1-2. Mɩnla ɔhʋanɩ zʋ yɛ adasamaa bɔ bʋwabɩlɛ dɩ kɛɛ abɩlantɩyɛ mɔɔ yɛhã yɩ odwokɔ wɔ nkyɩkyɛmi 1 yɩ nu nɩ a?

 FA YƖ kɛɛ abɩlantɩyɛ be yɩ awʋvʋlɔ wɔ ozukua paa. Naasʋ̃ eɣile ɔkʋ̃, asianɩ be zili ma yɩ awʋvʋlɔ yɩ wuli. Odwokɔ yɩ lileli abɩlantɩyɛ yɩ paa. Naasʋ̃, nɩ mɔɔ ɩtɛla zɔ la yɩ anyunu. Ɩɣa ɩnwʋnlɩ kɛɛ yɩ awʋvʋlɔ zɩkɛlɩ ozukua sʋ̃maa ma bɔwɔlɩ kakɛ kezile be po. Meti kɛ ankɩ abɩlantɩyɛ yɩ kenyia agyiapadɩ sʋ̃maa nɩ, kakɛ mfomi yɛ bɛva beyiakili yi a. Ozukua yɩ yi diibenyiammɔ sʋ̃ bedee bo ozukua, naasʋ̃ sɛ bɛma yɩ alʋbɔ abʋmɩ po a, ɩlɔ́kʋla koduwa ɔzɔ ozukua yɩ kyɩ̃.

² Wɔ ɔhʋanɩ be zʋ nɩ, yɛ bʋwabɩlɛ dɩ kɛɛ ɔzɔ abɩlantɩyɛ yɩ dɩyɛ yɩ. Nɩ yɛ awʋvʋlɔ mɔɔ beli bɔmʋnlɩ, Adamɩ nɩɩ Yifi bedi munli, na nɩ bɛda Paladayɩsɩ kɩnlɩma be nu. (Gyn. 1:27; 2:​7-9) Nɩ bɔkɔhʋla bɛkɛva anyɩnlɩlelɛ bɔkɔwʋwa azɩ daabaa. Naasʋ̃ dɩyɛ bela zɩnzanlɩ. Paladayɩsɩ yɩ nɩɩ ɔnwʋmɔ ɔhʋanɩ mɔɔ bɔwɔ kɛɛ bɔkɔwʋwa azɩ daabaa nɩ vili bɛ sa. Mɩnla yɛ bɛva beyiakili bo nnwuakula a? Bayɩbʋlʋ yɩ kã kɛɛ: “Tanɩ iluwalɩ enii ɔkʋ̃ [Adamɩ] yɩ zʋ yɛ ɩɣalɩ oyuwadɩ a, na enii ɔkʋ̃ nɩ yɩ tanɩ nɩ ɩvalɩ owulo ɩɣalɩ. Iluwa eyi zʋ ti yɛ owulo ɩdʋlɩ ɩbɩndɩnlɩ mmenii munwatĩĩ bɔ zʋ a. Sianti yɛ lɛ kɛɛ, mmenii munwatĩĩ bɛyɛ tanɩ.” (Wul. 5:12) Tanɩ yɛ lɛ agyiapadɩ mɔɔ Adamɩ va yiakili yɛ a, na ɩkɔ iwieli owulo nu. Ɔzɔ tanɩ yɩ mɔɔ yenyianlɩ nɩ, ɩdɩ kɛɛ kakɛ kezile be mɔɔ ye nu bela ɩlɔ́kʋla koduwa.—Ndw. 49:8.

 3. Mɩnla ti mɔɔ yɛkɔhʋla kɛva yɛ tanɩ kedindiã “kakɛ” nwʋ a?

 ³ Gyisɛsɩ valɩ tanɩ dindianlɩ “kakɛ” nwʋ. (Mt. 18:​32-35) Sɛ yɛyɛ tanɩ a, ɩdɩ kɛɛ mɔɔ yɛma Gyehova kakɛ. Ɩsɛ kɛɛ yetuwa yɛ tanɩ nwʋ kakɛ. Sɛ bɛátuwa kakɛ eyi bɛma yɛ a, ankɩ gyɩsɛ owulo na yɛava yɛadɩdɩ.—Wul. 6:​7, 23.

