ASƲ̃ ɛyɛ yɩ ndwɩ kɛɛ nnɛ mmenii sʋ̃maa tɩ nɣanlɩ kɛɛ ɩsɛ kɛɛ bobu bɛ kɛɛ bɔ nwʋ hyinyia tɛla mvʋlɔ na ɔnwʋmɔ ɔhʋanɩ titili be wɔ kɛ a, bɔnlʋmmɔ mfomi yɛ ɩfata bɛ a? Ɩávalɩ nwʋmɔ ɔnwʋmɔ ɔhʋanɩ bela mɔɔ bɛlɛ yɩ nɩ, bɛtɩ nɣanlɩ kɛɛ bɛfata kɛɛ benyia sʋ̃maa bɛkɩnla nwʋmɔ. Mmenii mɔɔ bɛlɛ adwɩnɩ mɔɔ ɩdɩ zɔ nɩ dɩ angʋmidi na bɛáhile nninyeni nwʋ anyɩnlɩzɔlɛ. Ɔzɔ yɛ Bayɩbʋlʋ yɩ kã kɛɛ mmenii sʋ̃maa kɛyɛ bɛ dɩyɛ wɔ awielɩyɛ mmɩlɩ yɩ nu a.—2 Tim. 3:2.

Amba, angʋmidi subanɩ yɩ ɩ́dɩ dɩyɛ fʋlɔ. Adamɩ nɩɩ Yifi bɛlɩ kɛɛ bɛzabɛ bekezizi mɔɔ ɩdɩ baaba nɩɩ tanɩ nwʋ pɔkɔ, na ye munwala yɛtɩɩ ɛyɛkɛ iluwa bɔ pɔkɔ tanɩ yɩ ti. Ndianwʋ fʋlɔ sʋ̃ yɛ lɛ Yuzaya mɔɔ nɩ ɩdɩ Dwuumaa bo bulombunli nɩ. Iluwakɛɛ ɩdɩ bulombunli nɩ ti, nɩ isunzu kɛɛ sa ɩkʋla ɩyɩba awudo vʋãmɛ wɔ asɔlɩ awudo kɛnɩ. Naasʋ̃ nɩ íni nwʋmɔ ɔhʋanɩ kʋlaa kɛɛ ɩkɛyɛ zɔ. (2 Mm. 26:​18, 19) Akʋ̃ sʋ̃, nɩ Falasiimaa nɩɩ Sadusiimaa nɩ tɩ nɣanlɩ kɛɛ kɛmɔ bɛdɩ Abilehamɩ yɩ tʋmaa nɩ ti, ɩsɛ kɛɛ bobu bɛ kɛɛ bɛdɩ baaba bɛtɛla mmenii mvʋlɔ.—Mt. 3:9.

Yɛda oyuwadɩ be mɔɔ mmenii mɔɔ bɛdɩ angʋmidi na bɛtɩ nɣanlɩ kɛɛ bɛdɩ baaba bɛtɛla mmenii mvʋlɔ hyɛ numɔ manlɩ nu. Na bo subanɩ tanɩ yɩ kɔhʋla kenyia yɛ zʋ tumi. (Gal. 5:26) Ebiye a, yɛkɔhʋla kenyia adwɩnɩ kɛɛ ɩsɛ kɛɛ bɛma ɔnwʋmɔ ɔhʋanɩ titili be yɛ anzɛnyɩɩ bɛ nɩ yedi wɔ ɔhʋanɩ sʋnʋnkʋ̃ be zʋ. Mɩnla yɛ ɩkɔwʋwa yɛ na yɛányianlɩ ɔzɔ adwɩnɩ yɩ be a? Mɔɔ ili bɔmʋnlɩ, ɩsɛ kɛɛ yɛnwʋ Gyehova yɩ adwɩnɩ wɔ odwokɔ eyi nwʋ. Na Bayɩbʋlʋ nu egyinanlɛ zʋ ndwokɔ anwɩ̃ be kɔhʋla kɔwʋwa yɛ ma yɛkɔhʋla kɛyɛ eyi.

