1-2. Sɛ nnwuakula bizia Nyamɩnlɩ nɩɩ Bayɩbʋlʋ nwʋ ndwokɔ a, kɛ ɩsɛ kɛɛ awʋvʋlɔ bɛyɛ bɛ dɩyɛ bese a?

 Mmenii sʋ̃maa de tiã numɔ kɛɛ, ɔwʋvʋlɔyɛlɛ dɩ egyima kezile paa. Sɛ ɛdɩ ɔwʋvʋlɔ mɔɔ ɛtɩdɩɩ kuakula a, yɛkamvʋ wʋ wɔ egyima ɛzɩzɩbɛ mɔɔ ɛyɛɛ kɛva kɔwʋwa wʋ ɣa yɩ ma ɩkɛhyɛ yi dedi nu ɛzɩzɩbɛ na ɩayɛ mɔɔ ɩsɔ Gyehova anyɩ nɩ nwʋ. (Dit. 6:​6, 7) Mmɩlɩ mɔ wʋ ɣa yɩ inyii nɩ, ebiye a ɩkɔwɔ yɩ tʋ kɛɛ ibiziaa ndwokɔ be kɛvalɩ ye dedi nwʋ, dɩkɛɛ sianti mɔɔ Gyehova kã kɛɛ áma yɛyɛ nninyeni be nɩ.

² Ebiye a ahyɛasɩ yɩ wʋ ɣa yɩ ndwokɔɣizialɛ yɩ kelile wʋ ɛgyɩkɩ̃ɩ̃. Na ebiye a ɩkɛma ekenyia adwɩnɩ kɛɛ yi dedi wɔ Nyamɩnlɩ nɩɩ Bayɩbʋlʋ yɩ nu ɩáyɛ sɩ. Naasʋ̃ mɔɔ ɩdɩ yɛ lɛ kɛɛ, sɛ nnwuakula benyii a ihyinyia kɛɛ bebizia ndwokɔ na bɛava bɛahyɛ be bedi nu ɛzɩzɩbɛ. (1 Kɔl. 13:11) Meti máma wu kunlu tu. Sɛ bebizia ndwokɔ a, sa ɔkʋla bu yi kɛɛ ɔnwʋmɔ ɔhʋanɩ mɔɔ ɛkɛva kɔwʋwa bɛ ma bɔkɔnwʋ kezimɔ bɛzabɛ bokozunzu nninyeni nwʋ bɔkɔhɔ aɣinzi na bɛava bɛahyɛ be dedi nu ɛzɩzɩbɛ.

3. Mɩnla yɛ yɛbazunzu nwʋmɔ wɔ dɩyɛzumanlɛ eyi nu a?

³ Wɔ dɩyɛzumanlɛ eyi nu nɩ, yekehila kezimɔ awʋvʋlɔ kɔhʋla kɔwʋwa bo nnwuakula ma (1) bɛkɛhyɛ dedi mɔɔ bɛlɛ yɩ wɔ Nyamɩnlɩ nɩɩ Bayɩbʋlʋ yɩ nu ɛzɩzɩbɛ, (2) bɔkɔnwʋ mfasʋ mɔɔ ɩwɔ zʋlɔ kɛɛ bɛkɛva Nyamɩnlɩ mmɛla mɔɔ ɩfalɩ baaba nɩɩ tanɩ nwʋ bɛkɛyɛ egyima, na (3) bɛanwʋ kezimɔ bɛkɛhã be dedi nwʋ odwokɔ bekehile mvʋlɔ. Akʋ̃ sʋ̃, yekehila sianti mɔɔ ɩdɩ baaba kɛɛ nnwuakula keɣizia ndwokɔ. Na yɛahila nninyeni be mɔɔ awʋvʋlɔ bɔkɔhʋla bɛ nɩɩ bo nnwuakula kɔwɔ numɔ kɛyɛ mɔɔ ɩkɛma bekenyia ɔhʋanɩ bɛkɛhã be dedi nwʋ odwokɔ bekehile bɛ.

