1. Sɛ yɛkɔhʋla yɛkɛyɛ Kilisinyiamaa mɔɔ yɛ nwʋ wʋkwa a, mɩnla yɛ ɩsɛ kɛɛ yɛyɛ a?

 SƐ YEKILA kezimɔ nnwuakula benyi ndɛndɛ bɛba bɛyɛ mbanimbani nɩ a, ɩyɛ nnwʋánlɩ paa. Ɩdɩ kɛɛ mɔɔ bɛáyɛ nwʋmɔ egyima bela, ɔkɔnwʋ la nɩ benyi. Naasʋ̃, sɛ abiye pɛ kɛɛ ɩba ɩyɛ Kilisinyianii mɔɔ yɩ nwʋ wʋkwa a, ɩsɛ kɛɛ ɩyɛ nwʋmɔ egyima. b (1 Kɔl. 13:11; Hib. 6:1) Sɛ yɛkɔhʋla yekodwu ɔzɔ bʋtayɩ yɩ nwʋ a, ɩsɛ kɛɛ yɛ nɩɩ Gyehova nyia abusunwawɔlɛ mɔɔ numɔ yɛ sɩ. Akʋ̃ sʋ̃, yehyinyia yi sunzuma nwanzanwanza yɩ na ɩawʋwa yɛ ma yeanyia subanɩ ngɩnlɩma mɔɔ ɩsɔ yɩ anyɩ, yɛazuma nninyeni mɔɔ ɩkɔwʋwa yɛ wɔ ɛbɩlawɔlɛ nu, na iaziyeziye yɛ ɩama asɛdɩ azʋlɔtʋ mɔɔ yekenyia yɩ wɔ eɣile be nɩ.—Ɛɣɛ. 1:5.

2. Mɩnla yɛ yesuma wɔ Gyɛnɛsɩsɩ 1:27 yi nu a, na mɩnla yɛ yekozunzu nwʋmɔ wɔ dɩyɛzumanlɛ eyi nu a?

² Gyehova ɩbɔɔ mmenii nɩ, ɩwɔlɩ bɛ mmenyia nɩɩ mmaalɛ. (Kɩnga Gyɛnɛsɩsɩ 1:27.) Sɛ ɛfa mmenyia bɛ eniiwudo tindiã mmaalɛ bɛ dɩyɛ nwʋ a, ɔnwʋ kɛɛ bɛdɩ sʋnʋnkʋ̃, naasʋ̃ bɛdɩ sʋnʋnkʋ̃ wɔ ɔhʋanɩ fʋlɔ zʋ sʋ̃. Kɛ ndianwʋ nɩ, Gyehova wɔlɩ mmenyia nɩɩ mmaalɛ kɛɛ belí asɛdɩ pɔkyɩɩ be nwʋ egyima, meti behyinyia subanɩ nɩɩ nninyeni azʋlɔtʋ be na ɩawʋwa bɛ ma bɛali asɛdɩ eyi nwʋ egyima. (Gyn. 2:18) Wɔ dɩyɛzumanlɛ eyi nu nɩ, yekehila mɔɔ ɩkɔwʋwa nɣɛdɛkɛ ma bɛkɛɣa kɛyɛ Kilisinyiamaa mmaalɛ mɔɔ bɔ nwʋ wʋkwa. Wɔ dɩyɛzumanlɛ mɔɔ ili kɛnɩ yɩ nu sʋ̃ nɩ, yekehila mɔɔ mmɩlantɩyɛ kɔhʋla kɛyɛ.

3-4. Ɛhɩnla dɩka yɛ nɣɛdɛkɛ kɔnwʋ mmaalɛ mɔɔ bɔ nwʋ wʋkwa na bɛazumazuma bɛ a? (Kila mfonyini yi sʋ̃.)

³ Sɛ yekila Bayɩbʋlʋ yɩ nu a, yɛnwʋ mmaalɛ sʋ̃maa mɔɔ nɩ bɔwɔ subanɩ ngɩnlɩma mɔɔ bɔdɔ Gyehova na bɔsʋ̃mɩ yɩ. (Kila odwokɔ mɔɔ ɩwɔ jw.org zʋ mɔɔ ise “Mmea a Wɔn Ho Asɛm Wɔ Bible Mu No, Dɛn Na Yebetumi Asua Afi Wɔn Hɔ?”) Kɛmɔ Ɛhɛlɛlɛ Odwokɔ mɔɔ dɩyɛzumanlɛ yɩ gyĩ zʋ kã nɩ, nɩ bɛdɩ mmaalɛ mɔɔ “bɔkʋla bɔsɔ bɔ nwʋ, na bedi nɔhʋanlɛ wɔ nninyeni munwatĩĩ nu.” Akʋ̃ sʋ̃, Kilisinyiamaa mmaalɛ mɔɔ bɔ nwʋ wʋkwa wɔ kɛnɩ mɔɔ nɣɛdɛkɛ kɔhʋla kozuma nninyeni sʋ̃maa wɔ bɛ kɛnɩ wɔ bɛzabɛ bɛ asafʋ nu.

