Bɔwʋlɩ mɩ wɔ ɔlʋbɔ 1955. Nɩ yɛdɩ nnwuakula mmenyia asã, na mamɩ yɛ mɩdɩ kuakula wɔ nu a. Minyinli wɔ twonwa be mɔɔ nnɛ bɔfʋlɛ yɩ Vantaa mɔɔ nɩ ibike Finland yɩ ngyakɛ ɔfʋã nu.

Mɩ maamɩ nlumanlɩ ɣa yɛ yɛlɩ Gyehova Dasɩvʋlɔ nɩ, ɩákyɛ bela yɛ bɔwʋlɩ mɩ a. Naasʋ̃ nɩ mɩ papa ɩábɛ nɔhʋanlɛ yɩ, na nɩ ɩáma ɔhʋanɩ ma mɩ maamɩ nɩɩ amɩyɛ nnwuakula yɩ suma dɩyɛ anzɛnyɩɩ ɩ nɩɩ yɛ kɔ dɩyɛzumanlɛ. Meti sɛ nɩ mɩ papa íni kɛnɩ a yɛ ɩ nɩɩ yɛ suma Bayɩbʋlʋ a.

Ɔzʋmɩ mu nnwuakula nu munwala, nɩ mɩábɛ kɛɛ mɩyɛ Gyehova zʋ azʋ̃nzɩzɩbɛ. Kɛ ndianwʋ nɩ, milili alʋbɔ asunwa nɩ, mi tikyia valɩ mʋ nwʋ ɛya baaba iluwakɛɛ mɩhanlɩ kɛɛ milédi verilättyjä (Pankeeki mɔɔ bɛva mmegyia bɛyɛ). Ɩvalɩ yɩ sa ɔkʋ̃ ɩzɔlɩ mɩ avʋ̃tʋ iwukoli mu munwa, na ɩvalɩ fɔɔkɩ yɩ ɩvalɩ pankeeki yi be kɛɛ ɩhyɛɛ mɩ kɛva kowula mu munwa nu, naasʋ̃ mʋwɔlɩ mmɔdɩnɩ mʋwɔlɩ fɔɔkɩ yɩ wɔ yi sa nu.

Milili alʋbɔ 12 nɩ, mɩ papa wuli. Mɛyɩ mɛda nɩ, nɩ mʋkʋla mʋkɔ dɩyɛzumanlɛ, na mmeliyema mɔɔ bɔwɔ asafʋ yi nu nɩ nyianlɩ mʋ nwʋ alagyɩ wʋwalɩ mɩ, na eyi hyɛlɩ mɩ ɛzɩzɩbɛ ma mʋhɔlɩ mɩ anyunu wɔ sunzuma ɔfʋã nu. Mʋwɔlɩ yɩ tʋ mɩyɛlɩ Bayɩbʋlʋ ɛɣɩngalɛ eɣile bela na muzumanlɩ asafʋ awuuku nɩ bʋwɔ. Eyi wʋwalɩ mɩ ma munlumanlɩ wɔ August 8, 1969 mmɩlɩ mɔ nɩ mili alʋbɔ 14 nɩ.

Muwieli sukuulu nɩ ɩákyɛ bela yɛ mʋwɔlɩ ɔhʋanɩbukolɛ egyima yɩ tʋ a. Dapɛnɩ ɛgyɩkɩ̃ɩ̃ be mɛda  nɩ muduli mʋhɔlɩ dɩka mɔɔ mmʋwalɩyɛ nwʋ hyinyia wɔ Pielavesi, twonwa mɔɔ ibike Finland manlɩ yɩ avinli dɩka be nɩ.

