1. Mɩnla ɔhʋanɩ zʋ yɛ nɩ pʋanʋ nwʋ hyinyia wɔ Bayɩbʋlʋ mmɩlɩ nu a?

 NƖ PƲANƲ dɩ alɩyɛ titili mɔɔ nɩ bedi wɔ Bayɩbʋlʋ mmɩlɩ nu. (Gyn. 14:18; Lk. 4:4) Nɩ nwʋmɔ hyinyia nkʋ̃ʋ̃ ma ɩyɛ po a, Bayɩbʋlʋ yɩ fa “pʋanʋ” kyina kɛnɩ ma alɩyɛ. (Gyn. 18:6) Akʋ̃ sʋ̃, Gyisɛsɩ yɩ nnwʋánlɩ nninyeni anwɩ̃ be mɔɔ yezi yi bʋwɔ nu nɩ, pʋanʋ yɛ ɩva ɩyɛlɩ a. (Mt. 16:​9, 10) Nnwʋánlɩ nninyeni eyi numɔ ɔkʋ̃ wɔ Dwɔɔnʋ yi ti 6. Mmɩlɩ mɔ yesunzuu odwokɔ eyi nwʋ nɩ, sa yekila mɔɔ yɛkɔhʋla kozuma wɔ nu na yɛava yɛayɛ egyima nnɛ.

2. Mɩnla mmɩlɩ yɛ nɩ mmenii abʋmɩ abʋmɩ sʋ̃maa be hyinyia alɩyɛ a?

² Mmɩlɩ be mɔ Gyisɛsɩ nɩɩ yɩ asʋ̃mavʋlɔ yɩ yɛlɩ odwokɔbahanlɛ egyima be wieli nɩ, ɩ nɩɩ bɛ vʋlɩ ɛlɛnɩ dualɩ Galili Ngyemvile yi na bɛahʋla bɛahɔ bɛale bɔ mmʋnlɩ. (Mk. 6:​7, 30-32; Lk. 9:10) Bɔhɔlɩ dɩka be mɔɔ nɩ ɩdɩ yɩ nwʋ wɔ Bɛtɛsayɩda apaa yi nu kɛnɩ. Ɩákyɛ yɛ mmenii abʋmɩ abʋmɩ sʋ̃maa ɣalɩ kɛnɩ a, na bodualɩ bɔ nwʋ beyiyialɩ. Gyisɛsɩ iábu yɩ anyɩ ikua bɔ zʋ. Inyianlɩ mmɩlɩ ɩmanlɩ bɛ ihilehileli Bulombunlililɛ yɩ nwʋ nninyeni sʋ̃maa bɛ, na ɩzalɩ anlamvʋlɔ mɔɔ bɔwɔ bo nu nɩ adimakɛlɛ. Mmɩlɩ mɔ awulo yɛlɩ kɛɛ itwoo nɩ, nɩ adʋwavʋlɔ yɩ bɔdwɩnɩɩ mɔɔ ɩkɛyɛ na mmenii sʋ̃maa eyimmɔ munwala bɛanyia debe bɛali nɩ nwʋ. Nɩ bo nu be wɔ alɩyɛ ɛgyɩkɩ̃ɩ̃ wɔ bɔ nwʋ, naasʋ̃ nɩ ikehyinyia kɛɛ bo nu sʋ̃maa bɔkɔ bɔtɔ alɩyɛ wɔ nzuwalɩyɛ yɩ bedi. (Mt. 14:15; Dwɔ. 6:​4, 5) Mɩnla yɛ nɩ Gyisɛsɩ kɛyɛ a?

