Sʋ̃mavʋlɔ Pɔɔlʋ hɛlɛlɩ hɔ manlɩ Kilisinyiamaa mɔɔ bɔwɔ Tɛsalonika nɩ kɛɛ: “Sɛ abiyemmɔ bɔwɔ ɛkɛnɩ mɔɔ beléde mɔɔ yɛhɛlɛ yɩ wɔ kɛlɛta eyi nu nɩ bekeli a, mʋnlʋmmɔ bɛyɛ́ ɔzɔ mmenii nɩ ndwɩ baaba.” (2 Tɛs. 3:14) Bɔmʋnlɩ nɩ, nɩ yɛkã kɛɛ ɔhʋanɩhilelɛ eyi kɔ ma asafʋ nu mbanimbani. Nɩ sɛ abiye ɩáva Bayɩbʋlʋ nu egyinalɛzʋ-ndwokɔ ɩbɔ yɩ ɛbɩla na botu yɩ fʋlɔ mbɔmɩ sʋ̃maa naasʋ̃ iádiye a, nɩ mbanimbani yi ma nwʋmɔ ndɛnɩ fa bɔ asafʋ yɩ kɔkɔ. Na ɔzʋmɩ ɔzɔ mmɩlɩ yɩ, asafʋ yɩ nu maa beyiaki kɛɛ bɛ nɩɩ enii mɔɔ bɛyɛ yɩ ndwɩ nɩ kɔwɔ numɔ kɛyɛ nninyeni be kɛva kele bɛ anyɩ.

Naasʋ̃, ihyinyia kɛɛ yɛsɩnza ntɩyasɩ mɔɔ yɛlɛ yɩ wɔ ɔzɔ odwokɔ yɩ nwʋ nɩ. Kakɩ yɩ, yɛtɩ Pɔɔlʋ yi odwokɔ yɩ tʋ kɛɛ ɩdɩ pɔkɔ mɔɔ ɩsɛ kɛɛ Kilisinyianii bela si wɔ bʋwabɩlɛ azʋlɔtʋ be nu. Meti nwʋmɔ iáhyinyia kɛɛ asafʋ nu mbanimbani kɛma ndɛnɩ kɛva kɔwɔ asafʋ yɩ kɔkɔ. Mɩnla ti mɔɔ yɛyɛ nzɩnzanlɩyɛ eyi a? Bɛmá yehila mɔɔ nɩ Pɔɔlʋ ɩkãã nwʋmɔ odwokɔ mmɩlɩ mɔ ɩvalɩ fʋlɔdulɛ eyi ɩmanlɩ nɩ.

Pɔɔlʋ yɛlɩ yɩ ndwɩ kɛɛ ɔzɔ asafʋ yɩ nu maa be wɔ kɛnɩ a “bɛdɩ ahwadwʋvʋlɔ.” Nɩ bɛábɛ kɛɛ bɛfa fʋlɔdulɛ mɔɔ iluwa Nyamɩnlɩ Odwokɔ yɩ zʋ ɩva ma bɛ nɩ bɛyɛ egyima. Mmɩlɩ be mɔ ɩhɔ igyelalɩ bɛ nɩ, ɩvalɩ ɔhʋanɩhilelɛ eyi ɩmanlɩ bɛ kɛɛ: “Abiyela mɔɔ ɩábɛ kɛɛ ɩyɛ egyima nɩ, íni kɛɛ idi alɩyɛ.” Naasʋ̃ nɩ bo nu be bɛlanwʋ la bɛábɛ kɛɛ bɛyɛ egyima, ɩávalɩ nwʋmɔ kɛɛ nɩ bɔwɔ anwʋzɩzɩbɛ nɩ. Akʋ̃ sʋ̃, nɩ bɛfa bo munwa betindiã abiyemmɔ bo ndwokɔ nu. Nɩ kɛ ɩsɛ kɛɛ Kilisinyiamaa bɛ nɩɩ ahwadwʋvʋlɔ eyimmɔ di se a?—2 Tɛs. 3:​6, 10-12.

Pɔɔlʋ hanlɩ kɛɛ, “bɛyɛ́ ɔzɔ mmenii nɩ ndwɩ.” Wɔ Giliki nu nɩ, ntɩyasɩ mɔɔ ɩwɔ ɔzɔ odwokɔ yɩ nu yɛ lɛ kɛɛ, ekehila wʋ nwʋ bʋwɔ wɔ abiye nwʋ na yɩ nyɛlɩyɛ tanɩ yɩ iányianlɩ wʋ zʋ tumi. Pɔɔlʋ valɩ ɔhʋanɩhilelɛ eyi manlɩ asafʋ munli yi munwatĩĩ, na kɛ mbanimbani yi nkʋ̃ la. (2 Tɛs. 1:1; 3:6) Meti sɛ Kilisinyianii be yɛ yɩ ndwɩ kɛɛ yɩ ɔhɔnwʋ dedinii be ɩáva Bayɩbʋlʋ nu fʋlɔdulɛ ɩyɛ egyima a, ɩkɔhʋla kezi pɔkɔ kɛɛ ‘ɩ nɩɩ yɩ lóduwa.’

