nyamɩnlɩ ɛkɛnɩ. (Gal 2:20) Ɔzɔ ti, ɩsɛ kɛɛ yɛbʋwa bɛ ma benyia dedi wɔ Gyisɛsɩ yɩ elelɛ afɔlɩ yi nu.

KILÁ VIDIYO MƆƆ ISE SUMÁ “SA ƆKƲLA ENYIA ANYƖNLƖLELƐ DAABAA!” BUUKU NƖ FA HYƐ WƲ DEDI WƆ GYISƐSƖ NU ƐZƖZƖBƐ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• Kɛ ɩyɛ mɔɔ yɛnwʋ kɛɛ eliyema benyia nɩ iziyeziyeli yɩ nwʋ bʋwɔ ɩmanlɩ dɩyɛzumanlɛ nɩ a?

• Mɩnla ɔhʋanɩ zʋ yɛ ɩvalɩ ndwokɔ mɔɔ ɩwɔ “Pɩbɛ́ Sʋ̃maa” ɔfʋã ɛkɛnɩ ɩwʋwalɩ Bayɩbʋlʋ dɩyɛzumanlɛvʋlɔ yɩ a?

• Mɩnla ti mɔɔ nwʋmɔ ihyinyia paa kɛɛ yɛkɔwɔ mpayɩ yɛkɛma Bayɩbʋlʋ dɩyɛzumanlɛvʋlɔ a?