1. Mɩnla ti mɔɔ abiyemmɔ sunzu kɛɛ yɛlɔ́kʋla kɔwʋwa azɩ daabaa a?

 MMENII sʋ̃maa bɔ mmɔdɩnɩ kɛɛ bekeli alɩyɛ baaba na bɛadɩnyɛndɩnyɛ bɛ abɔkɔ nu eɣile bela na ama bɛanyia pɔkɔdɩlɛ baaba mɔɔ ɩkɛma bɔkɔwʋwa azɩ bɛkɛhyɛ. Naasʋ̃, bɛáhila ɔhʋanɩ kɛɛ bɔkɔwʋwa azɩ daabaa. Ebiye a atɩɩtɩɩ mɔɔ ebaniyɛlɛ fa ba nɩ ti, bo sunzu kɛɛ bɔlɔ́kʋla kɔwʋwa azɩ daabaa ma ɩkɛyɛ bʋwɔ. Naasʋ̃ kɛmɔ Gyisɛsɩ hanlɩ wɔ Dwɔɔnʋ 3:16 nɩɩ 5:24 nɩ, adasamaa kɔhʋla kenyia “nnwʋanlɩ mɔɔ íni awielɩyɛ.”

2. Mɩnla yɛ Dwɔɔnʋ yi ti 6 kã falɩ nnwʋanlɩ mɔɔ íni awielɩyɛ nwʋ a? (Dwɔɔnʋ 6:​39, 40)

² Eɣile ɔkʋ̃ be, Gyisɛsɩ luwalɩ nnwʋánlɩ ɔhʋanɩ zʋ manlɩ mmenii abʋmɩ abʋmɩ sʋ̃maa pʋanʋ nɩɩ egyeni. a Nɩ eyi yɛ nnwʋánlɩ, naasʋ̃ mɔɔ ɩhanlɩ wɔ ɔzɔ eɣile yi yɩ awulohyɩnlɩyɛ nɩ yɛ asibɔnwʋ tɛla mɛyɩ po. Ɔlɔmɩ nɩ dʋwalɩ yɩ wɔ Kapenɩyɔmɩ, wɔ Galilii ngyemvile yi nwʋ na ɛkɛnɩ yɛ Gyisɛsɩ hanlɩ hileli bɛ kɛɛ ikodunwo awuvʋlɔ na bɛawʋwa azɩ daabaa a. (Kɩnga Dwɔɔnʋ 6:​39, 40.) Mɔwʋ kila kezimɔ wʋ ɔhɔnwʋmmɔ nɩɩ wu mmusunwamaa mɔɔ bowuwu nɩ kɔhʋla kenyia zʋlɔ mfasʋ. Mɔɔ Gyisɛsɩ hanlɩ nɩ ma yɛnwʋ kɛɛ bɛzabɛ mɔɔ bowuwu nɩ, bokodunwo bo nu sʋ̃maa, na yɛ nɩɩ yɛ alɔvʋlɔ kɔhʋla kɔwʋwa azɩ daabaa! Naasʋ̃ Gyisɛsɩ hanlɩ odwokɔ fʋlɔ wɔ Dwɔɔnʋ yi ti 6 mɔɔ nɩ ɩyɛ sɩ ɩma mmenii sʋ̃maa kɛɛ bɛkɛdɩ yɩ tʋ, na nnɛ sʋ̃ abiyemmɔ bɛádɩ yɩ tʋ. Mɩnla yɛ Gyisɛsɩ hanlɩ a?

