Nɩ mɩ maamɩ nɩɩ mɩ papa dɩ Katɩlɩkɩmaa mɔɔ bɛáva bɔ ɔzʋ̃mɩnlɛ bedi ɛɣɛlɛ kʋlaa. Naasʋ̃ mmɩlɩ mɔ bozumanlɩ wɔ Bayɩbʋlʋ yɩ nu kɛɛ Nyamɩnlɩ yi dima yɛ lɛ Gyehova nɩ, bɛɣa bɛyɛlɩ Gyehova Dasɩvʋlɔmaa mɔɔ bɔbɔ ɛhyɩmɛ paa. Mɩ papa yiakili Gyisɛsɩ yɩ mmoduwaba mɔɔ nɩ ɩyɛ nɩ. Na akʋ̃ ɩvalɩ yɩ kapɩnta egyima yɩ ɩyɛlɩ aliyia be mɔɔ ɩwɔ yɛ awudo kɛnɩ bʋwɔ ma yɛva yɛyɛlɩ Kɩndɔm Hɔɔlʋ mɔɔ ili bɔmʋnlɩ wɔ San Juan del Monte, dɩka be mɔɔ ɩwɔ Philippines bo twonwa kezile Manila nu.

Bɔwʋlɩ mɩ wɔ 1952. Mɩ awʋvʋlɔ wɔlɩ yɩ tʋ kɛɛ bekilehilee mɩ Gyehova nwʋ dɩyɛ kɛmɔ behilehileli mɩ mmenlima mmenyia mbanimbani anla nɩɩ mmaalɛ asã yɩ nɩ. Minyii nɩ, mɩ papa hyɛlɩ mɩ ɛzɩzɩbɛ kɛɛ mɩɣɩngá Bayɩbʋlʋ yɩ ɔfʋã be eɣile bela, na ɩ nɩɩ mɩ zumanlɩ asafʋ awuuku azʋlɔtʋ sʋ̃. Nɩ ɩyɛ a, mɩ awʋvʋlɔ tʋ salɛ fʋlɔ mansini zʋ ehilalɛmaa nɩɩ mmeliyema mɔɔ bɛyɛ egyima wɔ Bɛtɩlɩ ma bɛba bɛda yɛ awudo. Mmeliyema mmenyia nɩɩ mmaalɛ eyimmɔ bo ozumanlɛnwʋnlɛ yɩ manlɩ mɩ abusunwa yɩ nyianlɩ anyɩnlɩlelɛ nɩɩ ɛzɩzɩbɛhyɛlɛ kezile, na mɛyɩ hanlɩ ye munwala ma yɛvalɩ Gyehova yɩ ɔzʋ̃mɩnlɛ yelili bɔmʋnlɩ wɔ yɛ ɛbɩlawɔlɛ nu.

Muzumanlɩ nninyeni sʋ̃maa wɔ mɩ awʋvʋlɔ be dedi nu. Mmɩlɩ mɔ adimakɛlɛ be hunli mɩ maamɩ mɛda nɩ, mɩ nɩɩ mɩ papa munwala wɔlɩ ɔhʋanɩbukolɛ egyima yɩ tʋ wɔ 1971. Naasʋ̃ wɔ 1973 nɩ, mɩ papa sʋ̃ wuli, nɩ mili alʋbɔ 20. Mɩ awʋvʋlɔ munwala mɔɔ bowuli nɩ manlɩ mɩdɩlɩ nɣanlɩ kɛɛ mɩyɛ ankʋnamɩ. Naasʋ̃ anyɩnlɩlazʋ mɔɔ “isi pi, na igyĩ yi pindinyii” mɔɔ ɩwɔ Bayɩbʋlʋ nu nɩ wʋwalɩ mɩ ma migyinanlɩ pindinyii, ɩmanlɩ mɩ ɛɣɛɛlɛ yɩkyɩlɩ, na mɩ nɩɩ Gyehova avinli hɔlɩ zʋlɔ yɛlɩ sɩ. (Hib. 6:19) Mɩ papa yi owulo mɛda nɩ, ɩákyɛ kʋlaa yɛ minyianlɩ ɔnwʋmɔ ɔhʋanɩ mɩɣa mɩyɛlɩ ɔhʋanɩbukolɛvʋlɔ titili a, na mʋhɔ mʋzʋ̃mɩnlɩ wɔ pamɩ be mɔɔ ɩwɔ aɣinzi aɣinzi mɔɔ bɔfʋlɔ yɩ Coron zʋ, wɔ Palawan.

