1. Mɩnla yɛ Gyehova pɛ kɛɛ yɛyɛ a?

 MMƖLƖ mɔ ɩyɛ anyɩnlɩlelɛ paa wɔ agyiahʋnlɩmaa bɛ ɛbɩlawɔlɛ nu nɩ, numɔ ɔkʋ̃ yɛ lɛ mmɩlɩ mɔ bɔwʋ bɛ ɣa. Ɩwɔ numɔ kɛɛ bɛ ɣa yɩ tʋ bʋlɔ ma bɛ dɩyɛ, naasʋ̃ bɛlɛ́pɛ yɩ kɛɛ ɩkɔhɔ zʋ kɛyɛ abɔdɔma. Nɔhʋanlɛ nu nɩ, sɛ bɔnwʋ kɛɛ bɛ ɣa nɩ ɩáhʋla inyi a, ɩkɛha bɛ paa. Ɔzɔ la yɛ sɛ Gyehova nwʋ kɛɛ yɛwɔ yɩ tʋ kɛɛ yesumaa yɩ nwʋ dɩyɛ a, yɩ anyɩ de paa. Naasʋ̃ Gyehova ɩábɛ kɛɛ yɛkɔ zʋlɔ yɛyɛ nnwuakula wɔ sunzuma ɔfʋã nu. (1 Kɔl. 3:1) Mfomi, ɩkã ikile yɛ kɛɛ yɛyɛ́ “mbanimbani” anzɛnyɩɩ yenyí wɔ sunzuma nu.—1 Kɔl. 14:20.

2. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Sɛ bɛkã kɛɛ yɛyɛ́ mbanimbani anzɛnyɩɩ yenyí wɔ sunzuma nu a, kɛ yɩ tʋ kile a? Mɩnla ɔhʋanɩ zʋ yɛ yɛkɔhʋla yekenyi kɛɛ Kilisinyiamaa mɔɔ yɛ nwʋ wʋkwa a? Mɩnla ɔhʋanɩ zʋ yɛ sunzuma ɔfʋã nu alɩyɛ mɔɔ ɩyɛ ɛzɩzɩbɛ nɩ, ɩbʋwa yɛ ma yenyi a? Na mɩnla ti mɔɔ íni kɛɛ yede yɛ nwʋ yedi sʋ̃maa a? Wɔ dɩyɛzumanlɛ eyi nu nɩ, yekenyia ndwokɔɣizialɛ eyimmɔ nwʋ munwalɩyɛ.

SƐ BƐKÃ KƐƐ YENYÍ WƆ SUNZUMA NU A, KƐ YƖ TƲ KILE A?

3. Sɛ bɛkã kɛɛ yenyí wɔ sunzuma nu a, kɛ yɩ tʋ kile a?

³ Wɔ Bayɩbʋlʋ nu nɩ, Giliki odwokɔpɔkɔ mɔɔ bekile yɩ tʋ kɛɛ “mbanimbani” kɔhʋla sʋ̃ kehile kɛɛ “abiye mɔɔ yɩ nwʋ wʋkwa” anzɛnyɩɩ “ili munli.” a (1 Kɔl. 2:6) Kɛmɔ abɔdɔma kʋla nyi ba yɛ ebani nɩ, ɩsɛ kɛɛ yɛzayɛ sʋ̃ yɛkɔ zʋlɔ yenyi wɔ yɛ nɩɩ Gyehova avinli abusunwawɔlɛ nu. Wɔ ɔzɔ ɔhʋanɩ yɩ zʋ nɩ yɛkɛɣa kɛyɛ Kilisinyiamaa mɔɔ yɛ nwʋ wʋkwa. Sɛ yɛ nwʋ kʋkwa po a, íni kɛɛ yeyiaki kɛɛ yekodu mpʋnɩ wɔ yɛ nɩɩ Gyehova avinli abusunwawɔlɛ nu. (1 Tim. 4:15) Kɛ yɛdɩ nnwuakula anzɛnyɩɩ mbanimbani nɩ, ye nu bela kɔhʋla kɛyɛ Kilisinyianii mɔɔ yɩ nwʋ  wʋkwa. Naasʋ̃ kɛ ɩkɛyɛ na yɛanwʋ kɛɛ yɛ nwʋ wʋkwa a?

