1. Ma ndianwʋ fa kilehile sianti mɔɔ yehyinyia Gyehova yɩ ɔhʋanɩhilelɛ nɩ nu.

 FA YƖ kɛɛ eminli wɔ pɔkɔ be nu. Wu kunlu du, iluwakɛɛ nnamɩ mɔɔ bɔ nwʋ yɛ ɛyɛlɛ, mmʋwaba nɩɩ nnuno mɔɔ bɔkɔhʋla bekeli wʋ awu, nɩɩ awʋlɔ nɣezile wɔ kɛnɩ. Naasʋ̃ sɛ enyia abiye mɔɔ izi kɛnɩ bʋwɔ mɔɔ ikehile wʋ ɔhʋanɩ, na ɩawɔ wʋ nwʋ banɩ wɔ asianɩ eyimmɔ nwʋ a, kila kezimɔ ɩkɛma wʋ anyɩ kele! Oyuwadɩ mɔɔ yɛda numɔ nɩ dɩkɛɛ ɔzɔ pɔkɔ nɩ. Nninyeni sʋ̃maa wɔ numɔ mɔɔ ɩkɔhʋla ɩkɛzɩkɛ yɛ nɩɩ Gyehova avinli abusunwawɔlɛ. Naasʋ̃, yɛwɔ Ɔhʋanɩhilelɛvʋlɔ mɔɔ idi munli, mɔɔ mɛyɩ yɛ lɛ Gyehova. Ɩbɔ yɛ nwʋ banɩ wɔ asianɩ nwʋ, na ikilee yɛ ɔhʋanɩ ma yekenyia nnwʋanlɩ mɔɔ íni awielɩyɛ wɔ oyuwadɩ fʋlɔ yɩ nu.

2. Mɩnla ɔhʋanɩ zʋ yɛ Gyehova kile yɛ ɔhʋanɩ a?

² Mɩnla ɔhʋanɩ yɛ Gyehova duwa zʋlɔ kile yɛ ɔhʋanɩ a? Dɩyɛ titili mɔɔ Gyehova duwa zʋlɔ kile yɛ ɔhʋanɩ yɛ lɛ yi Odwokɔ Bayɩbʋlʋ yɩ. Naasʋ̃, isia sʋ̃ iduwa mmenii zʋ ikile yɛ ɔhʋanɩ. Kɛ ndianwʋ nɩ, iduwa “sʋ̃mɩvʋlɔ nɔhʋanlɛvʋlɔ nɩ mɔɔ izi nɣɛlɛbɛ nɩ” zʋ ɩma sunzuma ɔfʋã nu alɩyɛ yɛ, mɔɔ ɩbʋwa yɛ ma yesizi abɔkɔ mɔɔ nɣɛlɛbɛ wɔ numɔ. (Mt. 24:45) Akʋ̃ sʋ̃, Gyehova duwa mmenii mvʋlɔ mɔɔ bɔ nwʋ wʋkwa zʋ kile ɔhʋanɩ yɛ. Kɛ ndianwʋ nɩ, mansini zʋ ehilalɛmaa nɩɩ asafʋ nu mbanimbani hyɛ yɛ ɛzɩzɩbɛ, na bɛfa ɔhʋanɩhilelɛ mɔɔ ɩbʋwa yɛ ma yekyina ndwokɔzɩzɩbɛ munwa bɛma yɛ. Yɛla Gyehova asɩ kɛɛ ikilee yɛ ɔhʋanɩ wɔ oyuwadɩ yɩ awielɩyɛ mmɩlɩ mɔ numɔ yɛ sɩ eyi nu! Eyi bʋwa yɛ ma yɛ nɩɩ Gyehova avinli kɔ zʋlɔ yɛ baaba, ɩma yɛ anyɩ de wɔ nnɛ na ɩkɛma yekenyia nnwʋanlɩ eɣile be.

3. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

³ Naasʋ̃ ɩyɛ a, sa ɩkʋla ɩyɛ sɩ kɛɛ yɛkɛva Gyehova yɩ ɔhʋanɩhilelɛ yɛkɛyɛ egyima, titili sɛ ɩfa iduwa mmenii mɔɔ bɛáli munli zʋ a. Mɩnla ti a? Ebiye a yɛ anyɩ ilédeli ɔhʋanɩhilelɛ yɩ nwʋ. Anzɛnyɩɩ yɛkɛdɩ nɣanlɩ kɛɛ ntɩyasɩ íni ɔzɔ ɔhʋanɩhilelɛ yɩ nu, na yɛkɛhã po kɛɛ gyama ɩ́zʋ̃ Gyehova kɛnɩ. Ɔzɔ mmɩlɩ yɩ nu titili  yɛ ɩsɛ kɛɛ yenyia anwʋlazʋ kɛɛ Gyehova yɛ ikilee yi mmenii ɔhʋanɩ a, na sɛ yedi yɩ ɔhʋanɩhilelɛ mɛda a yekenyia nyilalɛ. Mɔɔ ɩkɔwʋwa ma ɔzɔ anwʋlazʋ yɩ nu kɛyɛ sɩ nɩ, yekozunzu (1) kezimɔ Gyehova hileli yi mmenii ɔhʋanɩ wɔ ɔwɔkɩ mmɩlɩ yɩ nu, (2) kezimɔ ikilee yɛ ɔhʋanɩ wɔ nnɛ, nɩɩ (3) kezimɔ sɛ yɛkɔ zʋ yɛfa Gyehova yɩ ɔhʋanɩhilelɛ yɛyɛ egyima a, yenyia zʋlɔ mfasʋ nɩ nwʋ wɔ dɩyɛzumanlɛ eyi nu.

KEZIMƆ GYEHOVA HILELI YIZILAYAMAA NƖ ƆHƲANƖ

4-5. Mɩnla ɔhʋanɩ zʋ yɛ Gyehova hileli kɛɛ nɩ iluwa Mosisi zʋ ikilee yi mmenii ɔhʋanɩ a? (Kila Ɔwɩɛnɩlɛ Aɣanɩ yɩ anyunu mfonyini yi.)

⁴ Gyehova yɩlɩ Mosisi kɛɛ ilí Yizilayamaa nɩ bɛ anyunu ma bɔzʋ̃ Igyibiti bɛyɩ bɔ nwʋ. Na ɩmanlɩ Yizilayamaa nɩ dasɩlɛ mɔɔ idi munli mɔɔ ɩkɛma bɔkɔnwʋ kɛɛ mɛyɩ Gyehova yɛ iluwa Mosisi zʋ ikilee bɔ ɔhʋanɩ a. Kɛ ndianwʋ nɩ, nɩ awulo kyɩ̃ a iduwa mununkumi fadumi zʋ ikile bɔ ɔhʋanɩ, na awulo two sʋ̃ a iduwa sɩnɩ fadumi zʋ ɩyɛ zɔ. (Ɛkɩ. 13:21) Mosisi lili fadumi yɩ mɛda, na mɛyɩ yɛ ilili Yizilayamaa yɩ bɛ anyunu ɩhɔlɩ Ngyemvile Kɔkɔlɔ yɩ nwʋ a. Mmɩlɩ mɔ bɔhɔ bɛhalɩlɩ ngyemvile yɩ mɛda na bɔnwʋnlɩ kɛɛ Igyibitimaa yɩ dʋwa bɛ nɩ, bo kunlu duli iluwakɛɛ nɩ bosunzu kɛɛ bokohũhũ bɛ. Bɛhanlɩ kɛɛ ntɩyasɩ íni numɔ kɛɛ Mosisi ɩ nɩɩ bɛ ɣalɩ Ngyemvile Kɔkɔlɔ yɩ nwʋ. Naasʋ̃ nɩ ɩ́dɩ zɔ kʋlaa. Gyehova yɛ ɩhyɛlɩ da iluwalɩ Mosisi zʋ ɩvalɩ yi mmenii ɩhɔlɩ kɛ a. (Ɛkɩ. 14:2) Akʋ̃ Nyamɩnlɩ luwalɩ nnwʋánlɩ ɔhʋanɩ be zʋ ileli bɛ.—Ɛkɩ. 14:​26-28.

⁵ Wɔ eyi mɛda alʋbɔ 40 nɩ, Mosisi hɔlɩ zʋlɔ nyianlɩ anwʋlazʋ kɛɛ nɩ Gyehova iduwaa mununkumi fadumi yi zʋ ikehile yi mmenii ɔhʋanɩ wɔ ɛsɛlɛ yɩ zʋ. a Mmɩlɩ be, Gyehova valɩ fadumi yi ziyeli Mosisi yɩ ɛdamɛ aliyia yɩ zʋ, dɩka mɔɔ nɩ Yizilayamaa munwala bɔkɔnwʋ yɩ. (Ɛkɩ. 33:​7, 9, 10) Nɩ Gyehova ɩzʋ̃ fadumi yi nu ɩtɩndɛ ikile Mosisi, na mɛyɩ sʋ̃ ɩfa ɔhʋanɩhilelɛ mɔɔ ɩzʋ̃ Gyehova kɛnɩ nɩ ɩma yi mmenii. (Ndw. 99:7) Yizilayamaa yɩ nyianlɩ dasɩlɛ petee mɔɔ ikile kɛɛ nɩ Gyehova luwa Mosisi zʋ ikilee bɔ ɔhʋanɩ.