Mʋhɔlɩ Coron nɩ, nɩ mili alʋbɔ 21. Iluwakɛɛ nɩ mʋzʋ̃ twonwa kezile nu nɩ ti, ɩyɛlɩ mɩ nnwʋánlɩ mmɩlɩ mɔ mɩɣa mʋnwʋnlɩ kɛɛ layɩtɩ ɩáyɛ egyima wɔ kɛnɩ baaba, béni pipe, na kaalɩ anzɛnyɩɩ moto nkʋ̃kʋ̃ be la yɛ ɩwɔ kɛnɩ nɩ. Ɩwɔ numɔ kɛɛ nɩ mmeliyema ɛgyɩkɩ̃ɩ̃ wɔ kɛnɩ dɩyɛ, naasʋ̃ nɩ míni ɔhʋanɩbukolɛvʋlɔ mɔɔ mɩ nɩɩ yɩ  kɔhɔ dasɩlɛlilɛ, na ɩyɛ po a mɩzamɩ nkʋ̃ yɛ nɩ mʋkɔ dasɩlɛlilɛ a. Wɔ eziyianɩ mɔɔ ili bɔmʋnlɩ yɩ nu mɛyɩ, nɩ mɩ ɛɣɛɛlɛ lɔ mu mmusunwamaa nɩɩ mʋ ɔhɔnwʋmmɔ yɩ baaba. Nɩ itwu nunuma a, mikila ahɔnlɔnwa mɔɔ bogua oyumi nɩ, na ɔkɔnwʋ yɩ nɩ, nɩ mmʋnlɩ luwa mɩ anyɩ tʋ. Nɩ ɩyɛ mɩ kɛɛ miɣiakí mi egyimalilɛ yɩ na mizia mʋhɔ́ awudo.

Nɩ itwu ɔzɔ mmɩlɩ yɩ a, mɩkã kezimɔ mɩtɩ nɣanlɩ munwala mikile Gyehova wɔ mpayɩwɔlɛ nu. Nɩ mʋdwɩnɩndwɩnɩ odwokɔ be mɔɔ ɩhyɛ ɛzɩzɩbɛ mɔɔ mɩɣɩnganlɩ wɔ Bayɩbʋlʋ nu anzɛnyɩɩ asafʋ awuuku nu nɩ nwʋ. Ndwomi 19:14 yɛ nɩ mɩta mʋdwɩnɩndwɩnɩ nwʋ a. Mɩɣa mʋnwʋnlɩ kɛɛ sɛ mʋkɔ zʋ mʋdwɩnɩndwɩnɩ nninyeni mɔɔ ɩsɔ Gyehova anyɩ dɩkɛɛ yɩ sa ti egyima nɩɩ yi subanɩ azʋlɔtʋ yɩ nwʋ a, ɩkɛyɛ “mʋ Bʋdanlɩ nɩɩ mɩ Devʋlɔ.” Ɔwɩɛnɩlɛ Aɣanɩ be nu odwokɔ mɔɔ ise “You Are Never Alone” a nɩ wʋwalɩ mɩ baaba. Mɩɣɩnganlɩ yɩ mbɔmɩ sʋ̃maa. Meti mmɩlɩ mɔ ɩhalɩ mɩzamɩ nkʋ̃ nɩ, mʋnwʋnlɩ kɛɛ nɩ Gyehova kɩnla mʋ nwʋ, na ɔzɔ mmɩlɩ nɩ manlɩ minyianlɩ ɔnwʋmɔ ɔhʋanɩ mʋwɔlɩ mpayɩ, muzumanlɩ dɩyɛ, na mʋdwɩnɩndwɩnɩnlɩ nninyeni nwʋ.

Mʋhɔlɩ Coron nɩ, ɩákyɛ bela yɛ bɛyɩlɩ mɩ kɛɛ asafʋ nu ebani a. Iluwakɛɛ nɩ mɩzamɩ nkʋ̃ yɛ mɩdɩ asafʋ nu ebani wɔ kɛnɩ ti, mʋwɔlɩ yɩ tʋ kɛɛ mikilaa Tiyokɩlasi Ɔzʋ̃mɩnlɛ Sukuulu, Ɔzʋ̃mɩnlɛ Ayiyialɩyɛ, Asafʋ Buuku Dɩyɛzumanlɛ, nɩɩ Ɔwɩɛnɩlɛ Aɣanɩ Dɩyɛzumanlɛ mɔɔ yɛyɛ yɩ dapɛnɩ bela nɩ zʋ. Akʋ̃ sʋ̃, nɩ dapɛnɩ awielɩyɛ bela mɩma bagua nu ndɛnɩ, meti nɩ míni alagyɩ po mɔɔ mɩkɛva mʋkɔdwɩnɩndwɩnɩ ankʋnamɩyɛlɛ nwʋ!

