1. Sɛ yesunzu Abilehamɩ yi dedi nwʋ a, ebiye a mɩnla odwokɔ yɛ yekeɣizia yɛ nwʋ a?

 ƖWƆ numɔ kɛɛ mmenii sʋ̃maa bɛdɩ Abilehamɩ nwʋ odwokɔ kyɩ̃, naasʋ̃ bo nu sʋ̃maa bézi yi bʋwɔ. Mɔwʋ mɛyɩ ezi sʋ̃maa ɛfalɩ Abilehamɩ nwʋ. Kɛ ndianwʋ nɩ, ezi kɛɛ bɔfʋlɔ Abilehamɩ kɛɛ ɩdɩ ‘ɛzɩlɛ ɩma mmenii mɔɔ bɛlɛ dedi nɩ.’ (Wul. 4:11) Ebiye a ekeɣizia wʋ nwʋ kɛɛ, ‘Asʋ̃ mʋkɔhʋla mʋkɔwɔ mɩ ɛbɩla dɩkɛɛ Abilehamɩ na mianyia yi dedi nɩ be a?’ Nyɛ, sa ɔkʋla.

2. Mɩnla ti mɔɔ nwʋmɔ hyinyia kɛɛ yesunzu Abilehamɩ yi ndianwʋ yɩ nwʋ a? (Gyemisi 2:​22, 23)

² Ɔhʋanɩ ɔkʋ̃ mɔɔ yɛkɔhʋla koluwa zʋ kenyia Abilehamɩ yi dedi nɩ be yɛ lɛ kɛɛ, yekozuma yi ndianwʋ yɩ. Abilehamɩ diyeli Nyamɩnlɩ mmɩlɩ mɔ ɩhanlɩ kɛɛ idú ɩhɔ azɩlɛ be mɔɔ ɩwɔ aɣinzi aɣinzi zʋ nɩ. Ɩhɔ ɩwʋwalɩ ndamɛ aliyia nu alʋbɔ sʋ̃maa na ɩwɔlɩ mmɔdɩnɩ kɛɛ ɩkɛva yɩ ɣa Ayɩzɩkɩ mɔɔ ɩdɔ yɩ nɩ ɩkɔwɔ afɔlɩ ɩkɛma yɩ. Na ɔzɔ mɔɔ ɩyɛlɩ nɩ ikile kɛɛ ɩwɔ dedi kezile. Abilehamɩ yi dedi nɩɩ yɩ nyɛlɩyɛ manlɩ Nyamɩnlɩ lelili yi dianlɩ numɔ, na ɩɣa ɩyɛlɩ Nyamɩnlɩ yɩ ɔhɔnwʋ. (Kɩnga Gyemisi 2:​22, 23.) Gyehova pɛ kɛɛ ye munwala mɔɔ wʋzawʋ sʋ̃ ɛkɩnla nwʋmɔ nɩ, yenyia ɔzɔ nyilalɛ nɩ be. Eyi ti ɩvalɩ yi sunzuma yɩ hanlɩ Pɔɔlʋ nɩɩ Gyemisi ma bɛhɛlɛlɩ Abilehamɩ yi ndianwʋ yɩ nwʋ odwokɔ. Yɛbahila mɔɔ Wulomimaa yi ti 4 nɩɩ Gyemisi yi ti 2 munwala kã falɩ Abilehamɩ nwʋ. Awuuku anwɩ̃ yɩ munwala kã debe mɔɔ nwʋmɔ hyinyia falɩ Abilehamɩ nwʋ.