3. Mɩnla yɛ Gyisɛsɩ hanlɩ valɩlɩ yɩ nwʋ wɔ Dwɔɔnʋ 6:51 a?

³ Ɔlɔmɩ mɔɔ nɩ bɔwɔ Kapenɩyɔmɩ nɩ nwʋnlɩ pʋanʋ mɔɔ Gyisɛsɩ luwalɩ nnwʋánlɩ ɔhʋanɩ zʋ va manlɩ bɛ nɩ kɛɛ, ɩdɩkɛɛ  mana mɔɔ Gyehova va manlɩ Yizilayamaa nɩ. Ɛhɛlɛlɛdwokɔ yɩ po fʋlɔ mana yɩ kɛɛ alɩyɛ anzɛnyɩɩ pʋanʋ “mɔɔ ɩzʋ̃ sʋlɔ.” (Ndw. 105:40; Dwɔ. 6:31) Gyisɛsɩ gyinanlɩ mɔɔ nɩ mmenii nɩ zi falɩ mana yɩ nwʋ nɩ zʋ ihilehileli bɛ nninyeni be mɔɔ nwʋmɔ hyinyia. Ɩwɔ numɔ kɛɛ nɩ mana yɩ zʋ Nyamɩnlɩ kɛnɩ dɩyɛ, naasʋ̃ bɛzabɛ mɔɔ belili nɩ bɛábʋwa azɩ daabaa, bowuli. (Dwɔ. 6:49) Naasʋ̃ Gyisɛsɩ vʋlɔlɩ yɩ nwʋ “sʋlɔ alɩyɛ baaba nɩ,” “alɩyɛ nɩ mɔɔ Nyamɩnlɩ ɩfa ɩma,” nɩɩ “nnwʋanlɩ alɩyɛ nɩ.” (Dwɔ. 6:​32, 33, 35) Gyisɛsɩ hanlɩ odwokɔ be mɔɔ nwʋmɔ hyinyia mɔɔ ɩma yɛnwʋ sʋnʋnkʋ̃ kezile mɔɔ ɩla mɛyɩ nɩɩ mana mɔɔ belili nɩ bɛ avinli. Ɩhanlɩ kɛɛ: “Mamɩ yɛ mɩdɩ nnwʋanlɩ alɩyɛ nɩ mɔɔ mʋzʋ̃ sʋlɔ mɩɣa. Mɔɔ ikeli alɩyɛ eyi be nɩ ɩkɔwʋwa nnwʋanlɩ nu eɣile bela.” (Kɩnga Dwɔɔnʋ 6:51.) Dwuumaa nɩ valɩ ɛya. Nɩ bɛádɩ yɩ tʋ kɛɛ Gyisɛsɩ se mɛyɩ yɛ lɛ “alɩyɛ” mɔɔ ɩzʋ̃ sʋlɔ nɩ, na ɩdɩ baaba po ɩtɛla mana mɔɔ Nyamɩnlɩ va manlɩ bɛ nlabenyiammɔ nɩ. Gyisɛsɩ hanlɩ hileli bɛ kɛɛ: “Alɩyɛ nɩ mɔɔ mɩfaa mɩkɛma yɩ nɩ yɛ lɛ mʋ nnwʋnlamɩ.” Mɩnla yɛ nɩ ɩpɛɛ kehile a? Nwʋmɔ hyinyia kɛɛ yɛkɔnwʋ munwalɩyɛ nɩ, iluwakɛɛ mɛyɩ kɛma yɛkɔnwʋ kezimɔ yɛ nɩɩ yɛ alɔvʋlɔ munwala kenyia nnwʋanlɩ mɔɔ íni awielɩyɛ. Bɛmá yehila mɔɔ nɩ Gyisɛsɩ ɩpɛɛ kehile.

NNWƲANLƖ ALƖYƐ NƖƖ YƖ NNWƲNLAMƖ YƖ

4. Mɩnla ti mɔɔ odwokɔ mɔɔ Gyisɛsɩ hanlɩ nɩ yɛlɩ abiyemmɔ asibɔnwʋ a?

⁴ Mmɩlɩ mɔ mmenii mɔɔ betiyee Gyisɛsɩ nɩ nwʋnlɩ kɛɛ pʋanʋ mɔɔ nɩ ɩkãã nwʋmɔ odwokɔ kɛɛ ɩsɛ kɛɛ bedi nɩ dɩ yɩzayɩ yɩ nnwʋnlamɩ mɔɔ ‘ɩva ɩma na ama oyuwadɩ ianyia nnwʋanlɩ’ nɩ, ɩyɛlɩ bo nu be asibɔnwʋ baaba. Ebiye a nɩ bosunzu kɛɛ, yɩ nnwʋnlamɩ egyeni ankasa yɛ nɩ ɩkãã kɛɛ ɩsɛ kɛɛ bedi a. (Dwɔ. 6:52) Naasʋ̃ Gyisɛsɩ hanlɩ dɩyɛ fʋlɔ be mɔɔ ɩyɛlɩ bɛ asibɔnwʋ ɩdɛlalɩ mɔɔ ilili bɔmʋnlɩ ɩhanlɩ nɩ po. Ɩhanlɩ kɛɛ: “Sɛ mʋnlʋmmɔ bɛádi mɩzamɩ, Enii Ɣalɛ nɩ mʋ nnwʋnlamɩ, bɛánʋ mi mmegyia a, belényia nnwʋanlɩ mɔɔ íni awielɩyɛ.”—Dwɔ. 6:53.

