Bɔwʋlɩ mɩ wɔ 1927 wɔ twonwa ɛgyɩkɩ̃ɩ̃ be mɔɔ ibike Chicago, Illinois, U.S.A. Mɩ papa nɩɩ mɩ maamɩ wʋlɩ nnwuakula anlu. Bɔnlʋmmɔ yɛ lɛ Jetha, Don, mɩzamɩ, Karl, yɛɛ Joy. Nɩ ye munwala yezi yɛ kɛnɣa kɛɛ yɛzʋ̃ yɛ ahʋnlɩnɩ munwala nu yɛkɔzʋ̃mɩ Gyehova. Jetha hɔlɩ Giliyadɩ sukuulu mɔɔ ɩtɔ zʋlɔ anwɩ̃ yɩ wɔ 1943. Don, Karl, nɩɩ Joy hɔ zʋ̃mɩnlɩ wɔ Bɛtɩlɩ mɔɔ ɩwɔ Brooklyn, New York. Don hɔlɩ kɛnɩ wɔ 1944, Karl hɔlɩ kɛnɩ wɔ 1947, na Joy sʋ̃ dʋwalɩ bɛ wɔ 1951. Ndianwʋba mɔɔ bɛ nɩɩ mɩ awʋvʋlɔ yɛlɩ nɩ hyɛlɩ mɩ ɛzɩzɩbɛ kɛɛ mɩyɛ́ sʋ̃maa wɔ Gyehova ɔzʋ̃mɩnlɛ nu.

Nɩ mɩ maamɩ nɩɩ mɩ papa dɔ Nyamɩnlɩ na bɛta bɛkɩnga Bayɩbʋlʋ yɩ, meti bɛvalɩ Nyamɩnlɩ nwʋ ɔlɔlɛ bowulalɩ amɩyɛ sʋ̃ ye nu. Naasʋ̃ mmɩlɩ mɔ mɩ papa hɔ hɩnlanlɩ Europe azogyiamaa yɩ nwʋ ma bɔhɔlɩ Oyuwadɩ Kʋnɛ I mɛda nɩ, yɩ anyɩ iádeli asɔlɩhɔlɛ nwʋ dɔkʋ̃. Mɩ maamɩ anyɩ leli kɛɛ mɩ papa ɣalɩ awudo azʋ̃nudwolɩyɛ nu, meti ɩhã ihileli yi kɛɛ: “Karl, ma yɛhɔ́ asɔlɩ kɛmɔ nɩ yɛyɛ nɩ.” Mɩ papa hanlɩ kɛɛ: “Sa mɩ nɩɩ wʋ kɔ, naasʋ̃ mʋlɔ́wɔlɔ numɔ.” Mɩ maamɩ ɣizialɩ yɩ kɛɛ: “Mɩnla ti a?” Ɩhanlɩ kɛɛ: “Wɔ kʋnɛ yɩ nu nɩ, azɔfʋ mɔɔ bɔwɔ ɔzʋ̃mɩnlɛ ɔkʋ̃ nu naasʋ̃ bɔzʋ̃ manlɩ mvʋlɔ nu nɩ wɔlɩ mpayɩ manlɩ bɛ azogyiamaa yɩ na beyilalɩ bɛ akʋndɩ yɩ zʋ! Asʋ̃ nɩ Nyamɩnlɩ wɔ bɛzabɛ anwɩ̃ yɩ munwala bɛ afʋã a?”

