Asʋ̃ ozuma Ɔwɩɛnɩlɛ Aɣanɩ azʋlɔtʋ mɔɔ ɩɣalɩ ɔlʋbɔ eyi nu ndwokɔ munwatĩĩ bʋwɔ a? Mɛyɩ nɩ kila kɛɛ ɔkɔhʋla kɛyɩ ndwokɔɣizialɛ eyimmɔ munwa a:

Mɩnla nninyeni yɛ yɛyɛ a, ikile kɛɛ ‘yɛsɩnzaa yɛ adwɩnɩ’ a? (Wul. 12:2)

Ɩsɛ kɛɛ yɛkɔ zʋ yɛyɛ nninyeni baaba. Akʋ̃ sʋ̃, ɩsɛ kɛɛ yɛpɩbɛlɩ ye nu na yɛyɛ nzɩnzanlɩyɛ bela mɔɔ ihyinyia, ama yɛahʋla yɛava Nyamɩnlɩ yɩ mmɛla yɛayɛ egyima.—w23.01, owu. 8-9.

Mɩnla yɛ ɩsɛ kɛɛ yɛyɛ mmɩlɩ mɔ yɛlɛ yɛ anyɩ yedii mɔɔ isizii wɔ oyuwadɩ mɛda nɩ a?

Iluwakɛɛ yɛpɛ kɛɛ yɛnwʋ kɛɛ Bayɩbʋlʋ nkɔmɩhyɛ ɩbaa numɔ nɩ ti, yɛfa yɛ anyɩ yedi mɔɔ isizii wɔ oyuwadɩ yi nu nɩ mɛda. Kɛ ankɩ yɛkɔwɔ ye ti nu yɛkɛhã debe mɔɔ ɩkɛva nkyɩkyɛmi ɩkɛɣa asafʋ yi nu nɩ, yɛfa yɛ nkɔmmɔwɔlɛ munwala yekyina awuuku azʋlɔtʋ mɔɔ Gyehova yɩ ahyɩhyɛdɩ yɩ idindimi nɩ zʋ. (1 Kɔl. 1:10)—w23.02, owu. 16.

Mɩnla ɔhʋanɩ zʋ yɛ Gyisɛsɩ yi onlumanlɛ nɩ ɩdɩ sʋnʋnkʋ̃ wɔ yɩ mɛdalilɛmaa bɛ dɩyɛ nwʋ a?

Nɩ iáhyinyia kɛɛ Gyisɛsɩ yila yɩ nwʋ zʋ ma Gyehova kɛmɔ yɛyɛ yɩ nnɛ nɩ, iluwakɛɛ bɔwʋlɩ yɩ bedianlɩ manlɩ mɔɔ nɩ beyila zʋlɔ bɛma Nyamɩnlɩ nu. Nɩ Gyisɛsɩ dɩ abiye mɔɔ idi munli mɔɔ tanɩ bela íni yɩ nwʋ, meti nɩ iáhyinyia kɛɛ inu yɩ nwʋ wɔ yɩ tanɩ nwʋ.—w23.03, owu. 5.

Kɛ yɛkɛyɛ na yɛawʋwa mmenii mvʋlɔ ma bɛama munwalɩyɛ wɔ dɩyɛzumanlɛ tʋ a?

Sa yɛkʋla yɛma ye munwalɩyɛ nɩ yɛ nzikalɛ, na abiyemmɔ sʋ̃ bɛanyia ɔhʋanɩ bɛama munwalɩyɛ yɩ be. Áma ɛkã dɩyɛ bela mɔɔ ɩwɔ ɔfʋã yi nu nwʋ odwokɔ. Eyi kɛma mmenii mvʋlɔ sʋ̃ kenyia ebiye kɛhã.—w23.04, owu. 23.

“Ɔhʋanɩ Nwanzanwanza” mɔɔ Ayɩzaya 35:8 kã nwʋmɔ odwokɔ nɩ, igyĩ kɛnɩ ɩma mɩnla?

Nɩ sɛnkyɩlɛdɩ ɔhʋanɩ zʋ ɔhʋanɩ kezile eyi gyĩ kɛnɩ ma ɔhʋanɩ mɔɔ Dwuumaa nɩ koluwa ɔzʋlɔ kɔhɔ bo twonwa zʋ nɩ. Na nnɛ mmɩlɩ yi nu sʋ̃ ɛ? Alʋbɔ yaalɛ sʋ̃maa ansaana 1919 ɩbaa nɩ, bɛyɛlɩ eziyeziyelɛ egyima be iluwa Bayɩbʋlʋ mɔɔ behileli yɩ tʋ na bɛbɩlɩntɩlɩ, nɩɩ egyima mvʋlɔ mɔɔ bɛyɛlɩ nɩ zʋ. Nyamɩnlɩ mmenii boluwa “Ɔhʋanɩ Nwanzanwanza” mɔɔ ɩkɔ sunzuma ɔfʋã nu paladayɩsɩ nɩ zʋ, na ɩkɛma bekenyia nyilalɛ mɔɔ Nyamɩnlɩ Bulombunlililɛ kɛva kɛɣa nɩ.—w23.05, owu. 15-19.

Mmaalɛ anwɩ̃ mɔɔ Ɛɣɛlɛwulɛ yi ti 9 kã bɔ nwʋ odwokɔ nɩ, begyĩ kɛnɩ bɛma mɩnla?

