1. Mɩnla yɛ ɩsɛ kɛɛ Kilisinyianii benyia be yɛ na ama yɩ nwʋ ɩawʋkwa a?

 BULOMBUNLI Devidi hanlɩ hileli Sɔlɔmɔnʋ kɛɛ: “Má wʋ nwʋ ɩyɛ sɩ na yɛ wʋ dɩyɛ kɛɛ benyia.” (1 Aw. 2:​1-3) Ihyinyia kɛɛ Kilisinyiamaa mmenyia mɔɔ bɔwɔ kɛnɩ nnɛ bɔ mmɔdɩnɩ kɛɛ bɛkɛva fʋlɔdulɛ eyi bɛkɛyɛ egyima. Sɛ bɔkɔhʋla bɛkɛyɛ zɔ a, ɩsɛ kɛɛ bɛfa Nyamɩnlɩ yɩ mmɛla nɩɩ yɩ ɔhʋanɩhilelɛ bɛyɛ egyima wɔ bɛ ɛbɩlawɔlɛ nu. (Lk. 2:52) Mɩnla ti mɔɔ ɩsɛ kɛɛ mmɩlantɩyɛ bɔ mmɔdɩnɩ kɛɛ bɛkɛyɛ Kilisinyiamaa mmenyia mɔɔ bɔ nwʋ wʋkwa a?

2-3. Mɩnla ti mɔɔ ihyinyia kɛɛ abɩlantɩyɛ be ɩba ɩyɛ Kilisinyianii mɔɔ yɩ nwʋ wʋkwa a?

² Kilisinyiamaa mmenyia di asɛdɩ mɔɔ nwʋmɔ hyinyia nwʋ egyima wɔ abusunwa nɩɩ asafʋ yɩ nu. Mmɩlantɩyɛ, yede yedi kɛɛ ɩyɛ a bɔdwɩnɩ asɛdɩ mɔɔ ebiye a sa bɔkʋla bɛfa bowula bɛ sa eɣile be nɩ nwʋ. Ebiye a, wʋ bʋtayɩ yɛ lɛ kɛɛ ɛkɛyɛ ɔhʋanɩbukolɛvʋlɔ, asafʋ nu sʋ̃mɩvʋlɔ, na aɣinzi yi wʋaɣa wʋayɛ asafʋ nu ebani. Anzɛnyɩɩ ebiye a ɛkɛbɛ kɛɛ ekegyia na wʋawʋ nnwuakula. (Ɛfɩ. 6:4; 1 Tim. 3:1) Mɔɔ ɩkɔwʋwa wʋ ma okodwu bʋtayɩ eyimmɔ nwʋ nɩ, ɩsɛ kɛɛ ɛyɛ Kilisinyianii mɔɔ yɩ nwʋ wʋkwa. b

³ Mɩnla yɛ ɩkɔwʋwa wʋ ma ɛkɛyɛ Kilisinyianii mɔɔ yɩ nwʋ wʋkwa a? Nninyeni be mɔɔ nwʋmɔ hyinyia wɔ kɛnɩ mɔɔ ɩsɛ kɛɛ ɔnwʋ ɩyɛlɛ bʋwɔ. Mɩnla yɛ ɔkɔhʋla kɛyɛ yɩ nnɛ na wʋava wʋaziyeziye wʋ nwʋ wʋama asɛdɩ be mɔɔ ekenyia yɩ eɣile be na wʋali nwʋmɔ egyima bʋwɔ a?

4. Ɛhɩnla dɩka yɛ ɔkɔhʋla kenyia ndianwʋ baaba okozumazuma a?(Kila mfonyini yi sʋ̃.)

⁴ Sumazuma mmenii mɔɔ bɛyɛ ndianwʋba. Mmenii mɔɔ bɛyɛlɩ ndianwʋba sʋ̃maa wɔ Bayɩbʋlʋ yi nu mɔɔ mmɩlantɩyɛ kɔhʋla kozumazuma bɛ. Nɩ ɔzɔ mmenyia yɩ dɔ Nyamɩnlɩ na belili asɛdɩ azʋlɔtʋ nwʋ egyima bɛva bɔwʋwalɩ Nyamɩnlɩ yi mmenii. Sɛ ekila wʋ abusunwa nɩɩ asafʋ yi nu sʋ̃ a, ekenyia Kilisinyiamaa mmenyia mɔɔ bɔ nwʋ wʋkwa mɔɔ ɔkɔhʋla kozumazuma bɛ. (Hib. 13:7) Gyisɛsɩ Kɩlayɩsɩ sʋ̃ yɛlɩ ndianwʋ mɔɔ idi munli mɔɔ sa ɔkʋla sumazuma. (1 Pit. 2:21) Mmɩlɩ mɔ ekilaa be ndianwʋ yɩ nɩ, yɛ́ bo subanɩ azʋlɔtʋ mɔɔ ɩyɛ pɩkɛ nɩ ndwɩ. (Hib. 12:​1, 2) Na akʋ̃ kila kezimɔ ɔkɔhʋla kozumazuma bɛ.

