1-2. (a) Mɩnla yɛ lɛ tanɩ a, na kɛ ɩkɛyɛ na yɛali zʋlɔ nkunimi a? (Kila “Odwokɔ Be Mɔɔ Behilehile Nu.”) (b) Mɩnla yɛ yekozunzu nwʋmɔ wɔ dɩyɛzumanlɛ eyi nɩɩ dɩyɛzumanlɛ ndwokɔ mvʋlɔ mɔɔ ɩwɔ Ɔwɩɛnɩlɛ Aɣanɩ eyi nu nɩ a? (Kila odwokɔ mɔɔ ise “Odwokɔ Ma Ɛɣɩngalɛmaa” mɔɔ ɩwɔ Ɔwɩɛnɩlɛ Aɣanɩ eyi nu nɩ sʋ̃.)

 ASƲ̃ ɛkɛbɛ kɛɛ ɔkɔnwʋ kezimɔ Gyehova Nyamɩnlɩ dɔ wʋ a? Ɔhʋanɩba mɔɔ ɔkɔhʋla koluwa zʋ kenyia munwalɩyɛ nɩ yɛ lɛ kɛɛ, okozuma nninyeni mɔɔ Gyehova ɩyɛ na ama iale wʋ wɔ tanɩ nɩɩ owulo nu nɩ nwʋ dɩyɛ. Tanɩ a dɩ yɛ tamvʋlɔ mɔɔ yɩ nwʋ yɛ ɛyɛlɛ, na yɛlɔ́kʋla kɛva yɛzayɛ yɛ anwʋzɩzɩbɛ keli zʋlɔ nkunimi. Ye munwala yɛyɛ tanɩ eɣile bela, na yewu iluwa tanɩ ti. (Wul. 5:12) Naasʋ̃ odwokɔba be wɔ kɛ. Iluwa Gyehova yɩ mmʋwalɩyɛ zʋ nɩ, sa yɛkʋla yedi tanɩ zʋ nkunimi. Ɔhʋanɩ bela zʋ, sa yedi zʋlɔ nkunimi!

² Kɛyɛ alʋbɔ 6,000 yɛ dɩ yɛ Gyehova wɔlɩ yɩ tʋ kɛɛ ɩbʋwaa mmenii ma bɔkɔhʋ̃ kediyia tanɩ a. Mɩnla ti a? Iluwakɛɛ ɩdɔ yɛ. Ɔzʋmɩ mmɩlɩ mɔ Gyehova wɔlɩ mmenii nɩ, ɩla yɩ ali kɛɛ ɩdɔ bɛ paa. Eyi ti, ɩyɛ nninyeni sʋ̃maa mɔɔ ɩbʋwa bɛ ma bɔkʋ̃ betiyia tanɩ. Nyamɩnlɩ zi kɛɛ tanɩ fa yɛ kɔ owulo nu, naasʋ̃ ɩábɛ kɛɛ abiyela kowu. Mfomi ɩpɛ kɛɛ yɛbʋwa azɩ daabaa. (Wul. 6:23) Ɔzɔ yɛ ɩpɛ kɛɛ ɩyɛ ɩma wʋ a. Wɔ dɩyɛzumanlɛ eyi nu nɩ, yɛkɛyɩ ndwokɔɣizialɛ asã be munwa: (1) Mɩnla yɛ Gyehova yɛlɩ na ama adasamaa tanɩyɛlɛmaa bɛanyia anyɩnlɩlazʋ a? (2) Wɔ Bayɩbʋlʋ mmɩlɩ nu nɩ, mɩnla yɛ mmenii mɔɔ tanɩ wɔ bɔ nwʋ  yɛlɩ va zɔlɩ Gyehova anyɩ a? (3) Mɩnla yɛ Gyisɛsɩ yɛlɩ na ama iale adasamaa tanɩyɛlɛmaa wɔ tanɩ nɩɩ owulo nu a?

