Mmeliyema Anwɩ̃ Mɔɔ Bɛva Bɛ Bɛhɩnla Ɔhʋanɩhilelɛ Okuwu Yɩ Nwʋ
WƆ MANLƖ eɣile, January 18, 2023, bɛvalɩ nkayɩwɔlɛ titili be bedianlɩ jw.org zʋ mɔɔ nɩ ɩkãã kɛɛ, bɛyɩ Eliyema Gage Fleegle nɩɩ Jeffrey Winder kɛɛ Gyehova Dasɩvʋlɔmaa bɔ Ɔhʋanɩhilelɛ Okuwu yi nu maa. Mmeliyema mmenyia anwɩ̃ eyimmɔ munwala bɛva nɔhʋanlɛlilɛ bɔzʋ̃mɩ Gyehova bɛhyɛ.
Gage Fleegle nɩɩ yɩ yɩ Nadia
Bɛdɩdɩlɩ Eliyema Fleegle wɔ Pennsylvania adɔlɩyɛ ɔfʋã nu wɔ U.S.A. Nɩ yɩ awʋvʋlɔ munwala dɩ Dasɩvʋlɔmaa. Wɔ yi nnwuakula nu nɩ, ɩ nɩɩ yɩ abusunwa yɩ duli hɔ wʋwalɩ suwa ɛgyɩkɩ̃ɩ̃ be mɔɔ nɩ mmʋwalɩyɛ nwʋ hyinyia wɔ kɛnɩ nɩ. Mmɩlɩ ɛgyɩkɩ̃ɩ̃ be mɛda nɩ inlumanlɩ, wɔ November 20, 1988.
Eliyema Fleegle yɩ awʋvʋlɔ hyɛlɩ yɩ ɛzɩzɩbɛ kɛɛ ɩyɛ́ mmɩlɩ munwala ɔzʋ̃mɩnlɛ egyima yɩ be. Nɩ bɛta bede mansini zʋ ehilalɛmaa nɩɩ Bɛtɩlɩmaa wɔ bɛ awudo, na Eliyema Fleegle nwʋnlɩ kɛɛ ɔzɔ mmeliyema mmenyia nɩɩ mmaalɛ yɩ bɔwɔ anyɩnlɩlelɛ. Yi onlumanlɛ mɛda nɩ, ɩákyɛ bela yɛ ɩwɔlɩ ɔhʋanɩbukolɛ egyima yɩ tʋ wɔ September 1, 1989. Alʋbɔ anwɩ̃ mɛda nɩ, ɩhɔlɩ Bɛtɩlɩ. Nɩ eyi dɩ bʋtayɩ mɔɔ ɩva iziyeli yɩ anyɩ zʋ mmɩlɩ mɔ inyianlɩ alʋbɔ 12 nɩ. Ɩwɔlɩ yɩ Bɛtɩlɩ ɔzʋ̃mɩnlɛ tʋ wɔ Brooklyn Bɛtɩlɩ wɔ October 1991.
Eliyema Fleegle wɔ Bɛtɩlɩ nɩ, ɩvalɩ alʋbɔ awɔtwɛ ɩyɛlɩ egyima wɔ dɩka mɔɔ bɛyɛ yɛ awuuku nɩ, na aɣinzi yi, bɛvalɩ yɩ bɔhɔlɩ Ɔzʋ̃mɩnlɛ Egyima Azʋkɔlɩyɛ. Ɔzɔ mmɩlɩ yɩ nɩ, ɩvalɩ alʋbɔ ɛgyɩkɩ̃ɩ̃ ɩzʋ̃mɩnlɩ wɔ asafʋ be mɔɔ bɛkã Russia ndɛnɩ nu. Wɔ 2006 nɩ, igyialɩ Nadia, na ɩɣa ɩhɩnlanlɩ yɩ nwʋ wɔ Bɛtɩlɩ. Bɔwɔlɩ numɔ bɔzʋ̃mɩnlɩ wɔ Portuguese azɩlɛ-sini nu, na bɛva alʋbɔ bunlu nɩɩ yɩ mɛda bɔzʋ̃mɩ wɔ Spanish azɩlɛ-sini yi nu sʋ̃. Eliyema Fleegle valɩ alʋbɔ sʋ̃maa zʋ̃mɩnlɩ wɔ Ɔzʋ̃mɩnlɛ Egyima Azʋkɔlɩyɛ kɛnɩ mɛda nɩ, bɛmanlɩ ɩhɔ ɩyɛlɩ egyima wɔ Ehilehilelɛ Kɔmitii Ɔfɩsɩ, na aɣinzi yi, ɩhɔ ɩzʋ̃mɩnlɩ wɔ Ɔzʋ̃mɩnlɛ Egyima Kɔmitii Ɔfɩsɩ. Wɔ March 2022 nɩ, bɛyɩlɩ yɩ kɛɛ bʋwavʋlɔ ma Ɔzʋ̃mɩnlɛ Egyima Kɔmitii mɔɔ iwula Ɔhʋanɩhilelɛ Okuwu yɩ tʋ nɩ.