GYISƐSƖ LUWALƖ NNWƲÁNLƖ ƆHƲANƖ ZƲ MANLƖ PƲANƲ BƐ

3. Mɩnla yɛ Gyisɛsɩ hanlɩ hileli yɩ asʋ̃mavʋlɔ yɩ kɛɛ bɛyɛ́ bɛma ɔlɔmɩ yɩ a? (Kila mfonyini yi sʋ̃.)

³ Gyisɛsɩ hanlɩ hileli yɩ asʋ̃mavʋlɔ yɩ kɛɛ: “Iáhyinyia kɛɛ bɔkɔhɔ. Mʋnlʋmmɔzabɛ bɛmá dɩyɛ be bɛ ma beli.” (Mt. 14:16) Nɩ eyi kɛyɛ sɩ iluwakɛɛ nɩɩ mmenyia kɛyɛ 5,000 yɛ bɔwɔ kɛ a. Na yɛfa mmaalɛ nɩɩ nnwuakula po yɛkɩnla nwʋmɔ a, ɩkɛyɛ kɛɛ nɩ  ɩsɛ kɛɛ bɛma mmenii kɛyɛ 15,000 alɩyɛ. (Mt. 14:21) Andulusu hanlɩ kɛɛ: “Kuakula benyia ɔkʋ̃ ɩwɔ ɛkɩ mɔɔ ɩlɛ abele anzɛnyɩɩ baale pʋanʋ anwunhuma anlu nɩɩ egyeni ngyɩkɩ̃ɩ̃ ngyɩkɩ̃ɩ̃ anwɩ̃. Naasʋ̃ eyi ilótwu ɔlɔmɩ eyimmɔ bo munwatĩĩ bɛ dɩka bela.” (Dwɔ. 6:9) Nɩ mmenii sʋ̃maa ta di pʋanʋ mɔɔ bɛva baale bɛyɛ, na egyeni mmalɛ yɩ sʋ̃ ɩkɛyɛ kɛɛ nɩ bowula egyilamɩ yɩ ma ɩwʋlʋ. Naasʋ̃ nɩ alɩyɛ mɔɔ ɩwɔ kuakula nɩ yɩ sa nu nɩ ɩlɔ́sʋ̃ mmenii sʋ̃maa sʋ̃maa eyimmɔ!

4. Mɩnla yɛ yɛkɔhʋla kozuma wɔ Dwɔɔnʋ 6:​11-13 yɩ nu a? (Kila mfonyini yi sʋ̃.)

⁴ Nɩ Gyisɛsɩ pɛ kɛɛ ɩda kunlumiba ali ikile ɔlɔmɩ yɩ nɩ, meti ɩhanlɩ kɛɛ bɔwʋwá azɩ okuwu okuwu wɔ ndibe yɩ zʋ. (Mk. 6:​39, 40; kɩnga Dwɔɔnʋ 6:​11-13.) Akʋ̃ Gyisɛsɩ lalɩ yɩ Zɩ asɩ wɔ pʋanʋ nɩɩ egyeni yi nwʋ. Ɩfata paa kɛɛ ɩlalɩ Nyamɩnlɩ asɩ, iluwakɛɛ mɛyɩ yɛ ɩmanlɩ bɛ sa hanlɩ alɩyɛ yɩ a. Eyi ma yɛnwʋ kɛɛ ɩávalɩ nwʋmɔ dɩka bela mɔɔ yɛwɔ nɩ, nwʋmɔ hyinyia paa kɛɛ yesumazuma Gyisɛsɩ na yɛbɔ mpayɩ ansaana yɛali alɩyɛ. Akʋ̃ Gyisɛsɩ manlɩ bɛhyɛlɩ alɩyɛ yɩ, na mmenii yi lili ma be mi hyɩnlɩ. Ebiye po halɩ, mɔɔ nɩ Gyisɛsɩ ɩábɛ kɛɛ ɩkɛzɩkɛ. Meti ɩmanlɩ bohunwahunwanlɩ mɔɔ ɩhalɩ nɩ munwa na ebiye a aɣinzi yi bɛali. Gyisɛsɩ valɩ nninyeni mɔɔ ɩwɔ nɩ lili egyima wɔ nɣɛlɛbɛ nu. Eyi dɩ ndianwʋba mɔɔ sa yɛkʋla yesumazuma. Sɛ ɛdɩ ɔwʋvʋlɔ a, sa ɔkʋla ɛ nɩɩ wu nnwuakula sunzu odwokɔ eyi nwʋ na bɛanwʋ kɛɛ ihyinyia kɛɛ bɔbɔ mpayɩ ansaana bɛali alɩyɛ, bɛda kunlumiba ali na bɛ nɩɩ mmenii mvʋlɔ kyɛ mɔɔ bɔwɔ kɛmɔ Gyisɛsɩ yɛlɩ nɩ.