6. Kɛ Yizilayamaa nɩ yɛlɩ bɛ dɩyɛ zeli wɔ Gyehova yɩ ɔhʋanɩhilelɛ nwʋ a? (Nɔmɛsɩ 14:​2, 10, 11)

⁶ Alɔbɔ odwokɔ yɛ lɛ kɛɛ, Yizilayamaa sʋ̃maa wuli bɛ anyɩ gualɩ dasɩlɛ petee mɔɔ nɩ ikile kɛɛ Mosisi ɩtɩndɛɛ ɩkɛma Gyehova nɩ zʋ. (Kɩnga Nɔmɛsɩ 14:​2, 10, 11.) Mbɔmɩ sʋ̃maa yɛ bɔbʋlɩ kɛɛ bekele kediã nu kɛɛ Gyehova luwa Mosisi zʋ ikilee bɔ ɔhʋanɩ a. Iluwa eyi ti, Gyehova ɩáma ɔzɔ awʋbɔ sandɩnlɩ nɩ bɔkɔ anʋhʋba azɩlɛ yɩ zʋ.—Nɔ. 14:30.

7. Bɛzabɛ mɔɔ bɛvalɩ Gyehova yɩ ɔhʋanɩhilelɛ bɛyɛlɩ egyima nɩ, bo nu be yɛ lɛ aninyiammɔ a? (Nɔmɛsɩ 14:24) (Kila mfonyi ni yi sʋ̃.)

⁷ Naasʋ̃ nɩ Yizilayamaa yɩ be wɔ kɛnɩ a, nɩ bɛfa Gyehova yɩ ɔhʋanɩhilelɛ bɛyɛ egyima. Kɛ ndianwʋ nɩ, Gyehova hanlɩ kɛɛ: ‘Kelɛb hɔlɩ zʋlɔ valɩ yɩ ahʋnlɩnɩ munwala lili mɩ mɛda.’ (Kɩnga Nɔmɛsɩ 14:24.) Nyamɩnlɩ yilalɩ Kelɛb, na ɩmanlɩ yɩ sa po hanlɩ azɩlɛ be mɔɔ nɩ ɩla yɩ ahʋnlɩnɩ zʋ wɔ Keenanɩ. (Dwh. 14:​12-14) Yizilayamaa mɔɔ benyianlɩ ɔnwʋmɔ ɔhʋanɩ bɔhɔlɩ anʋhʋba azɩlɛ yɩ zʋ nɩ sʋ̃ yɛlɩ Gyehova yɩ ɔhʋanɩhilelɛ mɔɔ yɛkɛva yɛkɛyɛ egyima nɩ nwʋ ndianwʋba. Mmɩlɩ mɔ Dwohyuwa ɣa ziyeli Mosisi yɩ agyia nu kɛɛ Yizilaya anyunumililɛvʋlɔ nɩ, “bɛlalɩ annidi kezile ali behileli yi wɔ yɩ nnwʋanlɩ eɣile munwala nu.” (Dwh. 4:14) Eyi ti, Gyehova yilalɩ bɛ na ɩmanlɩ bɔhɔlɩ anʋhʋba azɩlɛ yɩ zʋ.—Dwh. 21:​43, 44.