 BƲWA WU ƔA MA ƖHYƐ DEDI MƆƆ ƖLƐ YƖ WƆ NYAMƖNLƖ NƖƖ BAYƖBƲLƲ YƖ NU ƐZƖZƖBƐ

4. Mɩnla ndwokɔ yɛ nnwuakula kɔhʋla keɣizia a, na mɩnla ti a?

⁴ Ɩsɛ kɛɛ Kilisinyiamaa awʋvʋlɔ tɩ yɩ tʋ kɛɛ, sɛ bede Nyamɩnlɩ bedi a mɛyɩ iáhile kɛɛ bo nnwuakula sʋ̃ kenyia Nyamɩnlɩ nu dedi. Bɛáfa Gyehova nu dedi bɔwʋ wʋ, na ɔzɔ la yɛ ɩdɩ wɔ wʋ ɣa yɩ sʋ̃ yɩ ɔfʋã nu a. Meti ebiye a wʋ ɣa yɩ kɔwɔ yɩ tʋ keɣizia ndwokɔ be dɩkɛɛ: ‘Kɛ ɩkɛyɛ na mɩanwʋ kɛɛ Nyamɩnlɩ wɔ kɛnɩ amba a? Asʋ̃ mʋkɔhʋla mikele mɔɔ Bayɩbʋlʋ kã nɩ mikeli a?’ Bayɩbʋlʋ yɩ hyɛ yɛ ɛzɩzɩbɛ kɛɛ ‘yɛvá yɛ adwɩnɩ yɛyɛ egyima’ na ‘yedwé nninyeni munwatĩĩ yehila.’ (Wul. 12:​1, NWT; 1 Tɛs. 5:21) Meti kɛ ɩkɛyɛ na wʋawʋwa wʋ ɣa ma ɩahyɛ yi dedi nu ɛzɩzɩbɛ a?

5. Mɩnla yɛ awʋvʋlɔ kɔhʋla kɛyɛ kɔwʋwa bo nnwuakula ma bekenyia Bayɩbʋlʋ yɩ nu dedi a? (Wulomimaa 12:2)

⁵ Bʋwa wʋ ɣa yɩ ma ɩbɩbɛ dasɩlɛ mɔɔ ikile kɛɛ mɔɔ Bayɩbʋlʋ kilehile nɩ dɩ nɔhʋanlɛ. (Kɩnga Wulomimaa 12:2.) Sɛ wʋ ɣa yɩ bizia ndwokɔ a, bʋwa yɩ ma ɩnwʋ kezimɔ ɩkɛbɩbɛ nwʋmɔ munwalɩyɛ wɔ nninyeni mɔɔ yɛfa yɛyɛ ɛbɩbɛlɛnu, dɩkɛɛ Watch Tower Publications Index nɩɩ Buuku Mɔɔ Gyehova Dasɩvʋlɔmaa Bɛfa Bɛyɛ Ɛbɩbɛlɛnu yɩ nu. Sa ɔkʋla sʋ̃ ɛhyɛ yɩ ɛzɩzɩbɛ ma ɩpɩbɛ ndwokɔ nɩɩ vidiyo azʋlɔtʋ wɔ jw.org zʋ mɔɔ ɩkɛma ɩkɔnwʋ dasɩlɛ mɔɔ ikile kɛɛ Bayɩbʋlʋ yɩ ɩ́dɩ buuku mɔɔ mmenii be hɛlɛlɩ kɛkɛ, mfomi ɩdɩ “Nyamɩnlɩ Odwokɔ.” (1 Tɛs. 2:13) Kɛ ndianwʋ nɩ, sa ɩkʋla ɩyɛ tɩɩtɩɩ Asiliyia twonwa Nɩnɩvɛ nwʋ ɛbɩbɛlɛnu. Mmɩlɩ be, nɩ nnimidimaa be kile kɛɛ twonwa bela íni kɛnɩ mɔɔ nɩ bɔfʋlɔ yɩ Nɩnɩvɛ. Naasʋ̃ wɔ kɛyɛ 1850 nɩ, mmenii be mɔɔ botudu azɩ hɔ nwʋnlɩ twonwa eyi mɔɔ ɩzɩkɛ nɩ mmɩlɩ mɔ botuduu azɩ nɩ, na eyi dɩ dasɩlɛ mɔɔ ikile kɛɛ Bayɩbʋlʋ nu odwokɔ dɩ nɔhʋanlɛ paa. (Zɛf. 2:​13-15) Sɛ ɩpɛ kɛɛ ɩnwʋ sʋ̃maa ɩfalɩ kezimɔ Nɩnɩvɛ twonwa yɩ ɩzɩkɛlɛ manlɩ Bayɩbʋlʋ nkɔmɩhyɛ ɣalɩ numɔ nɩ nwʋ a, sa ɩkʋla ikila odwokɔ mɔɔ ise “Asʋ̃ Ezi a?” wɔ November 2021 Ɔwɩɛnɩlɛ Aɣanɩ yɩ nu. Sɛ ɛhyɛ yɩ ɛzɩzɩbɛ ma ɩfa mɔɔ isuma wɔ yɛ awuuku azʋlɔtʋ yɩ nu nɩ itindiã mɔɔ izuma wɔ awuuku mvʋlɔ mɔɔ mmenii sʋ̃maa de tiã numɔ nɩ nwʋ a, ɩkɛhyɛ wʋ ɣa nɩ yi dedi ɛzɩzɩbɛ kɛɛ mɔɔ Bayɩbʋlʋ kã nɩ dɩ nɔhʋanlɛ.

6. Mɩnla ɔhʋanɩ zʋ yɛ awʋvʋlɔ kɔhʋla kɔwʋwa bo nnwuakula ma bɔkɔnwʋ kɛɛ mɔɔ Bayɩbʋlʋ kã nɩ dɩ nɔhʋanlɛ a? Ma nwʋmɔ ndianwʋ. (Kila mfonyini yi sʋ̃.)