MƖNLA YƐ GYEHOVA YƐLƖ NA AMA ADASAMAA TANƖYƐLƐMAA BƐANYIA ANYƖNLƖLAZƲ A?

3. Kɛ ɩyɛlɩ mɔɔ yɛ awʋvʋlɔ mɔɔ beli bɔmʋnlɩ nɩ ɣa yɛlɩ tanɩyɛlɛmaa a?

³ Mmɩlɩ mɔ Gyehova wɔlɩ benyia nɩɩ baalɛ mɔɔ beli bɔmʋnlɩ nɩ, nɩ ɩpɛ kɛɛ bɛ anyɩ de. Ɩmanlɩ dɩka kɩnlɩma bɛ ma bɔwʋwalɩ, ɩvalɩ agyiahʋnlɩ ɩmanlɩ bɛ kɛɛ akyɛdɩ, na ɩvalɩ egyima be mɔɔ ɩkɛma bɛ ahʋnlɩnɩ kɔdɔ bo kunlu iwulalɩ bɛ sa. Nɩ ɩsɛ kɛɛ bɔwʋ bɛhyɛ azɩlɛ yɩ zʋ manlɩ na bɛma azɩlɛ yɩ munwala danɩ paladayɩsɩ dɩkɛɛ Ɛdɩnɩ toolo yi. Ahyɛdɩ ɔkʋ̃ pɛ mɔɔ nɩ ɩáyɛ sɩ yɛ ɩva ɩmanlɩ bɛ a. Na ɩwɔlɩ bɛ kɔkɔ kɛɛ, sɛ bɛhyɛda bobu ahyɛdɩ yɩ zʋ bɛfa bɛtɩ yɩ zʋ atunwa a, bɛ tanɩ nɩ kɛva bɛ kɔhɔ owulo nu. Yezi mɔɔ izili. Sunzuma be mɔɔ ɩálɔ Nyamɩnlɩ na ɩálɔ bɛ sʋ̃ nɩ, ɩɣa idweli bɛ ihilalɩ. Adamɩ nɩɩ Yifi manlɩ ɔzɔ sunzuma nɩ lahɩlɩlɩ bɛ. Bɛáde bɛ Zɩ mɔɔ ɩla ɔlɔlɛ kezile ali ihile bɛ nɩ bedi, mfomi bɛyɛlɩ yɩ zʋ azʋ̃nzɩzɩbɛ na bɛyɛlɩ tanɩ. Kɛmɔ yezi nɩ, Gyehova yi odwokɔ yɩ ɣalɩ numɔ, na ɔzʋmɩ ɔzɔ eɣile yi nɩ, bɛyɛlɩ mmɩlɩɣa na awielɩyɛ kʋlaa nɩ bowuli.—Gyn. 1:​28, 29; 2:​8, 9, 16-18; 3:​1-6, 17-19, 24; 5:5.