⁴ Nɣɛdɛkɛ, asʋ̃ bezi Kilisinyiamaa mmaalɛ be mɔɔ bɔ nwʋ wʋkwa wɔ bɛ asafʋ yi nu mɔɔ bɔkɔhʋla kozumazuma bɛ a? Mɛyɩ nɩ yɛ bo subanɩ ngɩnlɩma nɩ ndwɩ na akʋ̃ kila kezimɔ ɛkɛla ɔzɔ subanɩ yɩ be ali. Wɔ nkyɩkyɛmi azʋlɔtʋ mɔɔ ili kɛnɩ yɩ nu nɩ, yekehila subanɩ azʋlɔtʋ asã be mɔɔ nwʋmɔ hyinyia mɔɔ ɩsɛ kɛɛ nɣɛdɛkɛ benyia na ama bɔ nwʋ ɩawʋkwa.

5. Sɛ baalɛ be kɛyɛ Kilisinyianii mɔɔ yɩ nwʋ wʋkwa a, mɩnla ti mɔɔ ihyinyia kɛɛ ɩkã yɩ nwʋ azɩ a?

⁵ Sɛ yɛkɔhʋla yɛkɛyɛ Kilisinyiamaa mɔɔ bɔ nwʋ wʋkwa a, ɩsɛ kɛɛ yɛkã yɛ nwʋ azɩ. Sɛ baalɛ be kã yɩ nwʋ azɩ a, ɩ nɩɩ Gyehova nɩɩ mmenii mvʋlɔ bɛ avinli kɛyɛ kɩnlɩma. (Gye. 4:6) Kɛ ndianwʋ nɩ, baalɛ mɔɔ ɩdɔ Gyehova nɩ, ɩzʋ̃ kãnwʋazɩ nu ide tiyɛlɛ nhyɩhyɛlɩyɛ mɔɔ bɛhã nwʋmɔ odwokɔ wɔ 1 Kɔlɛntɩmaa 11:3 nɩ itiã numɔ. Ɔzɔ egyinalɛzʋ-odwokɔ yɩ ɩyɛ egyima wɔ ahʋanɩ pɔkyɩɩ be zʋ wɔ asafʋ yɩ nɩɩ abusunwa nu. c

6. Mɩnla yɛ nɣɛdɛkɛ kɔhʋla kozuma wɔ kezimɔ nɩ Ɣɩlɩbɛka kã yɩ nwʋ azɩ nɩ nu a?

⁶ Bɛmá yezunzu Ɣɩlɩbɛka yi ndianwʋ yɩ nwʋ. Nɩ ɩdɩ baalɛ nɣɛlɛbɛvʋlɔ mɔɔ yɩ nnwʋanlɩ eɣile munwala nu nɩ ɩzʋ̃ akɛnɣazɩzɩbɛ nu izizili abɔkɔ azʋlɔtʋ, na nɩ izi mɔɔ ɩsɛ kɛɛ ɩyɛ eɣile bela. (Gyn. 24:58; 27:​5-17) Naasʋ̃ nɩ ibu dɩyɛ na ɩkã yɩ nwʋ azɩ sʋ̃. (Gyn. 24:​17, 18, 65) Dɩkɛɛ Ɣɩlɩbɛka nɩ, sɛ ɛkã wʋ nwʋ azɩ na etiye bɛzabɛ mɔɔ Gyehova ɩva asɛdɩ iwula bɛ sa nɩ a, ɔkɔwʋwa wu abusunwa nɩɩ asafʋ yɩ.