4. Mɩnla yɛ ɩma yɛnwʋ kɛɛ abiye dɩ Kilisinyianii mɔɔ yɩ nwʋ wʋkwa a?

⁴ Kilisinyianii mɔɔ yɩ nwʋ wʋkwa dɩ abiye mɔɔ ɩyɛ mɔɔ Gyehova pɛ kɛɛ ɩyɛ nɩ munwatĩĩ. Ɩáyɩyɩ numɔ ɩyɛ mɔɔ yɩzayɩ ɩpɛ yɩ. Ɩwɔ numɔ kɛɛ ɩtɔ sini na ikeli mfʋmɩ dɩyɛ, naasʋ̃ eɣile ɔkʋ̃ bela ɩyɛ mɔɔ ɩkɔhʋla kɛɛ ɩkɛma yi nzunzunlɩyɛ nɩɩ yɩ nyɛlɩyɛ nɩɩ Gyehova yɩ apɛdɩ keyiyia. Iwula subanɩ fʋlɔ yɩ na ɩkɔ zʋ ɩbɔ mmɔdɩnɩ kɛɛ ɩkɔnwʋ Gyehova yɩ adwɩnɩ wɔ nninyeni nwʋ. (Ɛfɩ. 4:​22-24) Izuma kɛɛ ikegyina Gyehova yɩ mmɛla nɩɩ yi egyinalɛzʋ-ndwokɔ zʋ ikezizi abɔkɔ mɔɔ nɣɛlɛbɛ wɔ nu. Meti iáhyinyia mmɛla sʋ̃maa ansaana ɩanwʋ mɔɔ ɩsɛ kɛɛ ɩyɛ. Na sɛ isi pɔkɔ be sʋ̃ a, iminyia yɩ nwʋ kɛɛ ɩkɛva kɛyɛ egyima.—1 Kɔl. 9:​26, 27.

5. Mɩnla yɛ ɩkɔhʋla kɔdʋ Kilisinyianii mɔɔ yɩ nwʋ lɔ́kʋkwalɩ a? (Ɛfɩsɛsɩmaa 4:​14, 15)

⁵ Naasʋ̃ Kilisinyianii mɔɔ yɩ nwʋ lɔ́kʋkwalɩ nɩ, ɩma “awohwimaa bɛfa bɛ ehilehilelɛ” bɛdahɩlɩ yɩ ndɛndɛ. Ide akɩnhã-akɩnhã, amanɩyɛwɔlɛ mɔɔ ɩ́dɩ nɔhʋanlɛ nɩɩ ɔvʋakɩlɛmaa bo ndwokɔ idi. b (Kɩnga Ɛfɩsɛsɩmaa 4:​14, 15.) Ɔzɔ enii nɩ, ɩáhyɛ nɩ ɩtwɩ̃ɩ̃ nungunlu, ɩtwɩ̃ ndwokɔ nu, ɩfa ɛya ndɛndɛ, na sɛ iyiyia tanɩ nwʋ odwohilalɛ a, ɩáhʋla kyina yi munwa.—1 Kɔl. 3:3.

6. Fa ndianwʋ kilehile kezimɔ Kilisinyiamaa benyi na bɔ nwʋ kʋkwa nɩ nu. (Kila mfonyini yi sʋ̃.)

⁶ Kɛmɔ yeli bɔmʋnlɩ yɛhã nɩ, Bayɩbʋlʋ yɩ fa sunzuma ɔfʋã nu enyinlɛ tindiã kezimɔ kuakula nyi nɩ nwʋ. Kuakula mɛyɩ íni dɩyɛnunwʋnlɛ bela, meti ihyinyia kɛɛ ebani be ma yɩ anyɩ kɔ yɩ nwʋ na ɩbɔ yɩ nwʋ banɩ. Kɛ ndianwʋ nɩ, sɛ enlilɛ be nɩɩ yɩ ɣa baalɛ botuaa kaalɩ ɔhʋanɩ a, sa ɩkã ikile yi kɛɛ ɩzɔ́ yɩ sa nu. Mmɩlɩ mɔ kuakula yɩ inyii nɩ, ebiye a enlilɛ yɩ kɛma ɔhʋanɩ ma yɩzayɩ nkʋ̃ kodua ɔhʋanɩ yɩ, naasʋ̃ ɩkɛhakɛ yɩ kɛɛ, ɩyɛ a ihilá kɛɛ kaalɩ bela lɛ́ba ansaana iadua numɔ. Sɛ kuakula yɩ yɛ ebani a, yɩzayɩ ɩkɔnwʋ kezimɔ ɩkɔwɔ yɩ nwʋ banɩ wɔ asianɩ mɔɔ ɩdɩdɩ zɔ nwʋ. Kɛmɔ nnwuakula hyinyia mmʋwalɩyɛ wɔ ebani kɛnɩ na ɩawɔ bɔ nwʋ banɩ wɔ asianɩ nwʋ nɩ, ɔzɔ la sʋ̃ yɛ Kilisinyiamaa mɔɔ bɔ nwʋ lɔ́kʋkwalɩ nɩ ta hyinyia mmʋwalɩyɛ wɔ Kilisinyiamaa mɔɔ bɔ nwʋ wʋkwa nɩ bɛ kɛnɩ a. Eyi kɛma bɔkɔwɔ bɔ nwʋ banɩ wɔ sunzuma ɔfʋã nu asianɩ nwʋ na bɛazizi abɔkɔba. Naasʋ̃ Kilisinyiamaa mɔɔ bɔ nwʋ wʋkwa mɛyɩ, sɛ besii pɔkɔ a, bosunzu  Bayɩbʋlʋ nu ndwokɔ nwʋ bɔnwʋ Gyehova yɩ adwɩnɩ wɔ nwʋ, akʋ̃ bɛfa mɔɔ bosuma nɩ bɛyɛ egyima pɛpɛɛpɛ.