Dasɩlɛlilɛ egyima mɔɔ mɩyɛlɩ yɩ wɔ Coron nɩ zoli mma, na mɩ Bayɩbʋlʋ dɩyɛzumanlɛmaa yɩ be po nlumanlɩ. Naasʋ̃ nɩ ndwokɔzɩzɩbɛ mvʋlɔ wɔ kɛ. Itwu eɣile be a nɩ mitiyia mʋkɔ azɩlɛ-sini yi nu, na mʋzʋ̃ awudo mɩyɩ mʋ nwʋ nwɔnɩ a mʋkɔ mutwu kɛnɩ oyuwa. Mɩtɩndɛɛ yɩ, nɩ mízi dɩka mɔɔ mʋkɔ a mɩkɛla po. Nɩ pamɩ ngyɩkɩ̃ɩ̃ ngyɩkɩ̃ɩ̃ sʋ̃maa kɩnla asafʋ nɩ yɩ azɩlɛ-sini yi nwʋ. Meti nɩ mɩta mɩfa ɛlɛnɩ muduwa ngyemvile mɔɔ ahumi ituu wɔ zʋlɔ zʋ mʋkɔ kɛnɩ, ɩávalɩ nwʋmɔ kɛɛ nɩ mízi nzulo wɩɛ nɩ! Wɔ ɔzɔ ndwokɔzɩzɩbɛ yɩ munwala nu nɩ, Gyehova wɔlɩ mʋ nwʋ banɩ na ihilalɩ mɩ. Aɣinzi yi, mɩɣa mɩdɩlɩ yɩ tʋ kɛɛ nɩ Gyehova isiyeziyee mɩ kɛma ndwokɔzɩzɩbɛ nɣezile mɔɔ nɩ mikeyiyia wɔ mi egyimalilɛ fʋlɔ mɔɔ ɩlɛ ɩbama mɩ nɩ nu.

Wɔ 1978 nɩ, bɛmanlɩ egyimalilɛ fʋlɔ mɩ wɔ Papua New Guinea mɔɔ ɩwɔ Australia manlɩ tisʋlɔ nɩ. Papua New Guinea dɩ manlɩ mɔɔ igua avile zʋ. Mɩɣa mʋnwʋnlɩ kɛɛ mmenii kɛyɛ miliyɔnʋ asã mɔɔ bɔwɔ kɛnɩ kã ndɛnɩ mɔɔ ɩbʋ 800 nɩ, ɩyɛlɩ mɩ asibɔnwʋ. Anyɩnlɩlelɛ odwokɔ yɛ lɛ kɛɛ, nɩ mmenii sʋ̃maa kʋla kã Melanesian Pidgin, ndɛnɩ be mɔɔ besia bɔfʋlɔ yɩ Tok Pisin nɩ.

Bɛmanlɩ mʋhɔ mʋzʋ̃mɩnlɩ wɔ Bʋlɔfʋlɔ asafʋ be nu ɛgyɩkɩ̃ɩ̃ wɔ bo twonwa kezile Port Moresby nu. Naasʋ̃ aɣinzi yi bɛmanlɩ mʋhɔlɩ Tok Pisin asafʋ nu na bɛmanlɩ mʋhɔ muzumanlɩ ndɛnɩ yɩ. Nɩ mɩfa mɔɔ musuma nɩ midi egyima wɔ dasɩlɛlilɛ egyima yɩ nu. Eyi wʋwalɩ mɩ ma muzumanlɩ ndɛnɩ yɩ ndɛndɛ paa. Ɩákyɛ, nɩ mʋkʋla mɩfa Tok Pisin ndɛnɩ yɩ mɩma bagua nu ndɛnɩ po. Mɔɔ ɩyɛlɩ mɩ nnwʋánlɩ po yɛ lɛ kɛɛ, mʋhɔlɩ Papua New Guinea nɩ, iádi ɔlʋbɔ ɔkʋ̃ po yɛ bɛyɛlɩ mɩ mansini zʋ ehilalɛvʋlɔ bɛmanlɩ asafʋ azʋlɔtʋ mɔɔ bɛkã Tok Pisin ndɛnɩ mɔɔ bɔwɔ nnɩka sʋ̃maa wɔ ɔzɔ mansini yi nu nɩ a.