3. Mɩnla Ɛhɛlɛlɛ Odwokɔ yɛ Pɔɔlʋ nɩɩ Gyemisi valɩ numɔ odwokɔ hanlɩ a?

³ Pɔɔlʋ nɩɩ Gyemisi munwala valɩ Gyɛnɛsɩsɩ 15:6 nu odwokɔ bɛhanlɩ, ɛkɛnɩ kã kɛɛ: “[Abilehamɩ] nyianlɩ Gyehova nu dedi,  na Nyamɩnlɩ wuli yi kɛɛ ɛdɩnɣɛlɛnii.” Mɔɔ ɛdɩnɣɛlɛ kile yɛ lɛ kɛɛ, Gyehova kele abiye kediã nu na iawu yi po kɛɛ mfʋmɩ bela íni yɩ nwʋ. Kila kezimɔ ɩkã ahʋnlɩnɩ kɛɛ Nyamɩnlɩ kowu enii mɔɔ ɩtɔ sini na tanɩ wɔ yɩ nwʋ kɛɛ mfʋmɩ bela íni yɩ nwʋ! Ebiye a, ɛpɛ kɛɛ Nyamɩnlɩ bu wʋzawʋ sʋ̃ kɛɛ ɛdɩnɣɛlɛnii na ɩkɔhʋla ɩkɛyɛ zɔ sʋ̃. Kakɩ yɩ, yɛbazuma sianti mɔɔ Gyehova vʋlɔlɩ Abilehamɩ kɛɛ ɛdɩnɣɛlɛnii nɩɩ mɔɔ amɩyɛ sʋ̃ yɛkɔhʋla kɛyɛ na Gyehova ɩavʋlɔ yɛ kɛɛ ɛdɩnɣɛlɛmaa.

4. Mɩnla yɛ ɩáma adasamaa yɛ ɛdɩnɣɛlɛmaa a?

⁴ Wɔ Pɔɔlʋ yɩ kɛlɛta mɔɔ ɩhɛlɛlɩ ɩmanlɩ Wulomimaa yɩ nu nɩ, ɩhanlɩ kɛɛ mmenii munwala bɛdɩ tanɩyɛlɛmaa. (Wul. 3:23) Sɛ ɔzɔ a, mɛyɩ nɩ mɩnla ti mɔɔ Nyamɩnlɩ kʋla de yɛ tiã nu na ɩfʋlɔ yɛ po kɛɛ ɛdɩnɣɛlɛmaa a? Mɔɔ ɩkɛyɛ na Kilisinyiamaa nɔhʋanlɛmaa munwala beanyia odwokɔɣizialɛ eyi nwʋ munwalɩyɛ nɩ, Pɔɔlʋ valɩ Abilehamɩ yɛlɩ ndianwʋ.

5. Mɩnla paa yɛ Gyehova gyinanlɩ zʋlɔ wuli Abilehamɩ kɛɛ ɛdɩnɣɛlɛnii a? (Wulomimaa 4:​2-4)

⁵ Gyehova vʋlɔlɩ Abilehamɩ kɛɛ ɛdɩnɣɛlɛnii mmɩlɩ mɔ nɩ ɩda Kenaanɩ azɩlɛ yɩ zʋ nɩ. Mɩnla yɛ ɩmanlɩ Gyehova vʋlɔlɩ Abilehamɩ ɛdɩnɣɛlɛnii a? Asʋ̃ nɩ ɩdɩ Mosisi Mmɛla mɔɔ nɩ Abilehamɩ didi zʋlɔ pɛpɛɛpɛ nɩ ti a? Anhã, ɩ́dɩ zɔ. (Wul. 4:13) Iluwakɛɛ Nyamɩnlɩ leli Abilehamɩ dianlɩ numɔ kɛɛ ɛdɩnɣɛlɛnii kɛyɛ alʋbɔ 400 ansaana ɩlɛ ɔzɔ Mmɛla nɩ ɩbama Yizilayamaa nɩ a. Meti mɩnla paa yɛ Gyehova gyinanlɩ zʋlɔ vʋlɔlɩ Abilehamɩ kɛɛ ɛdɩnɣɛlɛnii a? Iluwa Gyehova yɩ adʋmɩ ti yɛ ɩvʋlɔlɩ Abilehamɩ kɛɛ ɛdɩnɣɛlɛnii a, iluwakɛɛ nɩ ɩwɔ dedi.—Kɩnga Wulomimaa 4:​2-4.