5. Mɩnla yɛ ɩkɔwʋwa wʋ ma wʋ adwɩnɩ nu kɛla kɛ a, na mɩnla ti mɔɔ eyi nwʋ hyinyia a? (Ndwomi 119:9)

⁵ Nyia ‘adwɩnɩ mɔɔ numɔ la kɛnɩ na bɔ nwʋmɔ banɩ.’ (Ɛɣɛ. 3:21) Benyia mɔɔ yɩ adwɩnɩ nu la kɛnɩ nɩ, ɩyɛɛ dɩyɛ a ɩdwɩnɩ nwʋmɔ ansaana ɩayɛ. Meti bɔ mmɔdɩnɩ kɛɛ ɛkɛma wʋ adwɩnɩ nu kɛla kɛnɩ mmɩlɩ munwala. Mɩnla ti a? Wɔ oyuwadɩ eyi nu nɩ, mmɩlantɩyɛ sʋ̃maa wɔ kɛnɩ mɔɔ bɛma bo nzunzunlɩyɛ nɩɩ bɛ nɣanlɩdɩlɛ kile bɛ ɔhʋanɩ. (Ɛɣɛ. 7:7; 29:11) Akʋ̃ sʋ̃, TV, ɣilediyo, fɩlɩmɩ, intanɛtɩ, nɩɩ sohyiya midiya kɔhʋla kenyia wʋ zʋ tumi. Naasʋ̃, kɛ ɩkɛyɛ na wʋama wʋ adwɩnɩ nu ɩala kɛ a? Mɔɔ ili bɔmʋnlɩ, suma Bayɩbʋlʋ nu egyinalɛzʋ-ndwokɔ na dwɩnɩndwɩnɩ kezimɔ ɛfa yɛ egyima a, ɩkɔwʋwa wʋ nɩ nwʋ. Akʋ̃ fa mɔɔ ozuma nɩ sizi abɔkɔ mɔɔ ɩkɔzɔ Gyehova anyɩ. (Kɩnga Ndwomi 119:9.) Sɛ ɔkʋla suma kezimɔ ɛkɛva Bayɩbʋlʋ nu egyinalɛzʋ-ndwokɔ kezizi abɔkɔ a, ɩkɔwʋwa wʋ ma ɛkɛɣa kɛyɛ Kilisinyianii benyia mɔɔ yɩ nwʋ wʋkwa. (Ɛɣɛ. 2:​11, 12; Hib. 5:14) Sunzu kezimɔ sɛ enyia adwɩnɩ mɔɔ numɔ la kɛ a, ɩkɔwʋwa wʋ ma ɔkɔnwʋ: (1) kezimɔ ɛ nɩɩ mmaalɛ kɔwɔ nɩɩ (2) kezimɔ ekeziyeziye wʋ nwʋ.

6. Mɩnla ɔhʋanɩ zʋ yɛ sɛ abɩlantɩyɛ be yɩ adwɩnɩ nu la kɛnɩ a, ɩkɔwʋwa yɩ ma ɩkɛla annidi ali ikehile mmeliyema mmaalɛ a?

