1. Mɩnla mmɩlɩ yɛ bɛzabɛ mɔɔ bɔvɔ ngɔlɔ bɛ nɩ munwatĩĩ kɔhɔ sʋlɔ a?

 ALƲBƆ be mɔɔ idua nu nɩ, nɩ Gyehova yi mmenii bizia bɔ nwʋ kɛɛ, ‘Mɩnla mmɩlɩ yɛ bɛkɛva Kilisinyiamaa mɔɔ bɔvɔ ngɔlɔ bɛ mɔɔ bɛha nɩ bɔkɔhɔ sʋlɔ a?’ Nɩ yesunzu kɛɛ ebiye a, wɔ Amagadɔnʋ kʋnɛ mɛda nɩ, bɛzabɛ mɔɔ bɔvɔ ngɔlɔ bɛ nɩ bo nu be kɛhalɩ Paladayɩsɩ azɩlɛ yɩ zʋ ɛgyɩkɩ̃ɩ̃. Naasʋ̃ wɔ July 15, 2013 Ɔwɩɛnɩlɛ Aɣanɩ yɩ nu nɩ, yezumanlɩ kɛɛ, bɛkɛva bɛzabɛ mɔɔ bɔvɔ ngɔlɔ bɛ mɔɔ bɛha wɔ azɩlɛ yɩ zʋ munwala bɔkɔhɔ sʋlɔ ansaana Amagadɔnʋ kʋnɛ yɩ ɩawɔ yɩ tʋ.—Mt. 24:31.

2. Mɩnla odwokɔ yɛ ebiye a abiyemmɔ keɣizia a, na mɩnla yɛ yɛbazunzu nwʋmɔ wɔ dɩyɛzumanlɛ eyi nu a?

² Naasʋ̃ ebiye a, ye nu be keɣizia kɛɛ: Mɩnla yɛ ɩkɔdʋ Kɩlayɩsɩ yi ‘mmuwuanɩ mvʋlɔ’ mɔɔ bɛkɛva nɔhʋanlɛlilɛ bɔkɔzʋ̃mɩ Gyehova wɔ “anwʋhyɩlɩyɛ kezile” yi nu a? (Dwɔ. 10:16; Mt. 24:​21, NWT) Nnɛ, idide mmuwuanɩ mvʋlɔ yɩ be kɛɛ, sɛ bɛfa be mmeliyema mmenyia nɩɩ mmaalɛ mɔɔ bɔvɔ ngɔlɔ bɛ nɩ bɔkɔ sʋlɔ a, belényia abiye mɔɔ ɩkɔwʋwa bɛ anzɛnyɩɩ ikehile ɔhʋanɩ bɛ. Bɛmá yehila Bayɩbʋlʋ nu ndwokɔ anwɩ̃ be mɔɔ ebiye a, ɩma bɛ adwɩnɩ yɛ bɛ zɔ nɩ. Akʋ̃ yekozunzu sianti azʋlɔtʋ be ti mɔɔ íni kɛɛ bɛma eyi dide bɛ nɩ nwʋ.

MƖNLA YƐ ILÉSI A?

3-4. Mɩnla adwɩnɩ yɛ ebiye a abiyemmɔ kenyia a, na mɩnla ti a?

³ Abiyemmɔ sunzu kɛɛ, sɛ bɛzabɛ mɔɔ bɔvɔ ngɔlɔ bɛ mɔɔ bɛdɩ Ɔhʋanɩhilelɛ Okuwu yi nu maa béni kɛnɩ dɔkʋ̃ a, ebiye a mmuwuanɩ mvʋlɔ yɩ be bɔzʋ̃ nɔhʋanlɛ yɩ nu bɛkɛyɩ bɔ nwʋ iluwakɛɛ belényia abiye ma ikehile ɔhʋanɩ bɛ. Ebiye a bɛtɩ nɣanlɩ zɔ iluwa Bayɩbʋlʋ nu ndwokɔ be ti. Bɛmá yezunzu numɔ anwɩ̃ nwʋ. Mɔɔ ili bɔmʋnlɩ nɩ falɩ Ɔsɔfʋ Ebani Gyehoyada nwʋ. Nɩ ɩdɩ Nyamɩnlɩ sʋ̃mɩvʋlɔ nɔhʋanlɛvʋlɔ.  Ɩ nɩɩ yɩ yɩ Gyehohyabɩyatɩ wɔlɩ kuakula benyia Gyehowahyɩ nwʋ banɩ, na bɔwʋwalɩ yɩ ma ɩɣa ɩyɛlɩ bulombunli baaba mɔɔ idi nɔhʋanlɛ. Mmɩlɩ mɔ nɩ Gyehoyada da azɩ nɩ, Gyehowahyɩ hɔlɩ zʋlɔ zʋ̃mɩnlɩ Gyehova. Naasʋ̃ mmɩlɩ mɔ Gyehoyada wuli nɩ, ɩákyɛ yɛ Gyehowahyɩ wɔlɩ yɩ tʋ kɛɛ ɩyɛɛ nninyeni tanɩ a. Idiyeli mbanimbani mɔɔ nɩ bɛázʋ̃mɩ Gyehova nɩ, na iyiakili Gyehova ɔzʋ̃mɩnlɛ.—2 Mm. 24:​2, 15-19.