6. Kɛ ɩyɛ mɔɔ Gyehova bu tanɩyɛlɛnii be kɛɛ ɛdɩnɣɛlɛnii a?

⁶ Pɔɔlʋ zia hanlɩ kɛɛ sɛ abiye nyia Nyamɩnlɩ nu dedi a, ‘iluwa yi dedi ti bobu yɩ kɛɛ ɛdɩnɣɛlɛnii.’ (Wul. 4:5) Pɔɔlʋ va zɔlɩ zʋlɔ kɛɛ: “Ɔzɔ sʋ̃ la yɛ bulombunli Devidi ɩhanlɩ nyilalɛ mɔɔ enii mɔɔ Nyamɩnlɩ ibu yɩ ɛdɩnɣɛlɛnii nɩ inyia yɩ nɩ a. Kɛ enii nɩ yɩ ɛbɩla baaba ti yɛ inyia ɔzɔ nyilalɛ nɩ a. Bulombunli Devidi ise: ‘Nyilalɛ ɩhã mmenii mɔɔ Nyamɩnlɩ ɩva bɛ mmɛladʋnlɛ ɩhyɛ bɛ, na ɩɣɩda bɛ tanɩ nɩ mmɔ zʋ nɩ! Nyilalɛ ɩhã enii nɩ mɔɔ Nyamɩnlɩ iáwu yɩ tanɩ nwʋ ngʋnda nɩ!’” (Wul. 4:​6-8; Ndw. 32:​1, 2) Nyamɩnlɩ fa mmenii mɔɔ benyia yi nu dedi nɩ bɛ tanɩ ɩkyɛ bɛ anzɛnyɩɩ ɩkɩda zʋlɔ. Ɩfa bɛ tanɩ ɩkyɛ bɛ kʋlakʋla na ɩáhakɛ yɩ dɔkʋ̃ anzɛnyɩɩ iáwu nwʋmɔ ngʋnda dɔkʋ̃. Ibu mmenii mɔɔ ɩva bɛ tanɩ ɩhyɛ bɛ nɩ kɛɛ ɛdɩnɣɛlɛmaa anzɛnyɩɩ kɛɛ mfʋmɩ bela íni bɔ nwʋ iluwa be dedi ti.

7. Mɩnla ti mɔɔ yɛkʋla yɛkã kɛɛ Nyamɩnlɩ yɩ azʋ̃mɩvʋlɔ mɔɔ bɔwʋwalɩ azɩ wɔ ɔwɔkɩ mmɩlɩ nu nɩ bɛdɩ ɛdɩnɣɛlɛmaa a?

⁷ Ɩwɔ numɔ kɛɛ bowuli Abilehamɩ, Devidi nɩɩ Nyamɩnlɩ yɩ azʋ̃mɩvʋlɔ be kɛɛ ɛdɩnɣɛlɛmaa dɩyɛ, naasʋ̃ nɩ bɛlanwʋ la bɛdɩ mmenii mɔɔ tanɩ wɔ bɔ nwʋ. Naasʋ̃ iluwa be dedi ti, Nyamɩnlɩ wuli bɛ kɛɛ mfʋmɩ bela íni bɔ nwʋ, titili mmɩlɩ mɔ ɩvalɩ bɛ idindianlɩ bɛzabɛ mɔɔ bɛázʋ̃mɩ yɩ bɔ nwʋ nɩ. (Ɛfɩ. 2:12) Kɛmɔ Pɔɔlʋ lalɩ yɩ ali wɔ yɩ kɛlɛta yi nu nɩ, dedi nwʋ hyinyia paa na ama abiye nɩɩ Gyehova ianyia abusunwawɔlɛ. Abilehamɩ nɩɩ Devidi ɣa yɛlɩ Gyehova yɩ ɔhɔnwʋmmɔ iluwa be dedi ti, na amɩyɛ sʋ̃ sa yɛkʋla yɛyɛ zɔ la.

