1. Mɩnla ti mɔɔ yɛkɔhʋla yɛkɛhã kɛɛ nɩ Abilehamɩ yɩ anyɩnlɩlazʋ yi nu yɛ sɩ a?

 GYEHOVA wɔlɩ yɩ ɔhɔnwʋ Abilehamɩ anʋhʋba kɛɛ, iluwa yɩ tʋnii be ti, amanlɩ amanlɩ munwatĩĩ kenyia nyilalɛ. (Gyn. 15:5; 22:18) Iluwakɛɛ nɩ Abilehamɩ wɔ dedi kezile wɔ Nyamɩnlɩ nu nɩ ti, inyianlɩ anwʋlazʋ kɛɛ Nyamɩnlɩ yɩ anʋhʋba kɛɣa nu. Naasʋ̃ mmɩlɩ mɔ Abilehamɩ lili alʋbɔ 100 na yɩ yɩ sʋ̃ lili alʋbɔ 90 nɩ, nɩ agyiahʋnlɩmaa nɔhʋanlɛmaa eyimmɔ béni ɛɣalɛ. (Gyn. 21:​1-7) Naasʋ̃ Bayɩbʋlʋ yɩ ka kɛɛ, “Abilehamɩ ileli Nyamɩnlɩ yɩ anʋhʋba nɩ ilili, na ɩmanlɩ yɩ anyɩ ɩlalɩ ɔzʋlɔ ɛzɩzɩbɛ ɛzɩzɩbɛ wɔ mmɩlɩ mɔ nɩ anyɩnlɩlazʋ ɩzã kɛɛ ɩbayɛ ‘Amanlɩ be nlabenyia,’ kɛmɔ Ɛhɛlɛlɛ nɩ ise” nɩ. (Wul. 4:18) Kɛmɔ ezi nɩ, Abilehamɩ yɩ anyɩnlɩlazʋ ɣalɩ numɔ. Ɩwʋlɩ Ayɩzɩkɩ mɔɔ nɩ ɩva mmɩlɩ tɩndɩnlɩ ihila yɩ ɔhʋanɩ nɩ. Mɩnla yɛ ɩmanlɩ Abilehamɩ nyianlɩ anwʋlazʋ kɛɛ Gyehova yɩ anʋhʋba kɛɣa nu a?

2. Mɩnla yɛ ɩmanlɩ Abilehamɩ nyianlɩ anwʋlazʋ kɛɛ Gyehova yɩ anʋhʋba kɛɣa nu a?

² Iluwakɛɛ nɩ Abilehamɩ nɩɩ Gyehova wɔ abusunwawɔlɛ mɔɔ numɔ yɛ sɩ ti, “ileli ilili baaba kɛɛ Nyamɩnlɩ ɩkʋla ɩyɛ mɔɔ ɩhã nɩ.” (Wul. 4:21) Iluwa Abilehamɩ yi dedi ti, Gyehova leli yi dianlɩ numɔ na iwuli yi kɛɛ ɛdɩnɣɛlɛnii. (Gye. 2:23) Kɛmɔ Wulomimaa 4:18 kile nɩ, nɩ Abilehamɩ wɔ dedi nɩɩ anwʋlazʋ. Kakɩ yɩ, bɛmá yehila mɔɔ sʋ̃mavʋlɔ Pɔɔlʋ hanlɩ valɩlɩ anyɩnlɩlazʋ nwʋ kɛmɔ bɛhɛlɛ wɔ Wulomimaa yi ti 5 nɩ.