Iluwakɛɛ nɩ asafʋ azʋlɔtʋ nɩ bɛáɣike nwʋmɔ nɩ ti, nɩ ɩsɛ kɛɛ mɩyɛ mansini ayiyialɩyɛ sʋ̃maa na mutudu ahʋanɩ sʋ̃maa sʋ̃. Iluwakɛɛ nɩ mudu mʋhɔ manlɩ fʋlɔ mɔɔ ɔsʋnɩ ndɛnɩ mɔɔ bɛkã, na bɛ amamɩlɛ dɩ sʋnʋnkʋ̃ wɔ mɩ dɩyɛ yɩ nwʋ nɩ ti, ahyɛasɩ yɩ nɩ mɩtɩ nɣanlɩ kɛɛ mɩyɛ ankʋnamɩ. Nɩ ɛkɛnɩ dɩ avile avile na  ɔhʋanɩ yɩ zʋ dudu, meti nɩ mikyelagyelaa asafʋ azʋlɔtʋ yɩ a, mɩahʋla mɩfa kaalɩ mʋkɔ. Meti nɩ kɛyɛ dapɛnɩ bela mɩfa pileeni mutu ɔhʋanɩ. Nɩ ɩyɛ po a, pileeni mɔɔ mʋkɔvʋ nɩ ɩáyɛ baaba bela, nɩ mɩzamɩ nkʋ̃ mɩda numɔ. Nɩ ɔhʋanɩdulɛ eyimmɔ yɛ ahunlududulɛ dɩkɛɛ mɔɔ mɩlɛ ɛlɛnɩ mutuu ɔhʋanɩ wɔ ngyemvile zʋ la!

Nɩ bo nu sʋ̃maa béni foonu, meti sɛ nɩ mɩbahɔ mikegyela bɛ a, nɩ mɩkɛlɛ ahɛlɛta mɩma asafʋ azʋlɔtʋ yɩ. Mbɔmɩ sʋ̃maa nɩ, nɩ mʋkɔ mutwu kɛnɩ po ansaana mɩ ahɛlɛta nɩ iadwu bɛ kɛ. Na ɩba yɩ zɔ a, nɩ ɩsɛ kɛɛ mibiziabizia ma bekile mɩ dɩka mɔɔ mmeliyema yɩ da. Naasʋ̃, nɩ sɛ mʋkɔ mʋnwʋ mmeliyema yɩ a, bede mɩ wɔ ɔhʋanɩ kɩnlɩma zʋ bɛfa bekile kɛɛ bɛ anyɩ sɔ kɛɛ mɩɣa. Nɩ eyi ma mɩkakɛ sianti mɔɔ mutua ɔhʋanɩ tɩndɩnlɩ mʋkɔ mikyela bɛ nɩ. Gyehova wʋwalɩ mɩ wɔ ahʋanɩ sʋ̃maa zʋ, na mɩ nɩɩ yɩ avinli abusunwawɔlɛ yɩ nu sʋ̃ yɛlɩ sɩ.

Eɣile mɔ ili bɔmʋnlɩ mɔɔ mʋhɔlɩ dɩyɛzumanlɛ wɔ pamɩ be mɔɔ bɔfʋlɔ kɛnɩ Bougainville nɩ, agyiahʋnlɩmaa be valɩ ɛzɩlɩkɛ ɣa yiyialɩ mɩ, na beɣizialɩ mɩ kɛɛ: “Ɛkakɛ yɛ a?” Mɩhakɛlɩ kɛɛ milili agyiahʋnlɩmaa eyimmɔ dasɩlɛ mmɩlɩ mɔ mʋhɔ mudwuli Port Moresby fʋlɔ nɩ. Mɩ nɩɩ bɛ wɔlɩ Bayɩbʋlʋ dɩyɛzumanlɛ tʋ na aɣinzi yi mɩlanɩnlɩ dɩyɛzumanlɛ yɩ mɩmanlɩ eliyema be mɔɔ nɩ ɩwɔ kɛnɩ. Kakɩ yɩ mɛyɩ nɩ bɛzabɛ anwɩ̃ yɩ munwala bonluma! Nyilalɛ sʋ̃maa mɔɔ Gyehova va manlɩ mɩ wɔ alʋbɔ asã mɔɔ milili wɔ Papua New Guinea nɩ, eyi kɩnla nwʋmɔ.