 4. (a) Sɛ bɛábʋwa yɛ a, mɩnla yɛ ankɩ ɩkɔdʋ tanɩyɛlɛmaa munwala a? (Ndwomi 49:​7-9) (b) Sɛ Bayɩbʋlʋ kã “tanɩ” a, kɛ yɩ tʋ kile a? (Kila alɩka mɔɔ ise “ Tanɩ.”)

⁴ Asʋ̃ mɔɔ Adamɩ nɩɩ Yifi manlɩ ivili bɛ sa nɩ, yɛ sa kɔhʋla kɛhã yɩ dɔkʋ̃ a? Sɛ ɩhalɩlɩ yɛzayɛ nkʋ̃ a, ankɩ ɩlɛ́yɛ bʋwɔ kyɩ̃. (Kɩnga Ndwomi 49:​7-9.) Sɛ bɛábʋwa yɛ a, ankɩ yɛlɔ́kʋla yekenyia eɣile be nɩɩ awudunwolɩyɛ nwʋ anyɩnlɩlazʋ bela. Nɔhʋanlɛ nu nɩ, ankɩ yɛ awielɩyɛ kɛyɛ kɛɛ nnamɩ bɛ dɩyɛ yɩ la.—Odw. 3:19; 2 Pit. 2:12.

 5. Mɩnla ɔhʋanɩ zʋ yɛ yɛ Zɩ mɔɔ ɩdɔ yɛ nɩ, ɩwʋwa yɛ ma yeduwa yɛ tanɩ nwʋ kakɛ a? (Kila Ɔwɩɛnɩlɛ Aɣanɩ yɩ anyunu mfonyini yi.)

⁵ Abɩlantɩyɛ yɩ mɔɔ yeli bɔmʋnlɩ yɛhã yɩ nwʋ odwokɔ yɩ, ekila a, sɛ benyia be mɔɔ ɩwɔ ozukua paa pɛ kɛɛ ituwa yɩ kakɛ yɩ munwala ɩma yɩ a, kɛ ɩkɛdɩ nɣanlɩ ikeze a? Pɩlazunɛ bela íni nwʋmɔ kɛɛ yɩ anyɩ kɔzɔ yɩ baaba paa, na ikele ɔzɔ akyɛdɩ mɔɔ ɩzʋ̃ kunlumiba nu nɩ ikediã numɔ. Ɔzɔ la sʋ̃ yɛ Gyehova, yɛ Zɩ mɔɔ ɩdɔ yɛ nɩ, ɩva akyɛdɩ be ɩma yɛ ɩva iduwa tanɩ mɔɔ Adamɩ va yiakili yɛ nɩ nwʋ kakɛ a. Gyisɛsɩ hileli numɔ wɔ ɔhʋanɩ eyi zʋ kɛɛ: “Nyamɩnlɩ lɔlɩ oyuwadɩ sʋ̃maa nɩ ti yɛ ɩvalɩ yɩ Ɣa ɔkʋ̃tɩnyɩɩ nɩ ɩmanlɩ a, ama abiyela mɔɔ ikele yi ikeli nɩ iáwuli mfomi ianyia nnwʋanlɩ mɔɔ íni awielɩyɛ.” (Dwɔ. 3:16) Akʋ̃ sʋ̃, akyɛdɩ kʋ̃ yɩ la yɛ ɩma ɩyɛ bʋwɔ kɛɛ yɛ nɩɩ Gyehova kenyia abusunwawɔlɛ baaba a.