⁴ Mɔɔ ɩtɔ zʋlɔ anwɩ̃ yɩ falɩ ɔlʋbɔ yaalɛ mɔɔ ɩtɔ zʋlɔ anwɩ̃ Kilisinyiamaa yɩ nwʋ. Sʋ̃mavʋlɔ mɔɔ itualɩ yɩ tʋ mɔɔ iwuli yɛ lɛ Dwɔɔnʋ. Mmɩlɩ mɔ nɩ ɩda azɩ nɩ, ɩwʋwalɩ Kilisinyiamaa sʋ̃maa ma bɔhɔlɩ zʋlɔ bɔzʋ̃mɩnlɩ Gyehova. (3 Dwɔ. 4) Kɛmɔ asʋ̃mavʋlɔ nɔhʋanlɛmaa mvʋlɔ yɛlɩ nɩ, Dwɔɔnʋ sʋ̃ wɔlɩ mmɔdɩnɩ kɛɛ ɩkɔwɔ asafʋ yɩ nwʋ banɩ wɔ ɔvʋakɩlɛmaa be ehilehilelɛ nwʋ. (1 Dwɔ. 2:18; 2 Tɛs. 2:7.) Naasʋ̃ wɔ Dwɔɔnʋ yi owulo mɛda nɩ, Kilisinyiamaa sʋ̃maa hɔ lili ɔvʋakɩlɛmaa be ehilehilelɛ mɛda. Wɔ alʋbɔ ɛgyɩkɩ̃ɩ̃ be nu nɩ, bɛvalɩ nyɛlɩyɛ tanɩ bɛzɩkɛlɩ asafʋ yɩ pɔtɔɔ zɛ.

5. Mɩnla adwɩnɩ yɛ íni kɛɛ yɛma Bayɩbʋlʋ nu ndwokɔ anwɩ̃ eyi ɩma yenyia a?

⁵ Asʋ̃ Bayɩbʋlʋ nu ndwokɔ anwɩ̃ eyi kile kɛɛ, sɛ bɛfa bɛzabɛ mɔɔ bɔvɔ ngɔlɔ bɛ nɩ bɔkɔ sʋlɔ a, Kɩlayɩsɩ yi mmuwuanɩ mvʋlɔ yɩ keyiaki Gyehova ɔzʋ̃mɩnlɛ dɩkɛɛ Gyehowahyɩ, anzɛnyɩɩ bekeli ɔvʋakɩlɛmaa mɛda dɩkɛɛ mɔɔ abiyemmɔ yɛlɩ wɔ asʋ̃mavʋlɔ yɩ bo owulo mɛda nɩ a? Eyi ilési kyɩ̃. Sa yɛkʋla yenyia anwʋlazʋ kɛɛ, sɛ Kilisinyiamaa mɔɔ bɔvɔ ngɔlɔ bɛ nɩ kɔ sʋlɔ a, mmuwuanɩ mvʋlɔ yɩ kɔhɔ zʋlɔ kɔzʋ̃mɩ Gyehova na ikehila bɛ. Mɩnla ti mɔɔ yɛlɛ ɔzɔ anwʋlazʋ yɩ a?

NƆHƲANLƐ ƆZƲ̃MƖNLƐ ƖLƐ́SƖKƐ KYƖ̃

6. Mɩnla mmɩlɩ azʋlɔtʋ asã yɛ yɛbazunzu nwʋmɔ a?

⁶ Mɩnla ti mɔɔ yɛkɔhʋla kenyia anwʋlazʋ kɛɛ sɛ nninyeni nu yɛ sɩ po a, nɔhʋanlɛ ɔzʋ̃mɩnlɛ ɩlɛ́sɩkɛ a? Iluwa mɔɔ yezuma yɛvalɩ mmɩlɩ mɔ yɛda numɔ yɩ nwʋ nɩ ti. Mmɩlɩ mɔ yɛda numɔ eyi dɩ sʋnʋnkʋ̃ kʋlaa wɔ tɩɩtɩɩ Yizilayamaa nɩɩ ɔlʋbɔ yaalɛ mɔɔ ɩtɔ zʋlɔ anwɩ̃ Kilisinyiamaa bɛ mmɩlɩ zʋ nɩ nwʋ. Bɛmá yezunzu mmɩlɩ asã eyimmɔ nu ɔkʋ̃ bela nwʋ: (1) Ɔwɔkɩ Yizilayamaa bɛ mmɩlɩ zʋ, (2) mmɩlɩ mɔ asʋ̃mavʋlɔ yɩ wuli mɛda nɩ, nɩɩ (3)  yɛ mmɩlɩ yɩ, mɔɔ ɩdɩ “mmɩlɩ mɔ bɛkɛyɛ nninyeni munwatĩĩ mvʋlɔ nɩ.”—Egy. 3:21.