7. Kɛ ɩkɛyɛ na nɣɛdɛkɛ bɛazumazuma Ɛsɩta a?

 ⁷ Ɩsɛ kɛɛ Kilisinyiamaa munwala mɔɔ bɔ nwʋ wʋkwa nɩ bɔnwʋ mɔɔ bɛ anwʋzɩzɩbɛ kɔhʋla kɛyɛ. Bayɩbʋlʋ yɩ kã kɛɛ “nɣɛlɛbɛ nɩɩ bɛzabɛ mɔɔ bezi mɔɔ bɛ anwʋzɩzɩbɛ kɔhʋla kɛyɛ nɩ yɛ bɛda a.” (Ɛɣɛ. 11:2) Nɩ Ɛsɩta dɩ Nyamɩnlɩ yɩ sʋ̃mɩvʋlɔ mɔɔ idi nɔhʋanlɛ, na nɩ ide itiã numɔ kɛɛ, kɛ dɩyɛ bela yɛ izi a. Iluwa eyi ti, mmɩlɩ mɔ ɩɣa ɩyɛlɩ bulombunli baalɛ nɩ, iápigyiabigyia yɩ nwʋ sʋlɔ. Idiyeli Mɔdɩkaya yɩ fʋlɔdulɛ na ɩva ɩyɛlɩ egyima. (Ɛs. 2:​10, 20, 22) Wʋzawʋ sʋ̃, sa ɔkʋla ɛda subanɩ mɔɔ ɩdɩ zɔ nɩ be ali iluwa mmenii mvʋlɔ bɔ fʋlɔdulɛ mɔɔ ɛkɛbɩbɛ na wʋava wʋayɛ egyima nɩ zʋ.—Tay. 2:​3-5.

8. Kɛmɔ 1 Timoti 2:​9, 10 kã nɩ, mɩnla ɔhʋanɩ zʋ yɛ kãnwʋazɩ kɔwʋwa eliyema baalɛ be ma ikezi pɔkɔba wɔ yɩ anwʋziyeziyelɛ nu a?

⁸ Ɛsɩta lalɩ kãnwʋazɩ ali wɔ ɔhʋanɩ fʋlɔ zʋ sʋ̃. Nɩ ɩdɩ “baalɛ mɔɔ yɩ nwʋ yɛ pɩkɛ baaba na nɩ igyĩ yɩ agyia zʋ,” naasʋ̃ ɩábɔ mmɔdɩnɩ kɛɛ ɩkɔhwɩnhwɩ̃ adwɩnɩ ikeziye yɩzayɩ yɩ nwʋ zʋ. (Ɛs. 2:​7, 15) Kɛ ɩkɛyɛ na Kilisinyiamaa mmaalɛ bɛanyia Ɛsɩta yi ndianwʋ yɩ zʋ mfasʋ a? Ɔhʋanɩ mɔɔ okoluwa zʋ kɛyɛ zɔ nɩ, bɛhɛlɛ numɔ ɔkʋ̃ nwʋ odwokɔ wɔ 1 Timoti 2:​9, 10. (Kɩnga.) Wɔ ɛkɛnɩ nɩ, Pɔɔlʋ hanlɩ hileli Kilisinyiamaa mmaalɛ nɩ kɛɛ bɔnwʋ nɣɛlɛbɛ wɔ bɛ ndamɛviyialɛ nu. Giliki ndwokɔ abɔkɔ mɔɔ bɛva belili egyima wɔ ɛkɩ nɩ kile kɛɛ, ɩsɛ kɛɛ Kilisinyianii baalɛ yɩ anwʋziyeziyelɛ yɛ mɔɔ annidi wɔ numɔ, na ɩda yɩ ali kɛɛ ɩdwɩnɩ mmenii mvʋlɔ bɛ nɣanlɩdɩlɛ anzɛnyɩɩ kezimɔ bokowu yi nɩ nwʋ. Ye mmeliyema mmaalɛ mɔɔ bɛfa fʋlɔdulɛ eyi bɛyɛ egyima na besiyeziye bɔ nwʋ bʋwɔ nɩ, yɛpɛ bo odwokɔ paa!