 6. Mɩnla yɛ yɛbazunzu nwʋmɔ a, na mɩnla ti a?

⁶ Kɛ ɩkɛyɛ na yɛanyia akyɛdɩ sʋnʋnkʋ̃ eyi zʋ mfasʋ na bɛava yɛ tanɩ anzɛnyɩɩ yɛ “kakɛ” bɛahyɛ yɛ a? Mɔɔ ɩkɛma yekenyia odwokɔɣizialɛ eyi nwʋ munwalɩyɛ nɩ, yekozunzu Bayɩbʋlʋ nu ndwokɔ be nɩɩ mɔɔ yɩ tʋ kile nɩ nwʋ. Mmɩlɩ mɔ yɛdwɩnɩndwɩnɩɩ ndwokɔ eyimmɔ nwʋ nɩ, yɛkɔnwʋ mɔɔ Gyehova kyina zʋlɔ fa yɛ tanɩ kyɛ yɛ, na ɩkɛma anyɩnlɩzɔlɛ mɔɔ yɛwɔ yɛma yɩ nɩ kɛyɛ kezi.

GYEHOVA YƖ BƲTAYƖ YƐ LƐ KƐƐ IKEZIYEZIYE YƐ NƖƖ YƖ AVINLI

 7. (a) Mɩnla dɔkʋ̃ yɛ ivili Adamɩ nɩɩ Yifi bɛ sa a? (b) Kɛ Adamɩ nɩɩ Yifi bɔ tʋmaa nɩ, mɩnla yɛ yehyinyia yɩ paa? (Wulomimaa 5:​10, 11)

⁷ Mmɩlɩ mɔ Adamɩ nɩɩ Yifi yɛlɩ tanɩ nɩ, kɛ nnwʋanlɩ mɔɔ íni awielɩyɛ yɩ nkʋ̃ la yɛ ɩwɔlɩ bɛ a, mfomi bɛɣa bɛyɛlɩ bɛ Zɩ Gyehova yɩ adamvʋlɔ sʋ̃. Ahyɛasɩ yɩ, nɩ Adamɩ nɩɩ Yifi kɩnla Nyamɩnlɩ yɩ abusunwa yɩ nwʋ. (Lk. 3:38) Naasʋ̃ mmɩlɩ mɔ bɛyɛlɩ Gyehova zʋ  azʋ̃nzɩzɩbɛ nɩ, iduduli bɛ wɔ yɩ abusunwa yɩ nu ansaana bɔwʋʋ nnwuakula. (Gyn. 3:​23, 24; 4:1) Meti kɛ Adamɩ nɩɩ Yifi bɔ tʋmaa nɩ, ihyinyia kɛɛ yesiyeziye yɛ nɩɩ Gyehova avinli. (Kɩnga Wulomimaa 5:​10, 11.) Sɛ yɛkãã yɩ wɔ ɔhʋanɩ fʋlɔ zʋ a, ɩsɛ kɛɛ yɛ nɩɩ Gyehova nyia abusunwawɔlɛ baaba. Buuku be kã kɛɛ, Giliki odwokɔpɔkɔ mɔɔ ikile “eziyeziyelɛ” nɩ kɔhʋla kehile kɛɛ, “abiye kɛma yɩ tamvʋlɔ kɛɣa kɛyɛ yɩ ɔhɔnwʋ.” Naasʋ̃ mɔɔ ɩyɛ nnwʋánlɩ yɛ lɛ kɛɛ, Gyehova mfomi yɛ ilili bɔmʋnlɩ iduli agyiakɛ kɛɛ ikeziyeziye yɛ nɩɩ yɩ avinli a. Mɩnla ɔhʋanɩ zʋ a?