Pielavesi yɛ miyiyialɩ Sirkka, kɛdɛkɛ mɔɔ migyialɩ yɩ nɩ a. Mɔɔ ɩmanlɩ mɩbɛlɩ yi odwokɔ yɛ lɛ kɛɛ nɩ ɩkã yɩ nwʋ azɩ na ɩdɔ Gyehova sʋ̃. Nɩ yɩ anyɩ ɩáwʋlʋ dibilɛ anzɛnyɩɩ nnwʋnlamɩ ɔfʋã nu nninyeni. Nɩ yɛpɛ kɛɛ yɛyɛ mɔɔ yɛkɔhʋla bela yɛsʋ̃mɩ Gyehova ɩávalɩ nwʋmɔ egyima bela mɔɔ bɛkɛva kowula yɛ sa wɔ yɩ ɔzʋ̃mɩnlɛ nu nɩ. Yegyialɩ wɔ March 23, 1974. Kɛ ankɩ yɛkɔhɔ honeymoon nɩ, yɛhɔ yɛzʋ̃mɩnlɩ wɔ Karttula, dɩka mɔɔ nɩ behyinyia ɛlawulowɔlɛmaa sʋ̃maa nɩ.

Wɔ yɛ agyiahʋnlɩ yɩ ahyɛasɩ pɛɛ nɩ, Gyehova la yɩ ali kɛɛ sa ɩfa mɔɔ yehyinyia nɩ ɩma yɛ. (Mt. 6:33) Kɛ ndianwʋ nɩ, mmɩlɩ mɔ nɩ yɛwɔ Karttula nɩ, nɩ yéni kaalɩ. Ahyɛasɩ yɩ, nɩ yɛfa baskɩlɩ yetu ɔhʋanɩ. Naasʋ̃ nɩ ɛpɛ mmɩlɩ ba a, oyumi yɛ ɛyɛbɛ paa, meti nɩ sɛ yɛkɔhʋla yɛkɛyɛ asafʋ yɩ azɩlɛ-sini yi nu egyima yɛkɔhɔ aɣinzi a, nɩ yehyinyia moto anzɛnyɩɩ kaalɩ. Naasʋ̃ nɩ yéni ozukua mɔɔ yɛkɛva yɛkɔdɔ ebiye.

Mɩ anlima ebani ɣa gyelalɩ yɛ wɔ mmɩlɩ mɔ nɩ yɛáhila ɔhʋanɩ kʋlaa. Ɩvalɩ yɩ kaalɩ ɩmanlɩ yɛ, na nɩ bɛyɛ nwʋmɔ ahɛlɛta munwatĩĩ. Mɔɔ nɩ ihyinyia yɛ lɛ kɛɛ yɛkɔdɔ pɛtulo yekogua nu. Akʋ̃ dɩyɛ nɩ yɛ sa hã mɔɔ yehyinyia nɩ.

Gyehova manlɩ yɛnwʋnlɩ kɛɛ ikeli yɛ nnwʋnlamɩ ɔfʋã nu ahyinyiadɩ nwʋ egyima. Yɛ dɩyɛ yɛ lɛ kɛɛ yɛkɛva Bulombunlililɛ yɩ yekeli bɔmʋnlɩ.

Yɛhɔlɩ Ɔhʋanɩbukolɛmaa Sukuulu wɔ 1978 nɩ, Raimo Kuokkanen a mɔɔ nɩ ɩdɩ ye ehilehilelɛmaa yɩ bo nu ɔkʋ̃ hyɛlɩ yɛ ɛzɩzɩbɛ kɛɛ yɛvɩlɩ́ Gɩlɩyadɩ fɔɔmɩ. Meti yɛwɔlɩ yɩ tʋ kɛɛ yesumaa Bʋlɔfʋlɔ ndɛnɩ na ama yɛahʋla yɛahɔ Gɩlɩyadɩ Sukuulu yi be. Naasʋ̃ ansaana yɛkɛvɩlɩ fɔɔmɩ yɩ nɩ, bɔdʋlɩ salɛ bɔvʋlɔlɩ yɛ kɛɛ yɛhɔ́ yɛzʋ̃mɩ wɔ Finland Bɛtɩlɩ wɔ 1980. Ɔzɔ mmɩlɩ nɩ, nɩ Bɛtɩlɩmaa bɛáhʋla bɛfɩlɩ Gɩlɩyadɩ Sukuulu fɔɔmɩ yɩ be. Naasʋ̃ nɩ yɛpɛ kɛɛ yɛsʋ̃mɩ wɔ dɩka mɔɔ Gyehova pɛ yɩ na kɛ dɩka mɔɔ yɛpɛ a. Meti yeleli yedianlɩ numɔ yɛhɔlɩ. Naasʋ̃ yɛhɔlɩ zʋlɔ yezumanlɩ Bʋlɔfʋlɔ ndɛnɩ yɩ na ama eɣile be sɛ yenyia ɔnwʋmɔ ɔhʋanɩ a, yɛahɔ Gɩlɩyadɩ sukuulu yi be.