5. Mɔɔ Gyisɛsɩ yɛlɩ wɔ ɔzɔ eɣile yi nɩ, mɩnla yɛ mmenii nɩ yɛlɩ wɔ nwʋ a, na kɛ Gyisɛsɩ sʋ̃ yɛlɩ yɩ dɩyɛ zeli a?

⁵ Kezimɔ Gyisɛsɩ hilehileli nɩɩ nnwʋánlɩ nninyeni mɔɔ ɩyɛlɩ nɩ yɛlɩ ɔlɔmɩ yɩ nɩ asibɔnwʋ. Nɩ  bezi kɛɛ Mosisi hã diã kɛnɩ kɛɛ Nyamɩnlɩ kɛma nkɔmɩhyɛnii sʋnʋnkʋ̃ be kɛɣa. Meti ebiye a beɣizialɩ bɔ nwʋ kɛɛ, ‘Asʋ̃ Gyisɛsɩ yɛ lɛ ɔzɔ enii nɩ a?’ (Dit. 18:​15-18) Sɛ ɔzɔ a, mɛyɩ nɩ ɩkɛyɛ kɛɛ benyianlɩ adwɩnɩ kɛɛ Gyisɛsɩ kɛyɛ bulombunli baaba paa, na ɩkɔhʋla kɛma manlɩ yɩ munwala kenyia alɩyɛ keli. Eyi ti, nɩ ɔlɔmɩ yɩ nɩ “bɛpɛ kɛɛ bɛkyɩ [Gyisɛsɩ] wɔ ɛkɛnɩ la bɛyɛ yɩ bulombunli.” (Dwɔ. 6:​14, 15) Sɛ Gyisɛsɩ manlɩ ɔhʋanɩ a, ankɩ eyi kɛma ɩkɛva yɩ nwʋ kowulawula Dwuumaa mɔɔ bowula Wulomimaa bo tumililɛ tʋ nɩ bɛ manlɩwulɛndwokɔ nu. Naasʋ̃ ɩáyɛ zɔ. Bayɩbʋlʋ kã kɛɛ “ɩhwɩnlɩ yɩ nwʋ na yɩzayɩ nkʋ̃ ɩhɔlɩ file nɩ zʋ.” Meti ɩávalɩ nwʋmɔ kɛɛ nɩ mmenii pɛ kɛɛ bɛhyɛ yɩ nɩ, ɩáfa yɩ nwʋ iwulawula manlɩwulɛndwokɔ nu. Eyi dɩ ozumalɛdɩyɛ kezile ma yɛ paa!

6. Kɛ ɩkɛyɛ na yɛazumazuma Gyisɛsɩ yi ndianwʋ yɩ a? (Kila mfonyini yi sʋ̃.)

⁶ Ɩwɔ numɔ, ebiye a amɩyɛ mɛyɩ mmenii lɛ́kã kɛɛ yeluwá nnwʋánlɩ ɔhʋanɩ zʋ yɛma alɩyɛ bɛ anzɛnyɩɩ yɛzá mmenii adimakɛlɛ, anzɛnyɩɩ bɛlɛ́hyɛ yɛ kɛɛ yɛyɛ́ manlɩ ebani. Naasʋ̃ ebiye a bɛkɛhyɛ yɛ ɛzɩzɩbɛ kɛɛ yɛvá yɛ nwʋ yewula manlɩwulɛndwokɔ nu iluwa mma mɔɔ yɛkɔdʋ anzɛnyɩɩ abiye mɔɔ bosunzu kɛɛ ɩkɔhʋla kɛyɛ nninyeni bʋwɔ mɔɔ yekegyina yɩ mɛda nɩ. Naasʋ̃ Gyisɛsɩ yɛlɩ ndianwʋba manlɩ yɛ wɔ eyi nu. Ɩbʋlɩ kɛɛ ɩkɛva yɩ nwʋ kowulawula manlɩwulɛndwokɔ nu, na aɣinzi yi ɩhanlɩ po kɛɛ: “Mu bulombunlililɛ nɩ íni oyuwadɩ eyi nu.” (Dwɔ. 17:14; 18:36) Kɛ Kilisinyiamaa nɩ, ɩsɛ kɛɛ yenyia Gyisɛsɩ yɩ adwɩnɩ yɩ be na yesumazuma yi ndianwʋ yɩ. Dɩkɛɛ Gyisɛsɩ nɩ, yekyina  Nyamɩnlɩ Bulombunlililɛ yɩ mɛda, yɛkã nwʋmɔ odwokɔ yekile mmenii, na yɛbɔ mpayɩ kɛɛ ɔzɔ Bulombunlililɛ yɩ ɩɣɩlá. (Mt. 6:10) Bɛmá yehila ozumalɛdɩyɛ mvʋlɔ mɔɔ sa yɛkʋla yenyia wɔ Gyisɛsɩ yɩ nnwʋánlɩdɩyɛ mɔɔ ɩfalɩ pʋanʋ nwʋ nɩ nu.