Aɣinzi yi mɔɔ nɩ mɩ maamɩ wɔ asɔlɩ nɩ, Gyehova Dasɩvʋlɔmaa anwɩ̃ ɣalɩ yɛ awudo. Bɛvalɩ Bayɩbʋlʋ dɩyɛzumanlɛ awuuku anwɩ̃ be mɔɔ bɔfʋlɔ yɩ Light bɛmanlɩ mɩ papa, nɩ awuuku yi kilehile Bayɩbʋlʋ buuku mɔɔ bɔfʋlɔ yɩ Yikile nɩ nu. Mmɩlɩ mɔ mɩ maamɩ nwʋnlɩ awuuku yi nɩ, ɩwɔlɩ yɩ tʋ kɛɛ ɩkɩngaa. Eɣile ɔkʋ̃ be, ɩnwʋnlɩ yɩ wɔ newspaper nu kɛɛ bɛkãã kɛɛ, bɛzabɛ mɔɔ bɛ anyɩ deli Bayɩbʋlʋ dɩyɛzumanlɛ nwʋ nɩ, bɛɣɩla na bɛva Light buuku yi behilehile Bayɩbʋlʋ yɩ nu bɛ. Meti izili pɔkɔ kɛɛ ɩkɔhɔ. Ɩhɔlɩ nɩ, baalɛ ebani be yɛ ɩɣa iwukoli anyɩnkɛ yɩ a. Mɩ maamɩ yɩlɩ awuuku yi ɔkʋ̃, na iɣizialɩ baalɛ yɩ kɛɛ, “Ɛkɩ yɛ bosumaa buuku eyi a? Baalɛ yɩ hanlɩ kɛɛ, “Nyɛ mɩ ɣa yɩ, bɩla numɔ.” Dapɛnɩ mɔɔ ili kɛnɩ nɩ, mɩ maamɩ nɩɩ yɛ hɔlɩ kɛnɩ, na ɔzʋmɩ ɔzɔ mmɩlɩ yɩ nɩ, nɩ yɛta yɛkɔ kɛ.

Wɔ dɩyɛzumanlɛ ɔkʋ̃ be tʋ nɩ, enii mɔɔ nɩ ikilaa zʋlɔ nɩ hanlɩ kɛɛ mɩɣɩngá Ndwomi 144:15. Ɛkɛnɩ kã kɛɛ bɛzabɛ mɔɔ bɔsʋ̃mɩ Gyehova nɩ wɔ anyɩnlɩlelɛ. Mɩ anyɩ lelili ɔzɔ ɛhɛlɛlɛdwokɔ yɩ nwʋ. Akʋ̃ sʋ̃, mɩ anyɩ lelili 1 Timoti 1:11 mɔɔ ɩkã kɛɛ Gyehova dɩ “anyɩnlɩlelɛ Nyamɩnlɩ” nɩ, nɩɩ Ɛfɩsɛsɩmaa 5:1 mɔɔ ɩhyɛ yɛ ɛzɩzɩbɛ  kɛɛ ‘yɛyɛ́ ye nninyeni kɛɛ Nyamɩnlɩ’ nɩ nwʋ. Mɩɣa mʋnwʋnlɩ kɛɛ ɩsɛ kɛɛ mɩma mɩ anyɩ de kɛɛ mʋsʋ̃mɩɩ mʋ Wɔlɛvʋlɔ yɩ na mɩda yɩ asɩ kɛɛ ɩma minyia ɔnwʋmɔ ɔhʋanɩ mʋsʋ̃mɩɩ yɩ. Nninyeni anwɩ̃ eyimmɔ yɛ nɩ nwʋmɔ hyinyia mɩ paa wɔ mɩ ɛbɩlawɔlɛ nu a.

Ɔzʋ̃ dɩka mɔɔ nɩ yɛda wɔ Chicago ɔkɔɔ dɩka mɔɔ nɩ asafʋ mɔɔ ibike yɛ paa nɩ wɔ a, nɩ ɩdɩ kilomita 32 (mayɛlɩ 20). Naasʋ̃ nɩ yɛkɔ dɩyɛzumanlɛ, na nnimidi mɔɔ mʋwɔ wɔ Bayɩbʋlʋ nu nɩ yɛlɩ kezi. Mɩkakɛ kɛɛ mmɩlɩ be Jetha manlɩ munwalɩyɛ wɔ dɩyɛzumanlɛ tʋ. Mmɩlɩ mɔ ɩtɩndɛɛ nɩ, mɩhanlɩ yɩ wɔ mi ti nu kɛɛ: ‘Mizi munwalɩyɛ yɩ. Ankɩ sa mʋkʋla mipigyia mɩ sa sʋlɔ mɩkã.’ Mʋwɔlɩ yɩ tʋ kɛɛ misiyeziyee mʋ nwʋ bʋwɔ mɩkɛma dɩyɛzumanlɛ na mɩahʋla mɩama munwalɩyɛ. Mɩzamɩ sʋ̃ minyinli wɔ sunzuma ɔfʋã nu dɩkɛɛ mɩ mmenlima mɔɔ bɛha nɩ. Munlumanlɩ wɔ 1941.