Alʋbɔ ɛgyɩkɩ̃ɩ̃ be mɛda nɩ, Ɔhʋanɩhilelɛ Okuwu nɩ leli dianlɩ numɔ kɛɛ Bɛtɩlɩmaa kɔhʋla kɛvɩlɩ  Gɩlɩyadɩ Sukuulu fɔɔmɩ yɩ be. Ndɛndɛ la, yɛvɩlɩlɩ fɔɔmɩ yɩ be. Naasʋ̃ kɛ ebiye a nɩ yɛ anyɩ iále wɔ Bɛtɩlɩ ti a, mfomi nɩ yɛpɛ kɛɛ yɛda yɛ nwʋ ali kɛɛ yeziyeziye yɛ nwʋ kɛɛ yɛkɔhɔ kɔzʋ̃mɩ wɔ dɩka bela mɔɔ mmʋwalɩyɛ nwʋ hyinyia nɩ. Bɔdʋlɩ salɛ bɔvʋlɔlɩ yɛ kɛɛ yɛhɔ́ Gɩlɩyadɩ Sukuulu mɔɔ ɩtɔ zʋlɔ 79 nɩ be wɔ September 1985. Bɛvalɩ yɛ bɔhɔlɩ Colombia.

Wɔ Colombia nɩ, bɛmanlɩ yelili bɔmʋnlɩ yɛhɔ yɛzʋ̃mɩnlɩ wɔ Bɛtɩlɩ. Mʋwɔlɩ mmɔdɩnɩ kɛɛ mɩkɛyɛ mɔɔ mʋkɔhʋla bela wɔ mi egyimalilɛ yɩ nu. Naasʋ̃ wɔ alʋbɔ ɔkʋ̃ mɛda nɩ, mɩdɩlɩ nɣanlɩ kɛɛ ɩsɛ kɛɛ bɛsɩnza ye egyimalilɛ yɩ nu. Ɔzɔ mmɩlɩ yɩ nkʋ̃ la yɛ mɩhanlɩ kɛɛ bɛzɩnzá mi egyimalilɛ yɩ nu a. Mɛyɩ mɛda nɩ bɛmanlɩ yɛhɔ yɛzʋ̃mɩnlɩ kɛɛ odwokɔbadɛlɛlɛmaa wɔ Neiva mɔɔ ɩwɔ Huila mansini yi nu.

Ɔzʋmɩ mu nnwuakula nu munwala nɩ, nɩ mɩ anyɩ deli dasɩlɛlilɛ egyima yɩ nwʋ. Mmɩlɩ mɔ nɩ mɩdɩ ɔhʋanɩbukolɛvʋlɔ wɔ Finland mɔɔ nɩ milékyialɩ nɩ, nɩ ɩyɛ a mʋkɔ dasɩlɛlilɛ ɔzʋmɩ nwɔnɩ dɛkɛdɛkɛ kɔbʋmɩ ohunluma dasuwo nu. Yegyialɩ fʋlɔ yɩ sʋ̃, nɩ mɩ nɩɩ Sirkka kɔ dasɩlɛlilɛ a yɛáɣa awudo kyɩ̃. Sɛ yɛkɔ dasɩlɛlilɛ wɔ aɣinzi aɣinzi a, ɩyɛ a nɩ yɛda yɛ kaalɩ nu po. Nɩ eyi tɩ mmɩlɩ mɔ yɛfa yetua ɔhʋanɩ nɩ zʋ, na ɩma yɛbɔ egyima yɩ tʋ ndɛ wɔ eɣile mɔɔ ili kɛnɩ nɩ.