7. Mɩnla ti mɔɔ Yizilayamaa mɔɔ nɩ bedi nɔhʋanlɛ nɩ, bɛ padi iákolɔ mmɩlɩ mɔ bɔnwʋnlɩ kɛɛ awulombunli nɩɩ Yizilayamaa nɣalɩyɛ nɩ bɛyɛɛ nninyeni tanɩ nɩ a?

⁷ Ɔwɔkɩ Yizilayamaa bɛ mmɩlɩ zʋ. Ɩka ɛgyɩkɩ̃ɩ̃ ma Mosisi iwu nɩ, ɩhã ihileli Yizilayamaa nɩ kɛɛ: “Mizi kɛɛ mu owulo mɛda nɩ, bɛkɛyɛ tanɩ sʋ̃maa na bɔkɔhwɩ̃ bɔ nwʋ wɔ ɔhʋanɩ mɔɔ mɩhã kɛɛ boluwá zʋlɔ nɩ nwʋ.” (Dit. 31:29) Akʋ̃ sʋ̃, Mosisi wɔlɩ Yizilayamaa nɩ kɔkɔ kɛɛ, sɛ bɛtɩ atunwa a, bɔkɔhɔ alɔngɔzʋ̃mɩnlɛ nu. (Dit. 28:​35, 36) Ndwokɔ eyimmɔ ɣalɩ numɔ a? Nyɛ. Alʋbɔ sʋ̃maa mɛda nɩ, Yizilaya awulombunli sʋ̃maa yɛlɩ Gyehova zʋ azʋ̃nzɩzɩbɛ na ɩmanlɩ Yizilayamaa nɩ hwɩnlɩ bɔ nwʋ wɔ nɔhʋanlɛ ɔzʋ̃mɩnlɛ nwʋ. Iluwa eyi ti, Gyehova hwɩnlɩ bɛ azʋ̃, na ɩáma bulombunli bela di Yizilaya zʋ tumi dɔkʋ̃. (Izi. 21:​25-27) Naasʋ̃ mmɩlɩ mɔ Yizilayamaa mɔɔ bedi nɔhʋanlɛ nwʋnlɩ kɛɛ Nyamɩnlɩ odwokɔ yɩ ɣa numɔ nɩ, ɩhyɛlɩ bɛ ɛzɩzɩbɛ ma bɔzʋ̃mɩnlɩ yɩ.—Ayɩ. 55:​10, 11.

8. Asʋ̃ ɩsɛ kɛɛ ɩyɛ yɛ nnwʋánlɩ kɛɛ ɔlʋbɔ yaalɛ mɔɔ ɩtɔ zʋlɔ anwɩ̃ Kilisinyianɩ asafʋ yɩ zɩkɛlɩ a? Kilehile numɔ.

⁸ Mmɩlɩ mɔ asʋ̃mavʋlɔ yɩ wuli mɛda nɩ. Asʋ̃ ɩsɛ kɛɛ ɩyɛ yɛ nnwʋánlɩ kɛɛ ɔlʋbɔ yaalɛ mɔɔ ɩtɔ zʋlɔ anwɩ̃ Kilisinyianɩ asafʋ yɩ zɩkɛlɩ a? Anhã. Gyisɛsɩ hanlɩ dianlɩ kɛnɩ kɛɛ ɔvʋakɩlɛmaa sʋ̃maa kɛɣa. (Mt. 7:​21-23; 13:​24-30, 36-43) Sʋ̃mavʋlɔ Pɔɔlʋ, Pita nɩɩ Dwɔɔnʋ zili zʋlɔ owudo kɛɛ, Gyisɛsɩ yɩ nkɔmɩhyɛ yɩ wɔlɩ yɩ tʋ nyianlɩ numɔɣalɛ wɔ ɔlʋbɔ yaalɛ mɔɔ ili  bɔmʋnlɩ yɩ nu po. (2 Tɛs. 2:​3, 7; 2 Pit. 2:1; 1 Dwɔ. 2:18) Wɔ ɔlʋbɔ yaalɛ mɔɔ ɩtɔ zʋlɔ anwɩ̃ yɩ nu nɩ, Kilisinyianɩ asafʋ yɩ zɩkɛlɩ. Mmɩlɩ mɔ adʋwavʋlɔ yɩ bo nu mɔɔ itualɩ tʋ yɩ wuli nɩ, ɩákyɛ yɛ Kilisinyiamaa ɔvʋakɩlɛmaa hɔ hɩnlanlɩ Babilɔnʋ Kezile yi mɔɔ ɩdɩ oyuwadɩ munwala awohwizʋ̃mɩnlɛ bulombunli manlɩ yɩ nwʋ a. Meti, nkɔmɩ mɔɔ Gyisɛsɩ hyɛlɩ nɩ ɣalɩ numɔ.