5. Mɩnla ti mɔɔ yɛkʋla yɛkã kɛɛ, nɩ Gyisɛsɩ ɩlɛ́kã kɛɛ mmenii nɩ bɔnlʋ́ yi mmegyia ankasa a?

⁵ Ɔzʋmɩ Nowa yɩ mmɩlɩ zʋ yɛ Nyamɩnlɩ hyɛlɩ adasamaa kɛɛ máma bédi mmegyia a. (Gyn. 9:​3, 4) Gyehova zia zili ɔzɔ ahyɛdɩ yɩ zʋ wɔ Mmɛla mɔɔ ɩva ɩmanlɩ Yizilayamaa nɩ nu. Abiyela mɔɔ ikeli mmegyia nɩ, nɩ ɩsɛ kɛɛ “bokũ yi.” (Lɛv. 7:27) Gyisɛsɩ hilehileli Dwuumaa nɩ kɛɛ ɩsɛ kɛɛ bedidi Mmɛla mɔɔ Nyamɩnlɩ va ma bɛ nɩ munwatĩĩ zʋ. (Mt. 5:​17-19) Meti nɩ ntɩyasɩ íni numɔ kɛɛ ɩkɛhã kehile Dwuumaa nɩ kɛɛ belí yɩzayɩ nnwʋnlamɩ egyeni na bɔnlʋ yi mmegyia. Naasʋ̃ nɩ Gyisɛsɩ iduwaa odwokɔ eyi mɔɔ ɩyɛ asibɔnwʋ yɩ zʋ ikilehile bɛ mɔɔ ɩsɛ kɛɛ bɛyɛ na ama bɛanyia “nnwʋanlɩ mɔɔ íni awielɩyɛ.”—Dwɔ. 6:54.

6. Mɩnla ti mɔɔ yɛkʋla yɛkã kɛɛ mɔɔ Gyisɛsɩ hanlɩ valɩ yɩ nnwʋnlamɩ mɔɔ bekeli nɩɩ yi mmegyia mɔɔ bɔkɔnlʋ nwʋ nɩ dɩ ndindianwʋ a?

⁶ Mɩnla yɛ nɩ Gyisɛsɩ ɩpɛɛ ikehile a? Ɩda ali petee kɛɛ mɔɔ Gyisɛsɩ hanlɩ nɩ, nɩ ɩlɛ ɩyɛ ndindianwʋ ɩkɛma mmenii nɩ, kɛmɔ ɩvalɩ ndindianwʋ ilili egyima mmɩlɩ mɔ ɩhã ihileli Samaliyianii baalɛ yɩ kɛɛ: “Enii mɔɔ ɩkɔnlʋ nzulo mɔɔ mɩkɛva mɩkɛma yɩ nɩ ohobe ilókũ yɩ kyɩ̃, na nzulo mɔɔ mɩkɛva mɩkɛma yɩ nɩ ɩkɛlanɩ azudɩnlɩ wɔ yi nu mɔɔ ɩkɛma ikenyia nnwʋanlɩ mɔɔ íni awielɩyɛ” nɩ. (Dwɔ. 4:​7, 14) b Nɩ Gyisɛsɩ ɩlɛ́kã kɛɛ bula pɔkyɩɩ be nu nzulo kɛkɛ mɔɔ Samaliyianii baalɛ nɩ kɔnlʋ nɩ yɛ ɩkɛma ikenyia nnwʋanlɩ mɔɔ íni awielɩyɛ a. Ɔzɔ la sʋ̃ yɛ nɩ ɩlɛ́kã kehile ɔlɔmɩ mɔɔ ɩ  nɩɩ bɛ dɩndɛlɩ wɔ Kapenɩyɔmɩ nɩ kɛɛ, ɩsɛ kɛɛ bedi yɩ nnwʋnlamɩ egyeni na bɔnʋ yi mmegyia ankasa na ama bɛanyia nnwʋanlɩ mɔɔ íni awielɩyɛ a.