MƆƆ “ALƖYƐMANLƐ” NƖ YƖ TƲ KILE

7. Mɩnla yɛ Gyisɛsɩ yɛlɩ a, na kɛ asʋ̃mavʋlɔ yɩ yɛlɩ bɛ dɩyɛ zeli a? (Dwɔɔnʋ 6:​16-20)

⁷ Gyisɛsɩ manlɩ ɔlɔmɩ yɩ nɩ alɩyɛ wieli nɩ, ɩmanlɩ yɩ asʋ̃mavʋlɔ yɩ bɛvalɩ ɛlɛnɩ bɔzʋ̃ apaa yi nu kɛnɩ bɛyɩlɩ bɔ nwʋ bezia bɔhɔlɩ Kapenɩyɔmɩ, na yɩzayɩ nkʋ̃ ɩhwɩnlɩ yɩ nwʋ ɩhɔlɩ file yi zʋ, na ɩáma ɔlɔmɩ yɩ bɛ sa kã yɩ bɛyɛ yɩ bulombunli. (Kɩnga Dwɔɔnʋ 6:​16-20.) Mmɩlɩ mɔ asʋ̃mavʋlɔ yɩ da ɛlɛnɩ yɩ nu bɔkɔɔ nɩ, ahumi kezile be duli wɔ ngyemvile yi zʋ na azʋlɔkɩ yɩ yɛlɩ begyiabegyia. Gyisɛsɩ luwalɩ ngyemvile yi zʋ hɔlɩ bɛ pɛ. Na ɩhã ihileli sʋ̃mavʋlɔ Pita kɛɛ yɩzayɩ sʋ̃ iluwá nzulo yi zʋ ɩɣɩlá. (Mt. 14:​22-31) Gyisɛsɩ vʋlɩ ɛlɛnɩ yɩ la pɛ yɛ ahumi yi yiakili a. Eyi yɛlɩ adʋwavʋlɔ yɩ asibɔnwʋ ma bɛhanlɩ kɛɛ: “Ɩdɩ nɔhʋanlɛ kɛɛ mɔwʋ yɛ lɛ Nyamɩnlɩ Ɣalɛ nɩ!” a (Mt. 14:33) Ɩyɛ nnwʋánlɩ kɛɛ asʋ̃mavʋlɔ yɩ hanlɩ zɔ mmɩlɩ mɔ Gyisɛsɩ luwalɩ nzulo yi zʋ na bɛákã zɔ wɔ mmɩlɩ mɔ iluwalɩ nnwʋánlɩ ɔhʋanɩ zʋ ɩmanlɩ mmenii sʋ̃maa pʋanʋ nɩ. Maakɩ va zɔlɩ zʋlɔ kɛ: “Iluwakɛɛ nɩ [asʋ̃mavʋlɔ yɩ] bɛlɛ́tɩlɩ mmenii 5,000 alɩyɛmanlɛ nɩ yɩ tʋ bʋwɔ, bɛ adwɩnɩ ɩákʋla ɩnwʋ yɩ dɩyɛ ɔkʋ̃.” (Mk. 6:​50-52) Nɩ adʋwavʋlɔ yɩ lɛ́tɩlɩ kezimɔ tumi mɔɔ Gyehova va ma Gyisɛsɩ nɩ dɩ kezi nɩ tʋ, tumi mɔɔ ɩtɛla mɔɔ ɩva ɩmanlɩ mmenii sʋ̃maa pʋanʋ nɩ. Naasʋ̃ ɩákyɛ yɛ Gyisɛsɩ yɩzayɩ ɩvalɩ pʋanʋ nwʋ odwokɔ yɩ ɩɣalɩ dɔkʋ̃ a, na ɩmanlɩ yenyianlɩ ozumalɛdɩyɛ fʋlɔ wɔ nu.

8-9. Mɩnla ti mɔɔ nɩ ɔlɔmɩ yɩ bɛpɩbɛɛ Gyisɛsɩ a? (Dwɔɔnʋ 6:​26, 27)

⁸ Ɔlɔmɩ yɩ mɔɔ Gyisɛsɩ manlɩ alɩyɛ bɛ nɩ, nɩ mɔɔ ihyinyia bɛ paa yɛ lɛ bɔ nnwʋnlamɩ ɔfʋã nu ahyinyiadɩ mɔɔ bɛ sa kɛhã yɩ. Mɩnla ɔhʋanɩ zʋ a? Awulo hyɩnlɩ mɔɔ bɔhɔlɩ dɩka mɔɔ Gyisɛsɩ manlɩ alɩyɛ bɛ nɩ, bɔnwʋnlɩ kɛɛ Gyisɛsɩ nɩɩ yɩ asʋ̃mavʋlɔ yɩ bɔzʋ̃ kɛnɩ bɔhɔ. Meti bɔvʋlɩ ɛlɛnɩ be mɔɔ ɩzʋ̃ Tibeliyasɩ ɩɣalɩ kɛnɩ nɩ be bɔhɔlɩ Kapenɩyɔmɩ kɛɛ bɛkɛbɩbɛɛ Gyisɛsɩ. (Dwɔ. 6:​22-24) Asʋ̃ bɛyɛlɩ zɔ iluwakɛɛ nɩ bɛpɛ kɛɛ bɛtɩ Bulombunlililɛ yɩ nwʋ odwokɔ sʋ̃maa nɩ ti a? Anhã. Sianti paa ti mɔɔ bɔhɔlɩ kɛnɩ yɛ lɛ kɛɛ, nɩ bɛpɛ kɛɛ Gyisɛsɩ ma pʋanʋ sʋ̃maa bɛ. Mɩnla ti mɔɔ yɛkãã zɔ a?