7. Asʋ̃ Kilisinyiamaa mɔɔ bɔ nwʋ wʋkwa nɩ hyinyia mmenii mvʋlɔ bɔ mmʋwalɩyɛ a?

⁷ Asʋ̃ eyi kile kɛɛ Kilisinyianii mɔɔ yɩ nwʋ wʋkwa nɩ, iléhyinyia abiyela yɩ mmʋwalɩyɛ a? Anhã. Ɩyɛ a bɛzabɛ sʋ̃ behyinyia mmʋwalɩyɛ. Naasʋ̃ abiye mɔɔ yɩ nwʋ lɔ́kʋkwalɩ nɩ, ikila ɔhʋanɩ kɛɛ mmenii kɛhã mɔɔ ɩsɛ kɛɛ ɩyɛ nɩ bekile yi, anzɛnyɩɩ besizi abɔkɔ mɔɔ ɩsɛ kɛɛ yɩzayɩ isizi nɩ bɛma yɩ. Naasʋ̃ Kilisinyianii mɔɔ yɩ nwʋ wʋkwa mɛyɩ, sɛ ibizia mmʋwalɩyɛ wɔ bɛzabɛ mɔɔ bezi nɣɛlɛbɛ na bɔwɔ ozumanlɛnwʋnlɛ bɛ kɛnɩ po a, izi kɛɛ ɩdɩ yɩzayɩ yɩ asɛdɩ kɛɛ isizi abɔkɔ, na “abiyela ɩbazʋwa yɩzayɩ yɩ adɩsʋwa.”—Gal. 6:5.

8. Mɩnla ɔhʋanɩ zʋ yɛ Kilisinyiamaa mɔɔ bɔ nwʋ wʋkwa nɩ bo nu bela dɩ sʋnʋnkʋ̃ a?

⁸ Wɔ nnwʋnlamɩ ɔfʋã nu nɩ, ɩsʋnɩ kezimɔ abiyela yi eniiwudo dɩ. Ɔzɔ la sʋ̃ yɛ Kilisinyiamaa mɔɔ bɔ nwʋ wʋkwa nɩ dɩ a. Kɛ ndianwʋ nɩ, abiye wɔ nɣɛlɛbɛ paa, abiye sʋ̃ wɔ akɛnɣazɩzɩbɛ, abiye yi kunlu ɩdɩyɛnɛ, na abiye sʋ̃ wɔ nwɔkɛnwʋnlɛ. Akʋ̃ sʋ̃, Kilisinyiamaa mɔɔ bɔ nwʋ wʋkwa kɔhʋla keyiyia bʋwabɩlɛ kʋ̃, naasʋ̃ bo nu bela kɔhʋla kegyina Bayɩbʋlʋ nu egyinalɛzʋ-ndwokɔ zʋ kezi pɔkɔ mɔɔ ɩdɩ sʋnʋnkʋ̃ wɔ yɩ ɔhɔnwʋ yɩ dɩyɛ nwʋ. Eyi ta si wɔ mmɩlɩ mɔ ɩsɛ kɛɛ Kilisinyianii bela kyina yɩzayɩ yi tiwʋwaba zʋ si pɔkɔ nɩ. Iluwa eyi ti, bɛáwuwa bɔ ɔhɔnwʋ ndɛnɩ wɔ yɩ pɔkɔzilɛ be nwʋ iluwakɛɛ ɩdɩ sʋnʋnkʋ̃ wɔ bɛ dɩyɛ nwʋ nɩ ti. Mfomi, bɛma ɔkʋ̃yɛlɛ mɔɔ ɩwɔ bɛ avinli nɩ nwʋ hyinyia bɛ.—Wul. 14:10; 1 Kɔl. 1:10.