Kɛ odwokɔbadɛlɛlɛmaa nɩ, yezia yenyianlɩ anyɩnlɩlelɛ mɔɔ nɩ yɛwɔ wɔ dasɩlɛlilɛ egyima yɩ nu nɩ dɔkʋ̃. Yɛ asafʋ yɩ yɛlɩ kezi, na nɩ mmeliyema mmenyia nɩɩ mmaalɛ mɔɔ bɔwɔ Colombia yɩ bobu dɩyɛ, bɔwɔ ɔlɔlɛ, na nɩ bekile nninyeni nwʋ anyɩnlɩzɔlɛ sʋ̃.

Wɔ Neiva nɩ, nɩ ahyonwa be bike yɛ mɔɔ Gyehova Dasɩvʋlɔ ɔkʋ̃ po íni kɛnɩ. Nɩ mʋdwɩnɩ kezimɔ odwokɔba nɩ kodwu ɔzɔ ahyonwa nɩ zʋ nɩ nwʋ. Iluwa bɛsabɛsayɛlɛ mɔɔ nɩ ɩkɔlɩɩ zʋlɔ wɔ kɛnɩ nɩ ti, nɩ sɛ ɛdɩ ɛyɛvʋlɔ a ɩyɛ ɛyɛlɛ paa. Meti mʋwɔlɩ Gyehova mpayɩ kɛɛ ɩmá twonwa yi nu maa bo nu ɔkʋ̃ ɩɣá ɩyɛ Dasɩvʋlɔ. Nɩ musunzu kɛɛ ɩsɛ kɛɛ ɔzɔ enii nɩ ɩbʋwa Neiva twonwa yi nu kɛnɩ isuma nɔhʋanlɛ yɩ. Meti mizia mʋwɔlɩ mpayɩ kɛɛ sɛ inuma iwie a, yɩ nwʋ kɛɣa kɔwʋkwa wɔ sunzuma ɔfʋã nu, na iazia ɩahɔ yi twonwa zʋ ɩahɔ ɩahã odwokɔba yɩ. Ankɩ ɩsɛ kɛɛ mʋnwʋ yɩ kɛɛ Gyehova zi kezimɔ ikeli bʋwabɩlɛ yɩ nwʋ egyima ɩtɛla mɩ.

Mɛyɩ mɛda pɛɛ nɩ, mɩ nɩɩ abɩlantɩyɛ be mɔɔ bɔfʋlɔ yɩ Fernando González wɔlɩ yɩ tʋ kɛɛ yesumaa Bayɩbʋlʋ yɩ. Nɩ ɩda Algeciras, ɛkɛnɩ kɩnla ahyonwa mɔɔ nɩ Gyehova Dasɩvʋlɔ bela íni kɛnɩ nɩ nwʋ. Nɩ Fernando tua ɔhʋanɩ kilomita 50 (mayɛlɩ 30) dapɛnɩ bela ɩba Neiva ɩba ɩyɛ egyima. Nɩ isiyeziye yɩ nwʋ bʋwɔ ɩma ye dɩyɛzumanlɛ yɩ, na ɩákyɛ bela yɛ ɩwɔlɩ yɩ tʋ kɛɛ ɩkɔɔ asafʋ ayiyialɩyɛ eɣile bela a. Ɔzʋmɩ dapɛnɩ mɔɔ ili bɔmʋnlɩ yɩ la mɔɔ mɩ nɩɩ Fernando zumanlɩ dɩyɛ nɩ yɛ ɩwɔlɩ yɩ tʋ kɛɛ ikunwahunwaa yi twonwa zʋ maa be bo munwa ɩkɛva mɔɔ izuma wɔ Bayɩbʋlʋ yi nu nɩ ikehilehile bɛ a.