⁹ Mɔwʋ kila mɔɔ izili mmɩlɩ mɔ ɔlɔmɩ yɩ nɩ nwʋnlɩ Gyisɛsɩ wɔ dɩka be mɔɔ ibike Kapenɩyɔmɩ nɩ. Gyisɛsɩ hanlɩ hileli bɛ penyii kɛɛ, bɛɣalɩ kɛɛ bɛbabɛ alɩyɛ bekeli. Gyisɛsɩ manlɩ bɔnwʋnlɩ kɛɛ, ɩwɔ numɔ kɛɛ “belili pʋanʋ nɩ na be mi ɩhyɩnlɩ” dɩyɛ, naasʋ̃ ɔzɔ alɩyɛ nɩ dɩ “alɩyɛ mɔɔ ɩsɩkɛ.” Ɩhã ihileli bɛ kɛɛ bɛyɛ́ egyima bɛbɛ “alɩyɛ mɔɔ ɩázɩkɛ mɔɔ mɛyɩ yɛ ɩdɩ nnwʋanlɩ mɔɔ íni awielɩyɛ nɩ” mfomi. (Kɩnga Dwɔɔnʋ 6:​26, 27.) Gyisɛsɩ hanlɩ kɛɛ yɩ Zɩ yɛ ɩkʋla ɩma alɩyɛ eyi a. Mmɩlɩ mɔ mmenii nɩ dɩlɩ kɛɛ alɩyɛ be wɔ kɛnɩ mɔɔ ɩkɔhʋla kɛma bekenyia nnwʋanlɩ mɔɔ íni awielɩyɛ nɩ, ɩkɛyɛ kɛɛ ɩyɛlɩ bɛ nnwʋánlɩ baaba! Mɩnla alɩyɛ paa yɛ nɩ ɩkɔhʋla kɛyɛ eyi a, na nɩ kɛ ɩkɛyɛ na Gyisɛsɩ yi ediyelɛmaa nɩ bɛ sa ɩahã ebiye a?

10. “Egyima mɔɔ Nyamɩnlɩ ɩpɛ” ɛhɩnla dɩyɛ yɛ nɩ ɩsɛ kɛɛ mmenii nɩ suma nwʋmɔ dɩyɛ a?

¹⁰ Nɩ ɔzɔ Dwuumaa nɩ pɛ kɛɛ bɔnwʋ egyima kʋ̃ mɔɔ ɩsɛ kɛɛ bɛyɛ na ama bɛ sa ɩahã ɔzɔ alɩyɛ yɩ be. Ebiye a mɔɔ ɩɣalɩ bɛ adwɩnɩ nu yɛ lɛ “egyima” mɔɔ nɩ Mosisi Mmɛla nɩ pɩbɛ kɛɛ bɛkɛyɛ nɩ. Naasʋ̃ Gyisɛsɩ hanlɩ hileli bɛ kɛɛ: “Egyima mɔɔ Nyamɩnlɩ ɩpɛ kɛɛ bɛyɛ nɩ yɛ lɛ kɛɛ bekele Mɩzamɩ mɔɔ ɩzʋ̃ma yɩ nɩ bekeli.” (Dwɔ. 6:​28, 29) Sɛ nɩ bekenyia “nnwʋanlɩ mɔɔ íni awielɩyɛ” a, gyɩsɛ benyia yi nu dedi. Nɩ Gyisɛsɩ ɩma bɔnwʋ eyi daada. (Dwɔ. 3:​16-18, 36) Aɣinzi yi, Gyisɛsɩ hanlɩ sʋ̃maa valɩlɩ mɔɔ abiye  yɛ a ɩkɛma ikenyia nnwʋanlɩ mɔɔ íni awielɩyɛ nɩ nwʋ.—Dwɔ. 17:3.