8. Kezimɔ Gyehova hileli yi mmenii ɔhʋanɩ wɔ awulombunli yi bɛ mmɩlɩ zʋ nɩ, kilehile numɔ. (Kila mfonyi ni yi sʋ̃.)

⁸ Alʋbɔ sʋ̃maa mɛda nɩ, Gyehova yɩlɩ ndɛnɩwuwalɛmaa kɛɛ behilé yi mmenii ɔhʋanɩ. Mɛyɩ mɛda wɔ awulombunli yi bɛ mmɩlɩ zʋ nɩ, Gyehova yɩlɩ nkɔmɩhyɛmaa kɛɛ behilé yi mmenii ɔhʋanɩ. Awulombunli mɔɔ nɩ bedi  nɔhʋanlɛ nɩ, bediyeli ɔhʋanɩhilelɛ mɔɔ nkɔmɩhyɛmaa nɩ va manlɩ bɛ nɩ. Kɛ ndianwʋ nɩ, Bulombunli Devidi zʋ̃ kãnwʋazɩ nu leli ɛdɩnyɩanlɛ mɔɔ nkɔmɩhyɛnii Netanɩ va manlɩ yɩ nɩ dianlɩ nu. (2 Sa. 12:​7, 13; 1 Mm. 17:​3, 4) Bulombunli Gyehohyafatɩ valɩ yɩ nwʋ dianlɩ ɔhʋanɩhilelɛ mɔɔ nkɔmɩhyɛnii Gyehazɩyɛlɩ va manlɩ yɩ nɩ zʋ, na ɩhyɛlɩ Dwuudamaa nɩ ɛzɩzɩbɛ kɛɛ ‘benyiá Nyamɩnlɩ yɩ nkɔmɩhyɛmaa yɩ nu dedi.’ (2 Mm. 20:​14, 15, 20) Mmɩlɩ mɔ Bulombuli Hɛzɩkaya yɩ nwʋ hyɩlɩlɩ yɩ nɩ, ɩbɩbɛlɩ mmʋwalɩyɛ wɔ nkɔmɩhyɛnii Ayɩzaya kɛnɩ. (Ayɩ. 37:​1-6) Mmɩlɩ bela mɔ awulombunli yi lili Gyehova yɩ ɔhʋanɩhilelɛ zʋ nɩ, Gyehova yilalɩ bɛ na ɩwɔlɩ manlɩ yɩ nwʋ banɩ. (2 Mm. 20:​29, 30; 32:22) Ankɩ ɩsɛ kɛɛ eyi ma abiyela nwʋ kɛɛ Gyehova iluwa nkɔmɩhyɛmaa yɩ zʋ ikilee yi mmenii ɔhʋanɩ. Naasʋ̃ awulombunli sʋ̃maa nɩɩ Yizilayamaa be bɛátiye Gyehova yɩ nkɔmɩhyɛmaa nɩ.—Gyɛ. 35:​12-15.

KEZIMƆ GYEHOVA HILELI ƆWƆKƖ KILISINYIAMAA NƖ ƆHƲANƖ

9. Aninyiammɔ yɛ Gyehova luwalɩ bɔ zʋ hileli ɔwɔkɩ Kilisinyiamaa nɩ ɔhʋanɩ a? (Kila mfonyi ni yi sʋ̃.)

⁹ Wɔ ɔlʋbɔ yaalɛ mɔɔ ili bɔmʋnlɩ Y.M. nu nɩ, Gyehova hyɩhyɛlɩ Kilisinyianɩ asafʋ yɩ. Kɛ Gyehova hileli ɔwɔkɩ Kilisinyianɩ asafʋ yɩ ɔhʋanɩ zeli a? Ɩyɩlɩ Gyisɛsɩ kɛɛ asafʋ yɩ yi ti. (Ɛfɩ. 5:23) Naasʋ̃ Gyisɛsɩ yɩzayɩ ɩáfa ɔhʋanɩhilelɛ ɩbɩlɛɛ adʋwavʋlɔ yɩ nkʋ̃kʋ̃ nkʋ̃kʋ̃. Mfomi iluwalɩ asʋ̃mavʋlɔ nɩɩ mbanimbani mɔɔ nɩ bɔwɔ Gyelusalamɩ nɩ zʋ ihileli asafʋ yɩ ɔhʋanɩ. (Egy. 15:​1, 2) Akʋ̃ sʋ̃, bɛyɩlɩ mbanimbani kɛɛ belí asafʋ yɩ anyunu.—1 Tɛs. 5:12; Tay. 1:5.

10. (a) Kɛ ɔwɔkɩ Kilisinyiamaa nɩ bo nu sʋ̃maa yɛlɩ bɛ dɩyɛ zeli wɔ ɔhʋanɩhilelɛ mɔɔ bɛ sa hanlɩ nɩ nwʋ a? (Egyima 15:​30, 31) (b) Mɩnla ti mɔɔ abiyemmɔ bɛáde bɛzabɛ mɔɔ Gyehova duwa bɔ zʋ kile yi mmenii ɔhʋanɩ nɩ betiã nu a? (Kila alɩka mɔɔ ise “ Sianti Mɔɔ Abiyemmɔ Bɔbʋ Dasɩlɛ Petee Nɩ.”)

¹⁰ Asʋ̃ ɔwɔkɩ Kilisinyiamaa nɩ valɩ ɔhʋanɩhilelɛ yɛlɩ egyima a? Bo nu sʋ̃maa valɩ anyɩnlɩlelɛ leli ɔhʋanɩhilelɛ dianlɩ numɔ. Nɔhʋanlɛ nu nɩ, “belili fɛlɛkʋ̃ kezile wɔ akɛnɣazilɛ” mɔɔ benyianlɩ nɩ nwʋ. (Kɩnga Egyima 15:​30, 31.) Na nnɛ sʋ̃, mɩnla ɔhʋanɩ zʋ yɛ Gyehova kile yi mmenii ɔhʋanɩ a?