Ansaana mʋzʋ̃ Coron mɩyɩɩ mʋ nwʋ wɔ 1978 nɩ, miyiyialɩ eliyema baalɛ kɩnlɩma be mɔɔ ɩbɔ yɩ nwʋ mmɔdɩnɩ baaba mɔɔ bɔfʋlɔ yɩ Adel. Nɩ ɩdɩ ɔhʋanɩbukolɛvʋlɔ mɔɔ ɩwɔ nnwuakula anwɩ̃ mɔɔ bɔfʋlɔ bɛ Samuel nɩɩ Shirley. Mmɩlɩ ɔkʋ̃ yɩ la sʋ̃, nɩ ikilaa yɩ maamɩ mɔɔ yɩ alʋbɔ hɔ anyunumi nɩ. Wɔ May 1981 nɩ, mizia mɩɣalɩ Philippines mɩɣa migyialɩ Adel. Yegyialɩ yewieli nɩ, yɛwɔlɩ numɔ yɛyɛlɩ ɔhʋanɩbukolɛ egyima yɩ na yɛwɔlɩ numɔ yehilalɩ yɛ abusunwa yɩ.

Ɩwɔ numɔ kɛɛ nɩ mɩlɛ abusunwa dɩyɛ, naasʋ̃ wɔ 1983 nɩ, bezia bɛyɩlɩ mɩ kɛɛ ɔhʋanɩbukolɛvʋlɔ titili na bɛvalɩ mɩ bedianlɩ Linapacan Island mɔɔ ɩwɔ Palawan nɩ. Mɩ nɩɩ mɩ abusunwa yɩ munwala duli hɔlɩ dɩka eyi mɔɔ ɩwɔ aɣinzi aɣinzi na Dasɩvʋlɔ bela íni kɛnɩ nɩ. Wɔ ɔlʋbɔ ɔkʋ̃ mɛda nɩ, Adel yɩ maamɩ wuli. Naasʋ̃ yeminyianlɩ yɛ nwʋ wɔ dasɩlɛlilɛ egyima yɩ nu, na ɩwʋwalɩ yɛ ma yegyinanlɩ ɛyɛkɛlilɛ yɩ munwa. Yɛhyɩhyɛlɩ Bayɩbʋlʋ dɩyɛzumanlɛ mɔɔ itu mpʋnɩ sʋ̃maa wɔ Linapacan, meti ɩákyɛ bela yɛ nwʋmɔ ɣa hyinyianlɩ kɛɛ yenyia Kɩndɔm Hɔɔlʋ a. Meti yɛzayɛ yegyinanlɩ ebiye. Yɛ anyɩ leli kɛɛ yɛhɔlɩ kɛnɩ yɩ alʋbɔ asã mɛda pɛ nɩ, yenyianlɩ mmenii 110 ma bɛɣalɩ Ɛhakɛlɛlilɛ yɩ be. Na yɛzʋ̃ kɛnɩ yɛyɩlɩ yɛ nwʋ nɩ, bo nu sʋ̃maa nyianlɩ anyunumihɔlɛ ma bonlumanlɩ.

Wɔ 1986 nɩ, bɛmanlɩ yɛhɔ yɛzʋ̃mɩnlɩ wɔ pamɩ be mɔɔ bʋfʋlɔ yɩ Culion zʋ. Nɩ bɔwɔ dɩka be mɔɔ mmenii mɔɔ kokobe yɛ bɛ nkʋ̃ la yɛ bɛda kɛnɩ a. Mɛyɩ mɛda nɩ, Adel sʋ̃ ɣa yɛlɩ ɔhʋanɩbukolɛvʋlɔ titili. Ahyɛasɩ yɩ nɩ ye kunlu tu kɛɛ yekeli mmenii mɔɔ kokobe yɛ bɛ nɩ dasɩlɛ. Naasʋ̃ mmeliyema mɔɔ bɔwɔ kɛnɩ nɩ hyɛlɩ yɛ ɛzɩzɩbɛ kɛɛ mmenii mɔɔ kokobe yɛ bɛ nɩ, bɛma awudo bɛ meti ɩyɛ sɩ kɛɛ bɛkɛva bɛ adimakɛlɛ yɩ kɛzanɩ yɛ. Mmenii eyi mɔɔ bɔ nwʋ ba bɛ nɩ, nɩ bo nu be ba dɩyɛzumanlɛ wɔ eliyema baalɛ be yɩ awudo. Ɩákyɛ yɛ bɔlɔ mɔɔ ɩhanlɩ yɛ nɩ duli minlinli a, na yɛhanlɩ Bayɩbʋlʋ nu anyɩnlɩlazʋ yɩ nwʋ odwokɔ yehileli mmenii eyimmɔ mɔɔ nɩ bɛtɩ nɣanlɩ kɛɛ  Nyamɩnlɩ nɩɩ mmenii munwala bʋ bɛ nɩ. Bɛ anyɩ leli baaba paa mmɩlɩ mɔ bozumanlɩ kɛɛ sa bɔkʋla benyia pɔkɔdɩlɛ mɔɔ idi munli baaba wɔ eɣile be nɩ.—Lk. 5:​12, 13.