3. Mɩnla yɛ Pɔɔlʋ hanlɩ valɩlɩ anyɩnlɩlazʋ nwʋ a?

³ Pɔɔlʋ hilehileli sianti mɔɔ yɛkɔhʋla yekenyia anwʋlazʋ kɛɛ yɛ ‘anyɩnlɩlazʋ yɩ ɩáma yɛ ɛɣɛɛlɛ bɔ anzɛnyɩɩ yɛ sa si azɩ’ nɩ nu. (Wul. 5:5) Isia sʋ̃ ɩbʋwa yɛ ma yɛnwʋ kezimɔ yɛ anyɩnlɩlazʋ yɩ kɔhʋla kɛyɛ kezi. Sɛ yesunzuu Wulomimaa 5:​1-5 yi nwʋ a, dwɩnɩndwɩnɩ kezimɔ wʋzawʋ wʋ eɣile be nwʋ anyɩnlɩlazʋ nɩ ɩɣa ɩyɛ kezi nɩ nwʋ. Mmɩlɩ mɔ yesunzuu nwʋmɔ nɩ, ɩkɔwʋwa wʋ ma ɔkɔnwʋ kezimɔ ɩkɛma wʋ anyɩnlɩlazʋ yɩ kɛyɛ kezi kɛdɛla  kezimɔ ɩdɩ wɔ nnɛ po. Bɛmá yeli bɔmʋnlɩ yezunzu anyɩnlɩlazʋ sʋnʋnkʋ̃ be mɔɔ Pɔɔlʋ hanlɩ kɛɛ ɩlɛ́ma yɛ sa kezi azɩ nɩ nwʋ.

4. Mɩnla yɛ bɛhã nwʋmɔ odwokɔ wɔ Wulomimaa 5:​1, 2 yi nu a?

⁴ Kɩnga Wulomimaa 5:​1, 2. Pɔɔlʋ hɛlɛlɩ ɔzɔ ndwokɔ yɩ hɔ manlɩ asafʋ mɔɔ nɩ ɩwɔ Wulomi nɩ. Nɩ mmeliyema mmenyia nɩɩ mmaalɛ mɔɔ bɔwɔ kɛnɩ nɩ, bɛɣa bozuma Gyehova nɩɩ Gyisɛsɩ nwʋ dɩyɛ, bɛɣa benyia bo nu dedi, na bɛɣa bɛyɛ Kilisinyiamaa. Na ‘iluwa be dedi ti, Nyamɩnlɩ wuli bɛ ɛdɩnɣɛlɛmaa’ na ɩvalɩ sunzuma nwanzanwanza nɩ ɩvɔlɩ ngɔlɔ bɛ. Meti benyianlɩ anyɩnlɩlazʋ kɩnlɩma mɔɔ idi munli mɔɔ nɩ sa bɔkʋla bekila yɩ ɔhʋanɩ kɛɛ bɛ sa kɛhã.

5. Mɩnla anyɩnlɩlazʋ yɛ bɛzabɛ mɔɔ bɔvɔ ngɔlɔ bɛ nɩ bɔwɔ a?

⁵ Aɣinzi yi, Pɔɔlʋ hɛlɛlɩ anyɩnlɩlazʋ mɔɔ Nyamɩnlɩ va ma bɛ nɩ nwʋ odwokɔ ɩhɔ ɩmanlɩ Kilisinyiamaa mɔɔ bɔvɔ ngɔlɔ bɛ mɔɔ nɩ bɔwɔ Ɛfɩsɛsɩ nɩ. Nɩ ɔzɔ anyɩnlɩlazʋ yɩ yɛ lɛ kɛɛ bɛ sa kɛhã “nninyeniba mɔɔ Nyamɩnlɩ ɩva ɩma nwanzanwanzamaa nɩ.” (Ɛfɩ. 1:​18, NWT) Akʋ̃ sʋ̃, Pɔɔlʋ manlɩ Kolosiyiamaa nɩ nwʋnlɩ dɩka mɔɔ bekenyia bɛ anyɩnlɩlazʋ yɩ nwʋ akatuwa. Ɩhanlɩ nwʋmɔ odwokɔ kɛɛ, ɩdɩ “anyɩnlɩlazʋ dɩyɛ nɩ mɔɔ Nyamɩnlɩ ɩva iziye mʋnlʋmmɔ bɛ ɛkɛnɩ wɔ sʋlɔ nɩ.” (Kol. 1:​4, 5) Kilisinyiamaa mɔɔ bɔvɔ ngɔlɔ bɛ nɩ, bɛ anyɩnlɩlazʋ yɛ lɛ kɛɛ, bokodunwo bɛ ma bekenyia nnwʋanlɩ mɔɔ íni awielɩyɛ wɔ sʋlɔ na bɛ nɩɩ Kɩlayɩsɩ bɛali tumi.—1 Tɛs. 4:​13-17; Yik. 20:6.