9. Mɩnla yɛ yɛkɔhʋla kozuma wɔ Abigɛlɩ yi ndianwʋ yɩ nu a?

⁹ Dɩyɛnunwʋnlɛ dɩ subanɩ fʋlɔ mɔɔ ɩsɛ kɛɛ Kilisinyiamaa mmaalɛ nyia na ama bɔ nwʋ ɩawʋkwa. Mɩnla yɛ lɛ dɩyɛnunwʋnlɛ a? Ɩdɩ subanɩ mɔɔ ɩma abiye nwʋ sʋnʋnkʋ̃ mɔɔ ɩwɔ baaba nɩɩ tanɩ bɛ avinli na isi pɔkɔ kɛɛ ɩkɛyɛ baaba. Bɛmá yehila Abigɛlɩ yi ndianwʋ yɩ. Yi hũ zili pɔkɔ tanɩ be mɔɔ ankɩ ɩkɔhʋla ɩkɛva yɩ awudomaa munwala bɔ nnwʋanlɩ ikediã asianɩ nu. Iluwakɛɛ nɩ Abigɛlɩ wɔ dɩyɛnunwʋnlɛ ti, ɩyɛlɩ nwʋmɔ debe ndɛndɛ. Na eyi manlɩ ileli mmenii sʋ̃maa bɔ nnwʋanlɩ. (1 Sa. 25:​14-23, 32-35) Dɩyɛnunwʋnlɛ sʋ̃ bʋwa yɛ ma yɛnwʋ mmɩlɩ mɔ ɩfata kɛɛ yɛtɩndɛ nɩɩ mmɩlɩ mɔ ɩsɛ kɛɛ yɛkã ye munwa yetiã nu. Isia sʋ̃ ɩbʋwa yɛ mmɩlɩ mɔ yekilee mmenii mvʋlɔ bɔ nwʋ anyɩnlɩlelɛ nɩ na yɛáyɛlɩ dɩyɛ ma ɩádɛlalɩ zʋlɔ.—1 Tɛs. 4:11.

10-11. Sɛ osuma ɛɣɩngalɛ nɩɩ ɛhɛlɛlɛ bʋwɔ a, mɩnla mfasʋ yɛ wʋzawʋ nɩɩ mmenii mvʋlɔ kenyia wɔ zʋ a? (Kila mfonyini yi sʋ̃.)

¹⁰ Ihyinyia kɛɛ Kilisinyianii baalɛ suma nninyeni mɔɔ ɩkɔwʋwa yɩ wɔ ɛbɩlawɔlɛ nu. Nninyeni mɔɔ mmaalɛ suma wɔ bo nnwuakula nu nɩ, bɔkʋla bɛfa bɛyɛ egyima bɔ nnwʋanlɩ eɣile munwala. Bɛmá yehila nwʋmɔ ndianwʋ ɛgyɩkɩ̃ɩ̃ be.

 ¹¹ Suma ɛɣɩngalɛ nɩɩ ɛhɛlɛlɛ bʋwɔ. Wɔ nnɩka be nɩ, bɛáwu ɛɣɩngalɛ nɩɩ ɛhɛlɛlɛ kɛɛ ɩdɩ debe mɔɔ nwʋmɔ hyinyia mɔɔ ɩsɛ kɛɛ mmaalɛ suma. Naasʋ̃ ɩdɩ nninyeni mɔɔ nwʋmɔ hyinyia mɔɔ ɩsɛ kɛɛ Kilisinyianii bela suma. d (1 Tim. 4:13) Meti máma dɩyɛ bela si wʋ ɔhʋanɩ kɛɛ okozuma ɛɣɩngalɛ nɩɩ ɛhɛlɛlɛ bʋwɔ. Mɩnla mfasʋ yɛ ekenyia wɔ zʋ a? Ɩdɩ debe mɔɔ ɩkɔhʋla ɩkɔwʋwa wʋ ma ekenyia egyima kɛyɛ. Akʋ̃ sʋ̃, ɩkɛma ɩkɛyɛ mɛlɛkɛ kɛɛ okozuma Bayɩbʋlʋ yɩ na wʋava wʋahilehile mmenii mvʋlɔ. Na mɔɔ ɩtɛla yi munwala nɩ, ɩkɛma ɔkɔhwɩ̃ keɣike Gyehova mmɩlɩ mɔ osumaa yɩ nwʋ dɩyɛ na ɔdwɩnɩndwɩnɩ nwʋmɔ nɩ.—Dwh. 1:8; 1 Tim. 4:15.