SƲNƲNKƲ̃ MƆƆ ƖWƆ NDWOKƆ ANWƖ̃ YƖ NU

7. Mɩnla yɛ abiyemmɔ kã falɩ Gyisɛsɩ yi odwokɔ mɔɔ ɩwɔ Dwɔɔnʋ 6:53 nɩ nwʋ a?

⁷ Abiyemmɔ kã kɛɛ, Gyisɛsɩ yi odwokɔ mɔɔ ɩwɔ Dwɔɔnʋ 6:53 nɩ kilehile mɔɔ ɩsɛ kɛɛ yɛyɛ mmɩlɩ mɔ yedii Niibenyia Nunuma Alɩyɛ nɩ. Bɛkã zɔ iluwakɛɛ ndwokɔ mɔɔ ɩva ilili egyima wɔ Dwɔɔnʋ 6:53 nɩ, ɩ nɩɩ mɔɔ ɩhanlɩ wɔ Niibenyia Nunuma Alɩyɛ yɩ tʋ nɩ di nsɛ. (Mt. 26:​26-28) Meti bekile numɔ kɛɛ, abiyela mɔɔ ɩkɔhɔ Niibenyia Nunuma Alɩyɛ yɩ tʋ nɩ, ɩsɛ kɛɛ idi pʋanʋ na ɩnʋ nwanyɩ nɩ be. Asʋ̃ eyi dɩ nɔhʋanlɛ a? Nwʋmɔ hyinyia paa kɛɛ yɛkɔnwʋ nɔhʋanlɛ mɔɔ ɩwɔ odwokɔ eyi nu, iluwakɛɛ ɔlʋbɔ bela mmenii abʋmɩ abʋmɩ sʋ̃maa yɛ yɛ nɩɩ bɛ bo numɔ di Niibenyia Nunuma Alɩyɛ yɩ. Yɛkɔnwʋ yɩ kɛɛ mɔɔ Gyisɛsɩ hanlɩ wɔ Dwɔɔnʋ 6:53 nɩ dɩ sʋnʋnkʋ̃ kʋlaa wɔ mɔɔ ɩhanlɩ wɔ Niibenyia Nunuma Alɩyɛ nɩ tʋ nɩ nwʋ.