GYEHOVA YƐLƖ ƐBƖDALƐ NWƲ NHYƖHYƐLƖYƐ

 8. Mɩnla yɛ lɛ ɛbɩdalɛ nhyɩhyɛlɩyɛ nɩ a?

⁸ Ɛbɩdalɛ nhyɩhyɛlɩyɛ yɛ lɛ nhyɩhyɛlɩyɛ be mɔɔ Gyehova yɛlɩ na ama adasamaa mɔɔ tanɩ wɔ bɔ nwʋ nɩ, bɛ nɩɩ yɩ avinli ɩayɛ baaba dɔkʋ̃. Nɩ eyi pɩbɛ kɛɛ ikoduwa debe mɔɔ ɩ nɩɩ mɔɔ Adamɩ manlɩ ivili yɩ sa nɩ yɩ bʋlɔ dɩ ɔkʋ̃. Sɛ nɩ ɩyɛ zɔ a yɛ ɩkɛma yekezia yekenyia dɩyɛ mɔɔ ɩzɩkɛ anzɛnyɩɩ iminli nɩ a. Kilisinyianɩ Giliki Ɛhɛlɛlɛdwokɔ yɩ sʋ̃ ma yɛnwʋ kɛɛ, eyi dɩ ɔhʋanɩ mɔɔ Gyehova luwalɩ zʋlɔ manlɩ ɩyɛlɩ bʋwɔ kɛɛ abiye ɩ nɩɩ yɩ kezia kenyia abusunwawɔlɛba.—Wul. 3:25

 9. Mɩnla yɛ Gyehova yɛlɩ na ama ɩahʋla ɩava Yizilayamaa bɛ tanɩ ɩahyɛ bɛ a?

⁹ Mɔɔ nɩ ɩkɛyɛ na Yizilayamaa nɩ bɛahʋla bɛ nɩɩ Gyehova bɛanyia abusunwawɔlɛ baaba nɩ, ɩyɛlɩ mmɩlɩ sikalɛ nu nhyɩhyɛlɩyɛ be mɔɔ nɩ ikoluwa zʋ kɛva bɛ tanɩ kɛhyɛ bɛ. Ɔlʋbɔ bela, nɩ ɩsɛ kɛɛ Yizilayamaa nɩ fa eɣile ɔkʋ̃ di awuwa titili be. Nɩ bɔfʋlɛ ɔzɔ eɣile yi nɩ Ɛbɩdalɛ Eɣile. Wɔ ɔzɔ eɣile yi nɩ, nɩ ɔsɔfʋ ebani yi fa nnamɩ bɔ afɔlɩ ma mmenii nɩ. Amba, nɩ nnamɩ afɔlɩwɔlɛ yɩ ɩáhʋla pɩda Yizilayamaa bɛ tanɩ kʋlakʋla, iluwakɛɛ mmenii tʋ bʋlɔ tɛla nnamɩ. Naasʋ̃ nɩ sɛ bɔbɔ afɔlɩ yɩ kɛmɔ Gyehova pɩbɛ nɩ a, ɩma inyia ɛpɛ kɛɛ ɩkɛva bɛ tanɩ ɩkɛhyɛ bɛ. (Hib. 10:​1-4) Akʋ̃ sʋ̃, nɩ nhyɩhyɛlɩyɛ eyi nɩɩ tanɩ nwʋ afɔlɩ mɔɔ nɩ bɛta bɔbɔ nɩ kakɛ bɛ kɛɛ, tanɩ lanwʋ la wɔ bɔ nwʋ, na behyinyia afɔlɩ be mɔɔ ikoduwa bɛ tanɩ nwʋ kakɛ kʋlakʋla.

10. Mɩnla yɛ Gyehova yɛlɩ na ama ɩava adasamaa bɛ tanɩ ɩahyɛ bɛ a?

¹⁰ Mɩnla yɛ Gyehova yɛlɩ mɔɔ ɩma ɩyɛ bʋwɔ kɛɛ ɩkɛva adasamaa bɛ tanɩ ɩkɛhyɛ bɛ a? Ɩyɛlɩ nhyɩhyɛlɩyɛ ma bɛvalɩ yɩ Dɔɣalɛ yɩ “bɔwɔlɩ afɔlɩ mbɔmɩ ɔkʋ̃ la kɛɛ ɩyɩ́ mmenii sʋ̃maa bɛ tanɩ nɩ mmɔ.” (Hib. 9:28) Gyisɛsɩ valɩ ‘yɩ nnwʋanlɩ idianlɩ kɛnɩ anzɛnyɩɩ ɩva ɩyɛlɩ elelɛdɩyɛ ɩva leli mmenii sʋ̃maa.’ (Mt. 20:28) Mɩnla yɛ lɛ elelɛdɩyɛ a?