12. Mɩnla yɛ osuma wɔ Ɛɣɛlɛwulɛ 31:26 yɩ nu a?

¹² Suma kezimɔ ɛ nɩɩ mmenii kɔwɔ nkɔmmɔ bʋwɔ. Ihyinyia kɛɛ Kilisinyiamaa bɛ nɩɩ mmenii bɔ nkɔmmɔ wɔ ɔhʋanɩ mɔɔ itu mpʋnɩ zʋ. Mɔɔ ɩfalɩ eyi nwʋ nɩ, sʋ̃mavʋlɔ Gyemisi valɩ fʋlɔdulɛ mɔɔ ɩkɔwʋwa yɛ ɩmanlɩ yɛ. Ɩhanlɩ kɛɛ “Sɛ [abiye] ɩkãã odwokɔ a, ɩwɔ kɛɛ ɩdwɩnɩ nwʋ, yɛɛ íni kɛɛ ɩfa ɛya ndɛndɛ.” (Gye. 1:19) Sɛ abiye ɩtɩndɛɛ na ɛyɛ dinyii etiye yi a, ikile kɛɛ ɛdaa kunlumiyɩbalɛ ali. (1 Pit. 3:8) Sɛ wʋádɩ mɔɔ enii kʋ̃ nɩ ɩkãã nɩ tʋ bʋwɔ anzɛnyɩɩ kezimɔ ɩtɩ nɣanlɩ nɩ tʋ bʋwɔ a, biziá ndwokɔ mɔɔ ɩfata. Akʋ̃ kyina ɛgyɩkɩ̃ɩ̃ na dwɩ̃ ansaana wʋadɩndɛ. (Ɛɣɛ. 15:​28, ad.) Biziá wʋ nwʋ kɛɛ: ‘Asʋ̃ mɔɔ mɩbahã yɩ, ɩdɩ nɔhʋanlɛ na ɩkɛhyɛ yɩ ɛzɩzɩbɛ a? Asʋ̃ nɣɛlɛbɛ wɔ numɔ na ikile kɛɛ mʋ dwɩnɩ yɩ nwʋ a?’ Sumazuma Kilisinyiamaa mɔɔ bɔ nwʋ wʋkwa mɔɔ bezi nkɔmmɔ bɔ nɩ. (Kɩnga Ɛɣɛlɛwulɛ 31:26.) Fa wʋ adwɩnɩ siye kezimɔ bɛtɩndɛ nɩ zʋ. Sɛ osuma kezimɔ bɔbɔ nkɔmmɔ bʋwɔ a, ɩkɔwʋwa ma ɛ nɩɩ mmenii mvʋlɔ bɛ avinli kɛyɛ baaba.

13. Kɛ ɩkɛyɛ na wʋazuma kezimɔ bɛyɛ dɩyɛ wɔ awudo a? (Kila mfonyini yi sʋ̃.)

¹³ Suma kezimɔ bɛyɛ dɩyɛ wɔ awudo. Wɔ nnɩka sʋ̃maa nɩ, mmaalɛ yɛ bɛta bɛyɛ awudo egyima a. Wʋ maamɩ anzɛnyɩɩ eliyema baalɛ fʋlɔ kɔhʋla kehile wʋ kezimɔ ɛkɛyɛ awudo egyima bʋwɔ. Eliyema baalɛ be mɔɔ bɔfʋlɔ yɩ Cindy hanlɩ kɛɛ: “Dɩyɛ ɔkʋ̃ mɔɔ muzumanlɩ wɔ mɩ maamɩ kɛnɩ yɛ lɛ kɛɛ, sɛ ɛyɛ egyima ɛzɩzɩbɛ a, mɔɔ ɩzʋ̃ numɔ ɩba nɩ ɩma wʋ anyɩ de. Iluwakɛɛ muzumanlɩ kezimɔ bɛyɛ alɩyɛ, besiyeziye awudo, bɛpanɩ dɩyɛ na bedi kualɛ mɔɔ bɛázɩkɛ ozukua nɩ ti, ɩmanlɩ nninyeni yɛlɩ mɛlɛkɛ wɔ mɩ ɛbɩlawɔlɛ nu na iwukoli ɔnwʋmɔ ɔhʋanɩ ma mɩyɛlɩ sʋ̃maa wɔ Gyehova yɩ ɔzʋ̃mɩnlɛ nu. Mɩ maamɩ zia hileli mɩ kezimɔ mikele ngyɛvʋlɔ, na ɩmanlɩ minyianlɩ ɔnwʋmɔ ɔhʋanɩ miyiyialɩ mmenii mɔɔ bo subanɩ yɛ pɩkɛ mɔɔ mʋkɔhʋla mukozumazuma bɛ.” (Ɛɣɛ. 31:​15, 21, 22) Baalɛ mɔɔ ɩbɔ mmɔdɩnɩ, ide ngyɛvʋlɔ, na izi kezimɔ bɛyɛ dɩyɛ wɔ awudo nɩ, ɩma yɩ abusunwa nɩɩ asafʋ yɩ bɛ anyɩ de.—Ɛɣɛ. 31:​13, 17, 27; Egy. 16:15.

