1-2. (a) Bɛzabɛ mɔɔ bɛyɛ tanɩ mɔɔ bɛánlu bɔ nwʋ nɩ, kɛ Gyehova ibu bɛ ise a? (b) Mɩnla yɛ Gyehova pɛ kɛɛ tanɩyɛlɛmaa bɛyɛ a?

 GYEHOVA kyi tanɩ, na ɩázʋzɔ tanɩ bela zʋ. (Ndw. 5:​4-6) Gyehova kila ɔhʋanɩ kɛɛ yɛkɛva yɩ mmɛla mɔɔ ɩva ɩma yɛ wɔ Bayɩbʋlʋ yɩ nu nɩ yɛkɔwɔ yɛ ɛbɩla. Naasʋ̃, Gyehova zi kɛɛ yɛáli munli, meti iáhila ɔhʋanɩ kɛɛ yɛkɛyɛ yɛ dɩyɛ bela pɛpɛɛpɛ. (Ndw. 130:​3, 4) Mmɩlɩ kʋ̃ yɩ la sʋ̃, ɩázʋzɔ bɛzabɛ mɔɔ ‘bɛlanɩ Nyamɩnlɩ yɩ adʋmɩ nɩ nwʋ ehilehilelɛ nɩ ama bɛanyia ɔhʋanɩ bɛayɛ nninyeni mbʋanlɩ mbʋanlɩ’ nɩ zʋ. (Dwu. 4) Nɔhʋanlɛ nu nɩ, Bayɩbʋlʋ yɩ kã kɛɛ bɛkɛzɩkɛ “mmenii mɔɔ bézi Nyamɩnlɩ” nɩ wɔ Amagadɔnʋ kʋnɛ yɩ nu.—2 Pit. 3:7; Yik. 16:16.

² Naasʋ̃, Gyehova ɩábɛ kɛɛ ɩkɛzɩkɛ abiyela. Kɛmɔ yezumanlɩ wɔ dɩyɛzumanlɛ ndwokɔ mɔɔ ili eyi anyunu nɩ, Bayɩbʋlʋ yɩ kã yɩ petee kɛɛ “ɩpɛ kɛɛ abiyela nu yɩ nwʋ.” (2 Pit. 3:9) Asafʋ nu mbanimbani sumazuma Gyehova na bɔzʋ̃ abʋtalɩ nu bɔbɔ mmɔdɩnɩ kɛɛ bɔkɔwʋwa bɛzabɛ mɔɔ bɛyɛ tanɩ nɩ ma bokonlu bɔ nwʋ na bɛ nɩɩ Gyehova avinli ɩayɛ baaba dɔkʋ̃. Naasʋ̃, kɛ tanɩyɛlɛmaa munwala yɛ bonu bɔ nwʋ a. (Ayɩ. 6:9) Abiyemmɔ kɔ zʋlɔ yɛ tanɩ ɩávalɩ nwʋmɔ kɛɛ asafʋ nu mbanimbani bɔ mmɔdɩnɩ mbɔmɩ sʋ̃maa kɛɛ bɔkɔwʋwa bɛ ma bokonlu bɔ nwʋ nɩ. Mɩnla yɛ mbanimbani yi kɛyɛ wɔ bʋwabɩlɛ mɔɔ ɩdɩ zɔ nu a?

 “BƐYƖ́ AMUMUYƐNII EYI WƆ MƲNLƲMMƆ BƐ AVINLI”

3. (a) Mɩnla yɛ Bayɩbʋlʋ yɩ kã kɛɛ ɩsɛ kɛɛ bɛfa bɛyɛ tanɩyɛlɛmaa mɔɔ bɛánlu bɔ nwʋ nɩ a? (b) Mɩnla ti mɔɔ yɛkʋla yɛkã kɛɛ sɛ abiye iánu yɩ nwʋ a, ɔhʋanɩ be zʋ nɩ ɩdɩ kɛɛ mɔɔ yɩzayɩ ɩkãã kɛɛ bɛyɩ́ yɩ wɔ asafʋ yɩ nu a?

