ASƲ̃ eyiyia ɔhawʋ be ma ɛdɩ nɣanlɩ kɛɛ enii bʋwavʋlɔ bela kyɩ̃ a? Yɛda mmɩlɩ be mɔ “anwʋhyɩlɩlɛ sʋ̃maa” wɔ numɔ nu, na ɩkʋla ɩma ye padi kolɔ na yɛtɩ nɣanlɩ kɛɛ abiyela ɩyɩ yɩ anyɩ ɩma yɛ. (2 Tim. 3:1) Naasʋ̃, sɛ yeyiaa ndwokɔzɩzɩbɛ a, mmenii be wɔ kɛnɩ mɔɔ sa bɔkʋla bɔbʋwa yɛ. Bayɩbʋlʋ yɩ kã kɛɛ ɔhɔnwʋmmɔ baaba kɔhʋla kɔwʋwa yɛ wɔ “anwʋhyɩlɩyɛ mmɩlɩ nu.”—Ɛɣɛ. 17:17.

Wɔ sʋ̃mavʋlɔ Pɔɔlʋ yɩ odwokɔbadɛlɛlɛ ɔhʋanɩdulɛ yɩ nu nɩ, ɩ nɩɩ yɩ ɔhɔnwʋmmɔ yɩ be hɔlɩ, na bɔwʋwalɩ yɩ wɔ ahʋanɩ sʋ̃maa zʋ. (Kol. 4:​7-11) Mmɩlɩ mɔ bɛvalɩ Pɔɔlʋ bedianlɩ fiyiadɩ wɔ Wulomi nɩ, yɩ ɔhɔnwʋmmɔ yɩ wʋwalɩ yɩ ma ɩyɛlɩ egyima azʋlɔtʋ mɔɔ nɩ yɩzayɩ ɩlɔ́kʋla kɛyɛ nɩ. Kɛ ndianwʋ nɩ, Ɛpafɩlodɩtɛsɩ wʋwalɩ Pɔɔlʋ ma yɩ sa hanlɩ nninyeni mɔɔ mmeliyema mmenyia nɩɩ mmaalɛ mɔɔ bɔwɔ Fɩlɩpayɩ va nwʋanlɩ yɩ nɩ. (Fɩl. 4:18) Tayɩkɩkɛsɩ valɩ Pɔɔlʋ yɩ ahɛlɛta hɔ manlɩ asafʋ azʋlɔtʋ yɩ. (Kol. 4:7) Ɩávalɩ nwʋmɔ kɛɛ nɩ bediã Pɔɔlʋ fiyiadɩ wɔ yɩzayɩ yɩ awudo anzɛnyɩɩ ɩla fiyiadɩ ankasa nɩ, ɩhʋla ɩyɛlɩ yɩ ɔzʋ̃mɩnlɛ egyima yɩ iluwa yɩ ɔhɔnwʋmmɔ yɩ bɔ mmʋwalɩyɛ zʋ. Kɛ ɩkɛyɛ na wʋahʋla wʋayɛ ɔhɔnwʋba nnɛ a?

Nnɛ, mmeliyema mmenyia nɩɩ mmaalɛ be wɔ kɛnɩ mɔɔ bɛma yɛnwʋ mɔɔ ɔhɔnwʋmmɔ kɔhʋla kɛyɛ kɔwʋwa bɔ nwʋ bɔ nwʋ. Kila eliyema baalɛ be mɔɔ ɩlalɩ yɩ ali kɛɛ ɩdɩ ɔhɔnwʋ ɩma Elisabet mɔɔ ɩdɩ ɔhʋanɩbukolɛvʋlɔ wɔ Spain nɩ. Mmɩlɩ mɔ Elisabet yɩ maamɩ nyianlɩ kansa nɩ, eliyema baalɛ yɩ valɩ Bayɩbʋlʋ nu ndwokɔ mɔɔ ɩhyɛ ɛzɩzɩbɛ sʋ̃maa zɛndɩlɩ yɩ. Elisabet kã kɛɛ, “mɛsegyi eyimmɔ manlɩ minyianlɩ anwʋzɩzɩbɛ fʋlɔ eɣile bela mɩva milili mɩ asɛdɩ azʋlɔtʋ nwʋ egyima, na ɩáma mɩtɩ nɣanlɩ kɛɛ mɩyɛ ankʋnamɩ.”—Ɛɣɛ. 18:24.

Sɛ yɛbʋwa ye mmeliyema ma bɔkɔ dasɩlɛlilɛ anzɛnyɩɩ dɩyɛzumanlɛ a, sa ɩkʋla ɩhyɛ yɛ nɩɩ bɔ ɔhɔnwʋvalɛ nu ɛzɩzɩbɛ. Kɛ ndianwʋ nɩ, asʋ̃ sa ɔkʋla fa wʋ kaalɩ fa eliyema benyia anzɛnyɩɩ baalɛ ebani be kɔ dɩyɛzumanlɛ anzɛnyɩɩ dasɩlɛlilɛ a? Sɛ ɔbʋwa bɛ wɔ ɔzɔ ɔhʋanɩ yɩ zʋ a, sa ɔkʋla hyɛ bɛ ɛzɩzɩbɛ na bɛzabɛ sʋ̃ bɛkɛhyɛ wʋ ɛzɩzɩbɛ. (Wul. 1:12) Naasʋ̃ Kilisinyiamaa be wɔ kɛnɩ a bɛhalɩ aliyia nu. Kɛ ɩkɛyɛ na wʋayɛ ɔhɔnwʋba wʋama ɔzɔ mmeliyema yɩ a?