⁶ Benyia mɔɔ ɩlɛ Gyehova adwɩnɩ nɩ, ɩkɛva annidi ɩkɛma mmaalɛ. Mfʋmɩ bela íni nwʋmɔ kɛɛ abɩlantɩyɛ be kɛbɛ kɛɛ ɩkɔnwʋ eliyema baalɛ be bʋwɔ na ɩava yɩ ɔhɔnwʋ. Naasʋ̃ abɩlantɩyɛ mɔɔ yɩ adwɩnɩ nu la kɛnɩ nɩ, ɩlɛ́kã anzɛnyɩɩ ɩlɛ́kɛlɛ ndwokɔ be, anzɛnyɩɩ ɩlɛ́yɛ dɩyɛ bela mɔɔ ɩkɛma eliyema baalɛ yɩ kenyia adwɩnɩ kɛɛ  ɩpɛ yɩ, gyɩsɛ iziyeziye yɩ nwʋ kɛɛ ikegyia yɩ. (1 Tim. 5:​1, 2) Sɛ ɩ nɩɩ eliyema baalɛ be bɛyɛɛ agyiahʋnlɩ nhyɩhyɛlɩyɛ a, ɩ nɩɩ yɩzayɩ nkʋ̃ ɩlɔ́kɔ kowula dɩka be mmɩlɩ mɔ abiyela ɩáhɩnla bɔ nwʋ na ama mmenii mvʋlɔ beanyia baalɛ yɩ nwʋ adwɩnɩba.—1 Kɔl. 6:18.

7. Mɩnla ɔhʋanɩ zʋ yɛ adwɩnɩ mɔɔ numɔ la kɛnɩ kɔwʋwa abɩlantɩyɛ be ma ikeziyeziye yɩ nwʋ bʋwɔ na ɩadɩdɩ eɣinli mɔɔ ɩfata a?

⁷ Akʋ̃ sʋ̃, abɩlantɩyɛ mɔɔ yɩ adwɩnɩ nu la kɛnɩ nɩ, ikila yɩ ntalɩwulalɛ nɩɩ kezimɔ ɩtɩdɩ yi eɣinli bʋwɔ. Bɛzabɛ mɔɔ bɛpɩmbanɩ ntalɩ mɔɔ idwu zʋlɔ na bɔbɔ nwʋmɔ ɛlawulo nɩ, bo nu sʋ̃maa bɛáwu Gyehova na bɛ ɛbɩla sʋ̃ zɩkɛ. Iluwa eyi ti, bɛpanɩ ntalɩ mɔɔ ɩkyɩkyɩ bɔ nwʋ anzɛnyɩɩ ɩma mmenyia sɛlɩ mmaalɛ. Abɩlantɩyɛ mɔɔ ɩpɛ kɛɛ yɩ nwʋ kʋkwa nɩ, sɛ ɩpɛɛ ntalɩ ikowula a, ɩma Bayɩbʋlʋ nu egyinalɛzʋ-ndwokɔ nɩɩ mmenyia mɔɔ bɔ nwʋ wʋkwa wɔ asafʋ yi nu be ndianwʋba bʋwa yɩ. Sa ɩkʋla ibizia yɩ nwʋ kɛɛ: ‘Asʋ̃ atalɩ mɔɔ mɩbawula yɩ kile kɛɛ mɩ adwɩnɩ nu la kɛnɩ na mubu mmenii mvʋlɔ a? Asʋ̃ kezimɔ misiyeziye mʋ nwʋ nɩ, ɩma mmenii nwʋ mɩ kɛɛ mɩdɩ Nyamɩnlɩ yɩ sʋ̃mɩvʋlɔ amba a?’ (1 Kɔl. 10:​31-33; Tay. 2:6) Abɩlantɩyɛ mɔɔ yɩ adwɩnɩ nu la kɛnɩ nɩ, yi mmeliyema bu yi na Gyehova sʋ̃ pɛ yi odwokɔ.