⁶ Bʋwa wʋ ɣa yɩ ma ɩnwʋ kɛɛ mɔɔ Bayɩbʋlʋ kã nɩ dɩ nɔhʋanlɛ. Awʋvʋlɔ wɔ ɔhʋanɩ azʋlɔtʋ mɔɔ sa bɔkʋla boduwa zʋ bɛ nɩɩ bo nnwuakula bɔ Bayɩbʋlʋ nɩɩ dedi mɔɔ bekenyia wɔ Nyamɩnlɩ nu nɩ nwʋ nkɔmmɔ. Sɛ bɛ nɩɩ bo nnwuakula bɔ numɔ kɔ ɔwɔkɩ nninyeniziyelɛdɩka, dɩka mɔɔ fɩlawɛsɩ sʋ̃maa wɔ, nɩɩ Gyehova Dasɩvʋlɔmaa be egyimayɛlɛdɩka a, sa benyia ɔnwʋmɔ  ɔhʋanɩ bɛ nɩɩ bɛ bɔ be dedi nwʋ nkɔmmɔ. Kɛ ndianwʋ nɩ, sɛ bekehilahilaa ɔwɔkɩ nninyeniziyelɛdɩka, kɛ bɔkɔɔ dɩka kʋ̃ nɩ anzɛnyɩɩ bekilaa wɔ kɔmputa zʋ̃ nɩ, sɛ ɔnwʋ debe mɔɔ Bayɩbʋlʋ kã nwʋmɔ odwokɔ a, sa ɔkʋla ɛ nɩɩ yɩ bɔ nwʋmɔ nkɔmmɔ. Eyi kɔwʋwa wʋ ɣa yɩ ma ɩkɔnwʋ kɛɛ mɔɔ Bayɩbʋlʋ kã nɩ dɩ nɔhʋanlɛ. Ebiye a sa ɔkʋla ɛ nɩɩ wʋ ɣa yɩ bɔ Mowabɩ Bʋlɔ tafɩlaa yɩ nwʋ nkɔmmɔ. Gyehova yi dima wɔ bʋlɔ eyi mɔɔ ili alʋbɔ 3,000 yɩ zʋ. Mowabɩ Bʋlɔ tafɩlaa yɩ wɔ ɔwɔkɩ nninyeniziyelɛdɩka be wɔ France. Akʋ̃ sʋ̃, Mowabɩ Bʋlɔ tafɩlaa yɩ sasʋ wɔ Gyehova Dasɩvʋlɔmaa Be Egyimayɛlɛdɩka Ti. Ɔkɔnwʋ yɩ wɔ be nninyeniziyelɛdɩka yɩ ɔfʋã mɔɔ bɔfʋlɔ yɩ “Bayɩbʋlʋ Yɩ Nɩɩ Nyamɩnlɩ Yi Dima” wɔ Warwick, New York. Ɔkɔnwʋ yɩ wɔ Mowabɩ Bʋlɔ tafɩlaa yɩ zʋ kɛɛ Mowabɩ Bulombunli Mesha dwodwuli diyialɩ Yizilaya. Eyi nɩɩ mɔɔ Bayɩbʋlʋ kã nɩ yiyia. (2 Aw. 3:​4, 5) Sɛ wʋ ɣa yɩ yɩzayɩ ɩfa yɩ anyɩ ɩnwʋ dasɩlɛ mɔɔ ikile kɛɛ mɔɔ Bayɩbʋlʋ kã nɩ dɩ nɔhʋanlɛ a, ɩkɛma yi dedi nu kɛyɛ sɩ.—Fa tindiã 2 Mmɩlɩzʋdwokɔ 9:6 nwʋ.

7-8. (a) Kezimɔ bɛhyɩhyɛ abɔdɩ nu nninyeni be wɔ ɔhʋanɩ kɩnlɩma zʋ nɩ, mɩnla yɛ yɛkɔhʋla kozuma wɔ nu a? Ma nwʋmɔ ndianwʋ. (Kila mfonyini yi sʋ̃.) (b) Mɩnla ndwokɔɣizialɛ yɛ ɩkɔhʋla kɔwʋwa wʋ ɣa yɩ ma ɩkɛhyɛ yi dedi nu ɛzɩzɩbɛ wɔ Dɩyɛwɔlɛvʋlɔ yɩ nu a?