Mɩ ɛɣɛɛlɛ iléfi 1942 ayiyialɩyɛ mɔɔ yɛyɛlɩ wɔ Cleveland, wɔ Ohio nɩ. Mmenii mɔɔ bɔwɔ nnɩka 50 wɔ United States nɩ yɛ bediyeli ebiye wɔ foonu zʋ a. Yɛ abusunwa yɩ nɩɩ mmusunwa sʋ̃maa mɔɔ bɛɣalɩ ayiyialɩyɛ yɩ be nɩ hɔ lalɩ pɛda be tʋ wɔ dɩka be mɔɔ ibike ayiyialɩyɛ dɩka yɩ. Nɩ Oyuwadɩ Kʋnɛ II ɩkɔlɩ zʋ, na nɩ botwodwuu betiyiaa Gyehova Dasɩvʋlɔmaa ɛzɩzɩbɛ ɛzɩzɩbɛ. Nɩ itwu nunuma a, mʋnwʋ kɛɛ mmeliyema yɩ bɛbaakɩ bɛ ahaalɩ wɔ pɛda yɩ tʋ bɛva yɩ anyunu behile ɔhʋanɩ yɩ nu bɔzʋzɔ bɛ ahɩnlanɩyɛ. Mmeliyema mɔɔ bɛlɛ ahaalɩ nɩ, bo nu ɔkʋ̃ bela leli dianlɩ numɔ kɛɛ, itwu ohunluma a bɔkɔwɩɛnɩ. Na sɛ bɔnwʋ kɛɛ bɛ adamvʋlɔ bɛbaa a, nɩ bɔzʋzɔ bɛ ahaalɩ yɩ layɩtɩ yɩ na bɔwɔ awɩɛnɩ yɩ bogua bɔ zʋ. Ɩba yɩ zɔ a, nɩ mmeliyema mvʋlɔ bɛyɛ ndɛndɛ bɛɣa bɔwʋwa bɛ. Mɩhanlɩ kɛɛ, ‘Gyehova yi mmenii mɛyɩ, besiyeziye bɔ nwʋ bʋwɔ bɛma dɩyɛ bela!’ Eyi ti, mʋhʋla mɩlalɩ, na odwokɔ tanɩ bela iási.

Alʋbɔ be mɛda mmɩlɩ mɔ mʋdwɩnɩndwɩnɩɩ ɔzɔ ayiyialɩyɛ yɩ nwʋ nɩ, mɩɣa mʋnwʋnlɩ kɛɛ mɩ maamɩ ɩáyɛ dɩyɛ bela mɔɔ ikile kɛɛ nɩ yi kunlu du. Ɩvalɩ yɩ nwʋ munwala idianlɩ Gyehova nɩɩ yɩ ahyɩhyɛdɩ yɩ zʋ. Mɩ ɛɣɛɛlɛ iléfi ndianwʋba mɔɔ ɩyɛlɩ nɩ kyɩ̃.

Ɩka ɛgyɩkɩ̃ɩ̃ ma yɛkɔ ɔzɔ ayiyialɩyɛ yɩ nɩ, mɩ maamɩ ɣa yɛlɩ ɔhʋanɩbukolɛvʋlɔ. Meti mmɩlɩ mɔ bɛmaa ndɛnɩ azʋlɔtʋ mɔɔ ɩfalɩ mmɩlɩ munwala ɔzʋ̃mɩnlɛ egyima yɩ nwʋ nɩ, idiyeli yi bʋwɔ paa. Yeluwaa ɔhʋanɩ zʋ yɛkɔɔ awudo nɩ, ɩhanlɩ kɛɛ, “Mɩpɛ kɛɛ mʋkɔ zʋlɔ mɩyɛ ɔhʋanɩbukolɛ egyima yɩ, naasʋ̃ mʋlɔ́kʋla mɩkɛyɛ na miazia mɩayɛ awudo egyima yɩ sʋ̃.” Yɛɛ iɣizialɩ yɛ kɛɛ yɛkɔwʋwa yɩ anzɛnyɩɩ. Yɛ amɩyɛ sʋ̃ yɛhanlɩ kɛɛ, nyɛ, sa yɛbʋwa yɩ. Meti ɩhyɛlɩ awudo kɛnɩ egyima ɩmanlɩ yɛ kɛɛ, ansaana yekeli nwɔnɩ alɩyɛ nɩ, ye nu ɔkʋ̃ bela keziyeziye aliyia ɔkʋ̃ anzɛnyɩɩ anwɩ̃ nu. Meti sɛ yewie na yɛkɔ sukuulu a, nɩ ihilahila aliyia yɩ munwatĩĩ nu ihila kɛɛ dɩyɛ bela la bʋwɔ a, ansaana ɩahɔ dasɩlɛlilɛ. Nɩ íni alagyɩ kʋlaa, naasʋ̃ iábu yɩ anyɩ ikua yi nnwuakula zʋ kyɩ̃. Mmɩlɩ bela mɔ yɛzʋ̃ sukuulu yɛkɛɣa awudo kɛɛ yɛbali alɩyɛ anzɛnyɩɩ yɛkɔbɔ yɛkɛɣa awudo nɩ, nɩ ɩwɔ kɛnɩ mɔɔ ɩdɩkɛɛ yɛ. Nɩ ɩyɛ a yɛpɔ sukuulu a, yɛ nɩɩ yɩ bɔ numɔ kɔ dasɩlɛlilɛ, na eyi wʋwalɩ yɛ ma yɛdɩlɩ kezimɔ ɔhʋanɩbukolɛ egyima yɩ dɩ nɩ tʋ.

