Bayɩbʋlʋ yɩ kã yɩ petee kɛɛ Gyehova kʋla kã mɔɔ ikezi wɔ eɣile be. (Ayɩ. 45:21) Naasʋ̃ ɩáhã kezimɔ ɩyɛ zɔ nɩ nwʋ ndwokɔ sʋ̃maa. Meti yɛlɔ́kʋla yɛkɛdɩ ɔhʋanɩ mɔɔ iduwa zʋlɔ ɩyɛ zɔ nɩ munwatĩĩ tʋ. Naasʋ̃ bɛmá yezunzu ɛgyɩkɩ̃ɩ̃ mɔɔ yezi nɩ nwʋ.

Dɩyɛ bela íni kɛnɩ mɔɔ Gyehova ɩlɔ́kʋla ɩkɛyɛ, gyɩsɛ mɔɔ yɩzayɩ ɩhã kɛɛ ɩlɛ́yɛ. Gyehova yɩ nɣɛlɛbɛ nu dɔ, meti sa ɩkʋla ɩkã mɔɔ ɩpɛ kɛɛ ɩkã ɩfalɩ mɔɔ ikezi wɔ eɣile be nwʋ nɩ nwʋ odwokɔ. (Wul. 11:33) Iluwakɛɛ ɩkʋla ɩhyɛ yɩ nwʋ zʋ baaba nɩ ti, ɩkʋla isi pɔkɔ kɛɛ ɩlɛ́fa yi tumi mɔɔ ɩma ɩnwʋ mɔɔ ikezi wɔ eɣile be nɩ ikeli egyima.—Fa tindiã Ayɩzaya 42:14 nwʋ.

Gyehova ɩma yɩ apɛdɩ yɛlɩ kɛ. Mɩnla ɔhʋanɩ zʋ yɛ eyi falɩ yi tumi mɔɔ ɩfa ɩkã mɔɔ ikezi wɔ eɣile be nwʋ odwokɔ nɩ nwʋ a? Ayɩzaya 46:10 kile numɔ kɛɛ: “Mʋzʋ̃ ahyɛasɩ mɩkã awielɩyɛ ndwokɔ, na mɩkã nninyeni mɔɔ belésili nwʋ odwokɔ mitiã ɛkɛnɩ ɔzʋmɩ mmɩlɩ tɩndɩnlɩ. Mɩkã kɛɛ, ‘Mi tile nu pɔkɔ kegyina, na mɩkɛyɛ mɔɔ ɩsɔ mɩ anyɩ bela.’”

Sianti ɔkʋ̃ ti mɔɔ Gyehova kʋla kã mɔɔ ikezi wɔ eɣile be nɩ yɛ lɛ kɛɛ, ɩwɔ tumi mɔɔ ɩkʋla ɩma nninyeni sizi. Kɛ ebiye a Gyehova wɔ tumi nɩ ti, ihila nninyeni mɔɔ ibazizi wɔ eɣile be nɩ dɩkɛɛ mɔɔ izizi daada na ɩbahã nwʋmɔ odwokɔ kehile yɛ. Mfomi Gyehova kɔhʋla kɔwɔ yi ti nu kɛɛ ɩkɛma debe kezi wɔ mmɩlɩ pɔkyɩɩ be nu, na sɛ ɔzɔ mmɩlɩ nɩ itwu a ɩma isi.—Ɛkɩ. 9:​5, 6; Mt. 24:36; Egy. 17:31.

Eyi ti Bayɩbʋlʋ yɩ fa ndwokɔ be dɩkɛɛ “iziyeziye,” nɩɩ “ɩwɔ yi ti nu” ikilehile kezimɔ Gyehova yɛ yɩ dɩyɛ wɔ ndwokɔ mɔɔ ikezizi wɔ eɣile be nɩ nu. (2 Aw. 19:25; ad.; Ayɩ. 46:11) Ɔzɔ ndwokɔ eyimmɔ zʋ̃ odwokɔ mɔɔ yɩ tʋ kile “ɔwɩnɩlɛvʋlɔ” nu. (Gyɛ. 18:4) Kɛmɔ ɔwɩnɩlɛvʋlɔ mɔɔ izi egyima ɩkʋla ɩfa ndɛdɛlɛ ɩyɛ debe kɩnlɩma nɩ, ɔzɔ la yɛ Gyehova sʋ̃ ɩkɔhʋla ɩkɛyɛ nninyeni be anzɛnyɩɩ ɩkɛma ndwokɔ be kezizi ma yi tile nu pɔkɔ kɛɣa nu a.—Ɛfɩ. 1:11.