6. Mɩnla yɛ eliyema be mɔɔ bɔvɔ ngɔlɔ yɩ nɩ hanlɩ valɩ yɩ anyɩnlɩlazʋ nwʋ a?

⁶ Anyɩnlɩlazʋ eyi ɩla Kilisinyiamaa mɔɔ bɔvɔ ngɔlɔ bɛ nɩ bɛ ahʋnlɩnɩ zʋ paa. Bo nu ɔkʋ̃ yɛ lɛ Eliyema Frederick Franz. Ɩzʋ̃ yɩ ahʋnlɩnɩ nu ɩhanlɩ wɔ 1991 kɛɛ: “Yɛ anyɩnlɩlazʋ yɩ kɛɣa numɔ ɔhʋanɩ bela zʋ. Na mmenii 144,000 yɩ, ye nu ɔkʋ̃ bela yɩ sa kɛhã akatuwa mɔɔ Nyamɩnlɩ ɩva ɩwɔ anʋhʋba yɛ nɩ.” Mmɩlɩ mɔ ɩvalɩ alʋbɔ sʋ̃maa ɩzʋ̃mɩnlɩ Nyamɩnlɩ wɔ nɔhʋanlɛ nu nɩ, Eliyema Franz hanlɩ kɛɛ: ‘Yɛ anyɩnlɩlazʋ yɩ lanwʋ la tʋ bʋlɔ ma yɛ baaba.  Yɛ anyɩnlɩlazʋ yɩ kɔ ɔzʋlɔ yɛ kezi mmɩlɩ mɔ yɛdɩkɛɛ kɛɛ ɩkɛɣa numɔ nɩ. Sɛ ɩba yɩ kɛɛ ɩsɛ kɛɛ yɛfa alʋbɔ sʋ̃maa yɛdɩkɛ po a, yeziyeziye yɛ nwʋ kɛɛ yɛkɔhɔ zʋlɔ yɛkɛlɩkɛ. Kakɩ yɩ, anyɩnlɩzɔlɛ mɔɔ mʋwɔ mɩma yɛ anyɩnlɩlazʋ nɩ, ɩyɛ kezi ɩdɛla mmɩlɩ bela.’

7-8. Mɩnla anyɩnlɩlazʋ yɛ Gyehova azʋ̃mɩvʋlɔ sʋ̃maa wɔ a? (Wulomimaa 8:​20, 21)

⁷ Bɛzabɛ mɔɔ bɔsʋ̃mɩ Gyehova nnɛ nɩ, bo nu sʋ̃maa wɔ anyɩnlɩlazʋ fʋlɔ be. Ɩdɩ anyɩnlɩlazʋ mɔɔ nɩ Abilehamɩ wɔ nɩ be, mɔɔ mɛyɩ yɛ lɛ kɛɛ, bɔkɔwʋwa azɩlɛ yɩ zʋ daabaa wɔ Nyamɩnlɩ yi Bulombunlililɛ yi nu. (Hib. 11:​8-10, 13) Pɔɔlʋ hɛlɛlɩ anyɩnlɩlazʋ kɩnlɩma mɔɔ mmenii eyi bekilaa yɩ ɔhʋanɩ nɩ nwʋ odwokɔ. (Kɩnga Wulomimaa 8:​20, 21.) Mmɩlɩ mɔ ili bɔmʋnlɩ mɔɔ ozumanlɩ eɣile be mɔɔ Bayɩbʋlʋ yɩ bɔ nwʋmɔ anʋhʋba nwʋ dɩyɛ nɩ, numɔ ɛhɩnla dɩyɛ yɛ nɩ ekilaa yɩ ɔhʋanɩ paa a? Asʋ̃ nɩ ɩdɩ anʋhʋba mɔɔ mɛyɩ yɛ lɛ kɛɛ, eɣile be ekeli munli mɔɔ tanɩ íni wʋ zʋ tumi dɔkʋ̃ nɩ a? Anzɛnyɩɩ nɩ ɩdɩ anʋhʋba mɔɔ mɛyɩ yɛ lɛ kɛɛ, wʋ alɔvʋlɔ mɔɔ bowuwu nɩ, bekezia bɔkɔwʋwa azɩlɛ yɩ zʋ dɔkʋ̃ wɔ Paladayɩsɩ nɩ a? Iluwa anyɩnlɩlazʋ mɔɔ Nyamɩnlɩ va ma yɛ nɩ ti, ɩma enyia nninyeni ngɩnlɩma sʋ̃maa mɔɔ sa ɔkʋla ekila yɩ ɔhʋanɩ eɣile be.