Milili alʋbɔ 16 nɩ, mʋwɔlɩ ɔhʋanɩbukolɛ egyima yɩ tʋ. Ɩwɔ numɔ kɛɛ nɩ mɩ papa ɩlɛ́ba lɛ́yɛlɩ Dasɩvʋlɔ dɩyɛ, naasʋ̃ nɩ ɩpɛ kɛɛ ɩnwʋ kezimɔ mɩ dasɩlɛlilɛ egyima yɩ ɩkɔɔ. Eɣile ɔkʋ̃ nunuma be, mɩhã mihileli yi kɛɛ ɩávalɩ nwʋmɔ mmɔdɩnɩ bela mɔɔ mʋbɔɔ nɩ, milényianlɩ abiye mɔɔ mi nɩɩ yɩ kozuma Bayɩbʋlʋ yɩ.  Migyinanlɩ ɛgyɩkɩ̃ɩ̃, yɛɛ miɣizialɩ yɩ kɛɛ, “Ɛkɛbɛ yɩ kɛɛ ɛ nɩɩ mɩ kozuma dɩyɛ a?” Ɩdwɩnɩnlɩ nwʋmɔ ɛgyɩkɩ̃ɩ̃, yɛ ileli idianlɩ numɔ kɛɛ, mɩ nɩɩ yɩ zumá Bayɩbʋlʋ yɩ. Nyɛ, mɩ papa yɛ lɛ mɩ Bayɩbʋlʋ dɩyɛzumanlɛvʋlɔ mɔɔ ili bɔmʋnlɩ a. Nɩ ɩdɩ ɔnwʋmɔ ɔhʋanɩ kezile paa!

Yezumanlɩ buuku mɔɔ ise “The Truth Shall Make You Free.” Mmɩlɩ mɔ dɩyɛzumanlɛ yɩ ɩkɔɔ anyunumi nɩ, mɩɣa mʋnwʋnlɩ kɛɛ nɩ mɩ papa ɩbʋwaa mɩ ma mɩ dɩyɛzumanlɛ nɩɩ mɩ ehilehilelɛ kodu mpʋnɩ. Kɛ ndianwʋ nɩ, nunuma ɔkʋ̃ be mɔɔ yezumanlɩ nkyɩkyɛmi be nɩ, ɩhanlɩ kɛɛ: “Mʋnwʋ mɔɔ buuku yi ɩkãã yɩ. Naasʋ̃ kɛ ɩyɛ mɔɔ ɔnwʋ kɛɛ mɔɔ buuku yi ɩkãã yɩ dɩ nɔhʋanlɛ a?” Nɩ mízi kɛɛ ikeɣizia odwokɔ be mɔɔ ɩdɩ zɔ, meti mɩhã mihileli yi kɛɛ, “Mʋlɔ́kʋla mɩkɛyɩ yi munwa kakɩ yɩ, naasʋ̃ wɔ dɩyɛzumanlɛ mɔɔ ili kɛnɩ yɩ nu nɩ, mikenyia munwalɩyɛ mɩkɛma wʋ.” Amba sʋ̃, minyianlɩ munwalɩyɛ. Minyianlɩ ɛhɛlɛlɛndwokɔ mvʋlɔ mɔɔ mɩkɛva mikehilehile mɔɔ nɩ yesumaa yɩ nu. Ɔzʋmɩ ɔzɔ mmɩlɩ nɩ, nɩ misiyeziye mʋ nwʋ bʋwɔ mɩma yɛ dɩyɛzumanlɛ yɩ, na muzumanlɩ kezimɔ mɩkɛyɛ ɛbɩbɛlɛnu. Mɛyɩ wʋwalɩ mɩ ma mʋ nwʋ wʋkwalɩ, na mɩ papa sʋ̃ nyianlɩ anyunumihɔlɛ. Ɩvalɩ mɔɔ nɩ isumaa nɩ ɩyɛlɩ egyima na inlumanlɩ wɔ 1952.