GYISƐSƖ YƖ AFƆLƖ NƖ DUWALƖ ELELƐDƖYƐ YƖ

11. (a) Sɛ Bayɩbʋlʋ yɩ kã elelɛdɩyɛ a, kɛ yɩ tʋ kile a? (b) Nɩ aninyia yɛ ɩkɔhʋla koduwa elelɛdɩyɛ nɩ a?

¹¹ Sɛ Bayɩbʋlʋ yɩ kã elelɛdɩyɛ a, ikile debe mɔɔ botuwa bɛfa bɛpɩda abiye anzɛnyɩɩ bɛfa besiyeziye odwokɔ. Gyehova nwʋ elelɛdɩyɛ yɩ kɛɛ debe mɔɔ ɩkɔhʋla kegyina zʋlɔ kezia kɛva mɔɔ iminlinli nɩ ɩkɛɣa. Mɩnla ɔhʋanɩ zʋ a? Kakɛ kɛɛ Adamɩ nɩɩ Yifi manlɩ nnwʋanlɩ mɔɔ idi munli nɩɩ ɔnwʋmɔ ɔhʋanɩ mɔɔ nɩ bɔwɔ kɛɛ bɔkɔwʋwa azɩ daabaa nɩ vili bɛ sa. Meti nɩ ɩsɛ kɛɛ elelɛdɩyɛ nɩ yɩ bʋlɔ nɩɩ mɔɔ iminlinli nɩ yɩ bʋlɔ yɛ ɔkʋ̃. (1 Tim. 2:6) Nɩ ɩsɛ kɛɛ abiye mɔɔ ɩkɔhʋla koduwa elelɛdɩyɛ nɩ yɛ benyia mɔɔ yɩ anyɩ dɩ, mɔɔ (1) idi munli; (2) ɩkɔhʋla kɔwʋwa azɩlɛ yɩ zʋ daabaa; nɩɩ (3) ɩwɔ ɛpɛ kɛɛ ɩkɛva yɩ nnwʋanlɩ kɔwɔ afɔlɩ kɛma yɛ. Eyimmɔ la yɛ nɩ ɩkɔhʋla kɛma ɔzɔ enii nɩ kɛva yɩ nnwʋanlɩ kezia kɔdɔ nnwʋanlɩ mɔɔ Adamɩ manlɩ ivili yɩ sa nɩ a.

12. Mɩnla ti mɔɔ Gyisɛsɩ hʋlalɩ duwalɩ elelɛdɩyɛ nɩ a?

¹² Kila nninyeni asã be mɔɔ ɩmanlɩ Gyisɛsɩ hʋlalɩ duwalɩ elelɛdɩyɛ nɩ. (1) Nɩ idi munli,  kile kɛɛ, “ɩáyɛ tanɩ kyɩ̃.” (1 Pit. 2:22) (2) Iluwa ɔzɔ ti, nɩ ɩkɔhʋla kɔwʋwa azɩlɛ yɩ zʋ daabaa. (3) Nɩ ɩwɔ ɛpɛ kɛɛ ikowu na ɩava nnwʋanlɩ mɔɔ ɩdɩ zɔ nɩ iadiã kɛnɩ ɩama yɛ. (Hib. 10:​9, 10) Nɩ Gyisɛsɩ di munli kɛmɔ nɩ Adamɩ di munli ansaana ɩbayɛ tanɩ nɩ. (1 Kɔl. 15:45) Gyisɛsɩ luwalɩ yi owulo yi zʋ duwalɩ Adamɩ yɩ tanɩ nwʋ kakɛ na izia ɩdɔlɩ mɔɔ ivili Adamɩ yɩ sa nɩ ɩmanlɩ yɛ. (Wul. 5:19) Meti Gyisɛsɩ ɣa yɛlɩ “Adamɩ nɩ mɔɔ ili aɣinzi nɩ.” Iluwa eyi ti, nwʋmɔ iáhyinyia kɛɛ enii fʋlɔ mɔɔ idi munli kɛɣa koduwa mɔɔ Adamɩ manlɩ ivili yɩ sa nɩ nwʋ kakɛ, iluwakɛɛ Gyisɛsɩ wuli “mbɔmɩ ɔkʋ̃ la.”—Hib. 7:27; 10:12.