Asʋ̃ eyi kile kɛɛ nɩ bɛ nɩɩ ɔzɔ enii nɩ di dɩkɛɛ abiye mɔɔ bɛyɩ yɩ wɔ asafʋ yɩ nu a? Anhã, iluwakɛɛ Pɔɔlʋ dʋwalɩ zʋlɔ kɛɛ: “Bɔwɔ́ bɔ kɔkɔ wɔ ɔzɔ nyɛlɩyɛ nɩ mmɔ nwʋ, wɔ ɔhʋanɩ mɔɔ mʋnlʋmmɔ bokoluwa ɔzʋlɔ bɔkɔwɔ eliyema bela kɔkɔ nɩ.” Meti nɩ sa bɔkʋla bɛ nɩɩ enii mɔɔ bɛyɛ yɩ ndwɩ nɩ bɔ wɔ dɩyɛzumanlɛ tʋ anzɛnyɩɩ wɔ dasɩlɛlilɛ nu, naasʋ̃ sɛ ɩba yɩ kɛɛ bɛyɛɛ debe kɛva kele bɛ anyɩ a, bɔkʋla besi pɔkɔ kɛɛ bɛlɛ́ma ɩkɛɣa ebiye. Mɩnla ti a? Pɔɔlʋ hanlɩ kɛɛ, ‘ama yɩ anyunu iagua azɩ.’ Sɛ ɩba yɩ zɔ a, ɩkɛma yɩ anyɩ kɔdʋ̃ wɔ mɔɔ ɩyɛɛ nɩ nwʋ na ɩazɩnza.—2 Tɛs. 3:​14, 15.

Kɛ ɩkɛyɛ na Kilisinyiamaa mɔɔ bɔwɔ kɛnɩ nnɛ nɩ bɛava fʋlɔdulɛ eyi bɛayɛ egyima a? Mɔɔ ili bɔmʋnlɩ, ɩsɛ kɛɛ yekila yɛnwʋ yɩ paa kɛɛ, enii kʋ̃ nɩ yɩ nyɛlɩyɛ kile kɛɛ ‘ɩdɩ kwadwʋvʋlɔ’ kɛmɔ Pɔɔlʋ hanlɩ nɩ. Nɩ ɩlɛ́kã bɛzabɛ mɔɔ bekyina be tiwʋwaba zʋ besizi abɔkɔ mɔɔ iádiyia Bayɩbʋlʋ nu egyinalɛzʋ-odwokɔ bela, naasʋ̃ amɩyɛ yɛ anyɩ iáleli nwʋmɔ nɩ. Anzɛnyɩɩ nɩ ɩlɛ́kã bɛzabɛ mɔɔ ɩsʋnɩ nninyeni mɔɔ bɛ anyɩ deli nwʋmɔ nɩ. Akʋ̃ sʋ̃, nɩ ɩlɛ́kã bɛzabɛ mɔɔ bɛyɛ debe ma ɩyɛ ɛyɛkɛ yɛ nɩ. Mfomi nɩ Pɔɔlʋ ɩkãã bɛzabɛ mɔɔ bɛva Bayɩbʋlʋ nu fʋlɔdulɛ bɛma bɛ mɔɔ bɛábɛ kɛɛ bɛfa bɛyɛ egyima nɩ.

Nnɛ sʋ̃, sɛ yɛyɛ yɩ ndwɩ kɛɛ eliyema be ɩábɛ kɛɛ ɩfa Bayɩbʋlʋ nu fʋlɔdulɛ ɩyɛ egyima a, a sa yɛkʋla yesi pɔkɔ kɛɛ, sɛ yɛyɛɛ debe kɛva kele yɛ anyɩ a, yɛlɛ́ma ɩkɛɣa ebiye. Iluwakɛɛ eyi dɩ yɛzayɛ yɛ pɔkɔzilɛ ti, yɛ nɩɩ abiye mɔɔ ɩ́dɩ ye busunwanii mɔɔ yɛ nɩɩ yɩ da pika ɔkʋ̃ nu lɔ́bɔ nwʋmɔ nkɔmmɔ. Naasʋ̃ sa yɛkɔ zʋlɔ yɛ nɩɩ yɩ bɔ wɔ dɩyɛzumanlɛ tʋ nɩɩ dasɩlɛlilɛ nu. Sɛ ɩsɩnza yi subanɩ a, akʋ̃ sa yɛ nɩɩ yɩ bɔ kɛmɔ yɛ nɩɩ abiyela bɔ nɩ.