⁷ Bʋwa wʋ ɣa yɩ ma ɩdwɩnɩndwɩnɩ abɔdɩ nwʋ. Sɛ boluwa ɔwʋlɔtʋ ɔhʋanɩ anzɛnyɩɩ bɛyɛɛ egyima wɔ bɛ gaadɩnɩ nu a, bʋwa wʋ ɣa yɩ ma ɩnwʋ kezimɔ bɛhyɩhyɛ abɔdɩ azʋlɔtʋ be wɔ ɔhʋanɩ kɩnlɩma zʋ nɩ. Ɩkɛma wʋ ɣa yɩ kɔnwʋ kɛɛ dɩyɛwɔlɛvʋlɔ be mɔɔ izi nɣɛlɛbɛ yɛ ɩwɔlɩ a. Kɛ ndianwʋ nɩ, sɛ ekila abɔdɩ azʋlɔtʋ be dɩkɛɛ ahɔnlɔnwa okuwu, oyuwe, ngyasʋwa nɩɩ fɩlawɛsɩ azʋlɔtʋ be a, ɔkɔnwʋ kɛɛ kezimɔ bɛhyɩhyɛ bɛ nɩ ɩyɛɛ kɛyɛ kʋ̃. a Sayɩnsɩmaa va alʋbɔ sʋ̃maa zuma kezimɔ bɛhyɩhyɛ abɔdɩ azʋlɔtʋ wɔ ɔzɔ ɔhʋanɩ yɩ zʋ nɩ nwʋ dɩyɛ.

⁸ Mmɩlɩ mɔ wʋ ɣa yɩ isumaa sayɩnsɩ nwʋ dɩyɛ sʋ̃maa wɔ sukuulu nɩ, ɩkɛɣa kɔnwʋ kɛɛ kezimɔ bɛhyɩhyɛ abɔdɩ azʋlɔtʋ be nɩ da yɩ ali kɛɛ bedidi mmɛla pɔkyɩɩ be zʋ. Sɛ yɛfa nnuno kɛɛ ndianwʋ a, bo nu sʋ̃maa wɔ ɔhʋanɩ pɔkyɩɩ mɔɔ boduwa zʋ benyi. Sɛ benyii a bopuko mmɛdanɩ, na ɔzɔ mmɛdanɩ yɩ sʋ̃ puko mmɛdanɩ mvʋlɔ, na mɛyɩ sʋ̃ puko mmɛdanɩ ngyɩkɩ̃ɩ̃ ngyɩkɩ̃ɩ̃ mvʋlɔ sʋ̃maa. Eyi yɛ bɔfʋlɔ yɩ fractal yɩ a. Yɛnwʋ eyi wɔ abɔdɩ mvʋlɔ nu sʋ̃. Naasʋ̃ aninyia yɛ ɩyɛlɩ ɔzɔ nhyɩhyɛlɩyɛ kɩnlɩma yɩ a? Sɛ wʋ ɣa yɩ kɔ zʋlɔ dwɩnɩndwɩnɩ odwokɔɣizialɛ mɔɔ ɩdɩ zɔ nwʋ a, ebiye a ɩkɛma ikenyia dedi kezile kɛɛ Nyamɩnlɩ yɛ ɩwɔlɩ nninyeni munwatĩĩ a. (Hib. 3:4) Ebiye a sa ɔkʋla bizia yɩ kɛɛ, “Sɛ Nyamɩnlɩ yɛ ɩwɔlɩ yɛ dɩyɛ a, asʋ̃ wʋále di kɛɛ izi kezimɔ sɛ yɛbɔ yɛ ɛbɩla a ɩkɛma yɛ anyɩ kele a?” Akʋ̃ sa ɔkʋla ɔbʋwa yɩ ma ɩnwʋ kɛɛ Bayɩbʋlʋ yɩ kã nninyeni mɔɔ yɛyɛ a ɩkɛma yɛ anyɩ kele nɩ nwʋ odwokɔ.

 BƲWA WƲ ƔA YƖ MA ƖNWƲ MFASƲ MƆƆ ƖWƆ ZƲLƆ KƐƐ ƖKƐVA NYAMƖNLƖ MMƐLA MƆƆ ƖFALƖ BAABA NƖƖ TANƖ NWƲ NƖ ƖKƐYƐ EGYIMA

9. Mɩnla ti mɔɔ ebiye a kuakula be keɣizia sianti mɔɔ Bayɩbʋlʋ kã kɛɛ debe dɩ tanɩ nɩ nwʋ odwokɔ a?

⁹ Sɛ wʋ ɣa bizia sianti mɔɔ Bayɩbʋlʋ kã kɛɛ debe dɩ tanɩ nwʋ odwokɔ a, bɔ mmɔdɩnɩ kɛɛ ɔkɔnwʋ sianti ankasa ti mɔɔ ibiziaa ɔzɔ odwokɔ yɩ nɩ. Asʋ̃ ɩ nɩɩ Bayɩbʋlʋ yɩ ɩáyɛ adwɩnɩ a, anzɛnyɩɩ ɩánwʋ kezimɔ ikehilehile yi dedi nu kehile mmenii mvʋlɔ? Mɔɔ ɩdɩ bela nɩ, sa ɔkʋla duwa Sa Ɔkʋla Enyia Anyɩnlɩlelɛ Daabaa! buuku yɩ zʋ bʋwa yɩ ma ɩnwʋ mfasʋ mɔɔ ɩwɔ zʋlɔ kɛɛ yɛkɛva Gyehova yɩ mmɛla yɛkɛyɛ egyima. b