³ Sɛ tanɩyɛlɛnii be iánu yɩ nwʋ a, ɩsɛ kɛɛ asafʋ nu mbanimbani fa ɔhʋanɩhilelɛ mɔɔ ɩwɔ 1 Kɔlɛntɩmaa 5:13 nɩ bɛyɛ egyima. Ɛkɛnɩ kã kɛɛ: “Bɛyɩ́ amumuyɛnii eyi wɔ mʋnlʋmmɔ bɛ avinli.” Ɔhʋanɩ be zʋ nɩ, nɩ ɩdɩ kɛɛ mɔɔ tanɩyɛlɛnii nɩ yɩzayɩ izi pɔkɔ kɛɛ bɛyɩ́ yɩ wɔ asafʋ yɩ nu; na mɔɔ yɩzayɩ iluwa nɩ yɛ ituaa zʋlɔ mma yɩ a. (Gal. 6:7) Mɩnla ti mɔɔ yɛkʋla yɛkã zɔ a? Iluwakɛɛ mmɔdɩnɩ bela mɔɔ asafʋ nu mbanimbani wɔlɩ kɛɛ bɔkɔwʋwa yɩ ma ikonlu yɩ nwʋ nɩ, iáde itiã numɔ. (2 Aw. 17:​12-15) Iluwa yɩ nyɛlɩyɛ zʋ ihile kɛɛ ɩábɛ kɛɛ ɩfa Gyehova yɩ mmɛla ɩyɛ egyima.—Dit. 30:​19, 20.

4. Mɩnla ti mɔɔ sɛ abiye iánu yɩ nwʋ na bɛyɩ yɩ wɔ asafʋ yɩ nu a, bɔbɔ asafʋ yɩ amanɩyɛ a?

⁴ Sɛ abiye iánu yɩ nwʋ na bɛyɩ yɩ wɔ asafʋ yɩ nu a, bɔbɔ asafʋ yɩ amanɩyɛ kɛɛ enii kʋ̃ nɩ yɩ ɩ́dɩ Gyehova Dasɩvʋlɔ ebiyekʋ̃. a Kɛ adwɩnɩ nɩ yɛ lɛ kɛɛ bɛlɛ bokuaa yɩ anyunu azɩ. Mfomi eyi kɔwʋwa asafʋ yɩ nu maa ma bɛkɛva Bayɩbʋlʋ nu ahyɛdɩ mɔɔ ise ‘máma bɛ nɩɩ enii mɔɔ ɩdɩ zɔ nɩ tu’ na ‘áma bɛ nɩɩ enii mɔɔ ɩdɩ ɔzɔ nɩ di alɩyɛ po’ nɩ bɛkɛyɛ egyima. (1 Kɔl. 5:​9-11) Sianti baaba be ti yɛ Gyehova valɩ ahyɛdɩ eyi manlɩ a. Sʋ̃mavʋlɔ Pɔɔlʋ hɛlɛlɩ kɛɛ: “Fɩyayɛ ɛgyɩkɩ̃ɩ̃ mɔɔ bɛkɛva bokowula awulo ɔdɔkɔ nu nɩ, ɩma awulo ɔdɔkɔ nɩ itu.” (1 Kɔl. 5:6) Sɛ bɛáyɩ abiye mɔɔ ɩyɛ tanɩ mɔɔ iánlu yɩ nwʋ wɔ asafʋ yɩ nu a, sa ɩkʋla ɩma mvʋlɔ nyia adwɩnɩ kɛɛ iáhyinyia kɛɛ bɛkɛva Gyehova yɩ mmɛla bɔkɔwɔ bɛ ɛbɩla.—Ɛɣɛ. 13:20; 1 Kɔl. 15:33.