KEZIMƆ GYEHOVA KILE YƐ ƆHƲANƖ WƆ NNƐ

11. Ma ndianwʋ fa kile kezimɔ Gyehova hileli bɛzabɛ mɔɔ beli nninyeni anyunu nɩ ɔhʋanɩ wɔ yɛ mmɩlɩ yɩ nu.

¹¹ Nnɛ sʋ̃, Gyehova kɔ zʋlɔ kile yi mmenii ɔhʋanɩ. Ɩyɛ zɔ iluwa yi Odwokɔ yɩ nɩɩ yɩ Ɣa mɔɔ ɩdɩ asafʋ yɩ yi ti nɩ zʋ. Asʋ̃ yɛnwʋ dasɩlɛ be  mɔɔ ikile kɛɛ Nyamɩnlɩ kɔ zʋlɔ duwa mmenii zʋ kile yi mmenii ɔhʋanɩ a? Nyɛ. Kɛ ndianwʋ nɩ, mɔwʋ kila mɔɔ izili wɔ ɔlʋbɔ 1870 mɛda nɩ. Charles Taze Russell nɩɩ yi mmenii nyianlɩ ntɩyasɩ kɛɛ ɔlʋbɔ 1914 kɛyɛ ɔlʋbɔ mɔɔ nwʋmɔ hyinyia wɔ Nyamɩnlɩ Bulombunlililɛ nu. (Da. 4:​25, 26) Bayɩbʋlʋ nu ɛbɩbɛlɛnu mɔɔ bɛyɛlɩ nɩ, yɛ ɩmanlɩ bɔnwʋnlɩ eyi a, na ɩmanlɩ benyianlɩ anwʋlazʋ kɛɛ bɔkɔnwʋ nkɔmɩhyɛ eyi numɔɣalɛ. Asʋ̃ nɩ Gyehova yɛ ɩbʋwaa bɛ wɔ Bayɩbʋlʋ nu ɛbɩbɛlɛnu mɔɔ nɩ bɛyɛɛ yɩ nu a? Nyɛ, yɩzayɩ yɛ nɩ ɩbʋwaa bɛ a. Ndwokɔ mɔɔ izizili wɔ 1914 nɩ manlɩ ɩlalɩ ali kɛɛ, Nyamɩnlɩ Bulombunlililɛ wɔlɩ yɩ tʋ kɛɛ idii tumi wɔ ɔzɔ mmɩlɩ yɩ. Oyuwadɩ Kʋnɛ I bukoli nɩ, adimakɛlɛ, azɩlɛwʋsʋlɛ, nɩɩ kɔmɩ sʋ̃ ɣalɩ. (Lk. 21:​10, 11) Amba, nɩ Gyehova iluwa Kilisinyiamaa mmenyia nɔhʋanlɛmaa eyimmɔ zʋ ɩbʋwaa yi mmenii.

12-13. Mɩnla nhyɩhyɛlɩyɛ yɛ mmeliyema mɔɔ beli nninyeni anyunu nɩ yɛlɩ wɔ Oyuwadɩ Kʋnɛ II yɩ nu mɔɔ ɩmanlɩ dasɩlɛlilɛ egyima yɩ nyanlɩ anyunumihɔlɛ a?

¹² Bɛmá yehila mɔɔ izili wɔ Oyuwadɩ Kʋnɛ II yɩ nu sʋ̃. Mmɩlɩ mɔ mmeliyema mɔɔ beli nninyeni anyunu wɔ oyuwadɩ munwala egyimayɛlɛdɩka yi ti zunzunli Yikile 17:8 nwʋ nɩ, bɛɣa bɔnwʋnlɩ kɛɛ, kɛ ɔzɔ kʋnɛ yɩ yɛ ɩkɔhɔ kɛva Amagadɔnʋ kɛɣa a, mfomi ɩkɛma azʋ̃nudwolɩyɛ ɛgyɩkɩ̃ɩ̃ kɛɣa mɔɔ ɩkɛma yekenyia ɔnwʋmɔ ɔhʋanɩ yɛkɛyɛ dasɩlɛlilɛ egyima yɩ sʋ̃maa. Meti mmeliyema mɔɔ beli nninyeni anyunu nɩ, bɛyɛlɩ Ɔwɩɛnɩlɛ Aɣanɩ Giliyadɩ Bayɩbʋlʋ Sukuulu bɛva bɛdɩdɩlɩ odwokɔbadɛlɛlɛmaa ama bɛayɛ dasɩlɛlilɛ egyima yɩ wɔ oyuwadɩ munwala, ɩávalɩ nwʋmɔ kɛɛ ɔzɔ mmɩlɩ yɩ, nɩ ɩdɩ kɛɛ mɔɔ ntɩyasɩ íni numɔ kɛɛ bɛkɛyɛ zɔ nɩ. Mmɩlɩ mɔ nɩ kʋnɛ yɩ da numɔ po nɩ, nɩ odwokɔbadɛlɛlɛmaa nɩ bɛyɛɛ dasɩlɛlilɛ egyima yɩ. Akʋ̃ sʋ̃, sʋ̃mɩvʋlɔ nɔhʋanlɛvʋlɔ nɩ yɛlɩ Tiyokɩlasi Ɔzʋ̃mɩnlɛ Sukuulu b nwʋ nhyɩhyɛlɩyɛ mɔɔ bɛkɛva bɛkɛdɩdɩ asafʋ yɩ nu maa munwala ma bɛkɛɣa kɛyɛ odwokɔbahanlɛmaa nɩɩ ehilehilelɛmaa baaba. Boluwalɩ ɔzɔ ɔhʋanɩ yɩ zʋ bɛdɩdɩlɩ Nyamɩnlɩ mmenii bɛmanlɩ dasɩlɛlilɛ egyima kezile mɔɔ nɩ ɩla bɛ anyunu nɩ.