Gyehova yɛ ikile ɔnwʋmɔ ɔhʋanɩ mɔɔ ɩsɛ kɛɛ yɛ sa kã yɩ a. Mɔwʋ kila eyi nwʋ ndianwʋ azʋlɔtʋ be.

• Gyehova pɛ kɛɛ ohunɛmaa tɩ nɣanlɩ kɛɛ bɛ yɩmmɔ bu bɛ, na ɛyɩlɛmaa sʋ̃ tɩ nɣanlɩ kɛɛ bo hũ mmɔ  dɔ bɛ. (Ɛfɩ. 5:33) Na Gyehova pɛ kɛɛ agyiahʋnlɩmaa bɛ nɩɩ bɔ nwʋkãvʋlɔ nkʋ̃ la nyia nna nu nkitanwʋlilɛ. (1 Kɔl. 7:3) Akʋ̃ sʋ̃, ɩfata kɛɛ awʋvʋlɔ kehila ɔhʋanɩ kɛɛ bo nnwuakula kowu bɛ, na nnwuakula sʋ̃ bɛahila ɔhʋanɩ kɛɛ bɛ awʋvʋlɔ kɔlɔ bɛ na bɛava mmʋwalɩyɛ bela mɔɔ behyinyia nɩ bɛama bɛ.—2 Kɔl. 12:14; Ɛfɩ. 6:2.

• Gyehova ikilaa ɔhʋanɩ kɛɛ yɛkɛla annidi kezile ali yekehile asafʋ nu mbanimbani mɔɔ bɛyɛ egyima ɛzɩzɩbɛ bɔbʋwa yɛ nɩ. (1 Tɛs. 5:12) Naasʋ̃, íni kɛɛ asafʋ nu mbanimbani fa ɔnwʋmɔ ɔhʋanɩ mɔɔ bɛlɛ yɩ nɩ bɛhyɛ be mmeliyema mmenyia nɩɩ mmaalɛ zʋ.—1 Pit. 5:​2, 3.

• Nyamɩnlɩ va ɔnwʋmɔ ɔhʋanɩ ɩma enii aɣanɩ kɛɛ ɩkʋla ide ndwuliyɛ na ɩsɛ kɛɛ bɛ manlɩmaa bobu bɛ.—Wul. 13:​1, 6, 7.

Gyehova zʋ̃ yɩ ahʋnlɩnɩ nu fa mɔɔ ɩfata yɛ nɩ ɩma yɛ ma ibulu zʋlɔ. Iluwakɛɛ bɔwʋlɩ yɛ wɔ tanɩ nu ti, ankɩ owulo nkʋ̃ la yɛ ɩfata yɛ a. (Wul. 6:23) Naasʋ̃, iluwa Gyehova yɩ ɔlɔlɛ kanyɩɩ ti, ɩzʋ̃ yɩ ahʋnlɩnɩ munwala nu iyila yɛ. (Ndw. 103:​10, 11) Nyilalɛ anzɛnyɩɩ ɔnwʋmɔ ɔhʋanɩ bela mɔɔ yɛ sa kɛhã wɔ Gyehova kɛnɩ nɩ, ɩdɩ yɩ adʋmɩ ti a.—Wul. 12:​6-8; Ɛfɩ. 2:8.