5. Kɛ ɩsɛ kɛɛ yebu abiye mɔɔ bɛyɩ yɩ wɔ asafʋ yɩ nu nɩ yese a, na mɩnla ti a?

⁵ Sɛ bɛyɩ eliyema be wɔ asafʋ yɩ nu a, kɛ ɩsɛ kɛɛ yebu yi yese a? Ɩwɔ numɔ kɛɛ yɛ nɩɩ yɩ lɔ́bɔ dɩyɛ, naasʋ̃ íni kɛɛ yebu yi kɛɛ bɛyɛ yɩ hwɩɩ a ɩlɛ́yɛ bʋwɔ. Mfomi ɩsɛ kɛɛ yebu yi kɛɛ ɩdɩ owuanɩ mɔɔ iminli. Sɛ owuanɩ be minli a, sa ɩkʋla isia ɩba. Kakɛ kɛɛ enii kʋ̃ nɩ yɩ yilalɩ yɩ nwʋ zʋ manlɩ Gyehova. Naasʋ̃ alɔbɔ odwokɔ yɛ lɛ kɛɛ, kakɩ yɩ ɩáyɛ mɔɔ ɩsɔ Gyehova anyɩ, na mɛyɩ fa yɩ tiã asianɩ kezile be nu. (Izi. 18:31) Naasʋ̃ mmɩlɩ tɩndɩnlɩ la mɔɔ Gyehova yɩ nwɔkɛnwʋnlɛ lanwʋ la wɔ kɛnɩ yɩ mɛyɩ, anyɩnlɩlazʋ wɔ kɛnɩ kɛɛ ɩkɔhʋla kezia kɛɣa. Meti kɛ ɩkɛyɛ na asafʋ nu mbanimbani bɛawʋwa abiye mɔɔ bɛyɩ yɩ wɔ asafʋ yɩ nu a?

KEZIMƆ ASAFƲ NU MBANIMBANI BƲWA BƐZABƐ MƆƆ BƐYƖ BƐ WƆ ASAFƲ YƖ NU NƖ

6. Mɩnla nninyeni yɛ asafʋ nu mbanimbani kɛyɛ kɔwʋwa abiye mɔɔ bɛyɩ yɩ wɔ asafʋ yɩ nu a?

⁶ Sɛ bɛyɩ abiye wɔ asafʋ yɩ nu a, asʋ̃ mbanimbani yi yiaki mmɔdɩnɩ mɔɔ bɔbɔ kɛɛ bɔkɔwʋwa yɩ ma ikezia kɛɣa Gyehova pɛ nɩ a? Anhã! Sɛ bɔbɔɔ enii mɔɔ iánu yɩ nwʋ nɩ amanɩyɛ kɛɛ bɛbayɩ yɩ wɔ asafʋ yɩ nu a, mbanimbani kɔmitii nɩ ma ɩnwʋ mɔɔ ɩkɔhʋla kɛyɛ na bɛazia bɛale yi. Naasʋ̃ kɛ mɛyɩ nkʋ̃ la yɛ mbanimbani yi kɛyɛ a. Mbɔmɩ sʋ̃maa nɩ, bɛkɛhã kehile tanɩyɛlɛnii nɩ kɛɛ, bɛkɛbɛ kɛɛ aziyianɩ ɛgyɩkɩ̃ɩ̃ be mɛda nɩ bekezia bekeyiyia yɩ na bɛahila kɛɛ ɩzɩnza yɩ adwɩnɩ a. Sɛ tanɩyɛlɛnii nɩ de tiã numɔ kɛɛ beyiyiá dɔkʋ̃ a, asafʋ nu mbanimbani yi kɛva ɔnwʋmɔ ɔhʋanɩ kɛhyɛ yɩ ɛzɩzɩbɛ kɛɛ inlú yɩ nwʋ na izia ɩɣɩla. Sɛ ɔzɔ mmɩlɩ yɩ, nɩ ilónunli yɩ nwʋ po a, mbanimbani yi kɛyɛ nhyɩhyɛlɩyɛ na ɩwɔ numɔ la a, bɛahɔ bɛagyela yɩ na bɛahyɛ yɩ ɛzɩzɩbɛ kɛɛ inlú yɩ nwʋ.

7. Sɛ mbanimbani yi bɔbʋwaa abiye mɔɔ bɛyɩ wɔ asafʋ yɩ nu a, kɛ ɩkɛyɛ na bɛazumazuma Gyehova yi kunlumiyɩbalɛ yɩ a? (Gyɛlɩmaya 3:12)