¹³ Nnɛ, yɛkʋla yɛnwʋ yɩ petee kɛɛ, nɩ Gyehova ikilee yi mmenii ɔhʋanɩ wɔ ɔzɔ mmɩlɩ yɩ mɔ nɩ nninyeni nu yɛ sɩ nɩ. Wɔ Oyuwadɩ Kʋnɛ II mɛda nɩ, Gyehova yi mmenii mɔɔ bɔwɔ amanlɩ sʋ̃maa nu benyia fanwʋdi nɩɩ azʋ̃nudwolɩyɛ ɛgyɩkɩ̃ɩ̃ mɔɔ bɛfa bɛkã odwokɔba yɩ. Nɔhʋanlɛ nu nɩ, egyima yɩ izo mma baaba.

14. Mɩnla ti mɔɔ yɛkɔhʋla yekenyia anwʋlazʋ wɔ ɔhʋanɩhilelɛ mɔɔ Gyehova ahyɩhyɛdɩ yɩ nɩɩ asafʋ nu mbanimbani fa ma yɛ nɩ nu a? (Yikile 2:1) (Kila mfonyi ni yi sʋ̃.)

¹⁴ Nnɛ, Ɔhʋanɩhilelɛ Okuwu yi nu maa yɩ kɔ zʋlɔ pɩbɛ ɔhʋanɩhilelɛ wɔ Kɩlayɩsɩ kɛnɩ. Bɛpɛ kɛɛ ɔhʋanɩhilelɛ mɔɔ bɛfa bɛma mmeliyema nɩ da Gyehova yɩ adwɩnɩ wɔ nninyeni nwʋ nɩ ali. Na boduwa mansini zʋ ehilelalɛmaa nɩɩ asafʋ nu mbanimbani zʋ bɛfa ɔhʋanɩhilelɛ bɛma asafʋ yɩ. c Mbanimbani mɔɔ bɔvɔ ngɔlɔ bɛ nɩ wɔ “Kɩlayɩsɩ yɩ sa nyini zʋ.” (Kɩnga Yikile 2:1.) Amba, mbanimbani eyimmɔ bɛáli munli na ɩyɛ a bedi mfʋmɩ. Kɛmɔ nɩ ɩyɛ a Mosisi nɩɩ Dwohyuwa di mfʋmɩ nɩ, ɔzɔ la yɛ nɩ ɩyɛ a asʋ̃mavʋlɔ yɩ sʋ̃ di mfʋmɩ a. (Nɔ. 20:12; Dwh. 9:​14, 15; Wul. 3:23) Yɛkʋla yɛnwʋ yɩ petee kɛɛ Kɩlayɩsɩ ɩlanwʋ la ikilee sʋ̃mɩvʋlɔ nɔhʋanlɛvʋlɔ yɩ nɩɩ mbanimbani yi ɔhʋanɩ, na ɩkɔhɔ zʋlɔ kɛyɛ zɔ “kɔbʋmɩ oyuwadɩ awielɩyɛ.” (Mt. 28:20) Meti yɛwɔ sianti baaba be ti mɔɔ yɛkɔhʋla kenyia anwʋlazʋ wɔ ɔhʋanɩhilelɛ mɔɔ Gyisɛsɩ iluwa mbanimbani eyimmɔ zʋ fa ma yɛ nɩ nu.