Gyehova ma ɔhʋanɩ ma abiyela yɩzayɩ isi yɩ pɔkɔ. Ɩlɛ́hyɩhyɛlɩ kezimɔ abiye yɩ ɛbɩlawɔlɛ kɛyɛ ilétianlɩ kɛnɩ. Akʋ̃ sʋ̃, ɩáma bɛzabɛ mɔɔ bɔwɔ ahʋnlɩnɩba nɩ bɛyɛ nninyeni mɔɔ ɩkɛma bɔkɔnwʋ amanɩyɛ. Ɩma ɔhʋanɩ ma mmenii munwatĩĩ besi pɔkɔ wɔ kezimɔ bɔkɔwɔ bɛ ɛbɩla nɩ nwʋ, na ɩhyɛ bɛ ɛzɩzɩbɛ kɛɛ bɔwɔ́ ɛbɩla baaba.

Bɛmá yehila ndianwʋ anwɩ̃ eyi. Mɔɔ ili bɔmʋnlɩ yɩ falɩ Nɩnɩvɛmaa yɩ nwʋ. Gyehova hanlɩ kɛɛ bɛkɛzɩkɛ ɔzɔ twonwa yɩ iluwakɛɛ nɩ bɛáyɛ nninyeni mɔɔ ɩsɔ yɩ anyɩ. Naasʋ̃ mmɩlɩ mɔ Nɩnɩvɛmaa yɩ zɩnzanlɩ nɩ, Gyehova “zɩnzanlɩ yɩ adwɩnɩ wɔ ɔhawʋ mɔɔ ɩhanlɩ kɛɛ ɩkɛɣa bɔ zʋ nɩ nwʋ, na ɩáyɛ dɩyɛ bela bɛ.” (Dwn. 3:​1-10) Gyehova zɩnzanlɩ yɩ adwɩnɩ wɔ mɔɔ ɩhanlɩ kɛɛ ɩkɛɣa bɔ zʋ nɩ nwʋ, iluwakɛɛ Nɩnɩvɛmaa nɩ bɛvalɩ fanwʋdi mɔɔ bɔwɔ kɛɛ bɛzabɛ bekezi pɔkɔ nɩ belili egyima, na bonlunli bɔ nwʋ mmɩlɩ mɔ bɛdɩlɩ kɔkɔwɔlɛ ndwokɔ mɔɔ Gyehova hanlɩ hileli bɛ nɩ.

Ndianwʋ mɔɔ ɩtɔ zʋlɔ anwɩ̃ yɩ dɩ nkɔmɩhyɛ mɔɔ ɩfalɩ Sayɩlɔsʋ nwʋ. Mɛyɩ yɛ nɩ ikele Dwuumaa yɩ wɔ alɔngɔzʋ̃mɩnlɛ nu, na ɩahyɛ kɛɛ beziá begyina Gyehova yɩ asɔlɩ aliyia yɩ a. (Ayɩ. 44:26–45:4) Bulombunli Sayɩlɔsʋ mɔɔ ɩzʋ̃ Pɛhyɩya nɩ manlɩ nkɔmɩhyɛ eyi ɣalɩ numɔ. (Ɛzɩ. 1:​1-4) Naasʋ̃ nɩ Sayɩlɔsʋ ɩázʋ̃mɩ nɔhʋanlɛ Nyamɩnlɩ yɩ. Gyehova valɩ Sayɩlɔsʋ lili egyima ma yɩ nkɔmɩhyɛ ɣalɩ numɔ, naasʋ̃ ɩmanlɩ ɔhʋanɩ ma Sayɩlɔsʋ yɩzayɩ izili pɔkɔ wɔ enii mɔɔ ɩkɔzʋ̃mɩ yɩ nɩ nwʋ.—Ɛɣɛ. 21:1.

Nɔhʋanlɛ nu nɩ, eyimmɔ yɛ lɛ nninyeni ɛgyɩkɩ̃ɩ̃ mɔɔ Gyehova ikila ansaana ɩahã ndwokɔ be mɔɔ ikezi wɔ eɣile be a. Nɔhʋanlɛ odwokɔ yɛ lɛ kɛɛ, desanii bela íni kɛnɩ mɔɔ ɩkɔhʋla ɩkɛdɩ kezimɔ Gyehova ɩdwɩ̃ na ɩyɛ yɩ dɩyɛ nɩ munwala tʋ. (Ayɩ. 55:​8, 9) Mɔɔ yezi yɛfalɩ Gyehova nwʋ nɩ, ɩhyɛ yɛ dedi ɛzɩzɩbɛ kɛɛ Gyehova kɛyɛ mɔɔ ɩtɩnɣɛ mmɩlɩ munwala mɔɔ ndwokɔ mɔɔ ɩkɛhã ɩkɛvalɩ eɣile be nwʋ nɩ kɩnla nwʋmɔ.