 ⁷ Mbanimbani yi bɔ mmɔdɩnɩ kɛɛ bokozumazuma kezimɔ Gyehova da kunlumiyɩbalɛ ali mmɩlɩ mɔ bɔbʋwaa abiye mɔɔ bɛyɩ wɔ asafʋ yɩ nu nɩ. Kɛ ndianwʋ nɩ, Gyehova ɩádɩkɛ ma tɩɩtɩɩ Yizilayamaa yɩ bonu bɔ nwʋ ansaana ɩbɔɔ mmɔdɩnɩ kɛɛ ɩkɔwʋwa bɛ. Mfomi, ɩzʋ̃manlɩ yɩ nkɔmɩhyɛmaa ma bɔhɔlɩ bɛ pɛ mmɩlɩ po mɔ nɩ bolónunli bɔ nwʋ nɩ. Kɛmɔ yezumanlɩ wɔ dɩyɛzumanlɛ odwokɔ mɔɔ ɩtɔ zʋlɔ anwɩ̃ wɔ Ɔwɩɛnɩlɛ Aɣanɩ eyi nu nɩ, Gyehova hanlɩ hileli nkɔmɩhyɛnii Hoziya kɛɛ, ɩvá yɩ yɩ mɔɔ nɩ igua zʋlɔ ɩyɛɛ tanɩ nɩ yɩ tanɩ ɩhyɛ yɩ na iziá ɩhɔ ɩva yɩ. Gyehova luwalɩ ndianwʋ eyi zʋ manlɩ yi mmenii nwʋnlɩ kɛɛ ɩwɔ kunlumiyɩbalɛ paa. (Ho. 3:1; Mal. 3:7) Dɩkɛɛ Gyehova nɩ, asafʋ nu mbanimbani pɛ paa kɛɛ tanɩyɛlɛnii nɩ kezia kɛɣa, na bɛáma ɩyɛ sɩ ɩma yɩ kɛɛ ɩkɛyɛ zɔ.—Kɩnga Gyɛlɩmaya 3:12.

8. Mɩnla ɔhʋanɩ zʋ yɛ Gyisɛsɩ yɩ ɛɣɛlɛ mɔɔ ɩfalɩ ɛɣalɛ benyia mɔɔ iminlinli yɩ nwʋ nɩ, ɩma yɛnwʋ kezimɔ Gyehova tɩ nɣanlɩ wɔ bɛzabɛ mɔɔ bɛyɩ bɛ wɔ asafʋ yɩ nu nɩ nwʋ a? (Luuku 15:7)

⁸ Kakɛ Gyisɛsɩ yɩ ɛɣɛlɛ mɔɔ ɩfalɩ ɛɣalɛ benyia mɔɔ iminlinli yɩ nwʋ, mɔɔ yezunzunli nwʋmɔ wɔ dɩyɛzumanlɛ mɔɔ ɩtɔ zʋlɔ anwɩ̃ wɔ Ɔwɩɛnɩlɛ Aɣanɩ eyi nu nɩ. Mmɩlɩ mɔ ɛzɩlɛ nɩ nwʋnlɩ kɛɛ ɩɣa yɩ isiaa kɛɣa awudo nɩ, “iduli tɔlɔnwa ɩhɔlɩ ɩdɔlɩ yɩ ɣa benyia nɩ nwʋ, na ivoli yi munwa nwʋ.” (Lk. 15:20) Yɛ́ yɩ ndwɩ kɛɛ ɛzɩlɛ nɩ ɩádɩkɛ ma yɩ ɣa nɩ ɩba isiã yɩ kɛnɩ tanɩfakyɛ ansaana. Mfomi yɩzayɩ ɩhɔlɩ yɩ ɣa yɩ pɛ, kɛmɔ ɛzɩlɛ bela mɔɔ ɩwɔ ɔlɔlɛ kɛyɛ nɩ. Asafʋ nu mbanimbani bɔ mmɔdɩnɩ kɛɛ bɛkɛla ɔlɔlɛ mɔɔ ɩdɩ zɔ ali bekehile bɛzabɛ mɔɔ bɛyɩ bɛ wɔ asafʋ yɩ nu nɩ. Bɛpɛ kɛɛ mmenii eyi mɔɔ beminli nɩ “besia bɛba awudo.” (Lk. 15:​22-24, 32) Sɛ tanɩyɛlɛnii be sia ba Gyehova pɛ a, fɛlɛkʋ̃lilɛ ba sʋlɔ na yɛzayɛ mɔɔ yɛwɔ azɩlɛ yɩ zʋ sʋ̃ yedi fɛlɛkʋ̃!—Kɩnga Luuku 15:7.