SƐ YƐKƆ ZƲ YƐFA GYEHOVA YƖ ƆHƲANƖHILELƐ YƐYƐ EGYIMA A, YENYIA ZƲLƆ MFASƲ

15-16. Mɩnla yɛ osuma wɔ bɛzabɛ mɔɔ bɛvalɩ Gyehova yɩ ɔhʋanɩhilelɛ bɛyɛlɩ egyima nɩ bo ozumanlɛnwʋnlɛ yɩ nu a?

¹⁵ Sɛ yɛkɔ zʋ yɛfa Gyehova yɩ ɔhʋanɩhilelɛ yɛyɛ egyima a, yenyia nyilalɛ sʋ̃maa nnɛ po. Kɛ ndianwʋ nɩ, Andy nɩɩ yɩ yɩ Robyn valɩ fʋlɔdulɛ mɔɔ mɛyɩ yɛ lɛ kɛɛ, yɛdɩdɩ́ nninyeni zʋ wɔ yɛ ɛbɩlawɔlɛ nu nɩ yɛlɩ egyima. (Mt. 6:22.) Eyi ti, bɔhʋla bɔwʋwalɩ wɔ asafʋ aliyiagyinanlɛ egyima yɩ nu. Robyn kã kɛɛ: “Nɩ yɛta yɛbʋwa nniyia ngyɩkɩ̃ɩ̃ ngyɩkɩ̃ɩ̃ mɔɔ gyaalɩ ɩáhɩnla nwʋmɔ po nu. Nɩ mɩpɛ mfonyini dualɛ baaba, naasʋ̃ nɩ ɩsɛ kɛɛ mʋtɔnɩdɔnɩ nninyeni mɔɔ mɩfa mutudua mfonyini nɩ. Mʋdɔnlɩnɩ nɩ, muzunli. Naasʋ̃, dɩkɛɛ Abilehamɩ yɩ yɩ Sɛla nɩ, mizili mɩ kɛnɣa kɛɛ mikehila mɩ anyunu senyii, na milékila mɩ mɛda.” (Hib. 11:15) Mɩnla mfasʋ yɛ benyianlɩ wɔ mɔɔ bɛyɛlɩ nɩ nu a? Robyn dʋwalɩ zʋlɔ kɛɛ: “Yɛ anyɩ le baaba paa, iluwakɛɛ yezi kɛɛ yɛva mɔɔ yɛwɔ nɩ munwatĩĩ yɛma Gyehova. Sɛ yɛyɛɛ egyima mɔɔ Gyehova va ma yɛ nɩ a, ɩma yɛnwʋ kezimɔ oyuwadɩ fʋlɔ yɩ nu kɛyɛ.” Andy ɩ nɩɩ yɩ yɩ yɛ adwɩnɩ, ɩkã kɛɛ: “Yɛfa yɛ mmɩlɩ nɩɩ yɛ anwʋzɩzɩbɛ munwala yɛbʋwa Bulombunlililɛ egyima yɩ.”

¹⁶ Sɛ yɛkɔ zʋ yɛfa Gyehova yɩ ɔhʋanɩhilelɛ yɛyɛ egyima a, mɩnla mfasʋ dɔkʋ̃ yɛ yenyia a? Kɛ ndianwʋ nɩ, mmɩlɩ mɔ Marcia wieli SHS nɩ, iluwa fʋlɔdulɛ mɔɔ inyianlɩ nɩ ti, nɩ ɩpɛ kɛɛ ɩyɛ ɔhʋanɩbukolɛ egyima yɩ be. (Mt. 6:33; Wul. 12:11) Ɩhanlɩ kɛɛ: “Minyianlɩ ɔnwʋmɔ ɔhʋanɩ mɔɔ mɩkɛva mʋkɔhɔ yunivɛsiti alʋbɔ anla mɔɔ mulótuwa hwɩɩ. Naasʋ̃ nɩ mɩpɛ kɛɛ  mɩyɛ sʋ̃maa wɔ Gyehova ɔzʋ̃mɩnlɛ nu. Meti mizili pɔkɔ kɛɛ mʋkɔhɔ sukuulu mɔɔ ɩkɛma mikenyia salɛti egyima mɔɔ ɩkɔwʋwa mɩ ma mikenyia ozukua ɛgyɩkɩ̃ɩ̃ na ɩawʋwa mɩ ma mɩayɛ ɔhʋanɩbukolɛ egyima yɩ. Eyi kɩnla abɔkɔ baaba mɔɔ mizizi wɔ mɩ ɛbɩlawɔlɛ nu nɩ nwʋ. Kakɩ yɩ, mɩ anyɩ ile wɔ mʋ ɔhʋanɩbukolɛ egyima yi nu, na iluwakɛɛ mɩzamɩ mʋkʋla mikile mmɩlɩ dʋdʋ mɔɔ mɩkɛva mɩkɛyɛ egyima nɩ ti, ɩma mʋkʋla mɩfa mɩ mmɩlɩ yɩ be mʋkɔ mɩyɛ egyima wɔ Bɛtɩlɩ, na minyia ɔnwʋmɔ ɔhʋanɩ mvʋlɔ wɔ Gyehova ɔzʋ̃mɩnlɛ nu.”