Ɛɣɛlɛwulɛ buuku yi kã “baalɛ kwasɩya” yɩ salɛdʋlɛ nwʋ odwokɔ kɛɛ, “imĩ ɩkɔ owulo nu,” na baalɛ mɔɔ igyĩ kɛnɩ ɩma “nɣɛlɛbɛ” nɩ yɩ salɛdʋlɛ ma abiye duwa “ntɩyasɩ ɔhʋanɩ zʋ,” na ɩma inyia nnwʋanlɩ. (Ɛɣɛ. 9:​1, 6, 13, 18)—w23.06, owu. 22-24.

Mɩnla ɔhʋanɩ zʋ yɛ kezimɔ Nyamɩnlɩ nɩɩ Lɔɔtʋ lili nɩ hileli kɛɛ ɩwɔ kãnwʋazɩ nɩɩ ntɩyasɩ a?

Gyehova hanlɩ hileli Lɔɔtʋ kɛɛ iɣiandí ɩhɔ avile nɩ mmɔ zʋ. Naasʋ̃ mmɩlɩ mɔ Lɔɔtʋ zianlɩ Gyehova kɛɛ ɩmá iɣiandi ɩhɔ Zowa mfomi nɩ, Gyehova diyeli yi.—w23.07, owu. 21.

Sɛ ɛyɩlɛ be yi hũ kila ponogɩlafi a, mɩnla yɛ ɩkɔhʋla ɩkɛyɛ a?

Ɩsɛ kɛɛ ɩkakɛ kɛɛ mfʋmɩ yɩ ɩ́zʋ̃ mɛyɩ. Ɩsɛ kɛɛ ɩbɔ mmɔdɩnɩ ɩfa yɩ adwɩnɩ isiye ɩ nɩɩ Gyehova avinli abusunwawɔlɛ nɩ zʋ na ɩdwɩnɩndwɩnɩ mmaalɛ mɔɔ Bayɩbʋlʋ kã bɔ nwʋ odwokɔ kɛɛ bɛ adwɩnɩ du vʋlalɩ mɔɔ Gyehova yɩkyɩlɩ bɛ ɛɣɛɛlɛ be ndianwʋ yɩ nwʋ. Sa ɩkʋla ɩbʋwa yi hũ ma ɩtwɩ̃ yɩ nwʋ wɔ nninyeni mɔɔ ɩkɛma ikehila ponogɩlafi nwʋ.—w23.08, owu. 14-17.

Mɩnla ɔhʋanɩ zʋ yɛ sɛ yeyiaa ye dedi nwʋ odwohilalɛ a, dɩyɛnunwʋnlɛ kɛma yɛkɛla odwolɛ ali a?

Kɛ ankɩ okowu odwokɔɣizialɛ yɩ kɛɛ ɩlɛ ɩtɩndɛɛ ikediyia wʋ nɩ, sunzu kezimɔ ekegyina zʋlɔ ɔkɔnwʋ mɔɔ ihyinyia yɩ na wʋahʋla wʋawʋwa yɩ nɩ nwʋ. Sɛ yɛyɛ ɔzɔ a, sa ɩbʋwa ma yɛyɩ yi odwokɔɣizialɛ yɩ munwa wɔ odwolɛ ɔhʋanɩ zʋ.—w23.09, owu. 17.

Mɩnla ɔhʋanɩ zʋ yɛ Mɛɛlɩ yi ndianwʋ yɩ kɔwʋwa yɛ ma ye dedi kɛyɛ sɩ a?

Mmɩlɩ mɔ Mɛɛlɩ ɣa nwʋnlɩ kɛɛ mɛyɩ yɛ ɩkɔwʋ Mɛzaya yɩ nɩ, ɩmanlɩ mmenii mvʋlɔ wʋwalɩ yɩ ma yi dedi yɛlɩ sɩ. Gebila nɩɩ Ɛlizabɛtɩ begyinanlɩ Ɛhɛlɛlɛ Odwokɔ yɩ zʋ bɛhyɛlɩ Mɛɛlɩ ɛzɩzɩbɛ. Amɩyɛ sʋ̃, sa yɛkʋla yenyia ɛzɩzɩbɛhyɛlɛ wɔ ye mmeliyema dedimaa bɛ kɛnɩ.—w23.10, owu. 15.

Mɩnla ɔhʋanɩ yɛ ebiye a Gyehova koluwa zʋ kowuwa yɛ mpayɩ a?

Gyehova bɔ anʋhʋba kɛɛ ikediye yɛ mpayɩ, na ikila kezimɔ yɛ mpayɩ nɩ falɩ yi tile nu pɔkɔ nwʋ. (Gyɛ. 29:12) Sɛ mmenii bɔ dɩyɛ ɔkʋ̃ nwʋ mpayɩ a, ebiye a Gyehova koluwa ɔhʋanɩ azʋlɔtʋ zʋ ikeli nwʋmɔ egyima, naasʋ̃ ɩkɔwʋwa yɛ mmɩlɩ munwala.—w23.11, owu. 21-22.

Wulomimaa 5:2 kã “anyɩnlɩlazʋ” nwʋ odwokɔ, naasʋ̃ mɩnla ti mɔɔ bezia bɛhanlɩ nwʋmɔ odwokɔ wɔ nkyɩkyɛmi 4 yi nu a?

Sɛ abiye tɩ odwokɔba yɩ a, ɩma inyia anyɩnlɩlazʋ kɛɛ ɩkɔwʋwa azɩ daabaa wɔ paladayɩsɩ azɩlɛ yɩ zʋ. Naasʋ̃ sɛ iyiyia atɩɩtɩɩ, ikyina numɔ pindinyii, na ɩba ɩnwʋ kɛɛ Nyamɩnlɩ ide yi itiã numɔ a, ɩkɛma yɩ anyɩnlɩlazʋ yi nu kɛyɛ sɩ na ɩkɛla yɩ ahʋnlɩnɩ zʋ.—w23.12, owu. 12-13.