Milili alʋbɔ 17 nɩ, mʋzʋ̃ awudo mɩyɩlɩ mʋ nwʋ. Mɩ anlima Jetha a ɣa yɛlɩ odwokɔbadɛlɛlɛvʋlɔ, na Don sʋ̃ hɔ zʋ̃mɩnlɩ wɔ Bɛtɩlɩ. Nɩ bɛzabɛ anwɩ̃ yɩ munwala bɛ anyɩ deli be egyimalilɛ yɩ nwʋ paa, na eyi hyɛlɩ mɩ ɛzɩzɩbɛ. Meti mɩhyɩhyɛlɩ Bɛtɩlɩ nɩɩ Gɩlɩyadɩ Sukuulu fɔɔmɩ na miyiakili mɩmanlɩ Gyehova kɛɛ yɩzayɩ ihilé dɩka mɔɔ mʋhɔ mʋzʋ̃mɩ. Mɔɔ ɩzʋ̃ numɔ ɩɣalɩ yɛ lɛ kɛɛ, bɔdʋlɩ salɛ bɔvʋlɔlɩ mɩ kɛɛ mʋhɔ́ mʋzʋ̃mɩ wɔ Bɛtɩlɩ wɔ 1946.

Mɩva alʋbɔ 75 mɩyɛ egyima azʋlɔtʋ wɔ Bɛtɩlɩ na ɩma minyia ɔnwʋmɔ ɔhʋanɩ muzuma nninyeni mvʋlɔ sʋ̃maa. Kɛ ndianwʋ nɩ, muzuma kezimɔ bɛpɩlɩntɩ awuuku nɩɩ kezimɔ bobu ozukua nwʋ ngʋnda. Muzuma kezimɔ bɔtɔ nninyeni mɔɔ nwʋmɔ hyinyia bɛma Bɛtɩlɩ nɩɩ kezimɔ bɛfa nninyeni bɔnwʋa abiyemmɔ wɔ nnɩka mvʋlɔ. Mɔɔ ɩtɛla yɩ munwala nɩ, mɩ anyɩ deli Bɛtɩlɩ nwɔnɩ ɔzʋ̃mɩnlɛ nɩɩ ndɛnɩ azʋlɔtʋ mɔɔ bɛma yɩ wɔ Bɛtɩlɩ nɩ nwʋ paa.

Muzumanlɩ debe sʋ̃ wɔ mɩ anlima kuakula Karl mɔɔ ɩɣalɩ Bɛtɩlɩ wɔ 1947 nɩ yɩ kɛnɩ. Nɩ ɩyɛ dɩyɛ wɔ Bayɩbʋlʋ zumanlɛ nɩɩ ehilehilelɛ nwʋ baaba. Mmɩlɩ be mɩhanlɩ kɛɛ ɩwʋwá mɩ ma miziyeziye ndɛnɩ be mɔɔ nɩ mɩkɛmaa nɩ. Mɩhã mihileli yi kɛɛ mɩyɛ ɛbɩbɛlɛnu sʋ̃maa naasʋ̃ mɩanwʋ mɔɔ mɩvá mili egyima wɔ mɩ ndɛnɩ yɩ nu. Ɩwʋwalɩ mɩ ma mʋnwʋnlɩ mɔɔ ɩsɛ kɛɛ mɩyɛ. Iɣizialɩ mɩ kɛɛ, “Joel, wʋ ndɛnɩ yɩ yi odwokɔtile yɛ lɛ mɩnla?” Ɛkɛnɩ la yɛ mʋnwʋnlɩ mɔɔ ɩpɛɛ kehile a, mɛyɩ yɛ lɛ kɛɛ, mɩvá mɔɔ ɩfalɩ mu odwokɔtile yi nwʋ nɩ mili egyima na miyiaki nɣalɩyɛ yɩ. Mɩ ɛɣɛɛlɛ iléfi ɔzɔ odwokɔ yɩ kyɩ̃.