11. Mɩnla ɔhʋanɩ zʋ yɛ Dwuumaa nɩ lalɩ yɩ ali kɛɛ nnwʋnlamɩ ɔfʋã nu alɩyɛ la yɛ nwʋmɔ hyinyia bɛ a? (Ndwomi 78:​24, 25)

¹¹ Ɔzɔ Dwuumaa nɩ, bɛáde betiã numɔ kɛɛ ɩsɛ kɛɛ benyia Gyisɛsɩ nu dedi. Meti beɣizialɩ yɩ kɛɛ: “Mɩnla nnwʋánlɩ nninyeni yɛ ɛkɛyɛ ekehile yɛ na yeale wʋ yeali a?” (Dwɔ. 6:30) Bɛhanlɩ kɛɛ mmenii mɔɔ bɔwʋwalɩ azɩ wɔ Mosisi mmɩlɩ zʋ nɩ bɛ sa hanlɩ mana mɔɔ nɩ ɩdɩ alɩyɛ mɔɔ bedi yi eɣile bela. (Ne. 9:15; kɩnga Ndwomi 78:​24, 25.) Ɩda ali petee kɛɛ alɩyɛ ankasa yɛ nɩ nwʋmɔ lanwʋ la hyinyia bɛ a. Meti mmɩlɩ mɔ Gyisɛsɩ hanlɩ “sʋlɔ alɩyɛ baaba” mɔɔ ɩma nnwʋanlɩ mɔɔ íni awielɩyɛ nwʋ odwokɔ nɩ, bɛáma ikilehile numɔ kile bɛ po. (Dwɔ. 6:32) Bɛvalɩ bɛ adwɩnɩ beziyeli nnwʋnlamɩ ɔfʋã nu alɩyɛ zʋ nkʋ̃ʋ̃ ma bɔbʋlɩ nɔhʋanlɛ mɔɔ ɩfalɩ nnwʋanlɩ mɔɔ íni awielɩyɛ nwʋ mɔɔ nɩ Gyisɛsɩ pɛ kɛɛ ikilehile bɛ nɩ. Mɩnla yɛ yɛkɔhʋla kozuma wɔ odwokɔ eyi nu a?

MƆƆ ƖSƐ KƐƐ NWƲMƆ HYINYIA YƐ PAA

12. Mɩnla ɔhʋanɩ zʋ yɛ Gyisɛsɩ manlɩ yɛnwʋnlɩ nninyeni mɔɔ nwʋmɔ hyinyia paa nɩ a?

¹² Yenyia ozumalɛdɩyɛ be mɔɔ nwʋmɔ hyinyia paa wɔ Dwɔɔnʋ yi ti 6 yi nu. Mɔɔ ɩsɛ kɛɛ nwʋmɔ hyinyia yɛ paa yɛ lɛ sunzuma ɔfʋã nu nninyeni. Kakɛ kɛɛ, mmɩlɩ mɔ nɩ Setanɩ pɛ kɛɛ itwe Gyisɛsɩ ikila nɩ, Gyisɛsɩ hileli kɛɛ Gyehova mɔɔ yekediye yi nɩ nwʋ hyinyia kʋlaa tɛla alɩyɛ. (Mt. 4:​3, 4) Wɔ yi File Zʋ Ehilehilelɛ nu nɩ, ɩmanlɩ yɛnwʋnlɩ kezimɔ nwʋmɔ hyinyia kɛɛ yɛ nɩɩ Nyamɩnlɩ kenyia abusunwawɔlɛ baaba. (Mt. 5:3) Meti ɩsɛ kɛɛ yebizia yɛ nwʋ kɛɛ, ‘Asʋ̃ kezimɔ mʋbɔ mɩ ɛbɩla nɩ da yɩ ali kɛɛ sunzuma ɔfʋã nu nninyeni nwʋ hyinyia mɩ paa tɛla nnwʋnlamɩ ɔfʋã nu nninyeni a?’

13. (a) Mɩnla ti mɔɔ mfʋmɩ íni nwʋmɔ kɛɛ yɛ anyɩ keleli alɩyɛ nwʋ a? (b) Mɩnla yɛ Pɔɔlʋ wɔlɩ yɛ kɔkɔ wɔ nwʋ a? (1 Kɔlɛntɩmaa 10:​6, 7, 11)