8. Mɩnla sʋnʋnkʋ̃ yɛ ɩwɔ ndwokɔ anwɩ̃ yɩ nu a? (Kila mfonyini yi sʋ̃.)

⁸ Bɛmá yehila sʋnʋnkʋ̃ mɔɔ ɩwɔ ndwokɔ anwɩ̃ yɩ nu. Mɔɔ ili bɔmʋnlɩ, ɛhɩnla dɩka yɛɛ mɩnla mmɩlɩ yɛ Gyisɛsɩ hanlɩ odwokɔ mɔɔ ɩwɔ Dwɔɔnʋ 6:​53-56 nɩ a? Ɩhanlɩ odwokɔ eyi wɔ Galilii wɔ ɔlʋbɔ 32 Y.M nu. Ɩhanlɩ zɔ nɩ, kɛyɛ ɔlʋbɔ ɔkʋ̃ mɛda yɛ ɩvalɩ Niibenyia Nunuma  Alɩyɛ nɩ iziyeli kɛnɩ wɔ Gyelusalamɩ a. Mɔɔ ɩtɔ zʋlɔ anwɩ̃, aninyiammɔ yɛ nɩ ɩkãã ndwokɔ eyi kehile bɛ a? Ɩhanlɩ odwokɔ eyi ihileli yɩ ediyelɛmaa mɔɔ nɩ bɛ anyɩ bʋlʋ nnwʋnlamɩ ɔfʋã nu alɩyɛ tɛla sunzuma ɔfʋã nu nninyeni nɩ. (Dwɔ. 6:26) Nɔhʋanlɛ nu nɩ, mmɩlɩ mɔ Gyisɛsɩ hanlɩ debe mɔɔ nɩ ɩyɛ sɩ kɛɛ bɛkɛdɩ yɩ tʋ nɩ, ɛkɛnɩ la yɛ dedi mɔɔ bɔwɔ wɔ yi nu nɩ minlinli a. Yɩ adʋwavʋlɔ yɩ po, bo nu be bɛátʋwa yɩ dɔkʋ̃. (Dwɔ. 6:​14, 36, 42, 60, 64, 66) Nɩ mmenii eyimmɔ dɩ sʋnʋnkʋ̃ wɔ Gyisɛsɩ yɩ asʋ̃mavʋlɔ mɔɔ ɩ nɩɩ bɛ yiyialɩ wɔ ɔlʋbɔ ɔkʋ̃ mɛda wɔ ɔlʋbɔ 33 Y.M nu, mmɩlɩ mɔ ɩvalɩ Niibenyia Nunuma Alɩyɛ nɩ iziyeli kɛnɩ nɩ nwʋ. Wɔ ɔzɔ mmɩlɩ yɩ nɩ, nɩ yɩ asʋ̃mavʋlɔ nɔhʋanlɛmaa 11 yɩ kɩnla yɩ nwʋ, ɩávalɩ nwʋmɔ kɛɛ bɛátɩ mɔɔ nɩ Gyisɛsɩ ikilehilee munwala tʋ nɩ. Nɩ asʋ̃mavʋlɔ nɔhʋanlɛmaa yɩ bɛ́dɩ kɛɛ mmenii mɔɔ nɩ bɔwɔ Galilii nɩ, nɩ bede bedi kɛɛ Gyisɛsɩ yɛ lɛ Nyamɩnlɩ Ɣalɛ mɔɔ ɩzʋ̃ sʋlɔ nɩ. (Mt. 16:16) Gyisɛsɩ hamvʋlɩ bɛ kɛɛ: “Mʋnlʋmmɔ yɛ bɛdɩ mmenii mɔɔ bɛhɩnla mʋ nwʋ wɔ mʋ odwohilalɛ munwatĩĩ nɩ nu a.” (Lk. 22:28) Meti abɔkɔ anwɩ̃ eyimmɔ la po ma yɛnwʋ yɩ petee kɛɛ Gyisɛsɩ yi odwokɔ mɔɔ ɩwɔ Dwɔɔnʋ 6:53 nɩ, nɩ ɩlɛ́fa kehilehile mɔɔ nɩ ɩkɔhɔlɩ zʋlɔ wɔ Niibenyia Nunuma Alɩyɛ yɩ tʋ nɩ nu. Naasʋ̃ dasɩlɛ fʋlɔ wɔ kɛnɩ mɔɔ ɩma yɛnwʋ kɛɛ sʋnʋnkʋ̃ kezile wɔ ndwokɔ anwɩ̃ yɩ nu.

KEZIMƆ GYISƐSƖ YI ODWOKƆ YƖ FALƖ WƲ NWƲ

9. Aninyiammɔ yɛ Gyisɛsɩ yi odwokɔ mɔɔ ɩhanlɩ wɔ Niibenyia Nunuma Alɩyɛ yɩ tʋ nɩ falɩ bɔ nwʋ a?

⁹ Wɔ Niibenyia Nunuma Alɩyɛ yɩ tʋ nɩ, Gyisɛsɩ valɩ pʋanʋ mɔɔ fɩyayɛ íni numɔ manlɩ yɩ adʋwavʋlɔ yɩ na ɩhã ihileli bɛ kɛɛ igyĩ kɛnɩ ɩma yɩ nnwʋnlamɩ. Akʋ̃ sʋ̃, ɩvalɩ nwanyɩ yɩ ɩmanlɩ bɛ, na ɩhã ihileli bɛ kɛɛ igyĩ kɛnɩ ɩma yi “mmegyia mɔɔ ɩsɔ Nyamɩnlɩ yɩ nhyɩhyɛlɩyɛ nɩ yi munwa” nɩ. (Mk. 14:​22-25; Lk. 22:20; 1 Kɔl. 11:24) Mɔɔ ɩhanlɩ ɩvalɩ nhyɩhyɛlɩyɛ yɩ nwʋ nɩ dɩ odwokɔ mɔɔ nwʋmɔ hyinyia paa. Ɩvʋlɔlɩ nhyɩhyɛlɩyɛ eyi “nhyɩhyɛlɩyɛ fʋlɔ.” Kɛ mmenii munwala yɛ bɛkɩnla nhyɩhyɛlɩyɛ eyi nwʋ a, mfomi bɛzabɛ mɔɔ bɛ nɩɩ Gyisɛsɩ keli dɩyɛ wɔ Nyamɩnlɩ Bulombunlililɛ yɩ nu nɩ la yɛ bɛkɩnla nhyɩhyɛlɩyɛ eyi nwʋ a. (Hib. 8:​6, 10; 9:15) Adʋwavʋlɔ yɩ bɛátɩ mɔɔ ɩfalɩ nhyɩhyɛlɩyɛ eyi nwʋ nɩ munwatĩĩ nɩ tʋ, naasʋ̃ nɩ ɩlɛ́kyɛ na bɛava sunzuma nwanzanwanza yɩ bɛavɔ ngɔlɔ bɛ na bɛaɣa bɛahɩnla nhyɩhyɛlɩyɛ fʋlɔ yɩ nwʋ na bɛahɔ bɛahɩnla Gyisɛsɩ nwʋ wɔ sʋlɔ.—Dwɔ. 14:​2, 3.