4. Mɩnla ti mɔɔ Gyehova kyi tanɩ na ɩbʋwa yɛ ma yɛkʋ̃ yetiyia a? (Wulomimaa 8:​20, 21)

⁴ Gyehova manlɩ bɛhɛlɛlɩ alɔbɔ odwokɔ eyi wɔ Bayɩbʋlʋ nu na ɩawʋwa yɛ. Ɩbʋwa yɛ ma yɛtɩ sianti mɔɔ ikyi tanɩ bɔkɔbɔkɔ nɩ tʋ. Tanɩ ma yɛ nɩɩ yɛ Zɩ Gyehova avinli sɩkɛ, na ɩfa yɛ ɩkɔ owulo nu. (Ayɩ. 59:2) Eyi ti yɛ Setanɩ, sunzuma atunwadɩlɛvʋlɔ mɔɔ ɩmanlɩ eyi munwala wɔlɩ yɩ tʋ nɩ, yɩ anyɩ deli tanɩ nwʋ na ɩbɔ mmɔdɩnɩ kɛɛ ɩkɛma amɩyɛ sʋ̃ yɛkɛyɛ tanɩ yɩ a. Mmɩlɩ mɔ Adamɩ nɩɩ Yifi yɛlɩ tanɩ nɩ, ɩkɛyɛ kɛɛ inyianlɩ adwɩnɩ kɛɛ ili nkunimi kezile. Naasʋ̃ nɩ ízi kɛɛ Gyehova yɩ ɔlɔlɛ dɩ kezi. Gyehova ɩásɩnza yi tile nu pɔkɔ mɔɔ ɩwɔ ɩma Adamɩ nɩɩ Yifi bɔ tʋmaa nɩ. Ɩdɔ adasamaa, meti ndɛndɛ la yɛ ɩmanlɩ bo munwala benyianlɩ anyɩnlɩlazʋ a. (Kɩnga Wulomimaa 8:​20, 21.) Nɩ Gyehova zi kɛɛ Adamɩ yɩ tʋmaa be wɔ kɛnɩ a, bɛkɛɣa kɔlɔ yɩ na bɛayɛ sutiye bɛama yɩ. Na kɛ bɛ Zɩ nɩɩ bɔ Wɔlɛvʋlɔ nɩ, ɩyɛlɩ nhyɩhyɛlɩyɛ mɔɔ ɩkɛma bekele bɔ nwʋ wɔ tanɩ tʋ na bɛahwɩ̃ bɛaɣike yi. Mɩnla yɛ Gyehova yɛlɩ na ama eyi ɩayɛ bʋwɔ a?

5. Mɩnla mmɩlɩ yɛ Gyehova manlɩ adasamaa nyianlɩ anyɩnlɩlazʋ a, na kɛ nkɔmɩhyɛ mɔɔ ɩwɔ Gyɛnɛsɩsɩ 3:15 nɩ kã nwʋmɔ odwokɔ se a?

⁵ Kɩnga Gyɛnɛsɩsɩ 3:15. Mmɩlɩ mɔ bɛyɛlɩ tanɩ la pɛ, yɛ Gyehova hanlɩ kɛɛ ɩkɛzɩkɛ Setanɩ a, na ɩmanlɩ adasamaa nyianlɩ anyɩnlɩlazʋ. Nyamɩnlɩ hanlɩ kɛɛ “yɩ tʋnii” be yɛ ɩkɛɣa kele adasamaa a. Nɩ yɩ tʋnii eyi kɛzɩkɛ Setanɩ na iaziyeziye ɔhawʋ mɔɔ ɩva ɩɣalɩ wɔ Ɛdɩnɩ toolo yi nu munwatĩĩ. (1 Dwɔ. 3:8) Naasʋ̃ ansaana eyi kɛyɛ bʋwɔ nɩ, nɩ Setanɩ kɔwɔ yɩ tʋnii nɩ ma ikowu. Nɩ eyi kɛyɛ Gyehova ɛyɛkɛ kɛdɛla dɩyɛ bela. Naasʋ̃ nɩ Gyehova wɔ ɛpɛ kɛɛ ikeli ɛyɛkɛ na ɩama ɔhʋanɩ ma yɩ tʋnii nɩ ɩanwʋ amanɩyɛ na ɩava iale adasamaa wɔ tanɩ nɩɩ owulo tʋ!