 Sɛ wʋ anyɩ kele wɔ Bɛtɩlɩ a, ɩsɛ kɛɛ ɛfa wʋ nwʋ wula dasɩlɛlilɛ egyima yɩ nu bʋwɔ, na mɛyɩ kɛma ekenyia ozumanlɛnwʋnlɛ sʋ̃maa mɔɔ ɩhyɛ ɛzɩzɩbɛ. Mɩkakɛ ozumanlɛnwʋnlɛ be mɔɔ minyianlɩ mmɩlɩ mɔ yɛhɔlɩ dasɩlɛlilɛ nunuma be wɔ Bronx wɔ New York City nɩ. Mɩ nɩɩ eliyema be hɔ gyelalɩ baalɛ be mɔɔ mmɩlɩ be ileli Ɔwɩɛnɩlɛ Aɣanɩ nɩɩ Awake! yi be. Yɛwɔlɩ ye odwokɔ yɩ tʋ kɛɛ, “Nnɛ nunuma yɩ, yɛbʋwaa mmenii ma bokozuma nninyeni be mɔɔ ɩhyɛ ɛzɩzɩbɛ wɔ Bayɩbʋlʋ yɩ nu.” Ɩhanlɩ kɛɛ, “Sɛ Bayɩbʋlʋ nu odwokɔ yɛ bɛbahã dɩyɛ a, bɛɣɩlá nu.” Yezunzunli ɛhɛlɛlɛndwokɔ azʋlɔtʋ mɔɔ ɩfalɩ Nyamɩnlɩ Bulombunlililɛ yɩ nɩɩ oyuwadɩ fʋlɔ yɩ nwʋ. Yɩ anyɩ lelili nwʋmɔ baaba, meti dapɛnɩ mɔɔ ili kɛnɩ nɩ, ɩdʋlɩ salɛ ɩvʋlɔlɩ yɩ ɔhɔnwʋmmɔ sʋ̃maa ma bɛɣa bediyeli nkɔmmɔwɔlɛ yɩ be. Aɣinzi yi, ɩ nɩɩ yi hũ ɣa zʋ̃mɩnlɩ Gyehova.

Mizili pɔkɔ kɛɛ mikegyia nɩ, ilili alʋbɔ 10 ansaana mɩbayiyia mɩ yɩ. Mɩnla yɛ ɩwʋwalɩ mɩ ma minyianlɩ baalɛ mɔɔ ɩfata mɩ a? Mɩvalɩ mpayɩwɔlɛ muzunzunli odwokɔɣizialɛ eyi nwʋ kɛɛ, ‘Sɛ mikyia muwie yi a, mɩnla yɛ mɩ nɩɩ mɩ yɩ kɛyɛ a?’