10. Mɩnla ɔhʋanɩ fʋlɔ zʋ sʋ̃ yɛ mɔɔ Gyisɛsɩ hanlɩ mmɩlɩ mɔ nɩ bedii Niibenyia Nunuma Alɩyɛ nɩ dɩ sʋnʋnkʋ̃ wɔ mɔɔ ɩhanlɩ wɔ Galilii nɩ nwʋ a? (Kila mfonyini yi sʋ̃.)

¹⁰ Yɛ yɩ ndwɩ̃ kɛɛ, mɔɔ Gyisɛsɩ hanlɩ wɔ Niibenyia Nunuma Alɩyɛ yɩ tʋ nɩ falɩ “mmuwuanɩ kubo ɛgyɩkɩ̃ɩ̃” yɩ nwʋ. Yɩ adʋwavʋlɔ mɔɔ nɩ bɛkɩnla yɩ nwʋ wɔ ɔzɔ mmɩlɩ yɩ yɛ belili bɔmʋnlɩ bɛɣa bɛhɩnlanlɩ okuwu eyi nwʋ a. (Lk. 12:32) Bɔnlʋmmɔ nɩɩ mmenii mvʋlɔ mɔɔ aɣinzi yi bɛkɛɣa kɛhɩnla okuwu eyi nwʋ la yɛ Gyisɛsɩ hanlɩ kɛɛ bɔkʋla bedi pʋanʋ yɩ na bɔnʋ nwanyɩ yɩ be a. Mmenii eyimmɔ la yɛ bɔkɔhɔ kɛhɩnla Gyisɛsɩ nwʋ wɔ sʋlɔ a. Meti eyi dɩ dɩyɛ fʋlɔ mɔɔ ɩma yɛnwʋ kɛɛ odwokɔ mɔɔ ɩhã ihileli yɩ asʋ̃mavʋlɔ yɩ wɔ Niibenyia Nunuma Alɩyɛ yɩ tʋ nɩ dɩ sʋnʋnkʋ̃ wɔ mɔɔ ɩhanlɩ wɔ Galili nɩ nwʋ. Mɔɔ ɩhanlɩ wɔ Niibenyia Nunuma Alɩyɛ yɩ tʋ nɩ falɩ mmenii okuwu ɛgyɩkɩ̃ɩ̃ be nwʋ, naasʋ̃ mɔɔ ɩhanlɩ wɔ Galili nɩ falɩ mmenii sʋ̃maa nwʋ.

11. Mɩnla yɛ Gyisɛsɩ hanlɩ wɔ Galili mɔɔ ikile kɛɛ nɩ mɔɔ ɩkãã nɩ falɩ mmenii sʋ̃maa nwʋ a?

¹¹ Mmenii mɔɔ nɩ Gyisɛsɩ ɩtɩndɛɛ kehile bɛ wɔ Galilii nɩ, bo nu sʋ̃maa ɣalɩ kɛnɩ iluwa alɩyɛ mɔɔ bɛpɛɛ bekeli ti. Naasʋ̃ ɩhwɩnlɩ bɛ adwɩnɩ ɩhɔlɩ debe mɔɔ nwʋmɔ hyinyia kʋlaa  tɛla alɩyɛ zʋ. Nɩ ɩdɩ debe mɔɔ ɩkɛma bekenyia nnwʋanlɩ mɔɔ íni awielɩyɛ. Gyisɛsɩ hanlɩ kɛɛ mmenii mɔɔ bowuwu po nɩ, bokodunwo bɛ bɛkɛɣa nnwʋanlɩ nu wɔ eɣile mɔɔ ili aɣinzi yi nu na bɛawʋwa azɩ daabaa. Nɩ kɛ nyilalɛ mɔɔ mmenii okuwu ɛgyɩkɩ̃ɩ̃ be kenyia mɔɔ aɣinzi yi ɩhanlɩ nwʋmɔ odwokɔ wɔ Niibenyia Nunuma Alɩyɛ yɩ tʋ yɛ nɩ ɩkãã a, mfomi nɩ ɩdɩ nyilalɛ mɔɔ mmenii munwala kɔhʋla kenyia ebiye. Meti yɛ ɩhanlɩ kɛɛ: “Alɩyɛ nɩ mɔɔ mɩfaa mɩkɛma yɩ nɩ yɛ lɛ mʋ nnwʋnlamɩ nɩ mɔɔ mɩva mɩma nɩ ama oyuwadɩ ianyia nnwʋanlɩ.”—Dwɔ. 6:51.