MƖNLA ƆHƲANƖ ZƲ YƐ YƐKƆHƲLA YEKENYI KƐƐ KILISINYIAMAA MƆƆ BƆ NWƲ WƲKWA A?

9. Kɛ yekenyi wɔ sunzuma nu nɩ, asʋ̃ ɩba mbʋanlɩ a? Kilehile nu.

⁹ Kuakula mɛyɩ sɛ bɔwʋ yɩ a, ɔhʋanɩ bela zʋ sa inyi. Naasʋ̃, kɛ yekenyi wɔ sunzuma ɔfʋã nu nɩ ɩáɣa mbʋanlɩ, gyɩsɛ yɛyɛ nwʋmɔ egyima. Kɛ ndianwʋ nɩ, Kilisinyiamaa mɔɔ nɩ bɔwɔ Kɔlɛntɩ nɩ, beleli odwokɔba nɩ belili, bonlumanlɩ, benyianlɩ sunzuma nwanzanwanza yɩ, na benyianlɩ fʋlɔdulɛ mɔɔ sʋ̃mavʋlɔ Pɔɔlʋ va manlɩ bɛ nɩ zʋ mfasʋ. (Egy. 18:​8-11) Naasʋ̃ bo onlumanlɛ mɛda alʋbɔ be nɩ, nɩ bo nu sʋ̃maa lanwʋ la dɩ nnwuakula wɔ sunzuma ɔfʋã nu. (1 Kɔl. 3:2) Kɛ ɩkɛyɛ na eyi be ɩádʋlɩ yɛ a?

10. Mɩnla yɛ ɩsɛ kɛɛ yɛyɛ na ama yɛ nwʋ ɩawʋkwa a? (Dwuudu 20)

¹⁰ Sɛ yɛ nwʋ kɔhʋla kɔwʋkwa a, ɩsɛ kɛɛ yenyia ɛpɛ kɛɛ yekenyi wɔ sunzuma ɔfʋã nu. Bɛzabɛ mɔɔ “bɔdɔ asili ndwokɔ” mɔɔ bɛpɛ kɛɛ bɔkɔ zʋlɔ bɛyɛ nnwuakula wɔ sunzuma ɔfʋã nu nɩ, bɔ nwʋ lɔ́kwʋkwa kyɩ̃. (Ɛɣɛ. 1:22) Yɛábɛ kɛɛ yɛkɛyɛ kɛɛ bɛzabɛ mɔɔ bɛ anyɩ dɩ naasʋ̃ bɛlanwʋ la bekila ɔhʋanɩ kɛɛ bɛ awʋvʋlɔ kezizi abɔkɔ kɛma bɛ nɩ. Mfomi, yɛpɛ kɛɛ yɛzayɛ yɛbɔ mmɔdɩnɩ kɛɛ yekenyi wɔ sunzuma ɔfʋã nu. (Kɩnga Dwuudu 20.) Sɛ ɛlanwʋ la ɔbɔɔ mmɔdɩnɩ kɛɛ wʋ nwʋ kɔwʋkwa a, siã Gyehova kɛɛ ‘ɩmá ɔhʋla ɛyɛ nninyeni mɔɔ ɩpɛ yɩ nɩ.’—Fɩl. 2:13.

11. Mɩnla nninyeni yɛ Gyehova fa bʋwa yɛ ma yɛ nwʋ kʋkwa a? (Ɛfɩsɛsɩmaa 4:​11-13)

¹¹ Gyehova iáyiaki yɛ kɛɛ yɛvá yɛ anwʋzɩzɩbɛ yɛbɩ yenyi wɔ sunzuma ɔfʋã nu. Bɛzabɛ mɔɔ bɔsʋ̃mɩ kɛɛ mmuwuanɩzʋhilalɛmaa nɩɩ ehilehilelɛmaa wɔ Kilisinyianɩ asafʋ yɩ nu nɩ, beziyeziye bɔ nwʋ kɛɛ bɔkɔwʋwa yɛ ma yekenyi wɔ sunzuma ɔfʋã nu na ‘yɛ adwɩnɩ iadĩ na yɛayɛ kɛɛ Kɩlayɩsɩ yɩzayɩ munli yi.’ (Kɩnga Ɛfɩsɛsɩmaa 4:​11-13.) Gyehova fa yi sunzuma nwanzanwanza yɩ sʋ̃ bʋwa yɛ ma yenyia “Kɩlayɩsɩ yɩ adwɩnɩ nɩ be.” (1 Kɔl. 2:​14-16) Akʋ̃ sʋ̃, Nyamɩnlɩ ma bɛhɛlɛ kezimɔ nɩ Gyisɛsɩ dwɩ̃, ɩtɩndɛ na ɩyɛ yɩ dɩyɛ mmɩlɩ mɔ nɩ ɩwɔ azɩlɛ yɩ zʋ nɩ nwʋ odwokɔ wɔ Odwokɔba anla yɩ nu. Sɛ osumazuma kezimɔ nɩ Gyisɛsɩ dwɩ̃ na ɩyɛ yɩ dɩyɛ nɩ a, sa ɔkʋla twu bʋtayɩ mɔɔ ɛva  ziye wʋ anyɩ zʋ kɛɛ ɛkɛyɛ Kilisinyianii mɔɔ yɩ nwʋ wʋkwa nɩ nwʋ.