10. Kɛ ɩkɛyɛ na wʋawʋwa wʋ ɣa yɩ ma iazunzu kezimɔ ɩkɛva Gyehova ɔhɔnwʋ nɩ nwʋ a?

¹⁰ Bʋwa wʋ ɣa yɩ ma ɩva Gyehova ɔhɔnwʋ. Sɛ ɛ nɩɩ wʋ ɣa yɩ bosumaa Bayɩbʋlʋ yɩ a, duwa Sa Ɔkʋla Enyia Anyɩnlɩlelɛ Daabaa! buuku yɩ nu ndwokɔɣizialɛ nɩɩ ndianwʋ azʋlɔtʋ yɩ zʋ fa nwʋ kezimɔ ɩtɩ nɣanlɩ wɔ nninyeni be nwʋ. (Ɛɣɛ. 20:5) Kɛ ndianwʋ nɩ, ozumalɛdɩyɛ 8 yɩ fa Gyehova tindiã ɔhɔnwʋ be mɔɔ ɩdɔ yɛ mɔɔ ɩfa fʋlɔdulɛ mɔɔ ɩkɔwɔ yɛ nwʋ banɩ ɩma yɛ na ɩawʋwa yɛ nɩ nwʋ. Sɛ bosunzu 1 Dwɔɔnʋ 5:3 nwʋ bowie yɩ a, sa ɔkʋla ebizia yɩ kɛɛ, “Kakɩ mɔɔ yɛnwʋ kɛɛ Gyehova dɩ yɛ Ɔhɔnwʋ baaba nɩ, kɛ ɩsɛ kɛɛ yɛyɛ yɛ dɩyɛ wɔ mɔɔ ɩkã ikile yɛ nɩ nwʋ yese a?” Ebiye a ekeze kɛɛ, eyi dɩ odwokɔɣizialɛ be mɔɔ ɩáyɛ sɩ, naasʋ̃ ɩkɔwʋwa wʋ ɣa yɩ ma ɩkɛdɩ yɩ tʋ kɛɛ Gyehova dɔ yɛ ti mɔɔ ɩhyɩhyɛlɩ mmɛla eyimmɔ a.—Ayɩ. 48:​17, 18.

11. Kɛ ɩkɛyɛ na wʋawʋwa wʋ ɣa yɩ ma ɩanwʋ mfasʋ mɔɔ ɩwɔ Bayɩbʋlʋ nu egyinalɛzʋ-ndwokɔ zʋ a? (Ɛɣɛlɛwulɛ 2:​10, 11)

¹¹ Ɛ nɩɩ yɩ zunzu mfasʋ mɔɔ ɩwɔ zʋlɔ kɛɛ yɛkɛva Bayɩbʋlʋ nu egyinalɛzʋ-ndwokɔ yɛkɛyɛ egyima nɩ nwʋ. Sɛ bɔbɔ nu bɛkɩnga Bayɩbʋlʋ anzɛnyɩɩ awulohyɩnlɩyɛ odwokɔ yɩ a, bozunzú kezimɔ Bayɩbʋlʋ nu egyinalɛzʋ-ndwokɔ mɔɔ bɛfa bɛyɛ egyima nɩ wʋwa bɛ abusunwa yɩ nɩ nwʋ. Kɛ ndianwʋ nɩ, sa ɔkʋla fa ɔzɔ mmɩlɩ yɩ bʋwa wʋ ɣa yɩ ma ɩnwʋ kɛɛ sɛ yɛyɛ egyima ɛzɩzɩbɛ na yedi nɔhʋanlɛ a, ɩbʋwa yɛzayɛ. (Hib. 13:18) Sa ɔkʋla sʋ̃ ekilehile numɔ kile yi kɛɛ, sɛ yɛfa Bayɩbʋlʋ nu fʋlɔdulɛ yɛyɛ egyima a, ɩma yenyia pɔkɔdɩlɛ baaba na yɛ anyɩ de. (Ɛɣɛ. 14:​29, 30) Sɛ ɔbʋwa wʋ ɣa yɩ ma ɩnwʋ kɛɛ mfasʋ wɔ zʋlɔ kɛɛ yɛkɛva Bayɩbʋlʋ nu egyinalɛzʋ-ndwokɔ yɛkɛyɛ egyima a, ɩkɛma yɩzayɩ sʋ̃ yɩ anyɩ keleli nwʋmɔ baaba kɛɛ ɩkɛva kɛyɛ egyima.—Kɩnga Ɛɣɛlɛwulɛ 2:​10, 11.

12. Mɩnla ɔhʋanɩ zʋ yɛ ɛzɩlɛ be bʋwa yɩ ɣa benyia ma ɩnwʋ kɛɛ mfasʋ wɔ zʋlɔ kɛɛ ɩkɛva Bayɩbʋlʋ nu fʋlɔdulɛ ɩkɛyɛ egyima a?