8. Kɛ ɩkɛyɛ na abɩlantɩyɛ be ɩayɛ abiye mɔɔ bɔkʋla bɛfa bɔ nwʋ betiã yɩ zʋ a?

⁸ Ma mmenii mvʋlɔ benyia wu nu anwʋlazʋ. Abɩlantɩyɛ mɔɔ bɔkʋla bɛfa bɔ nwʋ betiã yɩ zʋ nɩ, ɩdɩ abiye mɔɔ idi yɩ asɛdɩ nwʋ egyima bʋwɔ. (Lk. 16:10) Bɛmá yehila Gyisɛsɩ yi ndianwʋ kɩnlɩma yɩ. Nɩ ɩ́dɩ abiye mɔɔ ɩdɩ kwadwʋvʋlɔ anzɛnyɩɩ nninyeni ɩávalɩ yɩ nwʋ. Mfomi ɩyɛlɩ egyima mɔɔ Gyehova va wulalɩ yɩ sa nɩ munwatĩĩ, mmɩlɩ po mɔɔ nɩ ɩyɛ sɩ kɛɛ ɩkɛyɛ zɔ nɩ. Nɩ ɩdɔ mmenii, titili yɩ adʋwavʋlɔ yɩ, na ɩzʋ̃ yɩ pɛ nu ɩvalɩ yɩ nnwʋanlɩ idianlɩ kɛnɩ ɩmanlɩ bɛ. (Dwɔ. 13:1) Egyima bela mɔɔ bɛkɛva bokowula wʋ sa nɩ, bɔ mmɔdɩnɩ kɛɛ ɛkɛyɛ yi munwatĩĩ na wʋava wʋazumazuma Gyisɛsɩ. Sɛ wʋánwʋ egyima be anyɩ zʋ bʋwɔ a, ɔzʋ̃ kãnwʋazɩ nu bizia eliyema be mɔɔ yɩ nwʋ wʋkwa ma ɩwʋwá wʋ. Áma ɛyɛ kwadwʋvʋlɔ. (Wul. 12:11) Mfomi, yɛ́ egyima mɔɔ iwula wʋ sa nɩ ‘kɛɛ gyama ɛyɛɛ kɛma Gyehova na ɛlɛ́yɛ kɛma mmenii.’ (Kol. 3:23) Amba, wʋáli munli, meti kã wʋ nwʋ azɩ na de mfʋmɩ bela mɔɔ ekeli nɩ tiã numɔ.—Ɛɣɛ. 11:2.

9. Mɩnla ti mɔɔ ɩsɛ kɛɛ abɩlantɩyɛ be suma nninyeni mɔɔ ɩkɔwʋwa yɩ wɔ ɛbɩlawɔlɛ nu ɩyɛlɛ a?

⁹ Sɛ ɛkɛɣa kɛyɛ Kilisinyianii benyia mɔɔ yɩ nwʋ wʋkwa a, ɩsɛ kɛɛ osuma nninyeni be ɩyɛlɛ. Eyi kɔwʋwa wʋ ma ekeli asɛdɩ azʋlɔtʋ nwʋ egyima bʋwɔ wɔ asafʋ yi nu, ekenyia egyima mɔɔ ɛkɛva kehila wʋ nwʋ nɩɩ wʋ abusunwa, na ɛ nɩɩ mmenii mvʋlɔ bɛ avinli sʋ̃ ɩayɛ baaba. Bɛmá yehila ɔzɔ nninyeni yi be.

10-11. Sɛ abɩlantɩyɛ be suma ɛɣɩngalɛ nɩɩ ɛhɛlɛlɛ bʋwɔ a, mɩnla ɔhʋanɩ zʋ yɛ ɩkɔwʋwa mɛyɩ nɩɩ asafʋ yɩ munwala a? (Ndwomi 1:​1-3) (Kila mfonyini yi sʋ̃.)

¹⁰ Suma ɛɣɩngalɛ nɩɩ ɛhɛlɛlɛ bʋwɔ. Bayɩbʋlʋ yɩ kã kɛɛ, sɛ abiye yɩ anyɩ kele na yɩ ɛbɩlawɔlɛ iazi  yi bʋwɔ a, ɩsɛ kɛɛ ide mmɩlɩ ɩkɩnga Nyamɩnlɩ Odwokɔ yɩ eɣile bela na ɩdwɩnɩndwɩnɩ nwʋmɔ bʋwɔ. (Kɩnga Ndwomi 1:​1-3.) Sɛ ɩkɩnga Bayɩbʋlʋ yɩ eɣile bela a, ɩkɔnwʋ Gyehova yɩ adwɩnɩ wɔ nninyeni nwʋ, na eyi kɔwʋwa yɩ ma ɩkɛva adwɩnɩ mɔɔ numɔ la kɛnɩ ikezizi abɔkɔ. (Ɛɣɛ. 1:​3, 4) Yehyinyia mmenyia mɔɔ bɛdɩ zɔ wɔ asafʋ yi nu. Mɩnla ti a?