Wɔ aziyianɩ ahyiã mɛda nɩ, Fernando nlumanlɩ wɔ January 1990. Mɛyɩ mɛda nɩ ɩɣa ɩyɛlɩ ɔhʋanɩbukolɛvʋlɔ. Sikalɛyɩ mɔɔ Dasɩvʋlɔ ɔkʋ̃ ɣa Algeciras nɩ, Bɛtɩlɩ nwʋnlɩ kɛɛ sa bɔkʋla bɛfa ɔhʋanɩbukolɛmaa aditili bɔkɔ kɛ. Wɔ February 1992 nɩ, bɛdɩlɩ asafʋ wɔ twonwa yi nu.

 Asʋ̃ Fernando hanlɩ odwokɔba yɩ hileli yi twonwa zʋ maa yɩ la a? Anhã! Igyialɩ mɛda nɩ, ɩ nɩɩ yɩ yɩ duli hɔlɩ San Vicente del Caguán. Ɛkɛnɩ sʋ̃ nɩ Dasɩvʋlɔ bela íni kɛnɩ. Bɔwʋwalɩ ma bɛyɩkyɩlɩ asafʋ wɔ kɛ. Wɔ 2002 nɩ, Fernando ɣa yɛlɩ mansini zʋ ehilalɛvʋlɔ. Na ɩ nɩɩ yɩ yɩ Olga bɛyɛ ɔzɔ egyima yɩ nkʋ̃ʋ̃ babʋmɩ nnɛ.

Ozumanlɛnwʋnlɛ eyi ma mʋnwʋ kɛɛ, nwʋmɔ hyinyia kɛɛ yɛbɔ nninyeni pɔkyɩɩ mɔɔ ɩfalɩ ye egyimalilɛ nwʋ mpayɩ. Gyehova yɛ nninyeni mɔɔ yɛlɔ́kʋla yɛkɛyɛ kyɩ̃. Debe yɩzayɩ ɩdɩ yi egyini a, na kɛ yɛ dɩyɛ a.—Mt. 9:38.

Wɔ 1990 nɩ, bɛmanlɩ yɛhɔ yɛyɛlɩ mansini egyima yɩ. Mansini mɔɔ ili bɔmʋnlɩ mɔɔ yɛyɛlɩ numɔ egyima nɩ, nɩ ɩwɔ Colombia twonwa kezile Bogotá nu. Nɩ ye kunlu tu kɛɛ yɛlɔ́kʋla yɛkɛyɛ ye egyimalilɛ yɩ bʋwɔ, iluwakɛɛ nɩ mɩ nɩɩ mɩ yɩ yɛtɩ nɣanlɩ kɛɛ yɛ́dɩ mmenii aditili bela na yéni nnimidi sʋnʋnkʋ̃ bela sʋ̃. Na nɩ yɛlɛ́hyɛlɩda yɛlɔ́bʋwalɩ twonwa kezile mɔɔ numɔ yɛ ɛhyɩmɛ zɔ nu kyɩ̃. Naasʋ̃ Gyehova lili yɩ anʋhʋba mɔɔ ɩwɔ Fɩlɩpɩmaa 2:13 nɩ zʋ, mɔɔ ise: “Sianti yɛ lɛ kɛɛ, Nyamɩnlɩ yɛ ɩyɛ egyima wɔ mʋnlʋmmɔ bɛ ahʋnlɩnɩ nu eɣile bela a, na ɩma mʋnlʋmmɔ bɔkʋla bɛyɛ nninyeni mɔɔ mɛyɩ Nyamɩnlɩ ɩpɛ yɩ nɩ.”

