Asʋ̃ Ezi a?
Mɩnla ti mɔɔ nɩ mmenyia mɔɔ bɛ́dɩ Yizilayamaa kɩnla Bulombunli Devidi yɩ azogyiamaa yɩ nwʋ a?
NƖ MMENYIA be dɩkɛɛ Amɔnʋnii Zɛlɛkɩ, Hitinii Yulaya nɩɩ Mowabɩnii Yɩtɩma mɔɔ bɛ́dɩ Yizilayamaa nɩ kɩnla Devidi yɩ azogyiamaa yɩ nwʋ. a (1 Mm. 11:39, 41, 46) Nɩ “Kɛlɛtɩmaa, Pɛlɛtɩmaa nɩɩ Gaatɩmaa” sʋ̃ kɩnla Devidi yɩ azogyiamaa yɩ nwʋ. (2 Sa. 15:18) Ɩkɛyɛ kɛɛ Kɛlɛtɩmaa nɩɩ Pɛlɛtɩmaa nɩ, nɩ bɛ nɩɩ Fɩlɩsɩtiyiamaa nɩ wɔ abusunwawɔlɛ be. (Izi. 25:16) Nɩ Gaatɩmaa bɔzʋ̃ Fɩlɩsɩtiyiamaa bo twonwa Gaatɩ nu.—Dwh. 13:2, 3; 1 Sa. 6:17, 18.
Mɩnla ti mɔɔ Devidi valɩ mmenyia mɔɔ bɛ́dɩ Yizilayamaa hɩnlanlɩ yɩ azogyiamaa yɩ nwʋ a? Nɩ ɩwɔ anwʋlazʋ kɛɛ bekeli yɩ nɔhʋanlɛ na mɔɔ nwʋmɔ hyinyia paa nɩ bekeli Gyehova nɔhʋanlɛ. Kɛ ndianwʋ nɩ, The New Interpreter’s Dictionary of the Bible yɩ kã falɩ Kɛlɛtɩmaa nɩɩ Pɛlɛtɩmaa nwʋ kɛɛ: “Bɔhɔlɩ zʋlɔ belili Devidi nɔhʋanlɛ wɔ bʋwabɩlɛ azʋlɔtʋ mɔɔ nɩ numɔ yɛ sɩ po wɔ yi bulombunlililɛ yɩ nu.” Mɩnla ɔhʋanɩ zʋ a? Mmɩlɩ mɔ “Yizilaya mmenyia munwatĩĩ” dianlɩ Bulombunli Devidi kɛnɩ na bɔhɔ belili “benyia atunwadɩlɛvʋlɔ be mɔɔ bɔfʋlɔ yɩ Hyiiba” yɩ mɛda nɩ, Kɛlɛtɩmaa nɩɩ Pɛlɛtɩmaa nɩ hɔlɩ zʋlɔ lili Devidi nɔhʋanlɛ na bɔwʋwalɩ yɩ ma ilili Hyiiba zʋ nkunimi. (2 Sa. 20:1, 2, 7) Mmɩlɩ fʋlɔ sʋ̃, Bulombunli Devidi yɩ ɣa Adonayɩgya wɔlɩ mmɔdɩnɩ kɛɛ, mɛyɩ mfomi kɛɣa keli bulombunli tɛla kɛɛ Sɔlɔmɔnʋ keli bulombunli. Naasʋ̃ Kɛlɛtɩmaa nɩɩ Pɛlɛtɩmaa nɩ hɔlɩ zʋlɔ lili Devidi nɔhʋanlɛ na bɔwʋwalɩ ma bɔzʋwalɩ Sɔlɔmɔnʋ mɔɔ nɩ Gyehova ɩyɩ yɩ kɛɛ ilí Devidi yɩ dɩyɛ nɩ bulombunli.—1 Aw. 1:24-27, 38, 39.
Enii fʋlɔ mɔɔ ɩ́dɩ Yizilayanii mɔɔ ɩhɔlɩ zʋlɔ ilili Devidi nɔhʋanlɛ yɛ lɛ Gaatɩnii Yitayɩ. Yitayɩ nɩɩ yɩ azogyiamaa 600 wʋwalɩ Bulombunli Devidi mmɩlɩ mɔ Absɔlɔmɩ dɩlɩ atunwa na ɩlanɩnlɩ Yizilaya mmenyia bɛ ahʋnlɩnɩ ma bodwodwuli bediyialɩ Bulombunli Devidi nɩ. Bɔmʋnlɩ nɩ, Devidi hanlɩ hileli Yitayɩ kɛɛ iluwakɛɛ ɩdɩ ɛyɛvʋlɔ ti ɔzɔ kʋnɛ yɩ ɩ́dɩ yɩ kʋnɛ. Naasʋ̃ Yitayɩ hanlɩ kɛɛ: “Kɛ Gyehova da azɩ yɩ na mi diibenyia bulombunli sʋ̃ da azɩ yɩ, dɩka bela mɔɔ mi diibenyia bulombunli kɔhɔ nɩ, owulo nu o nnwʋanlɩ nu o, ɛkɛnɩ la yɛ wʋ akɛlɛ sʋ̃ kɔhɔ a!”—2 Sa. 15:6, 18-21.
Yitayɩ lili Devidi mɔɔ Gyehova ɩvɔ ngɔlɔ yɩ kɛɛ yi bulombunli nɩ nɔhʋanlɛ
Ɩwɔ numɔ kɛɛ nɩ Kɛlɛtɩmaa, Pɛlɛtɩmaa nɩɩ Gaatɩmaa yɩ bɛ́dɩ Yizilayamaa dɩyɛ, naasʋ̃ nɩ bede betiã numɔ kɛɛ Gyehova yɛ lɛ nɔhʋanlɛ Nyamɩnlɩ nɩ, na Devidi sʋ̃ yɛ Gyehova vɔ ngɔlɔ yɩ a. Kila kezimɔ Devidi yɩ anyɩ zɔlɩ mmenyia eyi mɔɔ belili nɔhʋanlɛ bɛmanlɩ yɩ na begyinanlɩ yɩ ɔfʋã nɩ!
a Nyamɩnlɩ yɩ mmɛla mɔɔ bɛhã nwʋmɔ odwokɔ wɔ Ditilonɔmi 23:3-6 nɩ, nɩ ɩáma ɔhʋanɩ ma Amɔnʋmaa nɩɩ Mowabɩmaa bɔkɔ Yizilayamaa asafʋ yi nu. Naasʋ̃ ɩkɛyɛ kɛɛ nɩ mmɛla eyi ɩpɛɛ kehile kɛɛ, íni kɛɛ bɛma ɔhʋanɩ ma ɔzɔ mmenii nɩ bɛba bɛyɛ Yizilayamaa wɔ mmɛla ɔhʋanɩ zʋ, na kɛ ebiye a nɩ isi bɛ ɔhʋanɩ kɛɛ bɛ nɩɩ Nyamɩnlɩ yɩ mmenii kɔwɔ anzɛnyɩɩ bɔkɔwʋwa bo nu. Kila Insight on the Scriptures, Volume 1, owu. 95.