13. Mɩnla sʋnʋnkʋ̃ yɛ ɩwɔ ɛbɩdalɛ nhyɩhyɛlɩyɛ yɩ nɩɩ elelɛdɩyɛ yɩ bɛ avinli a?

¹³ Meti mɩnla sʋnʋnkʋ̃ yɛ ɩwɔ ɛbɩdalɛ nhyɩhyɛlɩyɛ nɩɩ elelɛdɩyɛ yɩ bɛ avinli a? Ɛbɩdalɛ yɩ dɩ nhyɩhyɛlɩyɛ mɔɔ Nyamɩnlɩ ɩyɛ na ama adasamaa bɛazia bɛ nɩɩ yɩ bɛanyia abusunwawɔlɛ baaba. Elelɛdɩyɛ nɩ yɛ lɛ bʋlɔ nɩ mɔɔ boduwalɩ na ama ɩayɛ bʋwɔ kɛɛ bɛkɛbɩda adasamaa bɛ tanɩ nɩ a. Ɔzɔ bʋlɔ nɩ yɛ lɛ Gyisɛsɩ yi mmegyia nɩ mɔɔ idwonwɔnlɩ igualɩ ɩmanlɩ yɛ nɩ.—Ɛfɩ. 1:7; Hib. 9:14.

GYEHOVA ƖMA YEDE YƐ NWƲ WƆ TANƖ NƖƖ OWULO TƲ NA IBU YƐ KƐƐ ƐDƖNƔƐLƐMAA

14. Mɩnla yɛ yɛbazunzu nwʋmɔ a, na mɩnla ti a?

¹⁴ Mɩnla mfasʋ yɛ yenyia yɩ wɔ ɛbɩdalɛ nhyɩhyɛlɩyɛ yɩ zʋ a? Mɔɔ ɩkɛyɛ na yɛanyia odwokɔɣizialɛ eyi nwʋ munwalɩyɛ nɩ, yɛbahila ndwokɔ anwɩ̃ be mɔɔ Bayɩbʋlʋ fa di egyima mɔɔ ɩma yɛtɩ kezimɔ yenyia Gyehova yɩ tanɩfakyɛ zʋ mfasʋ nɩ yɩ tʋ.

15-16. (a) Sɛ Bayɩbʋlʋ yɩ kã elelɛ a, kɛ yɩ tʋ kile a? (b) Kɛ eyi ɩkã yɛ ise a?

¹⁵ Wɔ Bayɩbʋlʋ nu nɩ, elelɛ kile ɔbɔnɩnlɛ anzɛnyɩɩ fanwʋdi mɔɔ abiye nyia iluwa elelɛdɩyɛ mɔɔ boduwalɩ nɩ ti. Sʋ̃mavʋlɔ Pita hilehileli numɔ wɔ ɔhʋanɩ eyi zʋ kɛɛ: “Bezi mɔɔ Nyamɩnlɩ iduwalɩ yɩ wɔ mʋnlʋmmɔ bɔ nwʋ, na ɩahʋla ɩabɔnɩ mʋnlʋmmɔ wɔ be nlabenyiammɔ bɛ ɛbɩla mbʋanlɩ mbʋanlɩ nɩ mɔɔ mʋnlʋmmɔ bozumanlɩ wɔ bɛ ɛkɛnɩ nɩ. Nyamɩnlɩ ɩáfa ozukua mvuduko anzɛnyɩɩ dwɛtɛ mɔɔ ɩáhyɛ na ɩázɩkɛ nɩ yɛ ɩbɔnɩnlɩ [kile kɛɛ, ileli] mʋnlʋmmɔ a, na mfomi, ɩvalɩ Gyisɛsɩ Kɩlayɩsɩ yi mmegyia nɩ mɔɔ ɩsʋmɩ bʋlɔ nɩ yɛ ɩbɔnɩnlɩ mʋnlʋmmɔ a. Gyisɛsɩ mɔɔ ɩdɩ kɛɛ owuanɩɣalɛ mɔɔ yɩ nwʋ íni ndɛnɩ bela nɩ.”—1 Pit. 1:​18, 19.