Aɣinzi yi, bɛmanlɩ yɛhɔ yɛyɛlɩ egyima wɔ mansini be mɔɔ ɩwɔ Medellín, twonwa mɔɔ ahyɛasɩ yɩ mɩhanlɩ nwʋmɔ odwokɔ yi nu. Mmenii mɔɔ bɔwɔ kɛnɩ nɩ, nɩ bɔnwʋ bɛsabɛsayɛlɛ nkʋ̃ʋ̃ ma nɩ ɩáyɛ bɔ nnwʋánlɩ dɔkʋ̃. Kɛ ndianwʋ nɩ, eɣile ɔkʋ̃ be, nɩ mɩ nɩɩ abiye yesumaa dɩyɛ wɔ pika be nu, na yɛdɩlɩ kɛɛ bɔtʋdʋʋ tui wɔ punwuanu. Ankɩ mɩdaa azɩ vuanu. Naasʋ̃ mɩ Bayɩbʋlʋ zumanlɛnii yi mɛyɩ, ɩdʋwalɩ zʋlɔ ɩɣɩnganlɩ nkyɩkyɛmi yi. Nɩ ɩávalɩ yɩ nwʋ kʋlaa. Mmɩlɩ mɔ ɩɣɩnganlɩ nkyɩkyɛmi yi iwieli nɩ, ɩhanlɩ kɛɛ ɩbaa, yɛ ivindenli a. Ɩákyɛ bela yɛ izia ɩɣalɩ a. Na nɩ nnwuakula anwɩ̃ kɩnla yɩ nwʋ, na ɩhanlɩ kɛɛ, “Eyi mɛyɩ fa kyɛ mɩ o, nɩ ɩsɛ kɛɛ mʋkɔ mɩfa mu nnwuakula yɩ.”

Nɩ ɩyɛ sʋ̃ a, yɛ nnwʋanlɩ kʋla ba da asianɩ nu. Mmɩlɩ be mɔɔ nɩ yɛyɛɛ abika-abika nu dasɩlɛlilɛ nɩ, mɩ yɩ duli tɔlɔnwa ɣalɩ mɩ pɛ mɔɔ nɩ yɩ nwʋ munwala ɩwʋsʋwʋsʋʋ. Ɩhanlɩ kɛɛ ankɩ abiye ɩtʋʋ tui ɩkɔwɔ yɩ. Eyi manlɩ mu kunlu hwɩnlɩ mɩ. Naasʋ̃ aɣinzi yi, yɛɣa yɛnwʋnlɩ yɩ kɛɛ nɩ enii kʋ̃ nɩ yɩ ɩlɔ́tʋ tui kɔwɔ Sirkka, mfomi nɩ ɩtʋʋ kɔwɔ benyia be mɔɔ nɩ iluwa yɩ pɛ.

Mmɩlɩ ɩkɔlɩɩ zʋlɔ nɩ, nɩ bɛsabɛsayɛlɛ yɩ ɩáyɛ yɛ atɩɩtɩɩ dɔkʋ̃. Kezimɔ Dasɩvʋlɔmaa mɔɔ nɩ bɔwɔ kɛnɩ daada nɩ gyinanlɩ bʋwabɩlɛ mɔɔ ɩyɛ sɩ ɩtɛla eyi po nu nɩ hyɛlɩ yɛ ɛzɩzɩbɛ. Yɛɣa yɛnwʋnlɩ kɛɛ sɛ Gyehova ɩbʋwaa bɛ dɩyɛ a, sa ɩbʋwa yɛzayɛ sʋ̃. Yɛvalɩ fʋlɔdulɛ mɔɔ ɛkɛnɩ mbanimbani va manlɩ yɛ nɩ sʋ̃ yɛyɛlɩ egyima. Yehilalɩ yɛ nwʋ bʋwɔ na yeyiakili nɣalɩyɛ yɩ yɛmanlɩ Gyehova.