9. Mɩnla ɔhʋanɩ zʋ yɛ mmɩlɩ mɔ yɛda numɔ yɩ ɩdɩ sʋnʋnkʋ̃ wɔ tɩɩtɩɩ Yizilayamaa nɩɩ ɔlʋbɔ yaalɛ mɔɔ ɩtɔ zʋlɔ anwɩ̃ Kilisinyiamaa bɛ dɩyɛ yɩ nwʋ a?

⁹ “Mmɩlɩ mɔ bɛkɛyɛ nninyeni munwatĩĩ mvʋlɔ.” Mmɩlɩ mɔ yɛda numɔ yɩ dɩ sʋnʋnkʋ̃ wɔ tɩɩtɩɩ Yizilayamaa bɛ mmɩlɩ nɩɩ mmɩlɩ mɔ ɔvʋakɩlɛmaa sʋ̃maa ɣalɩ wɔ ɔlʋbɔ yaalɛ mɔɔ ɩtɔ zʋlɔ anwɩ̃ yɩ nu nɩ nwʋ. Kɛ bɔfʋlɛ mmɩlɩ mɔ yɛda numɔ yɩ a? Yɛta yɛfʋlɛ yɩ oyuwadɩ nhyɩhyɛlɩyɛ tanɩ eyi yɩ “mmɩlɩ mɔ ili awielɩyɛ.” (2 Tim. 3:1) Naasʋ̃ Bayɩbʋlʋ yɩ ma yɛnwʋ kɛɛ “mmɩlɩ mɔ ili awielɩyɛ” yɩ, ɩ nɩɩ mmɩlɩ be mɔ nwʋmɔ hyinyia na ɩwalɩ wɔlɩ yɩ tʋ wɔ mmɩlɩ kʋ̃ nu. Ɔzɔ mmɩlɩ yɩ kɔdʋwa zʋlɔ kɔbʋmɩ kɛɛ Mɛzaya Bulombunlililɛ nɩ kɛma adasamaa keli munli na ɩayɛ azɩlɛ yɩ munwatĩĩ paladayɩsɩ. Mmɩlɩ eyi yɛ bɔfʋlɛ yɩ mmɩlɩ mɔ “bɛkɛyɛ nninyeni munwatĩĩ mvʋlɔ” yɩ a. (Egy. 3:21) Ɩwɔlɩ yɩ tʋ wɔ 1914. Mɩnla nninyeni yɛ bɛyɛlɩ yɩ mvʋlɔ a? Bɔzʋwalɩ Gyisɛsɩ Bulombunli wɔ sʋlɔ. Meti Gyehova zia nyianlɩ abiye mɔɔ ikegyina yɩ agyia nu ikeli tumi, nɔhʋanlɛvʋlɔ Bulombunli Devidi yɩ tʋnii. Naasʋ̃, mmɩlɩ mɔ Gyehova yɛlɩ bulombunlililɛ yɩ fʋlɔ mɛda nɩ, ɩákyɛ bela yɛ ɩwɔlɩ yɩ tʋ kɛɛ ɩlɛ nɔhʋanlɛ ɔzʋ̃mɩnlɛ isiyee kɛnɩ dɔkʋ̃ a! (Ayɩ. 2:​2-4; Izi. 11:​17-20) Asʋ̃ nɔhʋanlɛ ɔzʋ̃mɩnlɛ kɛzɩkɛ dɔkʋ̃ a?

10. (a) Mɩnla yɛ Bayɩbʋlʋ kã falɩ nɔhʋanlɛ ɔzʋ̃mɩnlɛ nwʋ wɔ yɛ mmɩlɩ yɩ nu a? (Ayɩzaya 54:17) (b) Mɩnla ti mɔɔ ɔzɔ nkɔmɩhyɛ yɩ ma yenyia anwʋlazʋ a?