8-9. Ndwokɔ mɔɔ ɩ́dɩ nɔhʋanlɛ ɛhɩnla dɩyɛ yɛ abiyemmɔ bɛhã bɛvalɩ Pɔɔlʋ nɩɩ Gyemisi bo ndwokɔ yɩ nwʋ a, na mɩnla ti a?

⁸ Alʋbɔ sʋ̃maa yɛ dɩ yɛ Nyamɩnlɩzʋ̃mɩnlɛ nu mbanimbani bozũ abusunwawɔlɛ mɔɔ ɩla dedi nɩɩ nyɛlɩyɛ bɛ avinli nɩ nwʋ pɩla a. Azɔfʋ be kilehile kɛɛ, mɔɔ ɩsɛ kɛɛ abiye yɛ na ama ianyia nnwʋanlɩ yɛ lɛ kɛɛ, ikele ye Niibenyia Gyisɛsɩ  ikeli. Ebiye a ɛdɩ kɛɛ bɛkãã kɛɛ, “Fa Gyisɛsɩ kɛɛ wʋ kɛla nɩɩ wʋ agyɩnkwã.” Abiyemmɔ sʋ̃ fa Pɔɔlʋ yi odwokɔ yɩ kã kɛɛ: ‘Kɛ enii yɩ ɛbɩla baaba ti yɛ ɩma ɩyɛ ɛdɩnɣɛlɛnii a.’ (Wul. 4:6) Abiyemmɔ sʋ̃ kile kɛɛ, sɛ ɔkɔ dɩka mɔɔ ɔzʋ̃mɩnlɛ azʋlɔtʋ bu yi kɛɛ ɩdɩ nwanzanwanza ɔkɔ sʋ̃mɩ wɔ kɛ, na ɛyɛ baaba ma mmenii a, ekenyia nnwʋanlɩ. Na ebiye a, bɔtwɩ̃ adwɩnɩ besiye Gyemisi 2:24 yɩ zʋ, mɔɔ ise: “Enii yɩ nyɛlɩyɛ baaba ɩma ɩsɔ Nyamɩnlɩ yɩ anyɩ na kɛ yɩ dedi nkʋ̃ a” bɛfa bɔfʋwa bo ndwokɔ yɩ zʋ.

⁹ Iluwakɛɛ ɔsʋnɩ adwɩnɩ mɔɔ bo nu bela lɛ nɩ ti, ɩyɛ a ɩma Bayɩbʋlʋ nwʋ nnimidimaa be sʋ̃ kã kɛɛ, nɩ Pɔɔlʋ nɩɩ Gyemisi bɛ adwɩnɩ iáyiyia wɔ kezimɔ dedi nɩɩ nyɛlɩyɛ nwʋ hyinyia na ama Nyamɩnlɩ iale abiye iadiã numɔ nɩ nwʋ. Azɔfʋ be kile kɛɛ, nɩ Pɔɔlʋ ide idi kɛɛ dedi nkʋ̃ la yɛ ɩkɔhʋla kɛma Nyamɩnlɩ kele abiye kediã nu a, naasʋ̃ Gyemisi mɛyɩ nɩ ide idi kɛɛ ɩsɛ kɛɛ abiye da nyɛlɩyɛba ali ansaana Nyamɩnlɩ iale yi iadiã nu. Ɔzʋ̃mɩnlɛ nwʋ nnimidivʋlɔ be kã kɛɛ: “Sianti mɔɔ Pɔɔlʋ hanlɩ kɛɛ dedi nkʋ̃ la nwʋ hyinyia na ama abiye ɩayɛ ɛdɩnɣɛlɛnii nɩ, nɩ Gyemisi ɩádɩ yɩ tʋ.” Naasʋ̃ Gyehova yɛ ɩvalɩ yi sunzuma ɩhanlɩ Gyemisi nɩɩ Pɔɔlʋ munwala ma bɛhɛlɛlɩ bo ndwokɔ yɩ a. (2 Tim. 3:16) Meti yede yedi kɛɛ sianti baaba be ti yɛ ɩdɩ kɛɛ mɔɔ bo ndwokɔ yɩ dɩ sʋnʋnkʋ̃ yɩ a. Meti ɩsɛ kɛɛ yesunzu dɩyɛ pɔkyɩɩ mɔɔ nɩ bo nu bela ɩkãã nwʋmɔ odwokɔ wɔ yɩ kɛlɛta yi nu nɩ nwʋ, na mɛyɩ kɔwʋwa yɛ ma yɛkɛdɩ bɔ tʋ bʋwɔ.