MƆƆ ADASAMAA TANƖYƐLƐMAA ƖYƐLƖ WƆ ƆWƆKƖ NA BƐAZƆ GYEHOVA ANYƖ

6. Mɩnla yɛ nɔhʋanlɛmaa be dɩkɛɛ Ebulu nɩɩ Nowa yɛlɩ na ama bɛahwɩ̃ bɛaɣike Gyehova a?

⁶ Ɔzʋmɩ ɔzɔ mmɩlɩ mɔ ɩbaa nɩ, ngyɩkɩ̃ɩ̃ ngyɩkɩ̃ɩ̃ la, Gyehova manlɩ adasamaa tanɩyɛlɛmaa nwʋnlɩ kezimɔ bɔkɔhʋla bɔkɔhwɩ̃ bekeɣike yi. Alɔbɔ odwokɔ mɔɔ izili wɔ Ɛdɩnɩ toolo yɩ nu mɛda nɩ, Ebulu mɔɔ ɩdɩ Adamɩ nɩɩ Yifi bɛ ɣa benyia mɔɔ ɩtɔ zʋlɔ anwɩ̃ nɩ yɛ lɛ enii mɔɔ ilili bɔmʋnlɩ inyianlɩ Gyehova nu dedi a. Iluwakɛɛ nɩ Ebulu dɔ Gyehova na ɩpɛ kɛɛ ɩsɔ yɩ anyɩ na ɩtwɩ̃ ibike yi nɩ ti, ɩwɔlɩ afɔlɩ  ɩmanlɩ yɩ. Nɩ Ebulu dɩ mmuwuanɩzʋhilalɛvʋlɔ, meti ihunli yi mmuwuanɩ mmalɛ yɩ be ɩva ɩwɔlɩ afɔlɩ ɩmanlɩ Gyehova. Mɩnla yɛ Gyehova yɛlɩ wɔ nwʋmɔ a? Yɩ “anyɩ zɔlɩ Ebulu nɩɩ yɩ afɔlɩ yɩ.” (Gyn. 4:4) Gyehova anyɩ zɔlɩ afɔlɩ azʋlɔtʋ mɔɔ mmenii mvʋlɔ mɔɔ bɔdɔ yɩ na bede yi bedi dɩkɛɛ Nowa wɔlɩ nɩ. (Gyn. 8:​20, 21) Gyehova leli afɔlɩ eyimmɔ dianlɩ numɔ va hileli kɛɛ adasamaa tanɩyɛlɛmaa kɔhʋla kɔzɔ yɩ anyɩ na bɛahwɩ̃ bɛaɣike yi. b

7. Mɩnla yɛ yesuma wɔ ɛpɛ mɔɔ nɩ Abilehamɩ wɔ kɛɛ ɩkɛva yɩzayɩ yɩ ɣa benyia ɩkɔwɔ afɔlɩ nɩ nu a?

⁷ Gyehova hanlɩ hileli Abilehamɩ, benyia mɔɔ nɩ ɩwɔ dedi kezile paa nɩ kɛɛ, ɩyɛ́ debe mɔɔ nɩ ɩyɛlɛ kɛyɛ sɩ paa. Mɛyɩ yɛ lɛ kɛɛ, ɩvá yɩzayɩ yɩ ɣa benyia Ayɩzɩkɩ ɩwɔ afɔlɩ. Pɩlazunɛ bela íni nwʋmɔ kɛɛ eyi manlɩ Abilehamɩ lili ɛyɛkɛ baaba paa. Naasʋ̃ nɩ iziyeziye yɩ nwʋ kɛɛ ikediye Gyehova. Naasʋ̃, ɩka ɛgyɩkɩ̃ɩ̃ ma ikũ yɩ ɣa yɩ la pɛ yɛ Gyehova manlɩ iyiakili a. Ɔzɔ ndianwʋ yɩ ma yɛnwʋ mɔɔ nɩ Gyehova kɛyɛ wɔ eɣile be. Nɩ Gyehova ɩzʋ̃ yɩ pɛ nu ɩkɛva yɩzayɩ yɩ Dɔɣalɛ ɩkɔwɔ afɔlɩ. Amba, Gyehova dɔ adasamaa paa.—Gyn. 22:​1-18.