¹⁰ Kɩnga Ayɩzaya 54:17. Dwɩnɩndwɩnɩ nkɔmɩhyɛ eyi nwʋ kila: “Akʋndɩ bela mɔɔ bɛkɛva bɛkɛɣa wʋ zʋ nɩ, ilékyina”! Ndwokɔ eyimmɔ ɩbaa numɔ nnɛ. Ɛhɛlɛlɛdwokɔ mɔɔ ili zʋlɔ yɩ kɔhʋla kɛhyɛ yɛ ɛzɩzɩbɛ wɔ yɛ mmɩlɩ yɩ nu: ‘Gyehova kehilehile wʋ mma mmenyia munwatĩĩ. Na wʋ mma mmenyia bɛ azʋ̃nudwolɩyɛ kɔzʋnɩ. Wʋ tʋ kedimi wɔ ɛdɩnɣɛlɛ nu.’ (Ayɩ. 54:​13, 14) Egyima mɔɔ Gyehova yi mmenii bɛyɛɛ bɛkɛva bekehilehile mmenii Gyehova nwʋ dɩyɛ nɩ, “Abɔnsamɩ, mɔɔ mɛyɩ yɛ ikila tanɩ oyuwadɩ eyi zʋ nɩ” po ɩlɔ́kʋla ikezi nwʋmɔ ɔhʋanɩ. (2 Kɔl. 4:4) Bɛva nɔhʋanlɛ ɔzʋ̃mɩnlɛ beziye kɛnɩ dɔkʋ̃, na ɩlɛ́sɩkɛ kyɩ̃. Ɩkɔwʋwa kɛnɩ daabaa. Akʋndɩ bela mɔɔ bɛkɛhyɩhyɛ bekediyia yɛ nɩ, ilékyina!

 MƖNLA YƐ IKEZI A?

11. Mɩnla yɛ ɩma yenyia anwʋlazʋ kɛɛ sɛ bɛzabɛ mɔɔ bɔvɔ ngɔlɔ bɛ nɩ kɔ sʋlɔ a, beléyiaki mmenii okuwu kezile nɩ a?

¹¹ Sɛ bɛfa bɛzabɛ mɔɔ bɔvɔ ngɔlɔ bɛ nɩ bɔkɔ sʋlɔ a, mɩnla yɛ ikezi a? Kakɛ kɛɛ Gyisɛsɩ yɛ ɩdɩ yɛ Mmuwuanɩzʋhilalɛvʋlɔ a. Mɛyɩ yɛ ɩdɩ asafʋ yɩ yi ti a. Gyisɛsɩ hanlɩ yɩ petee kɛɛ “mʋnlʋmmɔ be Diibenyia ɔkʋ̃ kyeinyii na mɛyɩ yɛ lɛ Kɩlayɩsɩ nɩ.” (Mt. 23:10) Gyisɛsɩ mɔɔ ɩdɩ ye Bulombunli nɩ kehila yɛ zʋ. Iluwakɛɛ Kɩlayɩsɩ yɛ ikilee ɔhʋanɩ bɛ nɩ ti, yɩ mɛdalilɛmaa mɔɔ bɔwɔ azɩlɛ yɩ zʋ nɩ bo kunlu iáduli dɩyɛ bela nwʋ. Yézi kezimɔ Kɩlayɩsɩ kehile yi mmenii ɔhʋanɩ wɔ ɔzɔ mmɩlɩ yɩ nu nwʋ ndwokɔ munwala. Meti bɛmá yehila Bayɩbʋlʋ nu ndianwʋ azʋlɔtʋ be mɔɔ ɩkɛma yekenyia anwʋlazʋ.

12. Mɩnla ɔhʋanɩ zʋ yɛ Gyehova hilalɩ yi mmenii wɔ (a) Mosisi yi owulo mɛda a? (b) Mmɩlɩ mɔ Ilayɩgya nyianlɩ egyimalilɛ fʋlɔ nɩ a? (Kila mfonyini yi sʋ̃.)

¹² Mosisi wuli ansaana Yizilayamaa nɩ bɛbadwu anʋhʋba azɩlɛ yɩ zʋ. Mɩnla yɛ ɩdʋlɩ Nyamɩnlɩ mmenii a? Asʋ̃ Gyehova yiakili bɛ mmɩlɩ mɔ Mosisi wuli nɩ a? Anhã. Mmɩlɩ tɩndɩnlɩ la mɔɔ bɔhɔlɩ zʋlɔ belili nɔhʋanlɛ nɩ, Gyehova hilalɩ bɛ. Ansaana Mosisi ibawu nɩ, Gyehova hanlɩ hileli yi kɛɛ ɩyɩ́ Dwohyuwa ma ili yi mmenii anyunu. Nɩ Mosisi va alʋbɔ sʋ̃maa ɩdɩdɩ Dwohyuwa. (Ɛkɩ. 33:11; Dit. 34:9) Akʋ̃ sʋ̃, nɩ abʋmɩ, yaalɛ nɩɩ bunlu zʋ mbanimbani wɔ kɛnɩ mɔɔ bɔbʋwaa ma bekehila mmenii yi zʋ. (Dit. 1:15) Behilalɩ Nyamɩnlɩ yi mmenii zʋ bʋwɔ baaba. Ndianwʋ ɔkʋ̃ sʋ̃ yɛ lɛ mɔɔ Ilayɩgya yɛlɩ nɩ. Ɩvalɩ alʋbɔ sʋ̃maa ɩwʋwalɩ Yizilayamaa yɩ ma bɔzʋ̃mɩnlɩ Gyehova. Naasʋ̃ aɣinzi yi, Gyehova manlɩ egyima fʋlɔ yɩ wɔ Dwuuda yɩ ngyakɛ ɔfʋã nu. (2 Aw. 2:1; 2 Mm. 21:12) Asʋ̃ nɔhʋanlɛmaa mɔɔ nɩ bɔwɔ Yizilaya mmusunwa okuwu bunlu yi nu nɩ, bɛányia abiyela ma ikila bɔ zʋ a? Anhã. Nɩ Ilayɩgya va alʋbɔ sʋ̃maa ɩdɩdɩ Ilayɩhya. Akʋ̃ sʋ̃, nɩ “nkɔmɩhyɛmaa bɛ mma” mɔɔ nɩ bɛdɩdɩ bɛ nɩ sʋ̃ wɔ kɛnɩ. (2 Aw. 2:7) Meti nɩ mmenyia nɔhʋanlɛmaa sʋ̃maa wɔ kɛnɩ mɔɔ bɔkɔhʋla bekehila Nyamɩnlɩ yi mmenii zʋ. Gyehova hɔlɩ zʋlɔ manlɩ yi tile nu pɔkɔ ɣalɩ numɔ na ihilalɩ yɩ azʋ̃mɩvʋlɔ nɔhʋanlɛmaa yɩ bɔ zʋ.