Yɛhɔlɩ 1953 manlɩ-avinli ayiyialɩyɛ yɩ wɔ Yankee Stadium nɩ, miyiyialɩ eliyema baalɛ be mɔɔ bɔfʋlɔ yɩ Mary Aniol. Ntʋlɔnkʋdɩ ɩ nɩɩ mɩ anlima Jetha hɔlɩ Gɩlɩyadɩ Sukuulu mɔɔ ɩtɔ zʋlɔ anwɩ̃ yɩ be, na ɩ nɩɩ yɩ yɛ bʋsʋ̃mɩɩ kɛɛ odwokɔbadɛlɛlɛmaa a. Ɩvalɩ anyɩnlɩlelɛ hanlɩ odwokɔbadɛlɛlɛ egyima mɔɔ ɩyɛɛ wɔ Caribbean nɩɩ Bayɩbʋlʋ dɩyɛzumanlɛ azʋlɔtʋ mɔɔ ɩhʋla ɩyɛ nɩ nwʋ odwokɔ ihileli mɩ. Mmɩlɩ mɔ yɛnwʋʋ yɛ nwʋ bʋwɔ nɩ, yɛɣa yɛnwʋnlɩ kɛɛ ye munwala yɛwɔ sunzuma ɔfʋã nu bʋtayɩ ɔkʋ̃. Ɔlɔlɛ mɔɔ yɛwɔ yɛma yɛnwʋ nɩ yɛlɩ kezi, na yegyialɩ wɔ April 1955. Mary lalɩ yɩ ali wɔ ahʋanɩ sʋ̃maa zʋ kɛɛ ɩdɩ akyɛdɩ mɔɔ ɩzʋ̃ Gyehova kɛ, na ɩyɛlɩ ndianwʋba mɔɔ mmenii kʋla suma. Egyimalilɛ bela mɔɔ bɛkɛva bɛkɛma yɩ nɩ, nɩ ɩfa anyɩnlɩlelɛ ɩyɛ. Nɩ ɩyɛ egyima ɛzɩzɩbɛ, ɩzʋ̃ yɩ ahʋnlɩnɩ nu ɩbʋwa mmenii mvʋlɔ, na ɩfa Bulombunlililɛ yɩ idi bɔmʋnlɩ. (Mt. 6:33) Yɛvalɩ alʋbɔ asã yɛyɛlɩ mansini egyima yɩ, na wɔ 1958 nɩ, bɔvʋlɔlɩ yɛ wɔ Bɛtɩlɩ.

Muzumanlɩ nninyeni sʋ̃maa wɔ Mary kɛnɩ. Kɛ ndianwʋ nɩ, yɛ agyiahʋnlɩ yɩ ahyɛasɩ pɛɛ nɩ, yezili pɔkɔ kɛɛ yɛkɛɣɩnga Bayɩbʋlʋ yɩ yɛkɔwɔ nu, na nɩ yɛkɩnga nkyɩkyɛmi 15 eɣile bela. Sɛ enii ɔkʋ̃ kɩnga ɛgyɩkɩ̃ɩ̃ a, nɩ yegyina yɛwɔ nwʋmɔ nkɔmmɔ yehila kezimɔ yɛkɛva yɛkɛyɛ egyima wɔ yɛ ɛbɩlawɔlɛ nu. Nɩ Mary ta kã mɔɔ izumanlɩ wɔ Gɩlɩyadɩ Sukuulu anzɛnyɩɩ yi odwokɔbadɛlɛlɛ egyima yi nu nɩ nwʋ odwokɔ ikile mɩ. Eyi wʋwalɩ mɩ ma minyianlɩ ntɩyasɩ mɔɔ numɔ dɔ na ɩwʋwalɩ mɩ ma muduli mpʋnɩ wɔ mɩ ndɛnɩmanlɛ nɩɩ kezimɔ mɩhyɛ mmeliyema mmaalɛ ɛzɩzɩbɛ nɩ nu.—Ɛɣɛ. 25:11.

Mʋ dɔvʋlɔ Mary wuli wɔ 2013. Mikilaa ɔhʋanɩ paa kɛɛ mʋkɔnwʋ yɩ wɔ oyuwadɩ fʋlɔ yɩ nu! Naasʋ̃ kakɩ yɩ, mizi mɩ kɛnɣa kɛɛ mʋkɔhɔ zʋ mukozuma dɩyɛ, na mɩava mʋ nwʋ munwala miadiã Gyehova zʋ. (Ɛɣɛ. 3:​5, 6) Sɛ mʋdwɩnɩndwɩnɩ mɔɔ Gyehova yi mmenii kɛyɛ wɔ oyuwadɩ fʋlɔ yɩ nu nɩ nwʋ a, ɩkyɩkyɩ mɩ ɛɣɛɛlɛ na ɩma mɩ anyɩ de. Ɔzɔ nninyeni yi be yɛ lɛ kɛɛ, yekozuma nninyeni mvʋlɔ yɛkɛvalɩ yɛ Kilehilevʋlɔ Kezile Baaba nɩ nwʋ! Amba, sɛ mikila nninyeni mɔɔ ihilehile mɩ nɩɩ kezimɔ ɩla ɔlɔlɛ kezile ali ihile mɩ nɩ a, mɩánwʋ kezimɔ mɩla yɩ asɩ po.