8. Afɔlɩ azʋlɔtʋ mɔɔ nɩ bɔbɔ yɩ wɔ Mmɛla yɩ tʋ nɩ, mɩnla yɛ ɩma yɛnwʋ yɩ a? (Lɛvitikɔsʋ 4:​27-29; 17:11)

⁸ Wɔ alʋbɔ sʋ̃maa mɛda nɩ, Mmɛla mɔɔ Gyehova va manlɩ Yizilayamaa nɩ bɩbɛlɩ kɛɛ bɔkɔwɔ afɔlɩ azʋlɔtʋ na ama bɛava bɛ tanɩ bɛahyɛ bɛ. (Kɩnga Lɛvitikɔsʋ 4:​27-29; 17:11.) Ɔzɔ afɔlɩ azʋlɔtʋ nɩ ma yɛnwʋ kɛɛ, nɩ Gyehova kɔwɔ afɔlɩ kezile be mɔɔ ikele adasamaa wɔ tanɩ nu. Sunzuma yɩ hanlɩ Nyamɩnlɩ yɩ nkɔmɩhyɛmaa ma behilehileli numɔ kɛɛ, yɩ tʋnii mɔɔ bɔwɔ yɩ nwʋ anʋhʋba mɔɔ ɩɣa ɩlalɩ ali kɛɛ ɩdɩ Nyamɩnlɩ Ɣalɛ sʋnʋnkʋ̃ nɩ kɔnwʋ amanɩyɛ na bɛahũ yi. Nɩ bokohũ yi dɩkɛɛ owuanɩ mɔɔ bɛfa bɔbɔ afɔlɩ. (Ayɩ. 53:​1-12) Mɔwʋ tua nwʋmɔ mfonyini kila: Nɩ Gyehova kɛyɛ nhyɩhyɛlɩyɛ ma bɛkɛva yɩ Dɔɣalɛ nɩ bɔkɔwɔ afɔlɩ na ɩava iale adasamaa, mɔɔ wʋzawʋ sʋ̃ ɛkɩnla nwʋmɔ nɩ wɔ tanɩ nɩɩ owulo nu!

MƖNLA YƐ GYISƐSƖ YƐLƖ VA LELI ADASAMAA WƆ TANƖ NU A?

9. Mɩnla yɛ Dwɔɔnʋ Numavʋlɔ nɩ hanlɩ valɩlɩ Gyisɛsɩ nwʋ a? (Hibulumaa 9:22; 10:​1-4, 12)

⁹ Wɔ ɔlʋbɔ 29 Y.M. nu nɩ, Dwɔɔnʋ Numavʋlɔ yɩ nwʋnlɩ Gyisɛsɩ mɔɔ ɩzʋ̃ Nazɩlɛtɩ nɩ, na ɩhanlɩ kɛɛ: “Behilá Nyamɩnlɩ yɩ Owuanɩ Ɣalɛ nɩ mɔɔ ɩyɩ oyuwadɩ tanɩ ɩkɔ nɩ!” (Dwɔ. 1:29) Ndwokɔ eyi lalɩ yɩ ali kɛɛ Gyisɛsɩ yɛ lɛ yɩ tʋnii sʋnʋnkʋ̃ mɔɔ Nyamɩnlɩ wɔlɩ yɩ nwʋ anʋhʋba nɩ a. Mɛyɩ yɛ nɩ ɩkɛva yɩ nnwʋanlɩ ɩkɔwɔ afɔlɩ a. Akʋ̃ dɩyɛ, nɩ Gyehova yɩ tʋnii mɔɔ ɩkɔwʋwa adasamaa ma bekeli tanɩ zʋ nkunimi kʋlakʋla nɩ ɩɣa.—Kɩnga Hibulumaa 9:22; 10:​1-4, 12.