¹¹ Sɛ mmeliyema mmenyia nɩɩ mmaalɛ hyinyia ɔhʋanɩhilelɛ anzɛnyɩɩ Bayɩbʋlʋ nu fʋlɔdulɛ a, bɔkɔ mmenyia mɔɔ bɔ nwʋ wʋkwa bɛ kɛnɩ. (Tay. 1:9) Sɛ ezi ɛɣɩngalɛ nɩɩ ɛhɛlɛlɛ bʋwɔ a, ɩkɔwʋwa wʋ ma ekeziyeziye ndɛnɩ nɩɩ munwalɩyɛ mɔɔ mmenii mvʋlɔ kenyia zʋlɔ mfasʋ na ɩahyɛ be dedi ɛzɩzɩbɛ. Ɩkɔwʋwa wʋ sʋ̃ ma sɛ osumaa dɩyɛ anzɛnyɩɩ etiyee ndɛnɩ wɔ asafʋ ayiyialɩyɛ anzɛnyɩɩ mansini nɩɩ manlɩ-avinli ayiyialɩyɛ tʋ a, ɛkɛhɛlɛ nninyeni mɔɔ ɩkɔhʋla kɔwʋwa wʋ kediã kɛ. Mɔɔ ɛkɛhɛlɛ nɩ kɔwʋwa wʋ ma wu dedi kɛyɛ sɩ na wʋava wʋahyɛ mmenii mvʋlɔ sʋ̃ ɛzɩzɩbɛ.

12. Mɩnla yɛ ɩkɔwʋwa wʋ ma ɛ nɩɩ mmenii kɔwɔ nkɔmmɔ bʋwɔ a?

¹² Suma kezimɔ ɛ nɩɩ mmenii kɔwɔ nkɔmmɔ bʋwɔ. Ɩsɛ kɛɛ Kilisinyianii benyia suma kezimɔ ɩ nɩɩ mmenii kɔwɔ nkɔmmɔ bʋwɔ. Benyia mɔɔ izi nkɔmmɔ bɔ nɩ itiye mvʋlɔ bɛ adwɩnɩhilelɛ na ɩtɩ bɛ nɣanlɩdɩlɛ tʋ. (Ɛɣɛ. 20:5) Sɛ ɩ nɩɩ abiye bɔbɔɔ nkɔmmɔ a, nnɩ mɔɔ enii kʋ̃ nɩ kɛva kɛdɩndɛ, kezimɔ ɩkɛyɛ yɩ anyunu, nɩɩ yɩ nyɛlɩyɛ nɩ, ɩsɛ kɛɛ ɩtɩ yɩ tʋ. Sɛ ɔkɔnwʋ eyi ɩyɛlɛ a, ɩsɛ kɛɛ ede mmɩlɩ na ɛ nɩɩ mmenii bɔ. Sɛ ɛta duwa foonu zʋ ɛ nɩɩ mmenii bɔ nkɔmmɔ, dɩkɛɛ email nɩɩ text message a, sa ɩkʋla ɩyɛ sɩ kɛɛ ɛ nɩɩ mmenii kɔwɔ nkɔmmɔ anyunumi nɩɩ anyunumi. Meti, pɩbɛ ɔhʋanɩ mɔɔ okoluwa zʋlɔ ɛ nɩɩ mmenii kɔwɔ nkɔmmɔ anyunumi nɩɩ anyunumi.—2 Dwɔ. 12.

13. Mɩnla dɔkʋ̃ yɛ ɩsɛ kɛɛ abɩlantɩyɛ be suma a? (1 Timoti 5:8) (Kila mfonyini yi sʋ̃.)

¹³ Suma kezimɔ wʋzawʋ ekehila wʋ nwʋ. Ɩsɛ kɛɛ Kilisinyianii benyia mɔɔ yɩ nwʋ wʋkwa nɩ, ɩkʋla ikila yɩzayɩ yɩ nwʋ nɩɩ yɩ abusunwa. (Kɩnga 1 Timoti 5:8.) Wɔ amanlɩ be zʋ nɩ, mmɩlantɩyɛ kʋla suma salɛti egyima wɔ bɛ papa anzɛnyɩɩ bo busunwanii be kɛ. Wɔ amanlɩ mvʋlɔ zʋ sʋ̃ nɩ, mmɩlantɩyɛ kʋla suma salɛti egyima nɩɩ egyima mvʋlɔ wɔ sukuulu nu mɔɔ iáhyinyia kɛɛ bɔkɔhɔ yunivɛsiti ansaana. Kɛmɔ ɩdɩ bela nɩ, ɩsɛ kɛɛ enyia salɛti egyima mɔɔ ɩkɔwʋwa wʋ ma ekenyia egyima be kɛyɛ. (Egy. 18:​2, 3; 20:34; Ɛfɩ. 4:28) Fa yɛ wu subanɩ kɛɛ ɛkɛyɛ egyima ɛzɩzɩbɛ na bɔ mmɔdɩnɩ kɛɛ egyima bela mɔɔ ɛkɛva wʋ sa kɛhã nɩ okowie. Sɛ ɛyɛ zɔ a, ɩkɛma mmenii kɔnwʋ kɛɛ ɔbɔ ɛhyɩmɛ, na eyi kɛma ekenyia egyima kɛyɛ. Subanɩ nɩɩ nninyeni mɔɔ yezunzu nwʋmɔ nɩ, nwʋmɔ hyinyia na ama Kilisinyianii benyia be ɩahʋla iali asɛdɩ  mɔɔ ikenyia yɩ eɣile be nɩ nwʋ egyima bʋwɔ. Bɛmá yehila asɛdɩ eyimmɔ be.