¹² Ɛzɩlɛ be mɔɔ ɩwɔ France mɔɔ bɔfʋlɔ yɩ Steve nɩ hanlɩ kezimɔ ɩ nɩɩ yɩ yɩ bʋwa bɛ ɣa benyia be mɔɔ bɔfʋlɔ yɩ Ethan ma ɩnwʋ kɛɛ, Gyehova hyɩhyɛ mmɛla ma yɛ iluwakɛɛ ɩdɔ yɛ. Ɩhanlɩ kɛɛ: “Yebizia ndwokɔ be dɩkɛɛ, ‘Mɩnla ti mɔɔ Gyehova pɛ kɛɛ yɛfa fʋlɔdulɛ eyi yɛyɛ egyima a? Mɩnla ɔhʋanɩ zʋ yɛ eyi da yɩ ali kɛɛ ɩdɔ yɛ a? Sɛ wʋáfa fʋlɔdulɛ eyi yɛ egyima a, mɩnla yɛ ikezi a?’” Nkɔmmɔwɔlɛ mɔɔ ɩdɩ zɔ wʋwa Ethan ma inyia dedi kezile kɛɛ, mɔɔ Gyehova kɛhã nɩ yɛ ɩdɩ baaba a. Steve va zɔlɩ zʋlɔ kɛɛ: “Yɛ bʋtayɩ yɛ lɛ kɛɛ yɛkɔwʋwa Ethan ma ɩkɔnwʋ kɛɛ fʋlɔdulɛ mɔɔ ɩwɔ Bayɩbʋlʋ yɩ nu nɩ, ɩtɛla enii yɩ nɣɛlɛbɛ kʋlaa.”

13. Mɩnla ɔhʋanɩ zʋ yɛ awʋvʋlɔ kɔhʋla kɔwʋwa bo nnwuakula ma bɛkɛva Bayɩbʋlʋ nu egyinalɛzʋ-ndwokɔ bɛkɛyɛ egyima a? Ma nwʋmɔ ndianwʋ.

¹³ Bʋwa wʋ ɣa yɩ ma ɩvá Bayɩbʋlʋ nu egyinalɛzʋ-ndwokɔ ɩyɛ egyima. Kɛ ndianwʋ nɩ, ebiye a bɛkɛva egyimalilɛ be bɛkɛma wʋ ɣa yɩ kɛɛ ɩhɔ́ ɩɣɩnga buuku be wɔ sukuulu. Ebiye a mmenii mɔɔ buuku yi kã bɔ nwʋ odwokɔ nɩ yɛ nninyeni be mɔɔ Gyehova hã kɛɛ ɩdɩbɛ, dɩkɛɛ nna nu ɛbɩlazɩkɛlɛ nɩɩ basabasayɛlɛ. Na bɛhɛlɛ buuku yi wɔ ɔhʋanɩ be zʋ mɔɔ ɩma ɩba ɩyɛ kɛɛ mfʋmɩ íni ɔzɔ nyɛlɩyɛ yɩ nwʋ. Sa ɔkʋla hyɛ wʋ ɣa yɩ  ɛzɩzɩbɛ ma isunzu kezimɔ Gyehova tɩ nɣanlɩ wɔ nyɛlɩyɛ mɔɔ ɩdɩdɩ zɔ nwʋ. (Ɛɣɛ. 22:​24, 25; 1 Kɔl. 15:33; Fɩl. 4:8) Eyi kɔhʋla kɔwʋwa yɩ ma ikeli yi tikyia nɩɩ yi sukuulumaa yɩ dasɩlɛ mmɩlɩ mɔ bosunzuu buuku yɩ nwʋ nɩ.

BƲWA WƲ ƔA MA ƖNWƲ KEZIMƆ ƖKƐHÃ YI DEDI NWƲ ODWOKƆ

14. Mɩnla odwokɔ yɛ ɩkɔhʋla kɛyɛ sɩ kɛma Kilisinyianii kuakula be kɛɛ ɩ nɩɩ mmenii mvʋlɔ kɔwɔ nwʋmɔ nkɔmmɔ a, na mɩnla ti a?

¹⁴ Kilisinyiamaa nnwuakula be wɔ kɛnɩ a, ɩyɛ a bo kunlu tu kɛɛ bɛkɛhã be dedi nwʋ odwokɔ bekehile mmenii mvʋlɔ. Kɛ ndianwʋ nɩ, sɛ bosumaa dɩyɛ na ɛlanɩlanɩlɛ nwʋ ndwokɔ findeli nu a, ɩyɛ a bo kunlu tu kɛɛ bɛkɛhã kɛɛ bɛále ɔzɔ ehilehilelɛ nɩ bedi. Mɩnla ti a? Ebiye a bɛ tikyiamaa yɩ kɛhã kɛɛ ɛlanɩlanɩlɛ dɩ nɔhʋanlɛ paa. Mɩnla yɛ ɩkɔhʋla kɔwʋwa wʋ ɣa yɩ ma ikenyia anwʋlazʋ kezile wɔ mɔɔ ide idi nɩ nu a?