17. Sɛ yɛkɔ zʋ yɛfa Gyehova yɩ ɔhʋanɩhilelɛ yɛyɛ egyima a, mɩnla nyilalɛ mvʋlɔ yɛ yekenyia a? (Ayɩzaya 48:​17, 18)

¹⁷ Ɩyɛ a, yɛ sa kã fʋlɔdulɛ mɔɔ ɩbɔ yɛ nwʋ banɩ wɔ Gyehova ahyɩhyɛdɩ yɩ kɛnɩ. Kɛ ndianwʋ nɩ, bɔbɔ yɛ kɔkɔ wɔ nnwʋnlamɩ ɔfʋã nu nninyeni sʋ̃maa ɩbɛlɛ nɩɩ nninyeni mɔɔ ɩkɛma yekowuli Nyamɩnlɩ yɩ mmɛla zʋ nɩ nwʋ. Wɔ eyi nu sʋ̃, sɛ yetiye Gyehova yɩ ɔhʋanɩhilelɛ a, yenyia zʋlɔ mfasʋ. Ɩma yenyia tile ɔwʋwaba baaba, na ɩáma adwɩnɩndwɩnɩ mbʋanlɩ mbʋanlɩ hyɛ yɛ zʋ. (1 Tim. 6:​9, 10) Eyi ti, yɛkʋla yɛzʋ̃ yɛ ahʋnlɩnɩ munwala nu yɛyɛ sʋ̃maa wɔ Gyehova ɔzʋ̃mɩnlɛ nu, na eyi kɛma yɛ anyɩ kele baaba, yekenyia azʋ̃nudwolɩyɛ, na yɛ ahʋnlɩnɩ ɩadɔ ye kunlu.—Kɩnga Ayɩzaya 48:​17, 18.

18. Mɩnla ti mɔɔ ezi wʋ kɛnɣa kɛɛ ɔkɔhɔ zʋ kɛva Gyehova yɩ ɔhʋanɩhilelɛ kɛyɛ egyima a?

¹⁸ Pɩlazunɛ bela íni nwʋmɔ kɛɛ, Gyehova kɔhɔ zʋ koluwa mmenii zʋ kehile yi mmenii ɔhʋanɩ wɔ anwʋhyɩlɩyɛ kezile yi nu kɔbʋmɩ Alʋbɔ Abʋmɩ Tumililɛ yɩ awielɩyɛ. (Ndw. 45:16) Ɔzɔ mmɩlɩ yɩ nɩ, asʋ̃ yɛkɔhɔ zʋ yɛkɛva ɔhʋanɩhilelɛ mɔɔ bɛkɛva kɛma yɛ nɩ kɛyɛ egyima, wɔ mmɩlɩ po mɔ ɩsɛ kɛɛ yɛfa mɔɔ yɛzayɛ yɛpɛ nɩ yetiã ahanlɩ nɩ a? Sɛ yɛkɔhʋla kɛyɛ zɔ wɔ ɔzɔ mmɩlɩ yɩ a, gyɩsɛ yɛfa ɔhʋanɩhilelɛ mɔɔ Gyehova fa ma yɛ wɔ nnɛ nɩ yɛyɛ egyima. Meti, bɛmá yɛva Gyehova yɩ ɔhʋanɩhilelɛ yɛyɛ egyima mmɩlɩ munwala, mɔɔ ɔhʋanɩhilelɛ mɔɔ iduwa mbanimbani mɔɔ ɩyɩ bɛ kɛɛ behilá yɛ zʋ fa ma yɛ nɩ kɩnla nwʋ. (Ayɩ. 32:​1, 2; Hib. 13:17) Na mmɩlɩ mɔ yɛyɛɛ zɔ nɩ, sa yɛkʋla yenyia anwʋlazʋ kezile wɔ yɛ Ɔhʋanɩhilelɛvʋlɔ Gyehova nu. Mɛyɩ yɛ ɩbɔ yɛ nwʋ banɩ wɔ nninyeni mɔɔ ɩkɔhʋla ɩkɛzɩkɛ yɛ nɩɩ yɩ avinli abusunwawɔlɛ nwʋ a, na ikilee yɛ ɔhʋanɩ ma yekenyia nnwʋanlɩ mɔɔ íni awielɩyɛ wɔ oyuwadɩ fʋlɔ yɩ nu.