Mɩnla yɛ ɩwʋwalɩ ye nnwuakula yɩ ma bɛ anyɩ leli wɔ Culion a? Mɩ nɩɩ Adel dʋlɩ salɛ vʋlɔlɩ mmeliyema nɣɛdɛkɛ anwɩ̃ be mɔɔ bɔwɔ Coron ma bɛɣa bɛhɩnlanlɩ yɛ nwʋ na ama ye nnwuakula yɩ bɛanyia ɔhɔnwʋmmɔ baaba mɔɔ bɛ nɩɩ bɛ kɔwɔ. Samuel, Shirley, nɩɩ mmeliyema nɣɛdɛkɛ anwɩ̃ eyimmɔ valɩ anyɩnlɩlelɛ wʋwalɩ mmenii ma bozumanlɩ nɔhʋanlɛ yɩ. Bɛ nɩɩ nnwuakula sʋ̃maa zumanlɩ dɩyɛ na mɩ nɩɩ Adel nɩɩ nnwuakula yɩ bɛ maamɩ mmɔ sʋ̃ zumanlɩ dɩyɛ. Idwuli mmɩlɩ be po nɩ, nɩ yɛ nɩɩ mmusunwa 11 sumaa dɩyɛ. Ɩákyɛ bela, yɛyɛlɩ Bayɩbʋlʋ dɩyɛzumanlɛ sʋ̃maa nkʋ̃ʋ̃ ma yɛhyɩhyɛlɩ asafʋ fʋlɔ!

Ahyɛasɩ yɩ mɛyɩ, nɩ mɩzamɩ nkʋ̃ la yɛ mɩdɩ asafʋ nu ebani wɔ ɔzɔ dɩka nɩ a. Meti Bɛtɩlɩ hanlɩ kɛɛ mɩyɛ́ dapɛnɩ dapɛnɩ dɩyɛzumanlɛ azʋlɔtʋ yɩ mɩma ɛlawulowɔlɛmaa awɔtwɛ mɔɔ bɔwɔ Culion nɩ. Bɛhanlɩ kɛɛ mɩyɛ́ ebiye sʋ̃ mɩma ɛlawulowɔlɛmaa ahɔnla mɔɔ bɔwɔ suwa be mɔɔ bɔfʋlɔ yɩ Marily, mɔɔ ɔkɔɔ kɛ a, ɛkɛva ɛlɛnɩ kodua nzulo dɔnɩhwɩlɩ asã ansaana wʋadwu kɛnɩ nɩ. Nɩ yɛpɔ dɩyɛzumanlɛ a, mɩ nɩɩ mɩ abusunwa yɩ fa dɔnɩhwɩlɩ sʋ̃maa duwa avile yi zʋ kɔ yɛ Bayɩbʋlʋ dɩyɛzumanlɛ azʋlɔtʋ wɔ suwa be mɔɔ bɔfʋlɔ yɩ Halsey.

Aɣinzi yi, yɛnwʋnlɩ kɛɛ egyima mɔɔ yɛyɛlɩ wɔ Marily nɩɩ Halsey nɩ zo mma sʋ̃maa, meti yegyinanlɩ Kɩndɔm Hɔɔlʋ wɔ ɔzɔ nnɩka anwɩ̃ yɩ munwala. Kɛmɔ izili wɔ Linapacan nɩ, mmeliyema nɩɩ anyɩnlɩlelɛmaa yɩ valɩ nninyeni mɔɔ yɛkɛva kegyina aliyia yɩ nu sʋ̃maa bɛɣalɩ na bɔwʋwalɩ sʋ̃ ma yegyinanlɩ. Nɩ Kɩndɔm Hɔɔlʋ mɔɔ ɩwɔ Marily kʋla fa mmenii 200, na nɩ bɔkʋla bobuko aliyia yɩ nu sʋ̃, meti nɩ ɩma bɔkʋla bɛfa kɛnɩ bɛyɛ mansini ayiyialɩyɛ azʋlɔtʋ.