¹³ Mfʋmɩ bela íni nwʋmɔ kɛɛ yɛkɔwɔ mpayɩ yekeziã yɛ nnwʋnlamɩ ɔfʋã nu ahyinyiadɩ na yɛava ɔzɔ nninyeni yi yɛale yɛ anyɩ. (Lk. 11:3) Bayɩbʋlʋ yɩ kã kɛɛ ɩdɩ baaba kɛɛ enii “keli alɩyɛ na ɩanlʋ na ianyia anyɩnlɩlelɛ wɔ yi egyima ɛzɩzɩbɛ mɔɔ ɩyɛ nɩ nu,” iluwakɛɛ eyi “zʋ̃ nɔhʋanlɛ Nyamɩnlɩ nɩ yɩ sa nu.” (Odw. 2:24; 8:15; Gye. 1:17) Naasʋ̃ ɩsɛ kɛɛ yekila bʋwɔ na nnwʋnlamɩ ɔfʋã nu nninyeni ɩáyɛlɩ dɩyɛ mɔɔ nwʋmɔ hyinyia yɛ paa wɔ yɛ ɛbɩlawɔlɛ nu. Sʋ̃mavʋlɔ Pɔɔlʋ manlɩ eyi lalɩ ali wɔ kɛlɛta mɔɔ ɩhɛlɛlɩ ɩmanlɩ Kilisinyiamaa nɩ nu. Ɩhanlɩ ndianwʋ tanɩ mɔɔ Yizilayamaa nɩ yɛlɩ mmɩlɩ mɔ nɩ bɔwɔ ɛsɛlɛ yɩ zʋ, dɩkɛɛ mɔɔ izili wɔ File Sɩnayɩ nwʋ nɩ nwʋ odwokɔ. Ɩwɔlɩ Kilisinyiamaa nɩ kɔkɔ kɛɛ íni kɛɛ ‘ye ti nu ba tanɩyɛlɛ zʋ, kɛmɔ ye nlabenyiammɔ be ti nu ɩɣalɩ tanɩyɛlɛ zʋ nɩ.’ (Kɩnga 1 Kɔlɛntɩmaa 10:​6, 7, 11.) Gyehova luwalɩ nnwʋánlɩ ɔhʋanɩ zʋ manlɩ Yizilayamaa nɩ alɩyɛ, naasʋ̃ iluwakɛɛ nɩ bɛ anyɩ bʋlʋ alɩyɛ ti, bɛmanlɩ ɩɣa ɩyɛlɩ dɩyɛ tanɩ ɩmanlɩ bɛ. (Nɔ. 11:​4-6, 31-34) Na mmɩlɩ mɔ bɔhɔ bɔzʋ̃mɩnlɩ nantwi aboduwaba yɩ nɩ, Yizilayamaa yɩ lalɩ yɩ ali kɛɛ mɔɔ bɔkɔnlʋ, mɔɔ bekeli, nɩɩ bɛ anyɩ mɔɔ bekele nɩ nwʋ hyinyia bɛ kʋlaa tɛla Gyehova mɔɔ bekediye yi. (Ɛkɩ. 32:​4-6) Ɩka ɛgyɩkɩ̃ɩ̃ ma bɛsɩkɛ Gyelusalamɩ nɩɩ yɩ asɔlɩ pika yɩ wɔ ɔlʋbɔ 70 Y.M. nu nɩ, Pɔɔlʋ hanlɩ Yizilayamaa yɩ be ndianwʋ tanɩ yɩ nwʋ odwokɔ va yɛlɩ kɔkɔwɔlɛ manlɩ Kilisinyiamaa mɔɔ nɩ bɔwɔ kɛnɩ wɔ ɔzɔ mmɩlɩ nɩ. Amɩyɛ sʋ̃ yɛda oyuwadɩ nhyɩhyɛlɩyɛ eyi yɩ awielɩyɛ, meti ɩsɛ kɛɛ yɛfa Pɔɔlʋ yɩ kɔkɔwɔlɛ yɩ anyɩnlɩbʋlʋ odwokɔ.