10. Mɩnla “nyɛlɩyɛ” yɛ Pɔɔlʋ hanlɩ nwʋmɔ odwokɔ wɔ Wulomimaa yi ti 3 nɩɩ 4 yɩ nu a? (Wulomimaa 3:​21, 28, NWT) (Kila mfonyini yi sʋ̃.)

¹⁰ Mɩnla “nyɛlɩyɛ” yɛ Pɔɔlʋ hanlɩ nwʋmɔ odwokɔ wɔ Wulomimaa yi ti 3 nɩɩ 4 yɩ nu a? Mosisi Mmɛla mɔɔ bɛva bɛmanlɩ Yizilayamaa yɩ mɔɔ bekelili zʋlɔ nɩ yɛ nɩ ɩkãã nwʋmɔ odwokɔ titili a. (Kɩnga Wulomimaa 3:​21, 28, NWT.) Nɩ ɩdɩ kɛɛ wɔ Pɔɔlʋ yɩ mmɩlɩ zʋ  nɩ, Dwuumaa be mɔɔ bɛɣa bɛyɛ Kilisinyiamaa nɩ bɛlanwʋ la bede bedi kɛɛ ɩsɛ kɛɛ bɔkɔlɩ zʋlɔ bedidi Mosisi Mmɛla yɩ zʋ. Meti Pɔɔlʋ valɩ Abilehamɩ yɛlɩ ndianwʋ va hileli kɛɛ, nɩ nwʋmɔ iáhyinyia kɛɛ abiye didi ɔzɔ mmɛla yɩ zʋ ansaana Nyamɩnlɩ iawu yi kɛɛ ɛdɩnɣɛlɛnii, mfomi ɩsɛ kɛɛ inyia Nyamɩnlɩ nu dedi. Eyi hyɛ ɛzɩzɩbɛ paa, iluwakɛɛ ɩma yɛnwʋ kɛɛ sɛ abiye de Nyamɩnlɩ nɩɩ Gyisɛsɩ Kɩlayɩsɩ idi a, Nyamɩnlɩ kɔhʋla kele yi kediã numɔ.

11. Mɩnla “nyɛlɩyɛ” yɛ nɩ Gyemisi ɩkãã nwʋmɔ odwokɔ a?

¹¹ Naasʋ̃ “nyɛlɩyɛ” mɔɔ Gyemisi hanlɩ nwʋmɔ odwokɔ wɔ Gyemisi yi ti 2 nu nɩ, ɩ́dɩ Mosisi Mmɛla yɩ zʋ lilɛ mɔɔ Pɔɔlʋ hanlɩ nwʋmɔ odwokɔ nɩ a. Nyɛlɩyɛ mɔɔ nɩ Gyemisi ɩkãã nwʋmɔ odwokɔ nɩ, nɩ ɩdɩ nninyeni mɔɔ Kilisinyiamaa bɛyɛ wɔ bɛ ɛbɩlawɔlɛ nu eɣile bela nɩ. Ɔzɔ nyɛlɩyɛ nɩ yɛ ikile kɛɛ Kilisinyianii be wɔ Nyamɩnlɩ nu dedi amba anzɛnyɩɩ ɩ́dɩ zɔ. Bɛmá yezunzu nwʋmɔ ndianwʋ anwɩ̃ be mɔɔ Gyemisi va lili egyima nɩ nwʋ.