14. Sɛ abɩlantɩyɛ be pɛ kɛɛ ɩba ɩyɛ mmɩlɩ munwala ɔzʋ̃mɩnlɛ egyima yɩ be a, mɩnla yɛ ɩkɔhʋla kɛyɛ a?

¹⁴ Mmɩlɩ munwala ɔzʋ̃mɩnlɛ egyima yɩ. Kilisinyiamaa mmenyia mɔɔ bɔ nwʋ wʋkwa nɩ, bo nu sʋ̃maa wɔlɩ bɛ mmɩlɩ munwala ɔzʋ̃mɩnlɛ egyima yɩ tʋ wɔ bo nnwuakula nu. Ɔhʋanɩbukolɛ egyima yɩ bʋwa mmɩlantɩyɛ ma bosuma kezimɔ bɛ nɩɩ mmenii azʋlɔtʋ keli. Isia sʋ̃ ɩbʋwa bɛ ma bɔnwʋ kezimɔ bɛkɛva bo ozukua bekeli egyima wɔ nɣɛlɛbɛ nu. (Fɩl. 4:​11-13) Dɩyɛ ɔkʋ̃ mɔɔ bɔkɔhʋla kɛyɛ kɛva kɔwɔ bɛ mmɩlɩ munwala ɔzʋ̃mɩnlɛ egyima yɩ tʋ yɛ lɛ ɔhʋanɩbukolɛ bʋwavʋlɔ. Mmenii sʋ̃maa fa mmɩlɩ be yɛ ɔhʋanɩbukolɛ bʋwavʋlɔ na isiyeziye bɛ ma bɔkʋla bɛyɛ ɔhʋanɩbukolɛmaa. Ɔhʋanɩbukolɛ egyima yɩ kɔhʋla kɛma ekenyia ɔnwʋmɔ ɔhʋanɩ ɛkɛyɛ mmɩlɩ munwala ɔzʋ̃mɩnlɛ egyima yɩ ɔfʋã azʋlɔtʋ be dɩkɛɛ, ɔkɔwʋwa ma bekegyina asafʋ nniyia, anzɛnyɩɩ ɔkɔhɔ kɔzʋ̃mɩ wɔ Bɛtɩlɩ.

15-16. Kɛ ɩkɛyɛ na abɩlantɩyɛ be ɩavata kɛɛ asafʋ nu sʋ̃mɩvʋlɔ anzɛnyɩɩ ebani a?

¹⁵ Asafʋ nu sʋ̃mɩvʋlɔ anzɛnyɩɩ ebani. Ɩsɛ kɛɛ Kilisinyiamaa mmenyia munwala fa yɛ bɔ bʋtayɩ kɛɛ bɔkɔzʋ̃mɩ kɛɛ asafʋ nu mbanimbani. Bayɩbʋlʋ yɩ kã kɛɛ, mmenyia mɔɔ bɔbɔɔ mmɔdɩnɩ kɛɛ bɛkɛɣa bɛkɛyɛ asafʋ nu mbanimbani nɩ, “nɩ annidi egyima baaba yɛ bɛpɛɛ bɛkɛyɛ a.” (1 Tim. 3:1) Ansaana abiye kɛvata kɛɛ asafʋ nu ebani nɩ, ɩsɛ kɛɛ idi bɔmʋnlɩ ɩsʋ̃mɩ kɛɛ asafʋ nu sʋ̃mɩvʋlɔ. Asafʋ nu azʋ̃mɩvʋlɔ bʋwa asafʋ nu mbanimbani wɔ ahʋanɩ sʋ̃maa zʋ. Asafʋ nu mbanimbani nɩɩ azʋ̃mɩvʋlɔ munwala bɔzʋ̃ kãnwʋazɩ nu bɔsʋ̃mɩ be mmeliyema na bɛfa ɛhyɩmɛ bɛyɛ dasɩlɛlilɛ egyima yɩ be. Mmeliyema mmɩlantɩyɛ mɔɔ beli alʋbɔ 17 kɔbʋmɩ 19 po kɔhʋla kɔzʋ̃mɩ kɛɛ asafʋ nu azʋ̃mɩvʋlɔ. Na asafʋ nu sʋ̃mɩvʋlɔ sʋ̃ mɔɔ ili alɔbɔ 20 mɔɔ ɩbɔ mmɔdɩnɩ nɩ kɔhʋla kɛvata kɛɛ asafʋ nu ebani.