14. Mɩnla yɛ osuma wɔ Crystal yi ndianwʋ yɩ nu a, na mɩnla yɛ ɩsɛ kɛɛ ɛfa wʋ adwɩnɩ siye zʋlɔ a?

¹⁴ Suma kezimɔ wʋzawʋ ekehila wʋ nwʋ. Sɛ ɔkɔhʋla kɛyɛ Kilisinyianii mɔɔ yɩ nwʋ wʋkwa a, ɩsɛ kɛɛ osuma kezimɔ wʋzawʋ ekehila wʋ nwʋ na ɛma wu kunlu twoli mɔɔ ɛlɛ yɩ nɩ nwʋ. (2 Tɛs.  3:​7, 8) Eliyema baalɛ Crystal hanlɩ kɛɛ: “Mɩ awʋvʋlɔ hyɛlɩ mɩ ɛzɩzɩbɛ kɛɛ, muzumá salɛti egyima mɔɔ ɩkɔwʋwa mɩ wɔ mɩ ɛbɩlawɔlɛ nu wɔ eɣile be. Mɩ papa manlɩ mʋhɔ muzumanlɩ kezimɔ bekila ozukuasɛmɩ zʋ sʋ̃, na eyi wʋwalɩ mɩ paa.” Sɛ osuma salɛti egyima mɔɔ ɩkɔwʋwa wʋ ma ekenyia egyima ɛkɛyɛ a, bɔ mmɔdɩnɩ kɛɛ okozuma kezimɔ ekehila wu ozukua zʋ bʋwɔ na wʋázɩkɛlɩ ozukua sʋ̃maa. (Ɛɣɛ. 31:​16, 18) Sɛ ɛma wʋ anyɩ sɔ mɔɔ ɛlɛ yɩ na wʋáyɛ atʋdɔ-atʋdɔ a, sa ɔkʋla otwu wu sunzuma ɔfʋã nu bʋtayɩ nwʋ, na wʋayɛ sʋ̃maa wɔ Gyehova yɩ ɔzʋ̃mɩnlɛ nu.—1 Tim. 6:8.

15-16. Mɩnla ɔhʋanɩ zʋ yɛ asigyiamaa mmaalɛ bɔkʋla bɔbʋwa mmenii mvʋlɔ a? (Maakɩ 10:​29, 30)

¹⁵ Sɛ enyia subanɩ mɔɔ ɩsɔ Gyehova anyɩ na osuma salɛti egyima a, ɩkɔwʋwa wʋ wɔ ɛbɩlawɔlɛ nu wɔ eɣile be. Bɛmá yehila ndianwʋ azʋlɔtʋ mɔɔ ɔkɔhʋla kozumazuma.

¹⁶ Sa ɔkʋla esi pɔkɔ kɛɛ ekeli sigyia kɔbʋmɩ mmɩlɩ be. Kɛmɔ Gyisɛsɩ hanlɩ nɩ, mmaalɛ be wɔ kɛnɩ mɔɔ besi pɔkɔ kɛɛ belékyia, mmɩlɩ po mɔɔ dɩka mɔɔ bɛda nɩ bɛáhyɛ sigyialilɛ nwʋ ɛzɩzɩbɛ nɩ. (Mt. 19:​10-12) Abiyemmɔ sʋ̃ wɔ ɛkɛnɩ a, besi pɔkɔ kɛɛ belékyia iluwa sianti mvʋlɔ be ti. Nyia anwʋlazʋ kɛɛ Gyehova nɩɩ Gyisɛsɩ bɛáwu asigyiamaa animitiyia. Wɔ oyuwadɩ munwala nɩ, mmeliyema mmaalɛ mɔɔ bɛdɩ asigyiamaa nɩ, bɔkʋla bɔbʋwa asafʋ yɩ baaba. Iluwakɛɛ bɔdɔ mmenii mvʋlɔ na bɔbʋwa bɛ nɩ ti, ɩma bɛba bɛyɛ kɛɛ mmenlima mmaalɛ nɩɩ enlinlɛ bɛma mmenii sʋ̃maa.—Kɩnga Maakɩ 10:​29, 30; 1 Tim. 5:2.