14. Mɩnla yɛ Bayɩbʋlʋ kã falɩ alɩyɛ mɔɔ yekeli wɔ oyuwadɩ fʋlɔ yɩ nu nɩ nwʋ a?

¹⁴ Mmɩlɩ mɔ Gyisɛsɩ hanlɩ kɛɛ yɛwɔ́ mpayɩ yeziã “awulohyɩnlɩyɛ bela alɩyɛ mɔɔ yehyinyia” nɩ, ɩhanlɩ sʋ̃ kɛɛ yɛwɔ́ mpayɩ ma Nyamɩnlɩ yɩ apɛdɩ ɩyɛlɩ kɛ “wɔ azɩlɛ yɩ zʋ, kɛmɔ bɛyɛ yɩ wɔ sʋlɔ nɩ.” (Mt. 6:​9-11) Ekila a, kɛ oyuwadɩ kɛyɛ keze wɔ ɔzɔ mmɩlɩ yɩ a? Bayɩbʋlʋ yɩ ma yɛnwʋ kɛɛ Nyamɩnlɩ yɩ apɛdɩ mɔɔ ɩkɛyɛlɩ kɛnɩ wɔ azɩlɛ  yɩ zʋ nɩ, alɩyɛ baaba mɔɔ yekeli sʋ̃ kɩnla nwʋ. Kɛmɔ Ayɩzaya 25:​6-8 ma yɛnwʋ yɩ nɩ, yekenyia alɩyɛ baaba sʋ̃maa yekeli wɔ Gyehova yi Bulombunlililɛ tʋ. Ndwomi 72:16 kã kɛɛ: “Alɩyɛ kowulu ɔzʋlɔ wɔ azɩlɛ yɩ zʋ; Ikowulu ɔzʋlɔ ɩkɔhɔ ikodwu avile be ti avinli.” Asʋ̃ ekilaa ɔhʋanɩ kɛɛ ɛkɛyɛ alɩyɛ mɔɔ wʋ anyɩ deli nwʋmɔ paa anzɛnyɩɩ ɛkɛyɛ alɩyɛ be mɔɔ ɛlɛ́yɛlɩ ebiye kyɩ̃ a? Mɛyɩ la ahanlɩ a, sa ɔkʋla yɛ wʋzawʋ wʋ nwanyɩ egyini na wʋali numɔ mma. (Ayɩ. 65:​21, 22) Abiyela mɔɔ ɩwɔ azɩlɛ yɩ zʋ kɛva nninyeni baaba eyimmɔ kele yɩ anyɩ.

15. Bɛzabɛ mɔɔ bokodunwo bɛ nɩ, mɩnla yɛ bokozuma a? (Dwɔɔnʋ 6:35)

¹⁵ Kɩnga Dwɔɔnʋ 6:35. Mmenii mɔɔ Gyisɛsɩ manlɩ pʋanʋ nɩɩ egyeni bɛ nɩ, asʋ̃ anyɩnlɩlazʋ be wɔ kɛnɩ ma bɛ a? Ɩwɔ numɔ kɛɛ ebiye a bo nu sʋ̃maa bɛányia Gyisɛsɩ nu dedi dɩyɛ, naasʋ̃ ebiye a bokodunwo bo nu be ma yɛkɔnwʋ bɛ. (Dwɔ. 5:​28, 29) Naasʋ̃ sɛ botunwo bɛ a, ɩsɛ kɛɛ bosuma Gyisɛsɩ yi odwokɔ mɔɔ ise, “Mamɩ yɛ mɩdɩ nnwʋanlɩ alɩyɛ nɩ a. Enii mɔɔ ɩkɛɣa mɩ pɛ nɩ kɔmɩ ilókũ yɩ kyɩ̃” nɩ mɔɔ yɩ tʋ kile ankasa. Ikehyinyia kɛɛ bekenyia dedi wɔ Gyisɛsɩ yɩ elelɛdɩyɛ afɔlɩ yɩ nu, na bede bedi kɛɛ Gyisɛsɩ valɩ yɩ nnwʋanlɩ dianlɩ kɛnɩ manlɩ bɛ. Ɔzɔ mmɩlɩ yɩ, bɛzabɛ mɔɔ bokodunwo bɛ, nɩɩ nnwuakula mɔɔ bɔkɔwʋ bɛ wɔ oyuwadɩ fʋlɔ yɩ nu nɩ kozuma nɔhʋanlɛ mɔɔ ɩfalɩ Gyehova nɩɩ yi tile nu pɔkɔ nwʋ nɩ nwʋ dɩyɛ. Kila kezimɔ ɩkɛyɛ anyɩnlɩlelɛ kɛɛ yɛkɔwʋwa ma bekehilehile mmenii eyimmɔ nninyeni ngɩnlɩma eyi! Mmenii eyi mɔɔ yɛkɔwʋwa bɛ ma bɛ nɩɩ Gyehova kenyia abusunwawɔlɛ nɩ kɛyɛ anyɩnlɩlelɛ kɛdɛla alɩyɛ bela mɔɔ yekeli wɔ kɛnɩ nɩ.

16. Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

¹⁶ Yezunzu odwokɔ mɔɔ ɩwɔ Dwɔɔnʋ yi ti 6 yɩ ɔfʋã be nwʋ, naasʋ̃ Gyisɛsɩ hilehileli nninyeni sʋ̃maa falɩ “nnwʋanlɩ mɔɔ íni awielɩyɛ” nwʋ. Nɩ ɩsɛ kɛɛ Dwuumaa nɩ tiye mɔɔ Gyisɛsɩ hanlɩ nɩ bʋwɔ paa, na ɔzɔ la yɛ ɩsɛ kɛɛ amɩyɛ sʋ̃ yɛyɛ a. Yɛkɔdʋwa Dwɔɔnʋ yi ti 6 yɩ nu ndwokɔ yɩ zʋ wɔ dɩyɛzumanlɛ mɔɔ ili kɛnɩ nɩ nu.