⁸ Sɛ yekilaa ɔhʋanɩ kɛɛ yɛkɔwʋwa azɩ daabaa wɔ sʋlɔ anzɛnyɩɩ azɩlɛ yɩ zʋ o, ye munwala yɛwɔ anyɩnlɩlazʋ kɩnlɩma mɔɔ ɩma yɛ anyɩ ide. Na yɛ anyɩnlɩlazʋ mɔɔ ɩma yɛ anyɩ ide nɩ, numɔ kɔhʋla kɛyɛ sɩ. Mɔɔ Pɔɔlʋ zia hɛlɛlɩ nɩ ma yɛnwʋ kɛɛ, sa ɩkʋla ɩba yɩ zɔ. Bɛmá yezunzu mɔɔ ɩhɛlɛlɩ ɩvalɩlɩ yɛ anyɩnlɩlazʋ yɩ nwʋ nɩ nwʋ. Sɛ yɛyɛ zɔ a, ɩkɛma anwʋlazʋ mɔɔ yɛwɔ yɩ wɔ yɛ anyɩnlɩlazʋ yi nu nɩ kɛyɛ kezi, na ɩlɛ́ma yɛ sa kezi asɩ kyɩ̃.

9-10. Kɛmɔ ɩdʋlɩ Pɔɔlʋ nɩ, mɩnla yɛ Kilisinyiamaa kɔhʋla kehila yɩ ɔhʋanɩ a? (Wulomimaa 5:3) (Kila mfonyini yi sʋ̃.)

⁹ Kɩnga Wulomimaa 5:3. Yɛ́ yɩ ndwɩ kɛɛ sɛ yeyiyiaa amanɩyɛnwʋnlɛ a, ɩkɔhʋla kɛma yɛ anyɩnlɩlazʋ yi nu kɛyɛ sɩ. Ebiye a eyi kɛyɛ yɛ nnwʋánlɩ. Naasʋ̃ nɔhʋanlɛ odwokɔ yɛ lɛ kɛɛ, Kɩlayɩsɩ yɩ mɛdalilɛmaa munwala kɔhʋla kehila yɩ ɔhʋanɩ kɛɛ bekeyiyia atɩɩtɩɩ. Bɛmá yezunzu Pɔɔlʋ yi ndianwʋ yɩ nwʋ. Ɩhã ihileli bɛzabɛ mɔɔ bɔwɔ Tɛsalonika nɩ kɛɛ: “Sianti yɛ lɛ kɛɛ,  mmɩlɩ mɔ nɩ yɛwɔ mʋnlʋmmɔ bɔ nwʋ ɛkɛnɩ nɩ, yelili bɔmʋnlɩ yɛwɔlɩ mʋnlʋmmɔ bɛ amanɩyɛ kɛɛ mmenii bɛkɛyɛ yɛ atɩɩtɩɩ, na izi sʋ̃ ɩma mʋnlʋmmɔ bɔnwʋ yɩ.” (1 Tɛs. 3:4) Na Ɩhɛlɛlɩ ɩhɔ ɩmanlɩ Kɔlɛntɩmaa nɩ kɛɛ: ‘Yɛpɛ kɛɛ mʋnlʋmmɔ bɔnwʋ kɛ yɛ nwʋ izili ɩhyɩlɩlɩ yɛ kezile ɩmanlɩ ɩwʋlʋlɩ yɛ zʋ, mɔɔ yɛdwɩnɩnlɩ kɛɛ yɛ awielɩyɛ nɩ la yɛ nɩ.’—2 Kɔl. 1:8; 11:​23-27.

¹⁰ Kilisinyiamaa mɔɔ bɔwɔ kɛnɩ nnɛ nɩ kɔhʋla kehila ɔhʋanɩ kɛɛ, bekeyiyia atɩɩtɩɩ be mɔɔ ɩdɩ zɔ. (2 Tim. 3:12). Na wʋzawʋ sʋ̃ ɛ? Ɔzʋmɩ kɛɛ enyianlɩ Gyisɛsɩ nu dedi, na ɔwɔlɩ yɩ tʋ kɛɛ edii yɩ mɛda nɩ asʋ̃ eyiyiaa atɩɩtɩɩ be a? Ebiye a, wʋ ɔhɔnwʋmmɔ nɩɩ wu mmusunwamaa bɛsɩlɩ wʋ anzɛnyɩɩ bɛ nɩɩ wʋ iáli yi bʋwɔ. Asʋ̃ wʋ kɛnɣa mɔɔ ezi kɛɛ ekeli nɔhʋanlɛ wɔ dɩyɛ bela nu nɩ, ɩma eyiyiaa ndwokɔzɩzɩbɛ wɔ egyima nu a? (Hib. 13:18) Asʋ̃ iluwa dasɩlɛlilɛ egyima yɩ ti, aɣanɩ mbanimbani botwodwuu betiyia wʋ a? Ɩávalɩ nwʋmɔ atɩɩtɩɩ mɔɔ ebiye a yeyiaa nɩ, Pɔɔlʋ se yelí fɛlɛkʋ̃. Mɩnla ti a?