15. Mɩnla yɛ ɩkɔhʋla kɔwʋwa Kilisinyianii kuakula be ma ikenyia anwʋlazʋ kezile wɔ mɔɔ ide idi nɩ nu a?

¹⁵ Bʋwa wʋ ɣa yɩ ma inyia anwʋlazʋ kezile wɔ mɔɔ ide idi nɩ nu. Íni kɛɛ wʋ ɣa yɩ yɩ anyɩ tʋ̃ kɛɛ mmenii kɔnwʋ kɛɛ ide Dɩyɛwɔlɛvʋlɔ be idi. (2 Tim. 1:8) Mɩnla ti a? Mɔɔ ɩdɩ yɛ lɛ kɛɛ, sayɩnsɩmaa sʋ̃maa po bede bedi kɛɛ nninyeni mɔɔ nnwʋanlɩ wɔ numɔ nɩ bɛába mbʋanlɩ. Bɔnwʋ dasɩlɛ mɔɔ ikile kɛɛ abiye mɔɔ izi nɣɛlɛbɛ yɛ ɩwɔlɩ nninyeni mɔɔ nnwʋanlɩ wɔ nu mɔɔ ɩyɛ nnwʋánlɩ nɩ a. Eyi ti bɛále ɛlanɩlanɩlɛ ehilehilelɛ mɔɔ bekilehile wɔ sukuulu sʋ̃maa nu wɔ oyuwadɩ munwala nɩ betiã nu. Dɩyɛ ɔkʋ̃ mɔɔ ɩkɔwʋwa wʋ ɣa yɩ ma ikenyia dedi nɩɩ anwʋlazʋ kezile yɛ lɛ kɛɛ, ɩkɔnwʋ mɔɔ ɩwʋwalɩ mmeliyema mmenyia nɩɩ mmaalɛ be ma beleli belili kɛɛ abiye yɛ ɩwɔlɩ nnwʋanlɩ a. c

16. Kɛ ɩkɛyɛ na awʋvʋlɔ bɛawʋwa bo nnwuakula ma bɛahʋla bɛahilehile sianti mɔɔ bede Dɩyɛwɔlɛvʋlɔ be bedi nɩ nu a? (1 Pita 3:15) (Kila mfonyini yi sʋ̃.)

¹⁶ Bʋwa wʋ ɣa yɩ ma ɩhʋla ihilehile sianti mɔɔ ide Dɩyɛwɔlɛvʋlɔ be idi nɩ nu ihilé mmenii mvʋlɔ. (Kɩnga 1 Pita 3:15.) Sɛ ɛ nɩɩ yɩ sunzu ndwokɔ mɔɔ ɩfalɩ dɩyɛwɔlɛ nwʋ a ɩkɔwʋwa yɩ paa. Kɛ ndianwʋ nɩ, sɛ ɛpɩbɛ “dɩyɛwɔlɛ” nɩɩ “ɛlanɩlanɩlɛ” wɔ jw.org zʋ a, ekenyia ndwokɔ nɩɩ vidiyo azʋlɔtʋ mɔɔ sa bɔkʋla bo sunzu nwʋmɔ. Akʋ̃ ma wʋ ɣa yɩ ɩyɩ́ numɔ ɔkʋ̃ mɔɔ ɩtɩ nɣanlɩ kɛɛ ɩyɛ mɛlɛkɛ kɛɛ ɩkɛva kehilehile yi odwokɔ nu ma mmenii kɛdɩ yɩ tʋ kɛɛ, Dɩyɛwɔlɛvʋlɔ be wɔ kɛ. Bʋwa yɩ ma ɩnwʋ kɛɛ, íni kɛɛ ɩ nɩɩ yi sukuulumaa yɩ sũ pɩla. Hyɛ yɩ ɛzɩzɩbɛ kɛɛ sɛ abiye ma ɔnwʋmɔ ɔhʋanɩ kɛɛ ɩ nɩɩ yɩ wɔ nkɔmmɔ a, ɩvá  ndwokɔ mɔɔ yɩ tʋdɩlɛ ɩáyɛ sɩ ilí egyima. Kɛ ndianwʋ nɩ, ebiye a sukuulunii be kɛhã kɛɛ: “Mamɩ mɛyɩ mɔɔ mɩ anyɩ nwʋ yɩ nɩ yɛ mide midi a, na Nyamɩnlɩ sʋ̃ mɛyɩ mʋlɔ́nwʋnlɩ yɩ kyɩ̃.” Kilisinyianii kuakula kɔhʋla kɛhã kɛɛ: “Fa yɩ kɛɛ oluwa pɔkɔ be mɔɔ mmenii bɛáhɔ kɛnɩ nu, yɛɛ ɔhɔ vindenli bula be mɔɔ nzulo wɔ numɔ zʋ a. Mɩnla yɛ ɛkɛhã a? Ebiye a ɛkɛhã kɛɛ abiye yɛ ɩɣa iduli a. Ɔzɔ la sʋ̃ yɛ amansɔnɩ eyi nɩɩ nninyeni mɔɔ nnwʋanlɩ wɔ numɔ nɩ di dasɩlɛ kɛɛ Dɩyɛwɔlɛvʋlɔ be wɔ kɛnɩ a!”

