Eɣile ɔkʋ̃ be, eliyema baalɛ be hilalɩ vidiyo be wɔ jw.org mɔɔ ɩkã kezimɔ Gyehova da kunlumiyɩbalɛ ali na isia sʋ̃ ɩyɛ debe ɩbʋwa mmenii nɩ. (Ayɩ. 63:​7-9) Izili pɔkɔ kɛɛ ɩkɛva mɔɔ izumanlɩ nɩ ɩkɛyɛ egyima na ɩawʋwa mmenii mvʋlɔ. Aɣinzi yi mɔɔ nɩ idii kualɛ wɔ ɔzɔ eɣile yi nɩ, ɩnwʋnlɩ baalɛ be mɔɔ íni dɩka ɩda na ɩhã ihileli yi kɛɛ ɩpɛ kɛɛ ɩtɔ alɩyɛ ɩma yɩ. Baalɛ nɩ leli dianlɩ numɔ. Mmɩlɩ mɔ ɩvalɩ alɩyɛ yɩ ɩɣɩlɛlɩ yɩ nɩ, ɩvalɩ Asʋ̃ Amanɩyɛnwʋnlɛ Ɩtʋ Ikodua a? kɛlɛta ɛɣalɛ nɩ ilili yi dasɩlɛ sikalɛ.

Baalɛ nɩ dukoli ozunɛ. Ihileli numɔ kɛɛ, bɛdɩdɩlɩ yɩ kɛɛ Gyehova Dasɩvʋlɔ naasʋ̃ ɩzʋ̃ nɔhʋanlɛ yɩ nu ɩyɩlɩ yɩ nwʋ nɩ, alʋbɔ sʋ̃maa dua nu. Naasʋ̃ nɩ ɩwɔ mpayɩ eɣile asã yɩ la kɛɛ Gyehova ɩwʋwá yɩ ma izia ɩɣɩla yɩ pɛ dɔkʋ̃. Eliyema baalɛ nɩ manlɩ Bayɩbʋlʋ yɩ na ileli idianlɩ numɔ kɛɛ ikozuma dɩyɛ. a

Sa yɛkʋla yesumazuma Gyehova na yɛala kunlumiyɩbalɛ ali yɛahile mmenii, mɔɔ ye mmusunwamaa nɩɩ ye mmeliyema Kilisinyiamaa kɩnla nwʋ. Akʋ̃ sʋ̃, sɛ yɛpɩbɛ ɔnwʋmɔ ɔhʋanɩ azʋlɔtʋ yɛfa yedi mmenii dasɩlɛ a, ikile kɛɛ yɛdaa kunlumiyɩbalɛ ali.