12. Mɩnla ɔhʋanɩ zʋ yɛ Gyemisi hilehileli abusunwawɔlɛ mɔɔ ɩwɔ dedi nɩɩ nyɛlɩyɛ bɛ avinli nɩ nu a? (Kila mfonyini yi sʋ̃.)

¹² Wɔ ndianwʋ mɔɔ ili bɔmʋnlɩ yɩ nu nɩ, Gyemisi manlɩ yɛnwʋnlɩ kɛɛ íni kɛɛ Kilisinyiamaa bɛyɩyɩ mmenii nu. Ɩvalɩ ndianwʋ mɔɔ ɩfalɩ benyia be mɔɔ ɩlalɩ kunlumiba ali ihileli ozukuanii be na iwuli yɩ anyɩ igualɩ ehyinyianii be zʋ nɩ ihilehileli odwokɔ yɩ nu. Gyemisi hanlɩ kɛɛ ebiye a benyia nɩ kɛhã kɛɛ ɩwɔ dedi, naasʋ̃ ɩáfa yɩ nyɛlɩyɛ kile zɔ. (Gye. 2:​1-5, 9) Wɔ ndianwʋ mɔɔ ɩtɔ zʋlɔ anwɩ̃ yɩ nu nɩ, Gyemisi hanlɩ abiye mɔɔ ɩnwʋ kɛɛ yɩ anlima hyinyia ntalɩ anzɛnyɩɩ alɩyɛ naasʋ̃ ɩayɛ dɩyɛ bela fa bʋwa yɩ nɩ nwʋ odwokɔ. Sɛ abiye mɔɔ ɩdɩ zɔ kã kɛɛ ɩwɔ dedi a, iluwakɛɛ ɩáfa nyɛlɩyɛ ɩkɩnla nwʋmɔ nɩ ti, yi dedi nɩ dɩ mbʋanlɩ. Kɛmɔ Gyemisi  hanlɩ nɩ, “dedi mɔɔ nyɛlɩyɛ baaba bela ɩáhɩnla nwʋmɔ nɩ, ɩdɩ awuliɣa.”—Gye. 2:​14-17.

13. Mɩnla ndianwʋ yɛ Gyemisi va hilehileli dedi mɔɔ bɛfa nyɛlɩyɛ bɛda yɩ ali nɩ nu a? (Gyemisi 2:​25, 26)

¹³ Gyemisi hanlɩ kɛɛ Ɣɩlahabɩ dɩ mmenii mɔɔ bɛvalɩ nyɛlɩyɛ bɛlalɩ dedi ali nɩ nwʋ ndianwʋba. (Kɩnga Gyemisi 2:​17, 25.) Nɩ Ɣɩlahabɩ ɩdɩ Gyehova nwʋ odwokɔ, nɩ izi sʋ̃ kɛɛ mɛyɩ yɛ nɩ ɩbʋwaa Yizilayamaa yɩ a. (Dwh. 2:​9-11) Ɩvalɩ yɩ nyɛlɩyɛ ihileli kɛɛ ɩwɔ dedi, iluwakɛɛ ileli Yizilayamaa asʋ̃mavʋlɔ anwɩ̃ mɔɔ nɩ bɔ nnwʋanlɩ la asianɩ nu nɩ. Iluwa eyi ti, bowuli baalɛ mɔɔ ɩ́dɩ Yizilayanii mɔɔ ɩtɔ sini eyi kɛɛ ɛdɩnɣɛlɛnii, dɩkɛɛ Abilehamɩ la. Ɣɩlahabɩ yi ndianwʋ yɩ ma yɛnwʋ kɛɛ, ihyinyia kɛɛ yɛfa nyɛlɩyɛ yekile kɛɛ yɛwɔ dedi.