11. Mɩnla ti mɔɔ ihyinyia kɛɛ yesi yɛ kɛnɣa kɛɛ yekegyina pindinyii wɔ odwodwudiyialɛ bela nu a?

¹¹ Sɛ yeyiaa atɩɩtɩɩ be po a, yɛ anyɩ kɔhʋla kele. Iluwakɛɛ ɩkɔwʋwa yɛ ma yekenyia subanɩ be mɔɔ nwʋmɔ hyinyia. Kɛmɔ Wulomimaa 5:3 kã nɩ, “ɛyɛkɛlilɛ ɩma enii nyia abʋtalɩ anzɛnyɩɩ ikyina pindinyii.” Kilisinyiamaa munwala keyiyia atɩɩtɩɩ, meti ɩsɛ kɛɛ ye munwala yenyia abʋtalɩ. Akʋ̃ sʋ̃, ɩsɛ kɛɛ yesi yɛ kɛnɣa kɛɛ yekegyina pindinyii wɔ atɩɩtɩɩ bela mɔɔ yekeyiyia nɩ nu. Sɛ yɛyɛ zɔ a, ɩkɔwʋwa yɛ ma yɛ sa kɛhã yɛ anyɩnlɩlazʋ yɩ nwʋ akatuwa. Yɛábɛ kɛɛ yɛkɛyɛ kɛɛ mmenii mɔɔ Gyisɛsɩ hanlɩ bɔ nwʋ odwokɔ wɔ yi ndianwʋ mɔɔ ɩfalɩ mma mɔɔ igualɩ awʋlɔ zʋ nɩ nu nɩ. Bɛvalɩ anyɩnlɩlelɛ beleli odwokɔ yɩ, naasʋ̃ mmɩlɩ mɔ ‘bɔnwʋʋ amanɩyɛ anzɛnyɩɩ beyiyiaa atɩɩtɩɩ nɩ,’ bɛ padi golɔlɩ. (Mt. 13:​5, 6, 20, 21) Ɩwɔ numɔ, atɩɩtɩɩ anzɛnyɩɩ odwodwudiyialɛ bela íni kɛnɩ mɔɔ ɩyɛ anyɩnlɩlelɛ dɩyɛ, naasʋ̃ sɛ yɛkɔ zʋ yekyina pindinyii a, Gyehova keyila yɛ daabaa. Mɩnla ɔhʋanɩ zʋ a?

12. Sɛ yekyina pindinyii wɔ odwodwudiyialɛ nu a, mɩnla mfasʋ yɛ yenyia a?

¹² Sʋ̃mavʋlɔ Gyemisi hanlɩ mfasʋ mɔɔ yenyia mmɩlɩ mɔ yegyina odwohilalɛ munwa nɩ nwʋ odwokɔ. Ɩhɛlɛlɩ kɛɛ: “Bɛmá pindinyiigyinanlɛ iwie yi egyima na bɛali munli wɔ dɩyɛ bela nu mɔɔ dɩyɛ bela iléhyinyia bɛ.” (Gye. 1:​2-4, NWT) Gyemisi hanlɩ pindinyiigyinanlɛ nwʋ odwokɔ dɩkɛɛ mɔɔ ɩwɔ egyima be mɔɔ ɩsɛ kɛɛ idi. Mɛyɩ nɩ ɩdɩ mɩnla egyima a? Sa ɩkʋla ɩbʋwa wʋ ma enyia abʋtalɩ sʋ̃maa, wu dedi ɩayɛ kezi, na wʋava wʋ nwʋ wʋadiã Gyehova zʋ kʋlakʋla. Naasʋ̃, sɛ yekyina odwodwudiyialɛ nu pindinyii a, yenyia zʋlɔ mfasʋ fʋlɔ be sʋ̃ mɔɔ nwʋmɔ hyinyia.