9. Mɩnla yɛ Gyehova hyɛ tanɩyɛlɛmaa ɛzɩzɩbɛ kɛɛ bɛyɛ́ a?

⁹ Babʋmɩ ɛkɩ nɩ, yɛnwʋ yɩ kɛɛ Gyehova ɩázʋzɔ tanɩyɛlɛmaa mɔɔ bɛánlu bɔ nwʋ nɩ zʋ. Naasʋ̃ ɩáyɩ yɩ anyɩ ɩma bɛ kʋlaa, ɩkɔ zʋlɔ ɩbʋwa bɛ. Ɩpɛ kɛɛ besia bɛba yɩ pɛ. Tanɩyɛlɛmaa mɔɔ bonu bɔ nwʋ nɩ, Hoziya 14:4 kã kezimɔ Gyehova tɩ nɣanlɩ wɔ bɔ nwʋ nɩ nwʋ odwokɔ. Ɛkɛnɩ kã kɛɛ: “Mɩkɛza bɛ adimakɛlɛ, na bɔzʋ̃ mɩpɛ bɛlɛ́yɩ bɔ nwʋ dɔkʋ̃. Mʋzʋ̃ mɩ ahʋnlɩnɩ nu mʋkɔlɔ bɛ, iluwakɛɛ mɩ ɛya ɩzʋ̃ bɔ zʋ ɩyɩ.” Asafʋ nu mbanimbani ma eyi bʋwa bɛ adwɩnɩ nu, na betiã bɛ anyɩ azɩ bekila kɛɛ enii kʋ̃ nɩ yɩ ɩyɛɛ nzɩnzanlɩyɛ be mɔɔ ikile kɛɛ inlu yɩ nwʋ a, na bɛagyina zʋlɔ bɛawʋwa yɩ. Na ɩsɛ kɛɛ ndwokɔ eyi hyɛ abiyela mɔɔ ɩhwɩ̃ yɩ nwʋ wɔ Gyehova nwʋ nɩ ɛzɩzɩbɛ ma ɩnwʋ kɛɛ Gyehova lanwʋ la dɔ yɩ, na ɩpɛ kɛɛ isia ɩba yɩ pɛ.

10-11. Kɛ ɩkɛyɛ na asafʋ nu mbanimbani bɛawʋwa bɛzabɛ mɔɔ ebiye a bɛyɩlɩ bɛ wɔ asafʋ yɩ nu nɩ, alʋbɔ sʋ̃maa dua numɔ nɩ a?

¹⁰ Kɛ ɩkɛyɛ na asafʋ nu mbanimbani bɛawʋwa bɛzabɛ mɔɔ ebiye a bɛyɩlɩ bɛ wɔ asafʋ yɩ nu nɩ, alʋbɔ sʋ̃maa dua numɔ nɩ a? Ebiye a ɔzɔ mmenii yi beyiaki tanɩ mɔɔ ɩmanlɩ bɛyɩlɩ bɛ wɔ asafʋ yɩ nu nɩ ɩyɛlɛ po. Ɩyɛ po a, bo nu be bɛáhakɛ mɔɔ ɩmanlɩ bɛyɩlɩ bɛ wɔ asafʋ yɩ nu. Sɛ bɛyɩlɩ mmenii eyimmɔ wɔ asafʋ yɩ nu nɩ ɩhyɛ kɛɛ mɩnla la po a, mbanimbani yi bɔ mmɔdɩnɩ pɩbɛ dɩka mɔɔ bɔwɔ na bɛahɔ bɛagyela bɛ. Sɛ mbanimbani yi kɔ kyela bɛ a, sa bɔkʋla bɛ nɩɩ bɛ bɔ mpayɩ po, na bɛahyɛ bɛ ɛzɩzɩbɛ kɛɛ beziá bɛɣɩla asafʋ yɩ nu. Sɛ bɛyɩ abiye wɔ asafʋ yɩ nu ma alʋbɔ sʋ̃maa tua numɔ a, pɩlazunɛ bela íni nwʋmɔ kɛɛ ɩkɛyɛ mɛlɛkɛ wɔ sunzuma ɔfʋã nu. Meti sɛ ɩda yɩ ali kɛɛ ɩpɛ kɛɛ isia ɩba a, ebiye a asafʋ nu mbanimbani kɛyɛ nhyɩhyɛlɩyɛ ma abiye ɩ nɩɩ yɩ kozuma  Bayɩbʋlʋ yɩ, mmɩlɩ po mɔ belédeli yi nɩ. Sɛ ɩba yɩ zɔ a, asafʋ nu mbanimbani yɛ bɛkɛyɛ Bayɩbʋlʋ dɩyɛzumanlɛ yɩ nwʋ nhyɩhyɛlɩyɛ a.