17. Kɛ ɩkɛyɛ na awʋvʋlɔ bɛawʋwa bo nnwuakula ma bɛabɩbɛ ɔnwʋmɔ ɔhʋanɩ mɔɔ bɛkɛva kɛhã Bayɩbʋlʋ nu odwokɔ kehile mmenii mvʋlɔ a? Ma nwʋmɔ ndianwʋ.

¹⁷ Bʋwa wʋ ɣa yɩ ma ɩbɩbɛ ɔnwʋmɔ ɔhʋanɩ mɔɔ ɩkɛva kɛhã Bayɩbʋlʋ nu odwokɔ kehile mmenii mvʋlɔ. (Wul. 10:10) Sa ɔkʋla fa mmɔdɩnɩ mɔɔ ɩkɔwɔ kɛɛ ɩkɛhã yi dedi nwʋ odwokɔ nɩ tindiã kuakula ɛgyɩkɩ̃ɩ̃ mɔɔ isumaa kezimɔ betiyia nwʋ. Kuakula nɩ di bɔmʋnlɩ suma kezimɔ ikodwodwu kegyina, na mɛyɩ mɛda nɩ ɩbɔ mmɔdɩnɩ kɛɛ ikodudu yi agyia nkʋ̃kʋ̃ nkʋ̃kʋ̃. Ɔzɔ la sʋ̃ yɛ Kilisinyianii kuakula be kɔhʋla koluwa ɔhʋanɩ mɔɔ ɩáyɛ sɩ zʋ kɛhã yi dedi nwʋ odwokɔ kehile mmenii mvʋlɔ a. Kɛ ndianwʋ nɩ, sa ɩkʋla ibizia yi sukuulunii be kɛɛ: “Ezi kɛɛ sayɩnsɩmaa bɛta bekila abɔdɩ zʋ bɛfa bɛhyɩhyɛ mahyini azʋlɔtʋ a? Ma mɩva vidiyo kɩnlɩma be mihile wʋ.” Sɛ ɩfa Asʋ̃ Bɔwɔlɩ a? vidiyo yi be ikile yi iwie a, sa ɩkʋla ɩkã kɛɛ: “Sɛ bɛkamvʋ sayɩnsɩmaa wɔ mahyini be mɔɔ behilalɩ abɔdɩ zʋ bɛhyɩhyɛlɩ nɩ wʋ a, asʋ̃ ekila a aninyia yɛ ɩsɛ kɛɛ yɛfa ɔzɔ abɔdɩ nɩ nwʋ animinyiamɩ yɛma yɩ a?” Ebiye a eyi kɛma sukuulunii nɩ kɛbɛ kɛɛ ikozuma sʋ̃maa kɛvalɩ Gyehova nwʋ.

KƆ ZƲLƆ BƲWA WƲ ƔA YƖ MA ƖHYƐ YI DEDI NU ƐZƖZƖBƐ

18. Kɛ ɩkɛyɛ na awʋvʋlɔ bɛahɔ zʋ bɛawʋwa bo nnwuakula ma bɛahyɛ be dedi wɔ Nyamɩnlɩ nu nɩ ɛzɩzɩbɛ a?

¹⁸ Yɛda oyuwadɩ be mɔɔ mmenii mɔɔ bɛále Gyehova bedi hyɛ numɔ manlɩ nu. (2 Pit. 3:3) Meti awʋvʋlɔ, sɛ bɛ nɩɩ bo nnwuakula bosumaa Bayɩbʋlʋ yɩ a, bɔwʋwá bɛ ma bozuma nninyeni mɔɔ ɩkɛma annidi mɔɔ bɔwɔ bɛma Nyamɩnlɩ Odwokɔ nɩɩ yɩ mmɛla nɩ kɛyɛ kezi. Bʋwa yɩ ma izunzú nninyeni nwʋ ɩhɔ aɣinzi na ɩhyɛ dedi mɔɔ ɩwɔ wɔ Gyehova nu nɩ ɛzɩzɩbɛ iluwa Gyehova yɩ abɔdɩ mɔɔ ɛ nɩɩ yɩ kɔwɔ nwʋmɔ nkɔmmɔ nɩ. Bʋwa yɩ ma ɩdɩ́ Bayɩbʋlʋ nkɔmɩhyɛ azʋlɔtʋ mɔɔ ɩɣa numɔ daada nɩ tʋ. Na mɔɔ ihyinyia paa nɩ, ɛ nɩɩ yɩ wɔ numɔ bɔwɔ mpayɩ na bɔ ebiye sʋ̃ ma yɩ. Sɛ ɛyɛ zɔ a, Gyehova keyila mmɔdɩnɩ mɔɔ ɔbɔɔ kɛɛ ɔkɔwʋwa wʋ ɣa yɩ ma ɩkɛhyɛ yi dedi nu ɛzɩzɩbɛ nɩ zʋ.—2 Mm. 15:7.