12. Sɛ abiye kenyia nnwʋanlɩ mɔɔ íni awielɩyɛ mɔɔ Gyisɛsɩ hanlɩ nwʋmɔ odwokɔ nɩ a, mɩnla yɛ ɩsɛ kɛɛ ɩyɛ a?

¹² Gyisɛsɩ ɩákã kile Dwuumaa mɔɔ nɩ bɔwɔ Galilii nɩ kɛɛ abiyela mɔɔ ɩwʋwa azɩlɛ yɩ zʋ kyɩ̃ nɩ kenyia nnwʋanlɩ mɔɔ íni awielɩyɛ. Mfomi ɩhanlɩ kɛɛ mmenii mɔɔ ‘bekeli alɩyɛ eyi be,’ kile kɛɛ mmenii mɔɔ bekenyia yi nu dedi nɩ la yɛ bekenyia zʋlɔ mfasʋ a. Mmenii sʋ̃maa kã kɛɛ bede Gyisɛsɩ bedi na bɛva yɩ kɛɛ bɛ ɛkɛla nɩɩ bɛ agyɩnkwã. (Dwɔ. 6:29) Naasʋ̃ sʋ̃maa wɔ kɛnɩ mɔɔ ɩsɛ kɛɛ yɛyɛ. Kɛ ndianwʋ nɩ, ɔlɔmɩ mɔɔ bɔnwʋnlɩ nnwʋánlɩdɩyɛ mɔɔ Gyisɛsɩ yɛlɩ nɩ leli yi lili, naasʋ̃ aɣinzi yi beyiakili yɩ mɛdalilɛ. Mɩnla ti a?

13. Mɩnla yɛ ikile kɛɛ abiye de Gyisɛsɩ di ankasa a?

¹³ Mmenii mɔɔ nɩ beli Gyisɛsɩ mɛda nɩ, bo nu sʋ̃maa wɔ kɛnɩ a iluwa mɔɔ nɩ benyia yɩ wɔ Gyisɛsɩ kɛnɩ ti yɛ nɩ bɔdʋwa yɩ a. Mɔɔ nɩ ihyinyia bɛ la yɛ lɛ kɛɛ ɩkɛza bɛ adimakɛlɛ, ɩkɛma alɩyɛ bɛ, na ɩahã ndwokɔ mɔɔ ɩkɛyɛ bɛ fɛ iahile bɛ. Naasʋ̃ Gyisɛsɩ manlɩ bɔnwʋnlɩ kɛɛ ɩába azɩlɛ yɩ zʋ kɛɛ ɩbama bɛ sa kɛhã mɔɔ bɛpɛ yɩ kɛkɛ, mfomi ɩɣalɩ kɛɛ ibahilehile bɛ mɔɔ ihyinyia  kɛɛ bɛyɛ na ama bɛayɛ yɩ adʋwavʋlɔ nɔhʋanlɛmaa. Nɩ ihyinyia kɛɛ “bɛba” yɩ kɛnɩ, kile kɛɛ, ɩsɛ kɛɛ betiye yi na bɛfa dɩyɛ bela mɔɔ ihilehileli nɩ bɛyɛ egyima.—Dwɔ. 5:40; 6:44.