¹⁶ Kɛ ɩkɛyɛ na wʋavata wʋama asɛdɩ eyimmɔ a? Ɔhʋanɩ pɔkyɩɩ bela íni kɛnɩ. Ɔlɔlɛ mɔɔ abiye wɔ ma Gyehova, yɩ abusunwa, nɩɩ asafʋ yɩ yɛ ɩkã yɩ ma ɩyɛ nninyeni mɔɔ Bayɩbʋlʋ yɩ kã kɛɛ ɩma abiye fata kɛɛ asafʋ nu ebani nɩ a. (1 Tim. 3:​1-13; Tay. 1:​6-9; 1 Pit. 5:​2, 3) Nninyeni mɔɔ ɩkɛma ɛkɛvata nɩ, bɔ mmɔdɩnɩ kɛɛ ɛkɛdɩ numɔ bela tʋ bʋwɔ. Bɔ mpayɩ siã Gyehova kɛɛ ɩwʋwá wʋ ma odwu nwʋmɔ. c

17. Mɩnla yɛ ɩkɛma abɩlantɩyɛ be kɛɣa kɛyɛ ohunɛ nɩɩ abusunwa ti baaba a? (Kila mfonyini yi sʋ̃.)

¹⁷ Ohunɛ nɩɩ abusunwa ti. Kɛmɔ Gyisɛsɩ hanlɩ nɩ, Kilisinyiamaa mmenyia be wɔ kɛnɩ a, bedi sigyia. (Mt. 19:12) Naasʋ̃, sɛ esi pɔkɔ kɛɛ ekegyia a, ɛkɛva ohunɛ nɩɩ abusunwa ti asɛdɩ ɛkɛhɩnla wʋ asɛdɩ azʋlɔtʋ nwʋ. (1 Kɔl. 11:3)  Gyehova kila ɔhʋanɩ kɛɛ ohunɛ kɔlɔ yɩ yɩ na ɩama yɩ sa ɩahã yɩ nnwʋnlamɩ ɔfʋã nu, nɣanlɩdɩlɛ ɔfʋã nu, nɩɩ sunzuma ɔfʋã nu ahyinyiadɩ. (Ɛfɩ. 5:​28, 29) Subanɩ nɩɩ nninyeni mvʋlɔ mɔɔ yezunzu nwʋmɔ dɩkɛɛ, ɛkɛma wʋ adwɩnɩ nu kɛla kɛ, ekenyia annidi ɛkɛma mmaalɛ, na wʋayɛ abiye mɔɔ bɔkʋla bɛfa bɔ nwʋ betiã wʋ zʋ nɩ, ɩkɔwʋwa wʋ ma ɛkɛyɛ ohunɛ baaba. Ɩkɔwʋwa wʋ ma ekeli wʋ asɛdɩ nwʋ egyima bʋwɔ kɛɛ ohunɛ nɩɩ abusunwa ti.