Kila wʋ nwʋ bʋwɔ wɔ oyuwadɩ adwɩnɩ nwʋ. Yɛákila yɩ bʋwɔ a, sa yɛkʋla yɛbɔ yɩ tʋ yenyia adwɩnɩ be kɛɛ yɛdɩ enii yɛtɛla abiyemmɔ. Kezimɔ ɔzɔ adwɩnɩ nɩ kɔhʋla kɛɣa ye ti nu nɩ, Gyisɛsɩ valɩ ndianwʋ be mɔɔ ɩfalɩ egyimayɛlɛmaa be mɔɔ boduwalɩ kakɛ bɛ nwʋ nɩ hilehileli numɔ. Egyimayɛlɛmaa yɩ be wɔlɩ yɩ tʋ yɛlɩ egyima nwɔnɩ, na oyuwa ifii ketee munwala nɩ begyĩĩ numɔ bɛyɛɛ egyima. Naasʋ̃ abiyemmɔ mɛyɩ, bɛɣa bɛyɛlɩ egyima dɔnɩhwɩlɩ ɔkʋ̃ pɛ. Bɛzabɛ mɔɔ belili bɔmʋnlɩ bɛɣalɩ nɩ nyianlɩ adwɩnɩ kɛɛ iluwa egyima mɔɔ nɩ bɛyɛ ti, bɔnlʋmmɔ yɛ bɛfata kɛɛ benyia ozukua kezile a. (Mt. 20:​1-16) Gyisɛsɩ luwalɩ ndianwʋ eyi zʋ hileli yɩ adʋwavʋlɔ yɩ kɛɛ, ɩsɛ kɛɛ bɛma bɛ anyɩ sɔ mɔɔ Nyamɩnlɩ kɛyɛ kɛma bɛ bela.

Kile nninyeni nwʋ anyɩnlɩzɔlɛ na áma ɛpɩbɛ sʋ̃maa wɔ mvʋlɔ kɛ. (1 Tɛs. 5:18) Sumazuma sʋ̃mavʋlɔ Pɔɔlʋ mɔɔ iábizia nnwʋnlamɩ nu ɔfʋã nu mmʋwalɩyɛ wɔ yi mmeliyema mɔɔ bɔwɔ Kɔlɛntɩ nɩ bɛ kɛ ɩávalɩ nwʋmɔ kɛɛ nɩ ɩwɔ ɔnwʋmɔ  ɔhʋanɩ kɛɛ ɩyɛ zɔ nɩ. (1 Kɔl. 9:​11-14) Ɩsɛ kɛɛ yɛma yɛ anyɩ sɔ dɩyɛ bela mɔɔ mmenii kɛva kɛma yɛ nɩ, na íni kɛɛ yɛhyɛ bɛ kɛɛ bɛyɛ́ nninyeni be bɛma yɛ.

Kã wʋ nwʋ azɩ. Sɛ abiye bu yɩ nwʋ tɛla zʋlɔ a, mbɔmɩ sʋ̃maa nɩ ɩma ɩtɩ nɣanlɩ kɛɛ dɩyɛ bela mɔɔ ɩwɔ nɩ, ɩsɛ kɛɛ inyia sʋ̃maa ɩkɩnla nwʋ. Sɛ yɛkã yɛ nwʋ azɩ a, ɩlɛ́ma yekenyia adwɩnɩ eyi mɔɔ ɩávata yɩ.

Nkɔmɩhyɛnii Danɩyɛlɩ yɛlɩ kãnwʋazɩ nwʋ ndianwʋ kɩnlɩma be manlɩ yɛ. Ankɩ abusunwa mɔɔ ɩzʋ̃ numɔ, yɩ anwʋpɩkɛ, kezimɔ izi dɩyɛ, nɩɩ nninyeni mɔɔ ɩbɔ numɔ mmɔdɩnɩ nɩ kɔhʋla kɛma ɩkɛdɩ nɣanlɩ kɛɛ ɩfata ɔnwʋmɔ ɔhʋanɩ sʋnʋnkʋ̃ mɔɔ yɩ sa hanlɩ yɩ nɩ. (Da. 1:​3, 4, 19, 20) Naasʋ̃ Danɩyɛlɩ hɔlɩ zʋlɔ hanlɩ yɩ nwʋ azɩ, na subanɩ eyi manlɩ ɩyɛlɩ abiye mɔɔ ɩla Gyehova yɩ ahʋnlɩnɩ zʋ paa.—Da. 2:30; 10:​11, 12.

Bɛmá yɛbʋ angʋmidi nɩɩ adwɩnɩ mɔɔ mɛyɩ lɛ kɛɛ yɛtɛla mmenii mvʋlɔ mɔɔ mmenii sʋ̃maa da yɩ ali wɔ nnɛ nɩ. Mfomi bɛmá yɛ anyɩ zɔ nyilalɛ bela mɔɔ Gyehova kɛva kɛma yɛ iluwa yɩ adʋmɩ ti nɩ.