14. Sɛ yekenyia Gyisɛsɩ yɩ nnwʋnlamɩ nɩɩ yi mmegyia zʋ mfasʋ a, mɩnla yɛ ɩsɛ kɛɛ yɛyɛ a?

¹⁴ Gyisɛsɩ hilehileli ɔlɔmɩ yɩ nɩ sianti mɔɔ ihyinyia kɛɛ benyia dedi. Wɔ mɩnla nu a? Nɩ ɩsɛ kɛɛ benyia dedi wɔ yɩ nnwʋnlamɩ nɩɩ yi mmegyia mɔɔ nɩ ɩkɛva ɩkɔwɔ afɔlɩ nɩ nu. Nɩ ihyinyia kɛɛ Dwuumaa nɩ nyia dedi wɔ eyi nu, na ɔzɔ la yɛ ɩsɛ kɛɛ amɩyɛ sʋ̃ yenyia dedi mɔɔ ɩdɩ zɔ wɔ nnɛ a. (Dwɔ. 6:40) Nyɛ, kɛmɔ Dwɔɔnʋ 6:53 kã nɩ, sɛ yekenyia Gyisɛsɩ yɩ nnwʋnlamɩ nɩɩ yi mmegyia yɩ zʋ mfasʋ a, ɩsɛ kɛɛ yenyia dedi wɔ elelɛdɩyɛ yɩ nu. Mmenii sʋ̃maa wɔ ɔnwʋmɔ ɔhʋanɩ kɛɛ bekenyia nyilalɛ eyi be.—Ɛfɩ. 1:7.

15-16. Mɩnla nninyeni mɔɔ nwʋmɔ hyinyia yɛ yezuma wɔ Dwɔɔnʋ yi ti 6 yɩ nu a?

¹⁵ Wɔ Dwɔɔnʋ yi ti 6 yɩ nu nɩ, yezuma nninyeni sʋ̃maa mɔɔ nwʋmɔ hyinyia na ɩhyɛ ye munwala ɛzɩzɩbɛ. Ɩma yɛnwʋ kɛɛ Gyisɛsɩ dwɩnɩ mmenii nwʋ ankasa. Mmɩlɩ mɔ nɩ ɩwɔ Galilii nɩ, ɩzalɩ mmenii adimakɛlɛ, ihilehileli bɛ Nyamɩnlɩ Bulombunlililɛ yɩ nwʋ dɩyɛ, na ɩmanlɩ alɩyɛ bɛ mmɩlɩ mɔ nɩ kɔmɩ ikũũ bɛ nɩ. (Lk. 9:11; Dwɔ. 6:​2, 11, 12) Na mɔɔ ɩtɛla yɩ munwala nɩ, ɩmanlɩ bɔnwʋnlɩ kɛɛ mɛyɩ yɛ lɛ “nnwʋanlɩ alɩyɛ” nɩ.—Dwɔ. 6:​35, 48.

¹⁶ Bɛzabɛ mɔɔ ɩhanlɩ bɔ nwʋ odwokɔ kɛɛ bɛdɩ “mmuwuanɩ mvʋlɔ” nɩ, íni kɛɛ bedi pʋanʋ nɩɩ nwanyɩ yɩ be wɔ Niibenyia Nunuma Alɩyɛ yɩ tʋ. (Dwɔ. 10:​16, NWT) Naasʋ̃ benyia Gyisɛsɩ yɩ nnwʋnlamɩ nɩɩ yi mmegyia yɩ zʋ mfasʋ, iluwakɛɛ benyia dedi wɔ Gyisɛsɩ yi elelɛdɩyɛ afɔlɩ yɩ nu. (Dwɔ. 6:53) Naasʋ̃, bɛzabɛ mɔɔ bedi pʋanʋ yɩ na bɔnʋ nwanyɩ yɩ be nɩ da yɩ ali kɛɛ bɛkɩnla nhyɩhyɛlɩyɛ fʋlɔ yɩ nwʋ na bɔwɔ anyɩnlɩlazʋ kɛɛ bekeli tumi wɔ sʋlɔ. Meti, kɛ yɛkɔhɔ sʋlɔ anzɛnyɩɩ yɛkɔwʋwa azɩlɛ yɩ zʋ nɩ, ihyinyia kɛɛ yesuma odwokɔ mɔɔ ɩwɔ Dwɔɔnʋ yi ti 6 nɩ. Ɩma yɛnwʋ yɩ kɛɛ, sɛ yekenyia nnwʋanlɩ mɔɔ íni awielɩyɛ a, ɩsɛ kɛɛ yenyia dedi.