Wɔ 1993 mɔɔ nɩ ye nnwuakula yɩ yɛ mbanimbani nɩ, mɩ nɩɩ Adel wɔlɩ mansini egyima yɩ tʋ wɔ Philippines. Akʋ̃ wɔ ɔlʋbɔ 2000 nɩ, mʋhɔlɩ Azʋ̃mɩvʋlɔ Ɛdɩdɩlɛ Sukuulu na bɛdɩdɩlɩ mɩ kɛɛ kilehilevʋlɔ mɔɔ mikehile dɩyɛ wɔ ɔzɔ sukuulu yɩ tʋ. Nɩ mɩtɩ nɣanlɩ kɛɛ mɩávata kɛɛ mɩkɛyɛ egyima eyi, naasʋ̃ nɩ Adel hyɛ mɩ ɛzɩzɩbɛ eɣile bela. Ɩhakɛlɩ mɩ kɛɛ Gyehova kɛma anwʋzɩzɩbɛ mɩ ma mɩkɛva mɩkɛyɛ egyimalilɛ fʋlɔ eyi. (Fɩl. 4:13) Nɩ Adel zi mɔɔ ɩkãã, iluwakɛɛ yɩzayɩ sʋ̃ ɩávalɩ nwʋmɔ kɛɛ nɩ adimakɛlɛ be ididee yi nɩ, nɩ ɩyɛɛ yi egyimalilɛ yɩ.

 Wɔ 2006 mmɩlɩ mɔ nɩ mɩlanwʋ la mikile dɩyɛ nɩ, Dɔkɩtamaa hanlɩ kɛɛ Adel nyia adwɩnɩ nu adimakɛlɛ be mɔɔ nɩ ɩkɔhʋla kɛma yɩ nwʋ kɔwʋsʋwʋsʋ. Eyi yɛlɩ yɛ asibɔnwʋ! Mmɩlɩ mɔ mɩhanlɩ kɛɛ ankɩ yɛvá ye egyimalilɛ yɩ yeziye kɛnɩ nɩ, Adel hanlɩ hileli mɩ kɛɛ, “Misiãã wʋ, pɛ dɔkɩta be mɔɔ ɩkɔhʋla kɔwʋwa mɩ wɔ mɩ adimakɛlɛ yɩ nwʋ, na mizi kɛɛ Gyehova kɔwʋwa yɛ ma yɛkɔdʋwa egyima yɩ zʋ.” Wɔ alʋbɔ ahyiã mɔɔ ili kɛnɩ nɩ, Adel dʋwalɩ yɩ ɔzʋ̃mɩnlɛ egyima yɩ zʋ mɔɔ ɩátɩndɛlɩ yɩ avʋ̃tʋ. Idwuli dɩka be mɔɔ nɩ ɩáhʋla itiyia dɔkʋ̃ nɩ, ɩwʋwalɩ hwiili nu ɩhɔlɩ dasɩlɛlilɛ. Mmɩlɩ sʋ̃ mɔɔ nɩ ɩáhʋla ɩtɩndɛ baaba nɩ, sɛ yɛkɔ dɩyɛzumanlɛ a, nɩ ɩfa odwokɔ ɔkʋ̃ anzɛnyɩɩ anwɩ̃ be la yɛ ɩma munwalɩyɛ a. Ansaana Adel kowu wɔ 2013 nɩ, nɩ mmeliyema yɩ ta kɛlɛ ndwokɔ be bɩlɛ yɩ fa kile anyɩnlɩzɔlɛ wɔ yi pindinyiigyinanlɛ nwʋ ndianwʋba mɔɔ ɩyɛlɩ nɩ nwʋ. Mɩ nɩɩ Adel, mʋ nwʋkãvʋlɔ nɔhʋanlɛvʋlɔ mɔɔ ɩwɔ ɔlɔlɛ yɩ wʋwalɩ alʋbɔ 30 nɩɩ yɩ mɛda, naasʋ̃ kakɩ yɩ mɔɔ íni kɛnɩ nɩ, alɔbɔlilɛ nɩɩ ankʋnamɩyɛlɛ yɩkyɩlɩ mɩ dɔkʋ̃.