Jeffrey Winder nɩɩ yɩ yɩ Angela
Bɛdɩdɩlɩ Eliyema Winder wɔ Murrieta, twonwa be mɔɔ ɩwɔ California, U.S.A.. Yɩ awʋvʋlɔ yɛ bɛdɩdɩlɩ yɩ wɔ nɔhʋanlɛ yɩ nu a, na inlumanlɩ wɔ March 29, 1986. Aziyianɩ mɔɔ ili kɛnɩ yɩ la yɛ ɩyɛlɩ ɔhʋanɩbukolɛ bʋwavʋlɔ a. Ɩzɔlɩ yɩ fɛlɛ nu nkʋ̃ʋ̃ ma nɩ ɩpɛ kɛɛ ɩtʋwa zʋlɔ. Ɩvalɩ aziyianɩ ɛgyɩkɩ̃ɩ̃ ɩyɛlɩ ɔhʋanɩbukolɛ bʋwavʋlɔ mɛda nɩ, ɩɣa ɩyɛlɩ ɔhʋanɩbukolɛvʋlɔ wɔ October 1, 1986.
Eliyema Winder dɩ abɩlantɩyɛ kuakula nɩ, ɩhɔ igyelalɩ yi mmenlima mmenyia mbanimbani mɔɔ nɩ bɔsʋ̃mɩ wɔ Bɛtɩlɩ. Ɔzɔ egyelalɛ nɩ manlɩ inyianlɩ ɛpɛ kɛɛ sɛ ɩyɛ ebani a, ɩkɔhɔ ɩkɔzʋ̃mɩ wɔ Bɛtɩlɩ. Na wɔ May 1990 nɩ, bɔdʋlɩ salɛ bɔvʋlɔlɩ yɩ kɛɛ ɩhɔ ɩzʋ̃mɩ wɔ Wallkill Bɛtɩlɩ.
Eliyema Winder wɔ Bɛtɩlɩ nɩ, ɩyɛlɩ egyima wɔ azʋkɔlɩyɛ azʋlɔtʋ, mɔɔ Azʋkɔlɩyɛ Mɔɔ Bekila Besiyeziye Bɛtɩlɩ, Azʋkɔlɩyɛ Mɔɔ Bɛyɛ Bɛtɩlɩ Egyini, nɩɩ Bɛtɩlɩ Ɔfɩsɩ sʋ̃ kɩnla nwʋ. Igyialɩ yɩ yɩ Angela wɔ 1997, na bɔwɔ numɔ bɔzʋ̃mɩ wɔ Bɛtɩlɩ ɔzʋmɩ ɔzɔ mmɩlɩ yɩ. Wɔ 2014 nɩ, bɛvalɩ bɛ bɔhɔlɩ Warwick, na ɛkɛnɩ yɛ Eliyema Winder hɔ wʋwalɩ ma begyinanlɩ oyuwadɩ munwala egyimayɛlɛdɩka yi ti aliyia yɩ nɩ a. Wɔ 2016 nɩ, boduli bɔhɔlɩ Ɔwɩɛnɩlɛ Aɣanɩ Dɩyɛzumanlɛ Dɩka mɔɔ ɩwɔ Patterson nɩ, ɛkɛnɩ yɛ Eliyema Winder hɔ yɛlɩ egyima wɔ Odiyo/Vidiyo Azʋkɔlɩyɛ kɛnɩ a. Alʋbɔ anla mɛda nɩ bezia bɔhɔlɩ Warwick, na bɛmanlɩ Eliyema Winder hɔ yɛlɩ egyima wɔ Egyimayɛlɛmaa Bɔ Bʋwɔyɛlɛ Kɔmitii Ɔfɩsɩ. Wɔ March 2022 nɩ, bɛyɩlɩ yɩ kɛɛ bʋwavʋlɔ ma Egyimayɛlɛmaa Bɔ Bʋwɔyɛlɛ Kɔmitii mɔɔ iwula Ɔhʋanɩhilelɛ Okuwu yɩ tʋ nɩ.
Yesiãã Gyehova yɩ nyilalɛ yɛma mmeliyema eyimmɔ mɔɔ bɛdɩ “akyɛdɩ” bɛma adasamaa, mmɩlɩ mɔ bɔkɔɔ zʋ bɛyɛ egyima ɛzɩzɩbɛ bɔbʋwa Bulombunlililɛ yɩ nɩ.—Ɛfɩ. 4:8.