10. Mɩnla ɔhʋanɩ zʋ yɛ Gyisɛsɩ lalɩ yɩ ali kɛɛ ‘ɩɣa ɩvʋlɔlɩ’ tanɩyɛlɛmaa a?

¹⁰ Gyisɛsɩ valɩ yɩ adwɩnɩ ziyeli mmenii mɔɔ tanɩ ma bɛtɩ nɣanlɩ kɛɛ bɛávata nɩ zʋ, na ɩdʋlɩ salɛ ɩvʋlɔlɩ bɛ kɛɛ bɛɣɩla bɛyɛ yɩ adʋwavʋlɔ. Nɩ izi kɛɛ adasamaa bɛ amanɩyɛnwʋnlɛ munwatĩĩ ɩzʋ̃ tanɩ. Meti ɩhyɛlɩda ɩwʋwalɩ mmenii mɔɔ iluwa bɛ tanɩ ti bɛfɛɛ nɩ. Ɩvalɩ ndindianwʋ ihilehileli numɔ kɛɛ: “Mmenii mɔɔ bɛtɩ pɔkɔ nɩ bɛáhyinyia awudoyɛlɛvʋlɔ. Mfomi anlamvʋlɔ yɛ behyinyia awudoyɛlɛvʋlɔ nwʋ a.” Ɩdʋwalɩ zʋlɔ kɛɛ: “Mɩába kɛɛ mɩbavɩlɛ ɛdɩnɣɛlɛmaa, mfomi tanɩyɛlɛmaa ti yɛ mɩɣalɩ a.” (Mt. 9:​12, 13) Ɔzɔ pɛpɛɛpɛ yɛ Gyisɛsɩ yɛlɩ a. Mmɩlɩ mɔ baalɛ be valɩ yɩ anyɩ tʋ mmʋnlɩ wʋwʋlɩ Gyisɛsɩ yɩ agyia nwʋ nɩ, ɩzʋ̃ kunlumiba nu ɩ nɩɩ yɩ dɩndɛlɩ na ɩvalɩ yɩ tanɩ ɩhyɛlɩ yɩ. (Lk. 7:​37-50) Ihilehileli Samaliyianii baalɛ yɩ nɔhʋanlɛ ndwokɔ be mɔɔ nwʋmɔ hyinyia, ɩávalɩ nwʋmɔ kɛɛ nɩ izi kɛɛ benyia mɔɔ ɩ  nɩɩ yɩ da nɩ ɩ́dɩ yi hũ nɩ. (Dwɔ. 4:​7, 17-19, 25, 26) Nyamɩnlɩ manlɩ Gyisɛsɩ tumi po ma idunwonli mmenyia, mmaalɛ, nnwuakula nɩɩ mbanimbani mɔɔ tanɩ ti bowuwuli nɩ.—Mt. 11:5.

11. Mɩnla ti mɔɔ nɩ ɩáyɛ sɩ ma tanɩyɛlɛmaa kɛɛ bekeɣike Gyisɛsɩ a?

¹¹ Ɩáyɛ nnwʋánlɩ kɛɛ nɩ ɩáyɛ sɩ ma mmenii mɔɔ nɩ bɛyɛ tanɩ nɣezile po kɛɛ bekeɣike Gyisɛsɩ. Ɩlalɩ kunlumiba nɩɩ nwɔkɛnwʋnlɛ ali ihileli bɛ. Nɩ bo kunlu iádu kɛɛ bɛ nɩɩ Gyisɛsɩ kɛdɩndɛ. (Lk. 15:​1, 2) Na Gyisɛsɩ hamvʋlɩ mmenii eyimmɔ mmɩlɩ mɔ bɛlalɩ yɩ ali kɛɛ bɔwɔ yi nu dedi nɩ. (Lk. 19:​1-10) Ɩmanlɩ mmenii nwʋnlɩ kɛɛ yɩ Zɩ Gyehova dɩ nwɔkɛnwʋnlɛvʋlɔ baaba. (Dwɔ. 14:9) Iluwalɩ yi ndwokɔ nɩɩ yɩ nyɛlɩyɛ zʋ ihileli kɛɛ yɩ Zɩ mɔɔ ɩwɔ kunlumiyɩbalɛ nɩɩ nwɔkɛnwʋnlɛ nɩ dɔ mmenii, na ɩpɛ kɛɛ ɩbʋwa bo nu bela ma ɩkʋ̃ itiyia tanɩ. Gyisɛsɩ wʋwalɩ mmenii mɔɔ tanɩ wɔ bɔ nwʋ ma bɛzɩnzanlɩ bo subanɩ na bɛɣa belili yɩ mɛda.—Lk. 5:​27, 28.