Nɩ Adel pɛ kɛɛ mʋtʋwa mi egyimalilɛ yɩ zʋ, meti ɔzɔ la yɛ mɩyɛlɩ a. Mʋhɔlɩ zʋlɔ mɩyɛlɩ sʋ̃maa wɔ mi egyimalilɛ yɩ nu, na ɩwʋwalɩ ma ankʋnamɩyɛlɛ nɣanlɩdɩlɛ yɩ hanlɩ azɩ. Ɔzʋmɩ 2014 kɔbʋmɩ 2017 nɩ, bɛmanlɩ mʋhɔ migyelagyelalɩ asafʋ azʋlɔtʋ mɔɔ bɛkã Tagalog ndɛnɩ mɔɔ bɔwɔ amanlɩ azʋlɔtʋ mɔɔ bɛva salɛ bediã ye egyima yɩ zʋ wɔ kɛnɩ nɩ. Mɛyɩ mɛda nɩ, mʋhɔ migyelagyelalɩ asafʋ azʋlɔtʋ mɔɔ bɛkã Tagalog ndɛnɩ wɔ Taiwan, United States, nɩɩ Canada. Wɔ 2019 nɩ, mihilalɩ Bulombunlililɛ Odwokɔbahanlɛmaa Sukuulu azʋlɔtʋ mɔɔ bɛfa Bʋlɔfʋlɔ bɛyɛ zʋ wɔ India nɩɩ Thailand. Mɩ anyɩ leli baaba wɔ egyimalilɛ azʋlɔtʋ eyimmɔ munwala nu. Sɛ mɩfa mʋ nwʋ munwala muwula Gyehova ɔzʋ̃mɩnlɛ nu a, mɩ anyɩ de paa.

Wɔ egyimalilɛ bela mɔɔ yekenyia nu nɩ, nɩ yɛ nɩɩ mmeliyema yɩ fa ɔhɔnwʋ ɛzɩzɩbɛ ɛzɩzɩbɛ, meti nɩ sɛ yetiãã bɛ kɛnɩ yɛkɔhɔ a ɩ́la azɩ. Muzuma kɛɛ mɩkɛva mʋ nwʋ mikediã Gyehova zʋ kʋlakʋla wɔ mmɩlɩ mɔ ɩdɩ zɔ nu. Ɩwʋwa mɩ mbɔmɩ sʋ̃maa, na eyi ɩwʋwa mɩ ma mʋzʋ̃ mɩ ahʋnlɩnɩ nu mide nzɩnzanlɩyɛ bela mɔɔ ɩba mɩ ɛbɩlawɔlɛ nu nɩ mitiã nu. Nnɛ, mʋsʋ̃mɩ kɛɛ ɔhʋanɩbukolɛvʋlɔ titili wɔ Philippines. Mɩ anyɩ de wɔ mɩ asafʋ fʋlɔ yɩ nu, iluwakɛɛ mmeliyema mɔɔ bɔwɔ kɛnɩ nɩ bʋwa mɩ, bɛdɩ abusunwa mɔɔ bɔdwɩnɩ mʋ nwʋ. Mɩ anyɩ le sʋ̃ kɛɛ Samuel nɩɩ Shirley bosumazumaa bɛ maamɩ yi dedi yi.—3 Dwɔ. 4.

Amba, miyiyia ndwokɔzɩzɩbɛ sʋ̃maa wɔ mɩ ɛbɩlawɔlɛ nu, mɔɔ ebiye yɛ lɛ kɛɛ, mɩ yɩ mɔɔ mʋdɔ yɩ nwʋnlɩ amanɩyɛ na adimakɛlɛ be mɔɔ ɩyɛ atɩɩtɩɩ hunli yi. Nɩ ɩsɛ kɛɛ musuma nninyeni mvʋlɔ na mide bʋwabɩlɛ azʋlɔtʋ mitiã numɔ. Naasʋ̃, mʋnwʋ kɛɛ Gyehova “nɩɩ ye nu bela yɛ avinli ɩáwa.” (Egy. 17:27) Gyehova yɩ sa “ɩáyɛ sikalɛ sʋ̃maa” kɛɛ ɩkɔwʋwa yɩ asʋ̃mɩvʋlɔ na ɩahyɛ bɛ ɛzɩzɩbɛ, wɔ mmɩlɩ po mɔ bɔwɔ azɩlɛ-sini mɔɔ ɩwɔ aɣinzi aɣinzi nu nɩ. (Ayɩ. 59:1) Mʋ Bʋdanlɩ Gyehova hɩnla mʋ nwʋ wɔ mʋ nnwʋanlɩ eɣile munwatĩĩ nu, na mɩ anyɩ sɔ mɔɔ ɩyɛ ɩma mɩ nɩ baaba. Ɩlɛ́kalɩ mɩzamɩ nkʋ̃ kyɩ̃.