¹¹ Asafʋ nu mbanimbani pɛ kɛɛ bosumazuma Gyehova, meti bɔbɔ mmɔdɩnɩ kɛɛ bɛkɛbɩbɛ bɛzabɛ mɔɔ bɛyɩ bɛ wɔ asafʋ yɩ nu nɩ na bɛahyɛ bɛ ɛzɩzɩbɛ kɛɛ beziá bɛɣɩla Gyehova pɛ. Sɛ tanɩyɛlɛnii be da yɩ ali kɛɛ inlu yɩ nwʋ na ɩzɩnza yɩ ahʋanɩ a, sa bɔkʋla bede yɩ ndɛndɛ zʋ la.—2 Kɔl. 2:​6-8.

12. (a) Mɩnla bʋwabɩlɛ azʋlɔtʋ nu yɛ ɩsɛ kɛɛ asafʋ nu mbanimbani kila bʋwɔ a? (b) Mɩnla ti mɔɔ íni kɛɛ yenyia adwɩnɩ kɛɛ tanɩyɛlɛmaa be wɔ kɛnɩ a, Gyehova lɔ́nwʋ bɛ nwɔkɛ kyɩ̃ a? (Kila azɩkɛnɩ odwokɔ yɩ sʋ̃.)

¹² Wɔ bʋwabɩlɛ azʋlɔtʋ be nu nɩ, ɩsɛ kɛɛ asafʋ nu mbanimbani kila bʋwɔ paa ansaana bɛazia bɛale abiye. Kɛ ndianwʋ nɩ, sɛ enii kʋ̃ nɩ yɩ ɩɣɛtɛɣɛtɛlɩ kuakula be, ɩvʋakɩlɩ wɔ nɔhʋanlɛ yɩ nwʋ, anzɛnyɩɩ iluwalɩ nɣɛlɛbɛ ɔhʋanɩ zʋ iguli yɩ agyiahʋnlɩ a, mɛyɩ nɩ ɩsɛ  kɛɛ asafʋ nu mbanimbani kila kɛɛ inlu yɩ nwʋ ankasa ansaana bɛale yi. (Mal. 2:14; 2 Tim. 3:6) Ɩsɛ kɛɛ bɔbɔ asafʋ yɩ nwʋ banɩ. Mmɩlɩ kʋ̃ yɩ la sʋ̃, ɩsɛ kɛɛ yɛkakɛ kɛɛ Gyehova kezia kele tanɩyɛlɛnii bela mɔɔ ɩzʋ̃ yɩ ahʋnlɩnɩ nu ikonlu yɩ nwʋ na ɩazɩnza yɩ ahʋanɩ nɩ. Meti ɩwɔ numɔ kɛɛ ɩsɛ kɛɛ asafʋ nu mbanimbani kila bʋwɔ mmɩlɩ mɔ bɛpɛ kɛɛ besia bede bɛzabɛ mɔɔ bɛ nɩɩ mmenii mvʋlɔ lili wɔ atinuzɩzɩbɛ zʋ nɩ dɩyɛ, naasʋ̃ íni kɛɛ benyia adwɩnɩ kɛɛ Gyehova ɩlɔ́nwʋ mmenii mɔɔ bɛdɩ zɔ nɩ nwɔkɛ kyɩ̃. b—1 Pit. 2:10.

MƆƆ ASAFƲ YƖ KƆHƲLA KƐYƐ

13. Kezimɔ yɛ nɩɩ abiye mɔɔ mbanimbani yi hã yɩ anyunu nɩɩ abiye mɔɔ bɛyɩ yɩ wɔ asafʋ yɩ nu di nɩ, mɩnla sʋnʋnkʋ̃ yɛ ɩwɔ nu a?