13. Mɩnla anwʋlazʋ yɛ Hibulumaa 13:5b ɩkɔhʋla ɩkɛma yekenyia a? (Kila mfonyini yi sʋ̃.)

¹³ Mmɩlɩ mɔ ndianwʋ eyimmɔ wɔ yɛ adwɩnɩ nu nɩ, mɩnla yɛ osunzu kɛɛ ikezi mmɩlɩ mɔ bɛzabɛ mɔɔ bɔvɔ ngɔlɔ bɛ nɩ bo munwala bɔhɔ sʋlɔ nɩ a? Iáhyinyia kɛɛ yɛma idide yɛ. Bayɩbʋlʋ yɩ kã yɩ senyii kɛɛ: Gyehova iléyiaki yi mmenii wɔ azɩlɛ yɩ zʋ kyɩ̃. (Kɩnga Hibulumaa 13:5b.) Dɩkɛɛ Mosisi nɩɩ Ilayɩgya  nɩ, Kilisinyiamaa mɔɔ bɔvɔ ngɔlɔ bɛ mɔɔ bedi nninyeni anyunu nɩ, bezi kezimɔ ihyinyia kɛɛ bɛtɩdɩ mmenii mvʋlɔ. Alʋbɔ sʋ̃maa yɛ dɩ yɛ Ɔhʋanɩhilelɛ Okuwu yi nu maa yɩ bɛva ɛdɩdɩlɛ bɛma mmenyia mɔɔ bɔlɔ́fɔlɩ ngɔlɔ bɛ nɩ ma bɔnwʋ kezimɔ bekeli nninyeni anyunu a. Kɛ ndianwʋ nɩ, bɛyɛ sukuulu sʋ̃maa mɔɔ bɛfa bɛtɩdɩ asafʋ nu mbanimbani, mansini zʋ ehilalɛmaa, Egyimayɛlɛdɩka Kɔmitii nu maa, mmeliyema mɔɔ bedi nninyeni anyunu wɔ Bɛtɩlɩ nɩɩ mmeliyema mvʋlɔ. Ɔhʋanɩhilelɛ Okuwu yi bɛhyɛda bɛtɩdɩ mmeliyema ma bɔbʋwa Kɔmitii azʋlɔtʋ mɔɔ iwula Ɔhʋanɩhilelɛ Okuwu yɩ tʋ nɩ. Yɛtɩndɛɛ yɩ, ɔzɔ nɔhʋanlɛmaa eyi bɛlɛ nɔhʋanlɛlilɛ bɛyɛɛ egyima nɣezile wɔ ahyɩhyɛdɩ yi nu mɔɔ sa bɔkʋla bɔkɔlɩ zʋlɔ bekila Kɩlayɩsɩ yi mmuwuanɩ yɩ.