Ɩwɔ numɔ, nɩ bʋwabɩlɛ yɩ be wɔ kɛnɩ a, ɩáhyɛda ɩyɛ ɛyɛlɛ kɛmɔ nɩ yesunzu nɩ. Eɣile ɔkʋ̃ be, mɩdɩlɩ nnɩ be mɔɔ nɩ ɩdɩ kɛɛ mɔɔ mmaalɛ anwɩ̃ be bedii mbevile ɛzɩzɩbɛ ɛzɩzɩbɛ wɔ pika mɔɔ nɩ yɛhɔ yegyela abiye wɔ numɔ nɩ mɛda. Nɩ sɛ mʋnwʋ kɛɛ abiyemmɔ bedii mbevile a, mɩábɛ yɩ kʋlaa. Naasʋ̃ pika yi diibenyia hanlɩ hileli mɩ kɛɛ mɩɣɩlá valanda yɩ nu na mɩɣa mihila dɩyɛ. Mʋhɔlɩ nɩ, ntʋlɔnkʋdɩ akoo anwɩ̃ yɛ nɩ bosumazumaa mbevile mɔɔ bɛ apaa nu maa bedi nɩ a.

Wɔ 1997 nɩ, bɛhanlɩ kɛɛ mʋhɔ́ mɩyɛ kilehilevʋlɔ wɔ Azʋ̃mɩvʋlɔ Ɛdɩdɩlɛ Sukuulu. b Nɩ mɩ anyɩ de kɛɛ mʋkɔhɔ asafʋ sukuulu azʋlɔtʋ, naasʋ̃ mɩádwɩnɩ nwʋmɔ kyɩ̃ kɛɛ mikenyia nwʋmɔ ɔhʋanɩ kezile mɔɔ ɩdɩ zɔ mɩkɛyɛ kilehilevʋlɔ wɔ sukuulu eyi nu be.

Aɣinzi yi, mʋzʋ̃mɩnlɩ kɛɛ manlɩ-avinli zʋ ehilalɛvʋlɔ. Naasʋ̃ mmɩlɩ mɔ bodualɩ ɔzɔ nhyɩhyɛlɩyɛ yɩ nu nɩ, mizia mʋhɔ mɩyɛlɩ mansini zʋ ehilalɛvʋlɔ. Meti mɩva alʋbɔ 30 mʋzʋ̃mɩ kɛɛ kilehilevʋlɔ nɩɩ mansini zʋ ehilalɛvʋlɔ. Minyia nyilalɛ sʋ̃maa wɔ egyimalilɛ eyimmɔ nu, naasʋ̃ kɛ eɣile bela yɛ nɩ ɩla azɩ a. Bɛmá mihilehile numɔ mihile bɛ.

Mɩdɩ abiye mɔɔ mɩ anyɩ tʋ yɛ sɩ paa. Eyi wʋwa mɩ ma migyina ndwokɔzɩzɩbɛ sʋ̃maa munwa. Naasʋ̃ itwu mmɩlɩ be a, nɩ mɩpɩlɩ mʋ nwʋ kɛɛ mikeli ɔhawʋ azʋlɔtʋ be nwʋ egyima wɔ asafʋ yi nu. Mmɩlɩ be, mɩhyɛlɩ abiyemmɔ kyɩngyɩ̃ɩ̃ kɛɛ bɛlá ɔlɔlɛ nɩɩ ntɩyasɩ ali behile mmenii mvʋlɔ. Naasʋ̃ nɩ eyimmɔ yɛ lɛ subanɩ azʋlɔtʋ mɔɔ nɩ mɩzamɩ sʋ̃ mihyinyia wɔ ɔzɔ mmɩlɩ nɩ paa.—Wul. 7:​21-23.