13-14. Sɛ yekyina pindinyii a, mɩnla yɛ ɩzʋ̃ numɔ ɩba a, na mɩnla ɔhʋanɩ zʋ yɛ eyi kã yɛ anyɩnlɩlazʋ a? (Wulomimaa 5:4)

¹³ Kɩnga Wulomimaa 5:4. Pɔɔlʋ hanlɩ kɛɛ, pindinyiigyinanlɛ “ɩma enii kyina yɩ agyia nu.” Sɛ ekyina wʋ agyia nu pindinyii a, ɩma Gyehova de wʋ tiã numɔ. Naasʋ̃ eyi iáhile kɛɛ sɛ Gyehova nwʋ kɛɛ eyiyiaa odwohilalɛ anzɛnyɩɩ ndwokɔzɩzɩbɛ be a, ɩyɛ yɩ fɛ o, mfomi yɩ anyɩ deli wʋ nwʋ iluwakɛɛ ɛlɛ nɔhʋanlɛlilɛ ekyinaa numɔ pindinyii. Kila kezimɔ ɩdɩ ɔnwʋmɔ ɔhʋanɩ kezile kɛɛ ye pindinyiigyinanlɛ nɩ ɩma Gyehova anyɩ de!—Ndw. 5:12.

¹⁴ Kakɛ kɛɛ Abilehamɩ gyinanlɩ odwohilalɛ munwa pindinyii na ɩmanlɩ Nyamɩnlɩ leli yi dianlɩ numɔ. Gyehova vʋlɔlɩ yɩ kɛɛ yɩ ɔhɔnwʋ na iwuli yi kɛɛ ɛdɩnɣɛlɛnii. (Gyn. 15:6; Wul. 4:​13, 22) Amɩyɛ sʋ̃, yɛ sa kɔhʋla kɛhã ɔzɔ ɔnwʋmɔ ɔhʋanɩ yɩ be. Kɛ egyima dʋdʋ mɔɔ yɛyɛ wɔ Gyehova yɩ ɔzʋ̃mɩnlɛ nu anzɛnyɩɩ ɔnwʋmɔ ɔhʋanɩ mɔɔ yɛlɛ nɩ yɛ ɩma Nyamɩnlɩ de yɛ tiã numɔ a, mfomi nɔhʋanlɛlilɛ mɔɔ yɛfa yekyina pindinyii nɩ yɛ ɩma ide yɛ itiã numɔ a. Na ɩávalɩ nwʋmɔ ɔlʋbɔ mɔɔ yeli, bʋwabɩlɛ  mɔɔ yɛwɔ nu, anzɛnyɩɩ yɛ anwʋzɩzɩbɛ nɩ, ye munwala yɛkɔhʋla yekegyina pindinyii. Asʋ̃ ɛlɛ nɔhʋanlɛlilɛ ekyinaa odwohilalɛ be munwa kakɩ yɩ a? Sɛ ɔzɔ a, ma wʋ anyɩ ilé iluwa kɛɛ Gyehova ide wʋ itiã numɔ. Sɛ yɛba yɛnwʋ yɩ kɛɛ Gyehova yɩ anyɩ deli yɛ nwʋ a, ɩkʋla ɩma yenyia anwʋzɩzɩbɛ kezile na yɛ anyɩnlɩlazʋ yi nu sʋ̃ yɛ sɩ.

15. Mɩnla odwokɔ fʋlɔ yɛ Pɔɔlʋ hanlɩ a, na mɩnla ti mɔɔ ebiye a ɩkɛyɛ abiyemmɔ asibɔnwʋ a?

¹⁵ Kɛmɔ Pɔɔlʋ hilehileli numɔ nɩ, sɛ yɛfa pindinyiigyinanlɛ yekyina odwohilalɛ nu a, ɩma Gyehova ide yɛ itiã numɔ. Yɛ́ mɔɔ Pɔɔlʋ hanlɩ nɩ ndwɩ: “Anyɩnlɩlazʋ mɔɔ ɩdɩ ɔzɔ nɩ ɩáma yɛ ɛɣɛɛlɛ ɩbɔ anzɛnyɩɩ yɛ sa si azɩ.” (Wul. 5:​4, 5) Ebiye a, eyi kezi abiyemmɔ bɔ nwʋ. Mɩnla ti a? Iluwakɛɛ ahyɛasɩ nɩ, Pɔɔlʋ hanlɩ wɔ Wulomimaa 5:2 kɛɛ, Kilisinyiamaa mɔɔ bɔwɔ Wulomi nɩ, bɔwɔ anyɩnlɩlazʋ kɛɛ ‘bekenyia Nyamɩnlɩ yɩ animinyiamɩ nɩ be!’ Eyi ti, ebiye a abiye keɣizia kɛɛ, ‘Sɛ nɩ ɔzɔ Kilisinyiamaa nɩ wɔ anyɩnlɩlazʋ a, nɩ mɩnla ti mɔɔ aɣinzi yi Pɔɔlʋ zialɩ hanlɩ anyɩnlɩlazʋ nwʋ odwokɔ wɔ yi odwokɔ yi nu yɩ a?’