14. Mɔɔ Yɛkãã munwala yɩ dɔkɔwɔlɛ yɛ lɛ mɩnla a?

¹⁴ Mɔɔ yɛkãã yɩ munwala yɩ dɔkɔwɔlɛ yɛ lɛ kɛɛ: Sɛ ɩka ɛgyɩkɩ̃ɩ̃ ma anwʋhyɩlɩyɛ kezile yɩ ba awielɩyɛ na sɛ bɛfa bɛzabɛ mɔɔ bɔvɔ ngɔlɔ bɛ mɔɔ bɛha wɔ azɩlɛ yɩ zʋ nɩ munwala bɔkɔ sʋlɔ a, Gyehova yi mmenii kɔhɔ zʋlɔ kɛva nɔhʋanlɛlilɛ kɔzʋ̃mɩ yɩ wɔ azɩlɛ yɩ zʋ. Iluwakɛɛ Gyisɛsɩ Kɩlayɩsɩ keli nninyeni anyunu nɩ ti, nɔhʋanlɛ ɔzʋ̃mɩnlɛ kɔhɔ zʋlɔ pɛpɛɛpɛ. Yezi kɛɛ wɔ ɔzɔ mmɩlɩ yɩ nɩ, amanlɩ amanlɩ mɔɔ bɛhã bɔ nwʋ bɔwɔ numɔ mɔɔ Bayɩbʋlʋ fʋlɛ bɛ Gɔgʋ mɔɔ ɩzʋ̃ Magɔgʋ nɩ kɔdʋ kɛhyɛ yɛ zʋ. (Izi. 38:​18-20) Naasʋ̃, bɛ sa kezi azɩ, iluwakɛɛ Nyamɩnlɩ mmenii beléyiaki nɔhʋanlɛ ɔzʋ̃mɩnlɛ kyɩ̃. Gyehova kele yi mmenii! Sʋ̃mavʋlɔ Dwɔɔnʋ nwʋnlɩ Kɩlayɩsɩ yi mmuwuanɩ mvʋlɔ yɩ wɔ anyɩnlɩzʋdɩyɛnwʋnlɛ nu kɛɛ, bɛdɩ “ɔlɔmɩ sʋ̃maa sʋ̃maa.” Bɛhã behileli Dwɔɔnʋ wɔ anyɩnlɩzʋdɩyɛnwʋnlɛ yɩ nu kɛɛ ɔzɔ “ɔlɔmɩ sʋ̃maa sʋ̃maa” nɩ yɛ lɛ bɛzabɛ mɔɔ “bɔzʋ̃ atɩɩtɩɩ kezile nɩ nu bɛyɩ bɔ nwʋ sɔkyɩɩ nɩ a.” (Yik. 7:​9, 14) Nyɛ, Gyehova kele bɛ!

15-16. Kɛmɔ Yikile 17:14 kile nɩ, mɩnla yɛ Kɩlayɩsɩ yɩ mɛdalilɛmaa mɔɔ bɔvɔ ngɔlɔ bɛ nɩ kɛyɛ wɔ Amagadɔnʋ kʋnɛ yɩ nu a, na mɩnla ti mɔɔ eyi hyɛ ɛzɩzɩbɛ a?

¹⁵ Naasʋ̃ ebiye a, abiyemmɔ keɣizia kɛɛ: ‘Sɛ bɛfa mmenii mɔɔ bɔvɔ ngɔlɔ bɛ nɩ bɔkɔ sʋlɔ a, mɩnla yɛ bɛkɛyɛ a?’ Bayɩbʋlʋ yɩ ma eyi nwʋ munwalɩyɛ senyii. Ɩma yɛnwʋ kɛɛ oyuwadɩ adumivʋlɔ, “bɛ nɩɩ Owuanɩɣalɛ nɩ bɛbahʋ̃.” Sa bedi nkugu wɔ ɔhʋanɩ bela zʋ. Ɛhɛlɛlɛdwokɔ  yɩ kã kɛɛ: ‘Owuanɩɣalɛ nɩ keli bɔ zʋ nkunimi.’ Na aninyiammɔ yɛ bɔkɔwʋwa yɩ a? Ɛhɛlɛlɛdwokɔ yɩ tʋwa zʋlɔ kɛɛ: Bɛzabɛ mɔɔ “ɩvʋlɔ bɛ,” “ɩba nu ɩyɩ bɛ,” na “bedi nɔhʋanlɛ” nɩ. (Kɩnga Yikile 17:14.) Bɛdɩ aninyiammɔ a? Bɔnlʋmmɔ yɛ lɛ bɛzabɛ mɔɔ bɔvɔ ngɔlɔ bɛ mɔɔ bodunwo bɛ nɩ! Sɛ ɩka ɛgyɩkɩ̃ɩ̃ ma anwʋhyɩlɩyɛ kezile yɩ ba awielɩyɛ na bɛfa bɛzabɛ mɔɔ bɔvɔ ngɔlɔ bɛ mɔɔ bɛha wɔ azɩlɛ yɩ zʋ nɩ bɔkɔ sʋlɔ a, be egyima mɔɔ bekeli bɔmʋnlɩ bɛkɛyɛ yɛ lɛ kɛɛ, bɔkɔhɔ kʋnɛ. Eyi dɩ ɔnwʋmɔ ɔhʋanɩ kezile! Ansaana Kilisinyiamaa mɔɔ bɔvɔ ngɔlɔ bɛ nɩ bo nu be bɛbayɛ Gyehova Dasɩvʋlɔmaa nɩ, nɩ bezi kʋnɛ. Nɩ bo nu be po dɩ azogyiamaa. Naasʋ̃ aɣinzi yi bɛɣa bɛyɛlɩ nɔhʋanlɛ Kilisinyiamaa, na bozumanlɩ kɛɛ bɛ nɩɩ mmenii kɔwʋwa azʋ̃nudwolɩyɛ nu. (Gal. 5:22; 2 Tɛs. 3:16) Beyiakili kʋnɛlilɛ munwala. Naasʋ̃ sɛ botunwo bɛ ma bɔkɔ sʋlɔ a, bɔkɔhɔ kɛhɩnla Kɩlayɩsɩ nɩɩ awɔvʋlɔ nwanzanwanza yɩ nwʋ ma bɔkɔhʋ̃ bekediyia Nyamɩnlɩ yɩ adamvʋlɔ wɔ kʋnɛ mɔɔ itualɩ yɩ tʋ yi nu.