¹⁶ Iluwa elelɛdɩyɛ afɔlɩ yɩ ti, yɛkɔhʋla kenyia fanwʋdi wɔ tanɩ nɩɩ owulo alɔngɔzʋ̃mɩnlɛ mɔɔ ɩma yedi ɛyɛkɛ nɩ tʋ. (Wul. 5:21) Yɛ anyɩ sɔ yɩ paa kɛɛ Gyehova nɩɩ Gyisɛsɩ bele yɛ iluwa Gyisɛsɩ yi mmegyia mɔɔ ɩtʋ bʋlɔ anzɛnyɩɩ yɩ nnwʋanlɩ mɔɔ ɩva ɩwɔlɩ afɔlɩ ɩmanlɩ yɛ nɩ.—1 Kɔl. 15:22.

17-18. (a) Sɛ bɛkã kɛɛ bowu yɛ ɛdɩnɣɛlɛmaa a, kɛ yɩ tʋ kile a? (b) Mɩnla mfasʋ yɛ ye nu bela nyia wɔ eyi zʋ a?

¹⁷ Bayɩbʋlʋ yɩ kã kɛɛ Gyehova iwu yɩ azʋ̃mɩvʋlɔ ɛdɩnɣɛlɛmaa. Eyi kile kɛɛ iáhila ɔhʋanɩ kɛɛ yɛzayɛ yekoduwa yɛ tanɩ nwʋ kakɛ. Ɩwɔ numɔ kɛɛ Gyehova ɩyɛ zɔ dɩyɛ, naasʋ̃ eyi ɩázɩnza yɩ pɛlɩpɛlɩlilɛ nwʋ mmɛla mɔɔ ɩhyɩhyɛ nɩ. Kɛ dɩyɛ baaba be mɔɔ yɛyɛ ti yɛ ɩma ibu yɛ kɛɛ yɛdɩ ɛdɩnɣɛlɛmaa a, yɛɛ kɛ ebiye a ɩsʋzɔ tanɩ zʋ ti a. Mfomi Gyehova ɩfa yɛ tanɩ ɩkyɛ yɛ iluwa dedi mɔɔ yɛwɔ wɔ mɔɔ ɩ nɩɩ Gyisɛsɩ bɛyɛ ma yɛ sa hã elelɛdɩyɛ yɩ nɩ ti.—Wul. 3:24; Gal. 2:16.

¹⁸ Mɩnla mfasʋ yɛ ye nu bela nyia wɔ eyi zʋ a? Bɛzabɛ mɔɔ bɛyɩ bɛ kɛɛ bɔhɔ́ bɛhɩnla Gyisɛsɩ nwʋ ma beli tumi wɔ sʋlɔ nɩ, bowu bɛ kɛɛ Nyamɩnlɩ mmalɛ mɔɔ bɛtɩnɣɛ daada. (Tay. 3:7; 1 Dwɔ. 3:1) Bɛva bɛ tanɩ bɛhyɛ bɛ. Ɔhʋanɩ be zʋ nɩ, ɩdɩ kɛɛ mɔɔ bɛáyɛ ɔzɔ tanɩ yɩ po, na ɩma bɛfata kɛɛ bɔkɔhɔ Bulombunlililɛ yi nu. (Wul. 8:​1, 2, 30) Bɛzabɛ sʋ̃ mɔɔ bɔwɔ  anyɩnlɩlazʋ kɛɛ bɔkɔwʋwa azɩlɛ yɩ zʋ nɩ, bowu bɛ kɛɛ Nyamɩnlɩ yɩ ɔhɔnwʋmmɔ mɔɔ bɛtɩnɣɛ, na ɩva bɛ tanɩ ɩhyɛ bɛ. (Gye. 2:​21-23) Mmenii okuwu kezile yi mɔɔ bokodua Amagadɔnʋ sʋ̃ nɩ, sa bɔkʋla bɔbʋwa azɩ daabaa mɔɔ bolówu kyɩ̃. (Dwɔ. 11:26) “Baabayɛlɛmaa” nɩɩ “tanɩyɛlɛmaa” mɔɔ bɛlɩla wɔ owulo nu nɩ, bokodunwo bɛ. (Egy. 24:15; Dwɔ. 5:​28, 29) Awielɩyɛ kʋlaa nɩ, Gyehova azʋ̃mɩvʋlɔ mɔɔ bɔwɔ azɩlɛ yɩ zʋ mɔɔ bɛkɛyɛ sutiye munwala kenyia “fanwʋdi sʋnʋnkʋ̃ nɩ mɔɔ Nyamɩnlɩ mmalɛ benyia yɩ nɩ.” (Wul. 8:21) Yɛlɛ anyɩnlɩlelɛ yekilaa ɔzɔ mmɩlɩ nɩ mɔ mmenii munwala bɛkɛɣa kɛyɛ yɛ Zɩ Gyehova yɩ mma mɔɔ bedi munli nɩ ɔhʋanɩ baaba!