Ye mmeliyema be wɔ kɛnɩ a iluwa bɔ pɔkɔdɩlɛ anzɛnyɩɩ bʋwabɩlɛ be ti bɛahʋla bɔkɔ dɩyɛzumanlɛ wɔ Kɩndɔm Hɔɔlʋ. Ɔzɔ yɛ ɩdʋlɩ eliyema be mɔɔ bɔfʋlɔ yɩ David mɔɔ nɩ inyia kansa nɩ a. Bɛvalɩ yɩ bedianlɩ awudo zʋ aziyianɩ ahyiã nɩɩ yɩ mɛda. Ɔzɔ mmɩlɩ yɩ munwala, nɩ ɩ nɩɩ yɩ yɩ Lidia duwa vidiyo-kɔɔlʋ zʋ dwɔyɩnɩ dɩyɛzumanlɛ wɔ awudo.

Mɩnla ɔhʋanɩ zʋ yɛ mmeliyema mɔɔ bɔwɔ bɛ asafʋ yɩ nu wʋwalɩ bɛ a? Sɛ bɔpɔ dɩyɛzumanlɛ bela a, mmeliyema mɔɔ bɔwɔ Kɩndɔm Hɔɔlʋ nɩ be  duwa vidiyo-kɔɔlʋ zʋ bɛ nɩɩ David nɩɩ Lidia bɔ nkɔmmɔ. Akʋ̃ sʋ̃, nɩ sɛ David nɩɩ Lidia ma munwalɩyɛ a, nɩ be mmeliyema yɩ kɛlɛ mɛsegyi mɔɔ ɩhyɛ ɛzɩzɩbɛ fa sɛndɩ bɛ aɣinzi yi. Kɛ eyi wʋwalɩ bɛ zeli a? Ɩáma David nɩɩ Lidia tɩ nɣanlɩ kɛɛ bɛyɛ ankʋnamɩ.

Asʋ̃ sa yɛkʋla yɛ nɩɩ mmeliyema mɔɔ bɛhalɩ aliyia nu nɩ yɛ dasɩlɛlilɛ nhyɩhyɛlɩyɛ a? Sa yɛkʋla yɛyɛ nzɩnzanlɩyɛ ɛgyɩkɩ̃ɩ̃ be wɔ yɛ mmɩlɩ nhyɩhyɛlɩyɛ nu na yɛ nɩɩ bɛ yɛawɔ numɔ yɛayɛ dasɩlɛlilɛ egyima yɩ. Yɛyɛ zɔ a nɩ yekilee kɛɛ yɛ ɛɣɛɛlɛ iléfili bɛzabɛ mɔɔ bɔwɔ bʋwabɩlɛ mɔɔ ɩdɩ zɔ nu nɩ. (Ɛɣɛ. 3:27) Ebiye a sa ɔkʋla ɛ nɩɩ bɛ bɔ numɔ kɛlɛ ahɛlɛta anzɛnyɩɩ bɛyɛ foonu zʋ dasɩlɛlilɛ. Asafʋ nu mbanimbani kʋla yɛ nhyɩhyɛlɩyɛ ma bɛzabɛ mɔɔ bɛhalɩ aliyia nu nɩ ma boduwa foonu anzɛnyɩɩ vidiyo-kɔɔlʋ zʋ bɔdwɔyɩnɩ dasɩlɛlilɛ ayiyialɩyɛ. David nɩɩ Lidia bɛ anyɩ lelili nhyɩhyɛlɩyɛ eyi nwʋ paa. David kile numɔ kɛɛ, “Ɩwɔ numɔ kɛɛ dasɩlɛlilɛ ayiyialɩyɛ ɩáhyɛ dɩyɛ, naasʋ̃ mmɩlɩ sikalɛ mɔɔ nɩ yɛfa yesunzu ndwokɔ nwʋ nɩɩ mpayɩ mɔɔ bɔbɔ nɩ hyɛlɩ yɛ ɛzɩzɩbɛ baaba.” Akʋ̃ sʋ̃, ebiye a ɩwɔ numɔ la a, sa ɔkʋla bizia eliyema be mɔɔ ɩhalɩ aliyia nu kɛɛ yɩ anyɩ keleli nwʋmɔ kɛɛ ɛkɛva wʋ Bayɩbʋlʋ dɩyɛzumanlɛvʋlɔ be kɔhɔ yɩ awudo na ɩahɩnla nwʋmɔ ma bɛayɛ dɩyɛzumanlɛ yɩ a.