14. Mɩnla ti mɔɔ yɛkɔhʋla yɛkɛhã kɛɛ Pɔɔlʋ nɩɩ Gyemisi bo ndwokɔ nɩ yiyia a?

¹⁴ Meti nɩ Bayɩbʋlʋ ɛhɛlɛlɛmaa anwɩ̃, Pɔɔlʋ nɩɩ Gyemisi munwala bekilehilee dedi nu wɔ ahʋanɩ mvʋlɔ zʋ. Nɩ Pɔɔlʋ ɩkãã ikehile Dwuumaa mɔɔ bɛɣa bɛyɛ Kilisinyiamaa nɩ kɛɛ, kɛ Mosisi Mmɛla mɔɔ bekelili zʋlɔ nɩ yɛ ɩkɛma Gyehova kele bɛ kediã nu a. Naasʋ̃ nɩ Gyemisi ɩkãã kɛɛ, nwʋmɔ hyinyia kɛɛ Kilisinyiamaa bɛda be dedi ali iluwa nyɛlɩyɛ baaba mɔɔ bɛkɛyɛ bɛkɛma mvʋlɔ nɩ zʋ.

15. Mɩnla nninyeni yɛ yɛkɔhʋla yɛkɛyɛ na yɛava yɛala ye dedi ali a? (Kila mfonyini yi sʋ̃.)

¹⁵ Gyehova ɩahã kɛɛ sɛ yɛpɛ kɛɛ yɛyɛ ɛdɩnɣɛlɛmaa a, yɛyɛ́ mɔɔ Abilehamɩ yɛlɩ nɩ be pɛpɛɛpɛ. Nɔhʋanlɛ nu nɩ, sa yɛkʋla yeduwa ahʋanɩ sʋ̃maa zʋ yɛfa yɛ nyɛlɩyɛ yekile kɛɛ yɛlɛ dedi. Sa yɛkʋla yɛma mmenii mvʋlɔ mɔɔ bɛba yɛ asafʋ yi nu akwaaba, yɛbʋwa mmeliyema mɔɔ bɔ nwʋ hyɩlɩ bɛ, na yɛbʋwa ye mmusunwamaa sʋ̃. Eyimmɔ munwala dɩ nyɛlɩyɛ mɔɔ Nyamɩnlɩ anyɩ deli nwʋmɔ na ɩma yenyia yi nyilalɛ. (Wul. 15:7; 1 Tim. 5:​4, 8; 1 Dwɔ. 3:18) Ɔhʋanɩ titili mɔɔ yekoluwa zʋ yɛkɛla ye dedi ali yɛ  lɛ kɛɛ, yɛkɛva ɛhyɩmɛ yɛkɛhã odwokɔba yɩ. (1 Tim. 4:16) Ye munwala, sa yɛkʋla yeduwa yɛ nyɛlɩyɛ zʋ yekile kɛɛ yɛwɔ dedi kɛɛ Gyehova yɩ anʋhʋba munwatĩĩ kɛɣa nu, na izi mɔɔ ɩdɩ baaba ɩma yɛ. Sɛ yɛyɛ zɔ a, sa yɛkʋla yenyia anwʋlazʋ paa kɛɛ Nyamɩnlɩ kowu yɛ kɛɛ ɛdɩnɣɛlɛmaa na ɩkɔvʋlɔ yɛ kɛɛ yɩ ɔhɔnwʋmmɔ.