17. Mɩnla yɛ kɛdɛkɛ be kɔhʋla kɛyɛ na ama ɩahʋla ɩayɛ mmɩlɩ munwala ɔzʋ̃mɩnlɛ egyima yɩ be a?

¹⁷ Sa ɔkʋla ɛyɛ mmɩlɩ munwatĩĩ ɔzʋ̃mɩnlɛ egyima. Wɔ oyuwadɩ munwala nɩ mmeliyema mmaalɛ yɛ sʋ̃maa wɔ dasɩlɛlilɛ nu. (Ndw. 68:11) Sa ɔkʋla etindiã wu nninyeni bʋwɔ na wʋayɛ mmɩlɩ munwala ɔzʋ̃mɩnlɛ egyima yi be a? Sa ɔkʋla ɛba ɛyɛ ɔhʋanɩbukolɛvʋlɔ, ɔbʋwa asafʋ nniyia egyinanlɛ, anzɛnyɩɩ ɔkɔ Bɛtɩlɩ. Bɔ́ wʋ bʋtayɩ yɩ nwʋ mpayɩ. Ɛ nɩɩ mmenii mvʋlɔ mɔɔ bodwu ɔzɔ bʋtayɩ yɩ nwʋ nɩ bɔwɔ nwʋmɔ nkɔmmɔ, na kila mɔɔ ɩwʋwalɩ bɛ ma bɔhʋla bodwuli nwʋmɔ. Akʋ̃ kɛlɛ nhyɩhyɛlɩyɛ pɔkyɩɩ mɔɔ ɩkɔwʋwa wʋ ma okodwu wʋ bʋtayɩ nwʋ nɩ tiã kɛnɩ. Sɛ ɛba ɛyɛ mmɩlɩ munwala ɔzʋ̃mɩnlɛ egyima yɩ be a, ekenyia ɔnwʋmɔ ɔhʋanɩ ɛkɛyɛ nninyeni mvʋlɔ mɔɔ ɩyɛ anyɩnlɩlelɛ sʋ̃maa ɛkɛma Gyehova.

18. Mɩnla ti mɔɔ sɛ eliyema baalɛ be ɩyɩɩ enii mɔɔ ikegyia yɩ a, ɩsɛ kɛɛ isunzu nwʋmɔ bʋwɔ a? (Kila mfonyini yi sʋ̃.)

¹⁸ Sa ɔkʋla esi pɔkɔ kɛɛ ekegyia. Subanɩ nɩɩ nninyeni mɔɔ yezunzu nwʋmɔ nɩ, ɩkɔhʋla ɩkɔwʋwa  wʋ ma ɛkɛyɛ ɛyɩlɛba. Naasʋ̃, sɛ osunzuu agyiahʋnlɩ nwʋ a, ɩsɛ kɛɛ ekila bʋwɔ mmɩlɩ mɔ ɛyɩɩ enii mɔɔ ekegyia yɩ nɩ. Pɔkɔzilɛ mɔɔ nwʋmɔ hyinyia paa mɔɔ ekezi wɔ wʋ ɛbɩlawɔlɛ nu nɩ, eyi dɩ numɔ ɔkʋ̃. Kakɛ kɛɛ, enii mɔɔ ekegyia yɩ nɩ ɩsɛ kɛɛ etiye yɩ ɔhʋanɩhilelɛ. (Wul. 7:2; Ɛfɩ. 5:​23, 33) Meti bizia wʋ nwʋ kɛɛ: ‘Asʋ̃ ɩdɩ Kilisinyianii benyia mɔɔ yɩ nwʋ wʋkwa a? Asʋ̃ ɩfa sunzuma ɔfʋã nu nninyeni idi bɔmʋnlɩ wɔ yɩ ɛbɩlawɔlɛ nu a? Asʋ̃ isizi abɔkɔ mɔɔ nɣɛlɛbɛ wɔ numɔ a? Sɛ idi mfʋmɩ a, ide itiã nu a? Asʋ̃ ibu mmaalɛ a? Asʋ̃ sa ɩkʋla ɩbʋwa mɩ wɔ sunzuma ɔfʋã nu, nnwʋnlamɩ ɔfʋã nu, nɩɩ nɣanlɩdɩlɛ ɔfʋã nu a? Sɛ bɛfa asɛdɩ bowula yɩ sa a, idi nwʋmɔ egyima bʋwɔ a? Kɛ ndianwʋ nɩ, mɩnla asɛdɩ yɛ iwula yɩ sa wɔ asafʋ yi nu a, na kɛ idi nwʋmɔ egyima ise a?’ (Lk. 16:10; 1 Tim. 5:8) Nɔhʋanlɛ, sɛ ɛpɛ kɛɛ enyia ohunɛ baaba a, ɩsɛ kɛɛ wʋzawʋ sʋ̃ esiyeziye wʋ nwʋ kɛɛ ɛkɛyɛ ɛyɩlɛba.