KEZIMƆ SUNZUMA ƆFƲÃ NU ALƖYƐ MƆƆ ƖYƐ ƐZƖZƖBƐ NƖ BƲWA YƐ

12. Mɩnla yɛ lɛ ‘bɔmʋnlɩ ehilehilelɛ mɔɔ ɩfalɩ Kɩlayɩsɩ nwʋ’ nɩ a?

¹² Mɔɔ ɩkɛyɛ na yɛ nwʋ ɩawʋkwa nɩ, ɩsɛ kɛɛ yesuma sʋ̃maa yɛkɩnla mɔɔ yelili bɔmʋnlɩ yezumanlɩ yɛvalɩ ‘Gyisɛsɩ Kɩlayɩsɩ yɩ nwʋ ehilehilelɛ’ nwʋ nɩ. Nninyeni mɔɔ yelili bɔmʋnlɩ yezumanlɩ nɩ be yɛ lɛ bɔnwʋnlunlɛ, dedi, onlumanlɛ nɩɩ awudunwolɩyɛ. (Hib. 6:​1, 2) Eyimmɔ yɛ lɛ bɔmʋnlɩ ehilehilelɛ mɔɔ Kilisinyiamaa munwala bede bedi nɩ. Meti eyimmɔ yɛ Pita hilehileli mmenii mmɩlɩ mɔ nɩ ɩkãã odwokɔba yɩ wɔ Pɛntɩkɔsʋ eɣile nɩ a. (Egy. 2:​32-35, 38) Ɩsɛ kɛɛ yede bɔmʋnlɩ ehilehilelɛ eyimmɔ yetiã numɔ ansaana yɛahʋla yɛaɣa yɛayɛ Kɩlayɩsɩ yɩ adʋwavʋlɔ. Kɛ ndianwʋ nɩ, Pɔɔlʋ wɔlɩ yɛ kɔkɔ kɛɛ, sɛ yɛále awudunwolɩyɛ ehilehilelɛ nɩ yedi a, yɛlɔ́kʋla kɛhã kɛɛ yɛdɩ nɔhʋanlɛ Kilisinyiamaa. (1 Kɔl. 15:​12-14) Naasʋ̃ ɩsɛ kɛɛ yesuma sʋ̃maa yɛkɩnla bɔmʋnlɩ ehilehilelɛ nɩ nwʋ ansaana yɛ nwʋ ɩawʋkwa.

13. Kɛ ɩkɛyɛ na yɛanyia sunzuma ɔfʋã nu alɩyɛ mɔɔ ɩyɛ ɛzɩzɩbɛ mɔɔ bɛhã nwʋmɔ odwokɔ wɔ Hibulumaa 5:14 zʋ mfasʋ a? (Kila mfonyini yi sʋ̃.)

¹³ Sunzuma ɔfʋã nu alɩyɛ mɔɔ ɩyɛ ɛzɩzɩbɛ nɩ mɛyɩ, ɩ́dɩ kɛɛ bɔmʋnlɩ ehilehilelɛ nɩ. Ɩfalɩ Gyehova yɩ mmɛla nɩɩ yi egyinalɛzʋ-ndwokɔ munwala nwʋ, na ɩbʋwa yɛ ma yɛtɩ adwɩnɩ mɔɔ ɩlɛ yɩ wɔ nninyeni nwʋ nɩ tʋ. Sɛ yɛkɔhʋla yekenyia alɩyɛ eyi zʋ mfasʋ a, ɩsɛ kɛɛ yesuma Nyamɩnlɩ Odwokɔ, yɛdwɩnɩndwɩnɩ nwʋmɔ, na yɛyɛ mɔɔ yɛkɔhʋla bela kɛɛ yɛkɛva yɛkɛyɛ egyima. Sɛ yɛyɛ zɔ a, ɩkɔwʋwa yɛ ma yekezizi abɔkɔ mɔɔ ɩsɔ Gyehova anyɩ. c—Kɩnga Hibulumaa 5:14.