Iluwa mɩ mɛlɛkɛyɛlɛ ti, nɩ ɩyɛ a mɩ padi kolɔ paa. (Wul. 7:24) Mmɩlɩ be po, mʋwɔlɩ Gyehova mpayɩ kɛɛ ɩkɛyɛ baaba kɛɛ mikeyiaki odwokɔbadɛlɛlɛ egyima yɩ na miazia mɩahɔ Finland. Ɔzɔ nunuma nɩ mʋhɔlɩ dɩyɛzumanlɛ, na ndwokɔ mɔɔ mɩdɩlɩ nɩ hyɛlɩ mɩ ɛzɩzɩbɛ ma mʋnwʋnlɩ kɛɛ, ɩsɛ kɛɛ mʋtʋwa mi egyimalilɛ yɩ zʋ na mʋkɔ zʋlɔ mɩyɛ mɩ mɛlɛkɛyɛlɛ nwʋ egyima. Nnɛ munwala sɛ mɩkakɛ kezimɔ Gyehova wuwalɩ ɔzɔ mpayɩ yɩ a, ɩkã mɩ ahʋnlɩnɩ paa. Akʋ̃ sʋ̃, mɩ anyɩ sɔ kezimɔ Gyehova ɩzʋ̃ abʋtalɩ nu ɩwʋwalɩ ma milili mɩ mɛlɛkɛyɛlɛ zʋ nɩ.

Mɩ nɩɩ Sirkka yɛ anyɩ sɔ ɔnwʋmɔ ɔhʋanɩ kezile mɔɔ Gyehova va ma yɛ ma yɛva yɛ nnwʋanlɩ eɣile yɩ ɔfʋã kezile nɩ la yɛyɛ mmɩlɩ munwala ɔzʋ̃mɩnlɛ egyima nɩ. Mɩla Gyehova asɩ baaba sʋ̃ kɛɛ ɩma minyia ɛyɩlɛ mɔɔ ɩva ɔlɔlɛ nɩɩ nɔhʋanlɛlilɛ wʋwa mɩ wɔ ɔzɔ mmɩlɩ munwala nu.

Ɩlɛ́kyɛ na mianyia alʋbɔ 70 na mɩava ɔnwʋmɔ ɔhʋanɩ mɔɔ mʋwɔ kɛɛ kilehilevʋlɔ nɩɩ mansini zʋ ehilalɛvʋlɔ nɩ miadiã kɛnɩ. Naasʋ̃ eyi ɩáyɛ ɛyɛkɛ mɩ kʋlaa. Mɩnla ti a? Iluwakɛɛ mide midi paa kɛɛ mɔɔ Gyehova pɛ yɛ lɛ kɛɛ, yɛzʋ̃ yɛ ahʋnlɩnɩ munwala nu yɛkɛyɛ mɔɔ yɛ anwʋzɩzɩbɛ kɔhʋla yɛkɛva yɛkɛyɩ yɩ ayɛlɛ. (Mik. 6:8; Mk. 12:​32-34) Yɛáhyinyia ɔnwʋmɔ ɔhʋanɩ sʋnʋnkʋ̃ be ansaana yɛazɔ Gyehova anyɩ.

Sɛ mʋdwɩnɩndwɩnɩ ɔnwʋmɔ ɔhʋanɩ azʋlɔtʋ mɔɔ minyia nɩ nwʋ a, mʋnwʋ kɛɛ kɛ ebiye a mʋ nwʋ hyinyia tɛla mmenii mvʋlɔ anzɛnyɩɩ mʋwɔ nnimidi anzɛnyɩɩ adʋmɩ akyɛdɩ sʋnʋnkʋ̃ be ti a. Mfomi Gyehova yɩ adʋmɩ ti yɛ mɩ sa hanlɩ ɔzɔ ɔnwʋmɔ ɔhʋanɩ yɩ a. Ɩmanlɩ minyianlɩ ɔnwʋmɔ ɔhʋanɩ azʋlɔtʋ eyimmɔ ɩávalɩ nwʋmɔ mɩ mɛlɛkɛyɛlɛ azʋlɔtʋ nɩ. Mizi kɛɛ, sɛ kɛ Gyehova yɩ mmʋwalɩyɛ a, ankɩ mʋlɔ́kʋla mɩkɛyɛ mi egyima azʋlɔtʋ yɩ. Ɔzɔ ɔhʋanɩ yɩ zʋ nɩ, mʋkʋla mɩkã kɛɛ, mɩ mɛlɛkɛyɛlɛ la Nyamɩnlɩ yi tumi ali.—2 Kɔl. 12:9.