12. Mɩnla yɛ Gyisɛsɩ hilehileli valɩlɩ yi owulo nwʋ a?

¹² Nɩ Gyisɛsɩ zi kɛɛ ɩlɛ yɩ nnwʋanlɩ ɩbawɔ afɔlɩ. Mbɔmɩ sʋ̃maa yɛ ɩhã ihileli yɩ adʋwavʋlɔ yɩ kɛɛ bɛkɛyɩ yɩ bɛkɛma na bɛahũ yi wɔ owudo zʋ a. (Mt. 17:22; 20:​18, 19) Kɛmɔ Dwɔɔnʋ nɩɩ nkɔmɩhyɛmaa nɩ hanlɩ dianlɩ kɛnɩ nɩ, nɩ izi kɛɛ yɩ afɔlɩ nɩ kɛyɩ oyuwadɩ yɩ tanɩ yɩ wɔ kɛ. Gyisɛsɩ hilehileli sʋ̃ kɛɛ sɛ ɩfa yɩ nnwʋanlɩ ɩbɔ afɔlɩ iwie yi a, ‘ɩkɔhwɩ̃ mmenii munwatĩĩ’ ɩkɛma yɩ nwʋ. (Dwɔ. 12:32) Bɛzabɛ mɔɔ benyia Gyisɛsɩ nu dedi na bɛfa yɩ  ahyɛdɩ bɛyɛ egyima nɩ kɔhʋla kɔzɔ Gyehova anyɩ. Sɛ bɛyɛ zɔ a, bɛlɛ́yɛ ‘alɔngɔ bɛkɛma tanɩ ebiyekʋ̃.’ (Wul. 6:​14, 18, 22; Dwɔ. 8:32) Gyisɛsɩ nyianlɩ akɛnɣazɩzɩbɛ na ɩzʋ̃ yɩ pɛ nu iwuli owulo ɛyɛkɛ ɛyɛkɛ na ɩava iale yɛ.—Dwɔ. 10:​17, 18.

13. Mɩnla ɔhʋanɩ zʋ yɛ Gyisɛsɩ wuli a, na mɩnla yɛ yi owulo nɩ kilehile yɛ falɩ Gyehova Nyamɩnlɩ nwʋ a? (Kila mfonyini yi sʋ̃.)

¹³ Bɛyɩlɩ Gyisɛsɩ bɛmanlɩ, bɛhyɩlɩ yɩ, bɔwʋdʋwʋdʋlɩ yɩ, bɛvalɩ odwokɔ bedianlɩ yɩ zʋ, bowuwalɩ yɩ owulo ɔfɔ, na bɛyɛlɩ yɩ ayɛkwa po. Azogyiamaa valɩ yɩ hɔlɩ dɩka mɔɔ bokohũ yi nɩ, na bɔwɔlɩ yɩ owudo nu. Mmɩlɩ mɔ nɩ ɩlɛ nɔhʋanlɛlilɛ ikyinaa ɔzɔ ɛyɛkɛ nɩ yi munwa nɩ, nɩ abiye wɔ kɛnɩ mɔɔ mɛyɩ po idii ɛyɛkɛ baaba paa. Ɔzɔ enii nɩ yɛ lɛ Gyehova. Nɩ Gyehova wɔ tumi kezile paa mɔɔ nɩ ɩkɔhʋla kɛva kɛyɩ yɩ Ɣa yɩ wɔ amanɩyɛnwʋnlɛ yɩ nu, naasʋ̃ ɩáfa yɩ nwʋ idideli odwokɔ yɩ nu. Sɛ Gyehova dɔ yɩ Ɣa yɩ paa a, nɩ mɩnla ti mɔɔ ɩmanlɩ ɔhʋanɩ ma ɩnwʋnlɩ amanɩyɛ na iwuli a? Yetuaa yɩ sini a, ɩdɩ ɔlɔlɛ. Gyisɛsɩ hanlɩ kɛɛ: “Na Nyamɩnlɩ lɔlɩ oyuwadɩ sʋ̃maa nɩ ti yɛ ɩvalɩ yɩ Ɣa ɔkʋ̃tɩnyɩɩ nɩ ɩmanlɩ a, ama abiyela mɔɔ ikele yi ikeli nɩ iáwuli mfomi ianyia nnwʋanlɩ mɔɔ íni awielɩyɛ.”—Dwɔ. 3:16.