14. Mɩnla yɛ Pɔɔlʋ yɛlɩ va wʋwalɩ Kilisinyiamaa mɔɔ bɔwɔ Kɔlɛntɩ nɩ ma bɔ nwʋ wʋkwalɩ a?

¹⁴ Kilisinyiamaa mɔɔ bɔ nwʋ lɔ́kʋkwalɩ nɩ, sɛ beyiyia bʋwabɩlɛ mɔɔ nwʋmɔ mmɛla pɔkyɩɩ bela íni Bayɩbʋlʋ nu a, mbɔmɩ sʋ̃maa nɩ ɩyɛ sɩ kɛɛ bekezi pɔkɔba. Ɩyɛ a abiyemmɔ tɩ nɣanlɩ kɛɛ sɛ Bayɩbʋlʋ lɛ́hyɛlɩ mmɛla pɔkyɩɩ be wɔ debe nwʋ a, bɔkɔhʋla bɛkɛyɛ mɔɔ bɛzabɛ bɛpɛ yɩ. Ebiye a, abiyemmɔ sʋ̃ keɣizia mmɛla  pɔkyɩɩ mɔɔ ɩfalɩ debe nwʋ. Kɛ ndianwʋ nɩ, ɩkɛyɛ kɛɛ Kilisinyiamaa mɔɔ nɩ bɔwɔ Kɔlɛntɩ nɩ ɣizialɩ Pɔɔlʋ kɛɛ, alɩyɛ mɔɔ bɛva bɔwɔ afɔlɩ bɛma awʋzʋmɩ mɔɔ bekeli nɩ, asʋ̃ mmɛla pɔkyɩɩ be wɔ nwʋmɔ a? Kɛ ankɩ Pɔɔlʋ kehile bɛ mɔɔ bɛyɛ́ nɩ, ɩmanlɩ bɔnwʋnlɩ kɛɛ eyi mɛyɩ ɩfalɩ tiwʋwaba nwʋ, na abiyela wɔ yɩ “fanwʋdi.” Pɔɔlʋ manlɩ bɔnwʋnlɩ egyinalɛzʋ-ndwokɔ be mɔɔ ɩkɔwʋwa bɛ ma bekezizi abɔkɔ mɔɔ ɩlɛ́ma be tiwʋwaba kelile bɛ na bɔlɔ́tʋndʋnlɩ mmenii mvʋlɔ sʋ̃ be agyia nu. (1 Kɔl. 8:​4, 7-9) Wɔ ɔzɔ ɔhʋanɩ yɩ zʋ nɩ, nɩ Pɔɔlʋ ɩbʋwaa Kɔlɛntɩmaa nɩ ma bekenyi wɔ sunzuma ɔfʋã nu na bɛava bɛzabɛ bɛ adwɩnɩ bɛayɛ egyima bɛanwʋ sʋnʋnkʋ̃ mɔɔ ɩla baaba nɩɩ tanɩ avinli tɛla kɛɛ bekehila ɔhʋanɩ kɛɛ mmenii kehile bɛ mɔɔ bɛyɛ́ anzɛnyɩɩ bɛkɛbɩbɛ mmɛla pɔkyɩɩ be.