¹³ Kɛmɔ yezunzu nwʋmɔ wɔ dɩyɛzumanlɛ mɔɔ ili eyi anyunu nɩ, ɩyɛ a bɔbɔ asafʋ yɩ amanɩyɛ kɛɛ bɛhã abiye yɩ anyunu. Sɛ ɩba yɩ zɔ a, sa yɛkʋla yɛ nɩɩ yɩ bɔ, iluwakɛɛ yezi kɛɛ inlunli yɩ nwʋ na ɩzɩnza yɩ ahʋanɩ. (1 Tim. 5:20) Ɩlanwʋ la ɩkɩnla asafʋ yɩ nwʋ na ihyinyia kɛɛ yi mmeliyema mmenyia nɩɩ mmaalɛ hyɛ yɩ ɛzɩzɩbɛ ma ɩkɔ zʋ ɩyɛ mɔɔ ɩtɩnɣɛ. (Hib. 10:​24, 25) Naasʋ̃, abiye mɔɔ bɛyɩ yɩ wɔ asafʋ yɩ nu mɛyɩ, yi odwokɔ dɩ sʋnʋnkʋ̃. Yɛ nɩɩ ɔzɔ enii nɩ ‘yɛadu dɔkʋ̃’ na yɛ nɩɩ ‘enii mɔɔ ɩdɩ ɔzɔ nɩ yɛáli alɩyɛ po.’—1 Kɔl. 5:11.

14. Sɛ bɛyɩ abiye wɔ asafʋ yɩ nu a, mɩnla pɔkɔ yɛ Kilisinyianii bela kegyina yi tiwʋwaba zʋ kezi a? (Kila mfonyini yi sʋ̃.)

¹⁴ Asʋ̃ mɔɔ yezunzu nwʋmɔ nɩ kile kɛɛ sɛ abiye mɔɔ bɛyɩ yɩ wɔ asafʋ yɩ nu ba dɩyɛzumanlɛ a, yɛkɛyɩ yɛ anyɩ kɛma yɩ a? Anhã. Ɩwɔ numɔ, yɛ nɩɩ yɩ lɔ́bɔ. Naasʋ̃ sɛ enii mɔɔ bɛyɩ yɩ wɔ asafʋ yɩ nu nɩ dɩ ye busunwanii anzɛnyɩɩ yɛ ɔhɔnwʋ paa a, sa Kilisinyianii bela kyina yi tiwʋwaba zʋ si pɔkɔ kɛɛ ɩkɔdʋ salɛ kɔvʋlɔ yɩ ma ɩkɛɣa dɩyɛzumanlɛ tʋ. Na sɛ ɩba dɩyɛzumanlɛ sʋ̃ ɛ? Bɔmʋnlɩ nɩ a, ankɩ yelésema yɩ. Naasʋ̃ kakɩ yɩ, Kilisinyianii bela kegyina yi tiwʋwaba mɔɔ ɩva Bayɩbʋlʋ ɩdɩdɩ yɩ nɩ zʋ ikezi mɔɔ ɩkɛyɛ nwʋ pɔkɔ. Abiyemmɔ wɔ kɛnɩ a, ilédide bɛ kɛɛ bekezema yɩ na bɛama yɩ akwaaba. Naasʋ̃, yɛ nɩɩ yɩ lɔ́bɔ nkɔmmɔ tɩndɩnlɩ bela anzɛnyɩɩ yɛ nɩɩ yɩ lɔ́bɔ pampɩɩ.

15. Tanɩyɛlɛmaa mɔɔ bɔ nwʋ odwokɔ wɔ 2 Dwɔɔnʋ 9-11 nɩ, bɛdɩ aninyiammɔ a? (Kila alɩka mɔɔ ise “ Asʋ̃ Nɩ Dwɔɔnʋ Nɩɩ Pɔɔlʋ Bɛkãã Tanɩ Kʋ̃ Yɩ La Nwʋ Odwokɔ a?”)