16. Mɩnla ɔhʋanɩ zʋ yɛ anyɩnlɩlazʋ bɔ yɩ tʋ kɛɛ inyii wɔ abiye nu a? (Kila mfonyini yi sʋ̃.)

¹⁶ Sɛ yɛtɩ yɩ tʋ kɛɛ anyɩnlɩlazʋ dɩ debe mɔɔ inyi a, ɩkɛma yɛkɛdɩ Pɔɔlʋ yi odwokɔ yɩ tʋ bʋwɔ. Kɛ ndianwʋ nɩ, asʋ̃ ɛkakɛ mmɩlɩ mɔ ili bɔmʋnlɩ mɔɔ ɛdɩlɩ anyɩnlɩlazʋ kɩnlɩma mɔɔ ɩwɔ Bayɩbʋlʋ yi nu nwʋ odwokɔ nɩ a? Ebiye a ɔzɔ mmɩlɩ yɩ, wʋ anyɩ lelili nwʋmɔ naasʋ̃ enyianlɩ adwɩnɩ kɛɛ, anyɩnlɩlazʋ kɩnlɩma eyi ɩlɔ́kʋla kɛɣa numɔ. Naasʋ̃ mmɩlɩ mɔ ɛɣa zumanlɩ sʋ̃maa ɛvalɩlɩ Gyehova nɩɩ Bayɩbʋlʋ nu anʋhʋba azʋlɔtʋ yɩ nwʋ nɩ, ɛɣa nyianlɩ anwʋlazʋ kezile kɛɛ ɔzɔ anyɩnlɩlazʋ yɩ kɔhʋla kɛɣa nu.

17. Wɔ wʋnwʋzʋyilalɛ nɩɩ wu onlumanlɛ mɛda po nɩ, mɩnla ɔhʋanɩ zʋ yɛ wʋ anyɩnlɩlazʋ nɩ kɔ ɔzʋlɔ nyi a?

¹⁷ Wɔ wu onlumanlɛ mɛda po nɩ, ɔhɔlɩ zʋlɔ zumanlɩ Gyehova nwʋ dɩyɛ na ɔlɔlɛ mɔɔ ɔwɔ ma yɩ nɩ ɣa yɛlɩ kezi, na eyi manlɩ wʋ anyɩnlɩlazʋ yɛlɩ kezi. (Hib. 5:13–6:1) Ebiye po a, odwokɔ mɔɔ ɩwɔ Wulomimaa 5:​2-4 nɩ ɣa numɔ wɔ wʋ ɔfʋã nu. Eyiyialɩ atɩɩtɩɩ sʋ̃maa,  naasʋ̃ egyinanlɩ numɔ pindinyii. Na Gyehova sʋ̃ ma ɔnwʋ yɩ kɛɛ yɩ anyɩ deli wʋ nwʋ. Iluwakɛɛ ezi kɛɛ Nyamɩnlɩ dɔ wʋ na yɩ anyɩ deli wʋ nwʋ nɩ ti, ɩma kakɩ yɩ, enyia anwʋlazʋ kezile kɛɛ nninyeni mɔɔ ɩva ɩwɔ wʋ anʋhʋba nɩ, wʋ sa kɛhã yɩ. Wʋ anyɩnlɩlazʋ yi nu ɣa yɛ sɩ ɩdɛla bɔmʋnlɩ dɩyɛ nɩ. Ɩla wʋ ahʋnlɩnɩ zʋ baaba, na ezi kɛɛ mɔɔ ɩdɩ bela nɩ sa ɩba numɔ. Yɛkɛhã a, ɩzɩnza wʋ ɛbɩlawɔlɛ kʋlaa. Ɩzɩnza kezimɔ ɛ nɩɩ wu mmusunwamaa di, kezimɔ esizi abɔkɔ nɩɩ kezimɔ ɛfa wʋ mmɩlɩ di egyima po.