19. Mɩnla ti mɔɔ ɛyɩlɛ yɩ asɛdɩ kɛɛ “bʋwavʋlɔ” nɩ annidi wɔ numɔ a?

¹⁹ Bayɩbʋlʋ yɩ kã kɛɛ ɛyɩlɛba “ɩdɩ bʋwavʋlɔ” ɩma yi hũ na ɩdɩ enii mɔɔ “ɩfata” yɩ. (Gyn. 2:18) Asʋ̃ eyi kile kɛɛ mmaalɛ bɛádʋ bʋlɔ a? Anhã! Ɛyɩlɛ yɩ asɛdɩ kɛɛ bʋwavʋlɔ nɩ, ɩdɩ animinyiamɩ ɩma yɩ. Nɔhʋanlɛ odwokɔ yɛ lɛ kɛɛ, Bayɩbʋlʋ yɩ ɩta ɩkã Gyehova nwʋ odwokɔ kɛɛ ɩdɩ “bʋwavʋlɔ.” (Ndw. 54:4; Hib. 13:6) Sɛ ɛyɩlɛ kyina yi hũ mɛda na ɩbʋwa yɩ ma isizi abɔkɔ baaba ɩma abusunwa yɩ a, nɩ ikile kɛɛ ɩdɩ bʋwavʋlɔ baaba. Na iluwakɛɛ ɩdɔ Gyehova ti, ɩbɔ mmɔdɩnɩ ɩyɛ mɔɔ ɩkɔhʋla bela ɩma mmenii nwʋ subanɩ ngɩnlɩma mɔɔ yi hũ wɔ nɩ. (Ɛɣɛ. 31:​11, 12; 1 Tim. 3:11) Sa ɔkʋla esiyeziye wʋ nwʋ kakɩ yɩ kɛɛ ɛkɛyɛ ɛyɩlɛba wɔ eɣile be iluwa ɛ nɩɩ Gyehova bɛ avinli abusunwawɔlɛ mɔɔ ɛkɛhyɛ numɔ ɛzɩzɩbɛ na wʋawʋwa mmenii mvʋlɔ wɔ awudo nɩɩ asafʋ yɩ nu nɩ zʋ.

20. Mɩnla nninyeniba yɛ enlinlɛ kɔhʋla kɛyɛ kɛma yɩ abusunwa a?

²⁰ Sa ɔkʋla ɛba ɛyɛ enlinlɛ. Sɛ ekyia owie a, ebiye a ɛ nɩɩ wu hũ kɔwʋ nnwuakula. (Ndw. 127:3) Ɩdɩ baaba kɛɛ ekeli bɔmʋnlɩ kozunzu mɔɔ ɩkɔwʋwa wʋ ma ɛkɛyɛ enlinlɛba nɩ nwʋ ansaana. Subanɩ nɩɩ nninyeni mɔɔ yezunzu nwʋmɔ wɔ dɩyɛzumanlɛ eyi nu nɩ, ɩkɔwʋwa wʋ ma ɛkɛyɛ ɛyɩlɛ nɩɩ enlinlɛba. Sɛ ɛda ɔlɔlɛ, kunlumiba, nɩɩ abʋtalɩ ali a, ɩkɛma wʋ abusunwa yɩ bɛ anyɩ kele na wu nnwuakula sʋ̃ kɛdɩ nɣanlɩ kɛɛ bɔwɔ banɩwɔlɛ na ɔdɔ bɛ.—Ɛɣɛ. 24:3.

21. Kɛ ɛtɩ nɣanlɩ se wɔ ye mmeliyema mmaalɛ yɩ nwʋ a, na mɩnla ti a? (Kila Ɔwɩɛnɩlɛ Aɣanɩ yɩ anyunu mfonyini yi.)

²¹ Mmeliyema mmaalɛ, iluwa mɔɔ bɛyɛ bɛma Gyehova nɩɩ yi mmenii ti, yɛdɔ bɛ baaba. (Hib. 6:10) Bɔbɔ mmɔdɩnɩ bɛda subanɩba ali, na bɛyɛ nninyeni mɔɔ ɩma bɛzabɛ nɩɩ mmenii mvʋlɔ bɛ anyɩ de wɔ bɛ ɛbɩlawɔlɛ nu, na besiyeziye bɔ nwʋ bɛma asɛdɩ mɔɔ bekenyia yɩ eɣile be nɩ. Bɔtʋ bʋlɔ baaba paa bɛma Gyehova yɩ ahyɩhyɛdɩ yɩ!