 ¹⁵ Ebiye a abiyemmɔ keɣizia kɛɛ, ‘Na kɛ Bayɩbʋlʋ yɩ kã kɛɛ Kilisinyianii mɔɔ ikezema enii mɔɔ ɩdɩ zɔ nɩ, ɩ nɩɩ yɩ dɩ ɔkʋ̃ wɔ yɩ nyɛlɩyɛ tanɩ yɩ nu be a? (Kɩnga 2 Dwɔɔnʋ 9-11.) Naasʋ̃ ɛhɛlɛlɛdwokɔ eyi nu ndwokɔ ma yɛnwʋ kɛɛ, nɩ ɔhʋanɩhilelɛ eyi falɩ ɔvʋakɩlɛmaa nɩɩ bɛzabɛ mɔɔ bɛhyɛ mmenii ɛzɩzɩbɛ ma bɛyɛ nninyeni tanɩ nɩ nwʋ. (Yik. 2:20) Eyi ti, sɛ abiye kɔ zʋlɔ kilehile awohwi ehilehilelɛ anzɛnyɩɩ ɩhyɛ abiyemmɔ ɛzɩzɩbɛ ma bɛyɛ nninyeni tanɩ a, mbanimbani yi lɔ́kɔ kegyela yɩ. Amba, yɛwɔ anwʋlazʋ kɛɛ enii mɔɔ ɩdɩ zɔ kɔhʋla konlu yɩ nwʋ eɣile be. Naasʋ̃ kɔbʋmɩ kɛɛ ɩkɛzɩnza nɩ, yelésema yɩ anzɛnyɩɩ yɛlɔ́tʋ salɛ yɛkɔvʋlɔ yɩ kɛɛ ɩɣɩlá dɩyɛzumanlɛ.

SUMAZUMA GYEHOVA YI KUNLUMIYƖBALƐ NƖƖ YƖ NWƆKƐNWƲNLƐ

16-17. (a) Mɩnla yɛ Gyehova pɛ kɛɛ tanɩyɛlɛmaa yɛ a? (Izikɩyɛlɩ 18:32) (b) Mɩnla ɔhʋanɩ zʋ yɛ asafʋ nu mbanimbani bɛ nɩɩ Gyehova bɔ numɔ yɛ egyima a?

¹⁶ Mɩnla yɛ yezuma wɔ dɩyɛzumanlɛ ndwokɔ anlu mɔɔ ɩwɔ Ɔwɩɛnɩlɛ Aɣanɩ eyi nu nɩ nu a? Gyehova ɩábɛ kɛɛ ɩkɛzɩkɛ abiyela! (Kɩnga Izikɩyɛlɩ 18:32.) Ɩpɛ kɛɛ tanɩyɛlɛmaa bɛ nɩɩ yɩ avinli yɛ baaba dɔkʋ̃. (2 Kɔl. 5:20) Meti mɔɔ ɔzʋmɩ tɩɩtɩɩ munwala Gyehova kɔ zʋlɔ hyɛ yɩ azʋ̃mɩvʋlɔ mɔɔ bɛ nɩɩ yɩ avinli zɩkɛ nɩ ɛzɩzɩbɛ kɛɛ, bonlú bɔ nwʋ na beziá bɛɣɩla yɩ pɛ yɩ a. Sɛ asafʋ nu mbanimbani bɔ mmɔdɩnɩ kɛɛ bɔkɔwʋwa bɛzabɛ mɔɔ bɛyɛ tanɩ mɔɔ numɔ yɛ ɔnlʋmɔ nɩ ma bokonlu bɔ nwʋ a, nɩ ikile kɛɛ bɛ nɩɩ Gyehova bɔ numɔ kɛyɛ egyima.—Wul. 2:4; 1 Kɔl. 3:9.

¹⁷ Mɔwʋ kila fɛlɛkʋ̃lilɛ mɔɔ ɩba sʋlɔ mmɩlɩ mɔ tanɩyɛlɛnii be inlu yɩ nwʋ nɩ! Mmɩlɩ bela mɔ yɛ sʋlɔ Ɛzɩlɛ Gyehova yi mmuwuanɩ mɔɔ beminli nɩ bo nu ɔkʋ̃ kezia kɛɣa asafʋ yɩ nu nɩ, yɩ anyɩ de baaba. Sɛ yɛdwɩnɩndwɩnɩ Gyehova yi kunlumiyɩbalɛ, yɩ nwɔkɛnwʋnlɛ, nɩɩ yɩ baabayɛlɛ nwʋ a, ɔlɔlɛ mɔɔ yɛwɔ yɛma yɩ nɩ kɛyɛ kezi.—Lk. 1:78.