18. Kɛ ɩkɛyɛ na abɩlantɩyɛ be ɩaɣa ɩayɛ ɛzɩlɛba a?

¹⁸ Ɛzɩlɛ. Sɛ ekyia a, ebiye a ɛkɛɣa kɛyɛ ɛzɩlɛ. Sɛ ɛpɛ kɛɛ ɛyɛ ɛzɩlɛ baaba a, mɩnla yɛ ɔkɔhʋla kozuma wɔ Gyehova kɛ a? Sa ɔkʋla suma sʋ̃maa wɔ yɩ kɛ. (Ɛfɩ. 6:4) Gyehova hanlɩ wɔ bagua nu kɛɛ ɩdɔ yɩ Ɣa, Gyisɛsɩ, na ide yi itiã nu. (Mt. 3:17) Sɛ ɛba yɛ ɛzɩlɛ a, bɔ mmɔdɩnɩ kɛɛ ɛkɛda kɛma wu nnwuakula yɩ kɔnwʋ kɛɛ ɔdɔ bɛ. Ta kamvʋ bɛ wɔ nninyeni baaba mɔɔ bɛyɛ nɩ nwʋ. Ɛzɩlɛmaa mɔɔ bosumazuma Gyehova yi ndianwʋ nɩ, bɔbʋwa bo nnwuakula ma bɛba bɛyɛ Kilisinyiamaa mmenyia nɩɩ mmaalɛ mɔɔ bɔ nwʋ wʋkwa. Sa ɔkʋla suma kɛɛ ɛkɛɣa kɛyɛ ɛzɩlɛba kakɩ yɩ, iluwa wʋ ahʋnlɩnɩ nu mɔɔ ɔzʋ̃ kɔwʋwa wu mmusunwamaa nɩɩ bɛzabɛ mɔɔ bɔwɔ asafʋ yi nu na wʋahã wʋahile bɛ kɛɛ ɔdɔ bɛ na wʋ anyɩ sɔ bɛ nɩ. (Dwɔ. 15:9) Eyi kɔwʋwa wʋ ma ɛkɛɣa kɛyɛ ohunɛ anzɛnyɩɩ ɛzɩlɛba eɣile be. Naasʋ̃ sɛ enyia ɔzɔ subanɩ yɩ a, Gyehova, wʋ abusunwa, nɩɩ asafʋ yɩ kenyia wʋ zʋ mfasʋ kezile.

19-20. Mɩnla yɛ ɩkɔwʋwa mmɩlantɩyɛ ma bɛkɛɣa kɛyɛ Kilisinyiamaa mmenyia mɔɔ bɔ nwʋ wʋkwa a? (Kila Ɔwɩɛnɩlɛ Aɣanɩ yɩ anyunu mfonyini yi.)

¹⁹ Mmeliyema mmɩlantɩyɛ, sɛ bɛkɛɣa kɛyɛ Kilisinyiamaa mmenyia mɔɔ bɔ nwʋ wʋkwa a, ɩlɛ́ba mbʋanlɩ o. Mfomi ɩsɛ kɛɛ bekila bɛzabɛ mɔɔ bɛyɛ ndianwʋba na bosumazuma bɛ, benyia adwɩnɩ mɔɔ numɔ la kɛ, bɛyɛ mmenii mɔɔ bɔkʋla bɛfa bɔ nwʋ betiã bɔ zʋ, benyia salɛti egyima, na besiyeziye bɔ nwʋ bɛma asɛdɩ mɔɔ bekenyia yɩ eɣile be nɩ.

²⁰ Naasʋ̃ sɛ ɩyɛ na ɔdwɩnɩndwɩnɩ egyima sʋ̃maa mɔɔ ɩsɛ kɛɛ ɛyɛ nɩ nwʋ a, ebiye a ɛkɛdɩ nɣanlɩ kɛɛ ɩyɛ sɩ sʋ̃maa. Naasʋ̃ sa ɔkʋla ɛyɛ. Kakɛ kɛɛ, Gyehova pɛ paa kɛɛ ɩbʋwa wʋ. (Ayɩ. 41:​10, 13) Akʋ̃ sʋ̃, wu mmeliyema mmenyia nɩɩ mmaalɛ mɔɔ bɔwɔ asafʋ yi nu sʋ̃ kɔwʋwa wʋ. Sɛ ɛba yɛ Kilisinyianii benyia mɔɔ wʋ nwʋ wʋkwa a, ekenyia anyɩnlɩlelɛ sʋ̃maa wɔ wʋ ɛbɩlawɔlɛ nu na wʋ ahʋnlɩnɩ kɔdɔ wu kunlu. Mmeliyema mmɩlantɩyɛ, yɛdɔ bɛ! Gyehova ɩhɔ́ zʋlɔ iyila bɛ, mmɩlɩ mɔ bɔbɔɔ mmɔdɩnɩ kɛɛ bɛkɛɣa kɛyɛ Kilisinyiamaa mmenyia mɔɔ bɔ nwʋ wʋkwa nɩ.—Ɛɣɛ. 22:4.