19. Mɔɔ Gyehova nɩɩ Gyisɛsɩ bɛyɛ bɛma yɛ nɩ, mɩnla ɔhʋanɩ zʋ yɛ ɩma yɛ bʋwabɩlɛ zɩnza a? (Kila alɩka mɔɔ ise “ Gyehova Yɩ Tanɩfakyɛ.”)

¹⁹ Amba, nɩ yɛ bʋwabɩlɛ dɩ kɛɛ abɩlantɩyɛ yɩ mɔɔ yɛhanlɩ yɩ nwʋ odwokɔ wɔ ahyɛasɩ yɩ kɛɛ, dɩyɛ bela vili yɩ sa na bɛvalɩ kakɛ kezile be mɔɔ ɩlɔ́kʋla koduwa kyɩ̃ beyiakili yi nɩ. Naasʋ̃ Gyehova wʋwa yɛ ma yɛ bʋwabɩlɛ zɩnza iluwa ɛbɩdalɛ nhyɩhyɛlɩyɛ yɩ nɩɩ elelɛdɩyɛ yɩ mɔɔ iduwalɩ nɩ zʋ. Dedi mɔɔ yenyia wɔ Gyisɛsɩ Kɩlayɩsɩ nu nɩ ɩma bɔkʋla bede yɛ, anzɛnyɩɩ yenyia fanwʋdi wɔ tanɩ nɩɩ owulo tʋ. Sa bɔkʋla botua yɛ tanɩ nu anzɛnyɩɩ bɛpɩba tanɩ nwʋ ɔfɔlilɛ mɔɔ ɩla yɛ zʋ nɩ. Naasʋ̃ mɔɔ nwʋmɔ hyinyia paa yɛ lɛ kɛɛ, kakɩ yɩ yɛkɔhʋla yɛ nɩɩ yɛ sʋlɔ Ɛzɩlɛ Gyehova mɔɔ ɩwɔ ɔlɔlɛ nɩ kenyia abusunwawɔlɛ baaba.

20. Mɩnla yɛ yekozunzu nwʋmɔ wɔ dɩyɛzumanlɛ mɔɔ ili kɛnɩ nɩ nu a?

²⁰ Mmɩlɩ mɔ yɛdwɩnɩndwɩnɩɩ mɔɔ Gyehova nɩɩ Gyisɛsɩ bɛyɛ bɛma yɛ yɩ nwʋ nɩ, anyɩnlɩzɔlɛ mɔɔ yɛwɔ yɛma bɛ nɩ kɛyɛ kezi. (2 Kɔl. 5:15) Sɛ kɛ bɔ mmʋwalɩyɛ a, ankɩ yéni anyɩnlɩlazʋ bela! Naasʋ̃ mɩnla ɔhʋanɩ zʋ ankasa yɛ yenyia Gyehova yɩ tanɩfakyɛ zʋ mfasʋ kɛɛ mmenii nkʋ̃kʋ̃ a? Yekozunzu eyi nwʋ wɔ dɩyɛzumanlɛ mɔɔ ili kɛnɩ nɩ nu.