15. Mɩnla ɔhʋanɩ zʋ yɛ Pɔɔlʋ wʋwalɩ Hibulu Kilisinyiamaa nɩ ma benyinli wɔ sunzuma ɔfʋã nu a?

¹⁵ Yesuma debe mɔɔ nwʋmɔ hyinyia wɔ kɛlɛta mɔɔ Pɔɔlʋ hɛlɛlɩ hɔ manlɩ Hibulu Kilisinyiamaa nɩ nu. Nɩ bo nu be bɛáwɔ mmɔdɩnɩ kɛɛ bekenyi wɔ sunzuma ɔfʋã nu, mfomi nɩ ‘bɛlanwʋ la bɔnʋ ngyesulo na kɛ sunzuma ɔfʋã nu alɩyɛ mɔɔ numɔ yɛ ɛzɩzɩbɛ nɩ a.’ (Hib. 5:12) Bɛásuma nninyeni mvʋlɔ mɔɔ Gyehova luwa asafʋ yɩ zʋ ikilehilee bɛ nɩ na bɛáde betiã nu sʋ̃. (Ɛɣɛ. 4:18) Kɛ ndianwʋ nɩ, Dwuumaa mɔɔ nɩ bɛɣa bɛyɛ dedimaa nɩ, nɩ bo nu sʋ̃maa lanwʋ la kile kɛɛ ɩsɛ kɛɛ bɔkɔ zʋ bedidi Mosisi Mmɛla yɩ zʋ. Naasʋ̃ nɩ kɛyɛ alʋbɔ 30 mɔɔ ɩɣa ɩzɩ̃ ɩhɔ nɩ, Kɩlayɩsɩ yɩ afɔlɩ nɩ ɣa dua ɔzɔ mmɛla yɩ nu. (Wul. 10:4; Tay. 1:10) Nɩ alʋbɔ 30 dɩ mmɩlɩ tɩndɩnlɩ mɔɔ ankɩ ɔzɔ Kilisinyiamaa nɩ kɔhʋla kɛva kozuma dɩyɛ na bɛadɩ yɩ tʋ kɛɛ, Mosisi Mmɛla nɩ ɩayɛ egyima ebiyekʋ̃. Meti nɩ Pɔɔlʋ ɩbʋwaa bɛ ma bekele Bayɩbʋlʋ nu nɔhʋanlɛ eyi mɔɔ numɔ dɔ mɔɔ nɩ ikilehilee bɛ nɩ bekediã numɔ. Yɩ kɛlɛta yɩ wʋwalɩ bɛ ma bɔnwʋnlɩ kɛɛ, ɔhʋanɩ mɔɔ Kilisinyiamaa duwa zʋlɔ sʋ̃mɩ Gyehova nɩ, ɩdɩ baaba kʋlaa ɩtɛla mɔɔ nɩ bɛyɛ wɔ Mosisi Mmɛla yɩ tʋ nɩ. Akʋ̃ sʋ̃, ɩmanlɩ benyianlɩ akɛnɣazɩzɩbɛ bɛva bɛhanlɩ odwokɔba nɩ, ɩávalɩ nwʋmɔ kɛɛ nɩ Dwuumaa mɔɔ nɩ bɛlɛ́yɛlɩ Kilisinyiamaa nɩ twodwu tiyia bɛ nɩ.—Hib. 10:​19-23.

ÁMA EDE WƲ NWƲ EDI SƲ̃MAA

16. Sɛ yɛpɛ kɛɛ yɛ nwʋ kʋkwa a, mɩnla dɔkʋ̃ yɛ ɩsɛ kɛɛ yɛyɛ a?

¹⁶ Sɛ yenyi wɔ sunzuma ɔfʋã nu a, ɩsɛ kɛɛ  yɛbɔ mmɔdɩnɩ kɛɛ yɛkɔhɔ zʋ yɛkɛma yɛ nwʋ kɔwʋkwa. Sɛ yɛkɔhʋla yɛkɛyɛ ɔzɔ a, íni kɛɛ yede yɛ nwʋ yedi sʋ̃maa. (1 Kɔl. 10:12) Ɩsɛ kɛɛ yɛkɔ zʋ ‘yetwe yɛ nwʋ yekila’ kɛɛ yenyiaa anyunumihɔlɛ anzɛnyɩɩ.—2 Kɔl. 13:5.

17. Mɩnla ɔhʋanɩ zʋ yɛ Pɔɔlʋ yɩ kɛlɛta mɔɔ ɩhɛlɛlɩ ɩhɔ manlɩ Kolosiyiamaa nɩ, ɩda ali kɛɛ nɩ ihyinyia kɛɛ bɔkɔ zʋ bɛma bɔ nwʋ kʋkwa a?