14. Mɩnla yɛ Gyisɛsɩ yɩ afɔlɩ nɩ ɩma ɔnwʋ yɩ a?

¹⁴ Gyisɛsɩ yɩ afɔlɩ yɩ dɩ dasɩlɛ mɔɔ ɩma yɛnwʋ yɩ petee kɛɛ Gyehova dɔ Adamɩ nɩɩ Yifi bɔ tʋmaa. Ɩdɩ dasɩlɛ mɔɔ ikile kɛɛ Gyehova dɔ wʋ baaba paa. Ɩvalɩ yɩ Dɔɣalɛ nɩ ɩwɔlɩ afɔlɩ na igyinanlɩ ɛyɛkɛ kezile mɔɔ ɩzʋ̃ numɔ ɩɣalɩ nɩ munwa na ɩava iale wʋ wɔ tanɩ nɩɩ owulo nu. (1 Dwɔ. 4:​9, 10) Amba, ɩpɛ kɛɛ ɩbʋwa ye nu ɔkʋ̃ bela ma ɩkʋ̃ itiyia tanɩ na idi zʋlɔ nkunimi!

15. Sɛ yekenyia Gyisɛsɩ yi elelɛdɩyɛ afɔlɩ mɔɔ Nyamɩnlɩ va ma yɛ kɛɛ akyɛdɩ nɩ zʋ mfasʋ a, mɩnla yɛ ɩsɛ kɛɛ yɛyɛ a?

¹⁵ Nyamɩnlɩ yɩ Ɣa ɔkʋ̃ kyeinyii mɔɔ ɩvalɩ yɩ ɩwɔlɩ afɔlɩ nɩ dɩ akyɛdɩ mɔɔ ɩma ɩyɛ bʋwɔ kɛɛ bɛkɛva yɛ tanɩ bɛkɛhyɛ yɛ. Naasʋ̃ sɛ Nyamɩnlɩ kɛva yɛ tanɩ kɛhyɛ yɛ a, ɩsɛ kɛɛ yɛyɛ debe. Ɩdɩ mɩnla a? Dwɔɔnʋ Numavʋlɔ yɩ nɩɩ Gyisɛsɩ yɩzayɩ munli yi manlɩ nwʋmɔ munwalɩyɛ kɛɛ: “Mʋnlʋmmɔ bonlú bɔ nwʋ wɔ bɛ tanɩ nwʋ, iluwakɛɛ Nyamɩnlɩ Bulombunlililɛ mmɩlɩ nɩ iɣike!” (Mt. 3:​1, 2; 4:17) Meti sɛ yenu yɛ nwʋ nkʋ̃ la a, yɛ ɩkɛma yɛkɔhʋla kɔhʋ̃ kediyia tanɩ na yɛahwɩ̃ yɛaɣike yɛ Zɩ mɔɔ ɩwɔ ɔlɔlɛ nɩ a. Naasʋ̃ sɛ bɛkã kɛɛ abiye inlu yɩ nwʋ a, kɛ yɩ tʋ ikile a, na mɩnla ɔhʋanɩ zʋ yɛ ɩbʋwa yɛ ma yɛkʋ̃ yetiyia tanɩ a? Dɩyɛzumanlɛ mɔɔ ili kɛnɩ nɩ kehilehile numɔ.