Sɛ yɛ nɩɩ ye mmeliyema mɔɔ bɛhalɩ aliyia nu nɩ bɔ numɔ yɛ egyima a, ɩkɛma yɛkɔnwʋ bo subanɩ azʋlɔtʋ mɔɔ ɩkã ahʋnlɩnɩ nɩ na mɛyɩ kɔhwɩ̃ yɛ keɣike bɛ. Kɛ ndianwʋ nɩ, sɛ yɛ nɩɩ mmeliyema mɔɔ bɛdɩ zɔ bɔ numɔ yɛ dasɩlɛlilɛ egyima yɩ na yɛnwʋ kezimɔ bekyina Nyamɩnlɩ Odwokɔ yɩ zʋ bɔbʋwa mmenii ma bɛfa Gyehova ɔhɔnwʋ nɩ a, ebiye a mɛyɩ kɛma yɛkɛbɛ bo odwokɔ baaba. Sɛ ɔbʋwa wʋ mmeliyema ma bɔkɔ dasɩlɛlilɛ nɩɩ dɩyɛzumanlɛ a, ɩma ɛba nyia ɔhɔnwʋmmɔ mvʋlɔ.—2 Kɔl. 6:13.

Mmɩlɩ mɔ Pɔɔlʋ yɩ ɔhɔnwʋ Tayɩtɔsɩ hɔ gyelalɩ yɩ nɩ, ɩmanlɩ yɩ ahʋnlɩnɩ dɔlɩ yi kunlu. (2 Kɔl. 7:​5-7) Sɛ yɛkã ndwokɔ mɔɔ ɩhyɛ ɛzɩzɩbɛ yekile ye mmeliyema a, ɩbʋwa. Naasʋ̃ kɛmɔ Tayɩtɔsɩ yɛlɩ nɩ, sɛ yɛbɔ mmɔdɩnɩ yɛkɔ bɛ pɛ na yɛyɛ nninyeni be yɛbʋwa bɛ a, ɩkyɩkyɩ bɛ ɛɣɛɛlɛ paa.—1 Dwɔ. 3:18.

Sɛ ɩba yɩ nɩ kezimɔ yɛkɔwʋwa yɛ nwʋ nkʋ̃kʋ̃ nkʋ̃kʋ̃ a, ye mmeliyema mɔɔ bɔwɔ Russia nɩ yɛ nwʋmɔ ndianwʋ kɩnlɩma be bɛma yɛ. Mɔwʋ kila Sergey nɩɩ yɩ yɩ Tatyana bo ozumanlɛnwʋnlɛ yɩ. Abolisimaa hɔ vɩdɩvɩdɩlɩ be nninyeni nu wɔ bɛ awudo, na mɛyɩ mɛda nɩ bɛvalɩ bɛ bɔhɔlɩ kɛɛ bekeɣiziaɣizia ndwokɔ bɛ. Belili bɔmʋnlɩ bɛyɩlɩ Tatyana ma ɩɣalɩ awudo. Sergey kã kɛɛ: “Tatyana hɔ dwuli awudo la pɛ, yɛ eliyema baalɛ be mɔɔ yɩ kɛnɣa yɛ sɩ hɔ gyelalɩ yɩ a. Ɩákyɛ yɛ mmeliyema sʋ̃maa sʋ̃ ɣalɩ ma beziyeziyeli awudo kɛnɩ a.”

Sergey va hɩnlanlɩ nwʋmɔ kɛɛ: “Mɩ anyɩ deli Ɛɣɛlɛwulɛ 17:17 nwʋ baaba, ɛkɛnɩ kã kɛɛ: ‘Ɔhɔnwʋ baaba da ɔlɔlɛ ali mmɩlɩ munwatĩĩ, na ɩdɩ eliyema mɔɔ bɔwʋlɩ yɩ bɛmanlɩ anwʋhyɩlɩyɛ mmɩlɩ.’ Mmɩlɩ mɔ nɩ miyiyiaa odwodwudiyialɛ mɔɔ nɩ mihyinyia mi mmeliyema nɩ, yɛ mɩdɩlɩ ɛhɛlɛlɛdwokɔ eyi tʋ bʋwɔ a. Gyehova manlɩ minyianlɩ ɔhɔnwʋmmɔ mɔɔ bɔwɔ akɛnɣazɩzɩbɛ ma bɔwʋwalɩ mɩ.” a

Yehyinyia yɛ ɔhɔnwʋmmɔ bɔ mmʋwalɩyɛ na yɛahʋla yɛagyina ndwokɔzɩzɩbɛ mɔɔ yeyiyia wɔ nnɛ nɩ munwa. Na yekehyinyia bɔ mmʋwalɩyɛ paa, titili wɔ anwʋhyɩlɩyɛ kezile yi nu. Meti nnɛ yɛ ihyinyia kɛɛ yɛbɔ mmɔdɩnɩ yɛyɛ ɔhɔnwʋba a!—1 Pit. 4:​7, 8.