16. Mɩnla anyɩnlɩlazʋ yɛ nɩ Abilehamɩ ɩlɛ yɩ a?

¹⁶ Wɔ Wulomimaa yi ti 4 nu nɩ, yenyia ozumalɛdɩyɛ fʋlɔ mɔɔ ɩfalɩ Abilehamɩ nwʋ. Mɛyɩ yɛ lɛ yɛ anyɩnlɩlazʋ mɔɔ yekehila yɩ ɔhʋanɩ kɛɛ ɩkɛɣa nu nɩ. Gyehova wɔlɩ anʋhʋba kɛɛ, iluwa Abilehamɩ zʋ nɩ “amanlɩ sʋ̃maa” kenyia nyilalɛ. Nɩ eyi dɩ anyɩnlɩlazʋ kɩnlɩma mɔɔ nɩ Abilehamɩ ikilaa yɩ ɔhʋanɩ kɛɛ ɩkɛɣa nu! (Gyn. 12:3; 15:5; 17:4; Wul. 4:17) Naasʋ̃ mmɩlɩ mɔ Abilehamɩ lili alʋbɔ 100 na Sɛla sʋ̃ lili alʋbɔ 90 nɩ, nɩ bɛlanwʋ la bɔlɔ́wʋlɩ. Wɔ enii anyɩ zʋ mɛyɩ, nɩ ɩdɩ kɛɛ mɔɔ Abilehamɩ nɩɩ Sɛla bɔlɔ́kʋla bɔkɔwʋ. Nɩ eyi dɩ odwohilalɛ kezile ma Abilehamɩ. Naasʋ̃ “ileli Nyamɩnlɩ yɩ anʋhʋba nɩ ilili, na ɩmanlɩ yɩ anyɩ ɩlalɩ ɔzʋlɔ ɛzɩzɩbɛ ɛzɩzɩbɛ wɔ mmɩlɩ mɔ nɩ anyɩnlɩlazʋ ɩzã kɛɛ ɩbayɛ ‘Amanlɩ be nlabenyia’” nɩ. (Wul. 4:​18, 19) Na amba sʋ̃, ɔzɔ anyɩnlɩlazʋ nɩ ɣalɩ numɔ. Ɩwʋlɩ Ayɩzɩkɩ, ɛɣalɛ benyia mɔɔ nɩ ɩva mmɩlɩ tɩndɩnlɩ ihila yɩ ɔhʋanɩ nɩ.—Wul. 4:​20-22.

17. Mɩnla yɛ ɩma yɛnwʋ kɛɛ bɔkɔhʋla bokowu yɛ kɛɛ ɛdɩnɣɛlɛmaa nɩɩ Nyamɩnlɩ yɩ ɔhɔnwʋmmɔ a?

¹⁷ Sa Nyamɩnlɩ kʋla de yɛ tiã nu na iawu yɛ kɛɛ yɩ ɔhɔnwʋmmɔ ɛdɩnɣɛlɛmaa dɩkɛɛ Abilehamɩ la. Eyi yɛ nɩ Pɔɔlʋ ɩtwɩ̃ɩ̃ adwɩnɩ ikeziye zʋlɔ mmɩlɩ mɔ ɩhanlɩ kɛɛ: “Akʋ̃ sʋ̃ kɛ [Abilehamɩ] yɩzayɩ nkʋ̃ ti yɛ bɛhɛlɛlɩ kɛɛ, ‘Nyamɩnlɩ ileli yɩ idianlɩ numɔ kɛɛ ɛdɩnɣɛlɛnii a.’ Mfomi bɛhɛlɛlɩ bɛmanlɩ amɩyɛ sʋ̃ mɔɔ yede Nyamɩnlɩ mɔɔ idunwonli Niibenyia Gyisɛsɩ Kɩlayɩsɩ wɔ owulo nu nɩ yedi nɩ sʋ̃.” (Wul. 4:​23, 24) Dɩkɛɛ Abilehamɩ nɩ, ɩsɛ kɛɛ yenyia dedi na yɛfa nyɛlɩyɛ yɛkɩnla nwʋmɔ. Akʋ̃ sʋ̃, ɩsɛ kɛɛ yenyia anyɩnlɩlazʋ. Pɔɔlʋ dʋwalɩ zʋlɔ hanlɩ yɩ anyɩnlɩlazʋ nwʋ odwokɔ wɔ Wulomimaa yi ti 5 yi nu, na mɛyɩ yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a.