¹⁶ Mɔwʋ dwɩnɩ eyi nwʋ kila! Bɛzabɛ mɔɔ bɔvɔ ngɔlɔ bɛ mɔɔ bɔwɔ azɩlɛ yɩ zʋ nɩ, bo nu be bɛyɛ mbanimbani, na béni anwʋzɩzɩbɛ po. Naasʋ̃ sɛ botunwo bɛ ma bɔkɔ sʋlɔ la pɛ, bɛkɛyɛ sunzuma abɔdɩ mɔɔ bɔwɔ anwʋzɩzɩbɛ mɔɔ bolówu kyɩ̃. Bɔkɔhɔ kɛhɩnla Safʋhɩnɩ Kɩlayɩsɩ nwʋ ma bɔkɔhʋ̃. Sɛ bowie Amagadɔnʋ kʋnɛ yɩ a, bɛ nɩɩ Gyisɛsɩ kɔwɔ numɔ kɔwʋwa adasamaa ma bekeli munli. Pɩlazunɛ bela íni nwʋmɔ kɛɛ, sɛ bɔkɔ sʋlɔ a, bekenyia ɔnwʋmɔ ɔhʋanɩ bɔkɔwʋwa be mmeliyema mmenyia nɩɩ mmaalɛ sʋ̃maa bɛkɛdɛla mɔɔ bɛyɛlɩ mmɩlɩ mɔ nɩ bɛdɩ mmenii mɔɔ bɔtɔ sini wɔ azɩlɛ yɩ zʋ nɩ!

17. Kɛ ɩyɛ mɔɔ yɛnwʋ kɛɛ Gyehova azʋ̃mvʋlɔ munwala kenyia banɩwɔlɛ wɔ Amagadɔnʋ kʋnɛ yɩ nu a?

¹⁷ Asʋ̃ ɛkɩnla mmuwuanɩ mvʋlɔ yɩ nwʋ a? Mɛyɩ nɩ mɩnla yɛ ihyinyia kɛɛ ɛyɛ mmɩlɩ mɔ Amagadɔnʋ kʋnɛ mɔɔ nwʋmɔ hyinyia nɩ wɔ yɩ tʋ nɩ a? Mɔɔ ɛkɛyɛ yɛ dɩ: Fa wʋ nwʋ tiã Gyehova zʋ na di yɩ ɔhʋanɩhilelɛ bela mɛda. Kɛ ɛkɛyɛ yɩ ekeze a? Bayɩbʋlʋ yɩ kã kile yɛ kɛɛ: “Bɔhɔ́ bowula bɛ aliyia kunlu na bɔdʋnlɩ bɛ anyɩnkɛ yɩ nu. Bɛvá bɔ nwʋ beziye ɛgyɩkɩ̃ɩ̃ kɔbʋmɩ kɛɛ ɛya ɛhyɩmɛ nɩ kodua nu.” (Ayɩ. 26:20) Nyamɩnlɩ yɩ azʋ̃mɩvʋlɔ nɔhʋanlɛmaa mɔɔ bɔwɔ sʋlɔ nɩɩ azɩlɛ yɩ zʋ munwala kenyia banɩwɔlɛ wɔ ɔzɔ mmɩlɩ yɩ. Dɩkɛɛ sʋ̃mavʋlɔ Pɔɔlʋ nɩ, yɛwɔ anwʋlazʋ kɛɛ, ‘oyumi adumivʋlɔ o, nninyeni mɔɔ bɔwɔ kɛnɩ nnɛ o, nninyeni mɔɔ bɛbaɣa aɣinzi nɩ o, dɩyɛ bela íni kɛnɩ mɔɔ ɩkɔhʋla ɩkɛyɩ amɩyɛ wɔ Nyamɩnlɩ yɩ ɔlɔlɛ nɩ nwʋ.’ (Wul. 8:​38, 39) Kakɛ mmɩlɩ munwala kɛɛ, Gyehova dɔ wʋ, na iléyiaki wʋ kyɩ̃!