18. Mɩnla anwʋlazʋ yɛ Gyehova ɩma yenyia a?

¹⁸ Sʋ̃mavʋlɔ Pɔɔlʋ hanlɩ odwokɔ fʋlɔ be mɔɔ nwʋmɔ hyinyia valɩlɩ mɔɔ abiye kenyia wɔ mmɩlɩ mɔ Nyamɩnlɩ ile yi idiã numɔ nɩ nwʋ. Yi odwokɔ yɩ ma enyia anwʋlazʋ kɛɛ wʋ anyɩnlɩlazʋ yɩ kɛɣa numɔ. Mɩnla ti mɔɔ ɔkɔhʋla kele eyi keli a? Sunzuma yɩ hanlɩ Pɔɔlʋ ma ɩhɛlɛlɩ odwokɔ be ɩva ɩhyɛlɩ Kilisinyiamaa ɛzɩzɩbɛ kɛɛ: “Anyɩnlɩlazʋ mɔɔ ɩdɩ ɔzɔ nɩ ɩáma yɛ ɛɣɛɛlɛ bɔ anzɛnyɩɩ yɛ sa si azɩ, iluwakɛɛ sunzuma nwanzanwanza nɩ mɔɔ Nyamɩnlɩ ɩva ɩma yɛ nɩ ikile kɛɛ Nyamɩnlɩ ɩva yɩ ɔlɔlɛ nɩ iwula yɛ ahʋnlɩnɩ nu.” (Wul. 5:5) Meti sa ɔkʋla enyia anwʋlazʋ kɛɛ anyɩnlɩlazʋ mɔɔ Gyehova ɩva ɩma wʋ nɩ kɛɣa numɔ.

19. Mɔɔ ɩfalɩ wʋ anyɩnlɩlazʋ yɩ nwʋ nɩ, mɩnla anwʋlazʋ yɛ ɔkɔhʋla ekenyia a?

¹⁹ Dwɩnɩndwɩnɩ anʋhʋba mɔɔ Nyamɩnlɩ va wɔlɩ Abilehamɩ nɩɩ mɔɔ ɩmanlɩ Nyamɩnlɩ leli yi dianlɩ numɔ na iwuli yi kɛɛ yɩ ɔhɔnwʋ nɩ nwʋ. Nɩ Abilehamɩ yɩ anyɩnlɩlazʋ yɩ ɩ́dɩ anyɩnlɩlazʋ mbʋanlɩ be. Bayɩbʋlʋ yɩ kã kɛɛ: “Abilehamɩ izili abʋtalɩ na inyianlɩ anʋhʋba nɩ mɔɔ Nyamɩnlɩ ɩwɔlɩ yɩ nɩ.” (Hib. 6:15; 11:​9, 18; Wul. 4:​20-22) Yɩ anyɩnlɩlazʋ yɩ ɩáma yɩ sa si azɩ kyɩ̃. Wʋzawʋ sʋ̃, sa ɔkʋla nyia anwʋlazʋ kɛɛ, sɛ ɔkɔ zʋ di nɔhʋanlɛ a, wʋ sa kɛhã wʋ anyɩnlɩlazʋ nwʋ akatuwa yɩ. Ɩsɛ kɛɛ ɛma wʋ anyɩ de iluwakɛɛ, ezi kɛɛ wʋ anyɩnlɩlazʋ yɩ kɛɣa numɔ, na ɩlɛ́ma wʋ sa kezi azɩ! (Wul. 12:12) Pɔɔlʋ hɛlɛlɩ kɛɛ: “Nyamɩnlɩ mɔɔ mɛyɩ yɛ ɩma enii inyia anyɩnlɩlazʋ nɩ, ɩmá anyɩnlɩlelɛ nɩɩ azʋ̃nudwolɩyɛ mʋnlʋmmɔ wɔ be dedi mɔɔ ɩwɔ yi nu nɩ ti, ama mʋnlʋmmɔ bɛaluwa sunzuma nwanzanwanza yi tumi nu, mʋnlʋmmɔ bɛanyia anyɩnlɩlazʋ ma ɩawʋlʋ ɔzʋlɔ.”—Wul. 15:13.