¹⁷ Wɔ kɛlɛta mɔɔ Pɔɔlʋ hɛlɛlɩ hɔ manlɩ Kolosiyiamaa yi nu nɩ, izia izili zʋlɔ wudo kɛɛ ihyinyia kɛɛ yɛkɔ zʋlɔ yɛma yɛ nwʋ kʋkwa. Ɩwɔ numɔ kɛɛ, nɩ Kilisinyiamaa mɔɔ bɔwɔ Kolosiyia nɩ bɔ nwʋ wʋkwa daada dɩyɛ, naasʋ̃ Pɔɔlʋ wɔlɩ bɛ kɔkɔ kɛɛ, ɩsɛ kɛɛ bekila bʋwɔ na oyuwadɩ yɩ adwɩnɩ yɩ iányianlɩ bɔ zʋ tumi. (Kol. 2:​6-10) Ɛpafɩlasɩ mɔɔ ɩda ali kɛɛ nɩ izi mmeliyema mɔɔ nɩ bɔwɔ Kolosiyia asafʋ yi nu bʋwɔ nɩ, ɩhɔlɩ zʋlɔ ɩwɔlɩ mpayɩ ɩmanlɩ bɛ ama ‘bɛagyina pindinyii’ anzɛnyɩɩ bɔ nwʋ ɩawʋkwa. (Kol. 4:12) Mɩnla yɛ yesuma wɔ eyi nu a? Nɩ Pɔɔlʋ nɩɩ Ɛpafɩlasɩ munwatĩĩ bɛtɩ yɩ tʋ kɛɛ, sɛ yɛ nwʋ kɔhɔ zʋlɔ kɔwʋkwa a, ihyinyia kɛɛ yɛzayɛ yɛbɔ mmɔdɩnɩ na Nyamɩnlɩ sʋ̃ bʋwa yɛ. Nɩ bɛpɛ kɛɛ Kolosiyia asafʋ yi nu maa nɩ, bɔ nwʋ kɔ zʋlɔ kʋkwa anzɛnyɩɩ benyi wɔ sunzuma ɔfʋã nu kɛɛ Kilisinyiamaa ɩávalɩ nwʋmɔ ndwokɔzɩzɩbɛ mɔɔ nɩ beyiyiaa nɩ.

18. Mɩnla yɛ ɩkɔhʋla kɔdʋ Kilisinyianii mɔɔ yɩ nwʋ wʋkwa a? (Kila mfonyini yi sʋ̃.)

¹⁸ Pɔɔlʋ wɔlɩ Hibulumaa nɩ kɔkɔ kɛɛ, Kilisinyianii mɔɔ yɩ nwʋ wʋkwa po nɩ, sɛ iákila bʋwɔ a, ɩ nɩɩ Nyamɩnlɩ avinli kɛzɩkɛ na iléde ɔzɔ enii nɩ kediã numɔ dɔkʋ̃. Sɛ Kilisinyianii be hyɛda yɛ azʋ̃nzɩzɩbɛ a, ɩ nɩɩ Nyamɩnlɩ avinli kɔhʋla kɔhwɩ̃ paa, na ɩlɔ́kʋla po konlu yɩ nwʋ na ianyia yɩ kɛnɩ tanɩfakyɛ. Anyɩnlɩlelɛ odwokɔ yɛ lɛ kɛɛ, nɩ Hibulumaa nɩ bɛ nɩɩ Gyehova avinli lɛ́sɩkɛlɩ zɔ. (Hib. 6:​4-9) Na bɛzabɛ mɔɔ beyiaki dɩyɛzumanlɛ nɩɩ dasɩlɛlilɛhɔlɛ anzɛnyɩɩ botu bɛ na aɣinzi yi bonu bɔ nwʋ nɩ sʋ̃ ɛ? Sɛ bɔzʋ̃ kãnwʋazɩ nu bonu bɔ nwʋ a, nɩ bɛdaa yɩ ali kɛɛ bɛ́dɩ kɛɛ mmenii mɔɔ Pɔɔlʋ hɛlɛlɩ bɔ nwʋ odwokɔ kɛɛ Nyamɩnlɩ léde bɛ kediã numɔ dɔkʋ̃ nɩ. Naasʋ̃ sɛ besia bɛba Gyehova pɛ a, bekehyinyia yɩ mmʋwalɩyɛ. (Izi. 34:​15, 16) Asafʋ nu mbanimbani kɛyɛ nhyɩhyɛlɩyɛ ma Dasɩvʋlɔ be mɔɔ yɩ nwʋ wʋkwa kɔwʋwa yɩ ma ikezia kegyina yɩ agyia zʋ wɔ sunzuma ɔfʋã nu.

19. Mɩnla bʋtayɩ yɛ ɩsɛ kɛɛ yɛfa yesiye yɛ anyɩ zʋ a?

¹⁹ Sɛ ɔbɔɔ mmɔdɩnɩ kɛɛ ɛkɛyɛ Kilisinyianii mɔɔ yɩ nwʋ wʋkwa a, kɔ zʋlɔ di sunzuma ɔfʋã nu alɩyɛ mɔɔ numɔ yɛ ɛzɩzɩbɛ nɩ, na nyia Gyehova yɩ adwɩnɩ wɔ nninyeni nwʋ. Na sɛ wʋ nwʋ wʋkwa daada sʋ̃ a, kɔ zʋlɔ kyina pindinyii kɛɛ Kilisinyianii mɔɔ inyi.