1. Sɛ otua Gyehova nwʋ mfonyini wɔ wʋ adwɩnɩ nu a, kɛ ɔnwʋ yɩ se a?

 ASƲ̃ odua kezimɔ Gyehova ɩdɩ nɩ nwʋ mfonyini wɔ wʋ adwɩnɩ nu kyɩ̃ a? Sɛ ɛ nɩɩ yɩ tɩndɛɛ wɔ mpayɩwɔlɛ nu a, mɩnla yɛ ɩba wʋ adwɩnɩ nu a? Ɩwɔ numɔ kɛɛ yɛánwʋ Gyehova dɩyɛ, naasʋ̃ Bayɩbʋlʋ yɩ kã yɩ nwʋ odwokɔ wɔ ahʋanɩ sʋ̃maa zʋ. Bayɩbʋlʋ yɩ kã Gyehova nwʋ odwokɔ kɛɛ ɩdɩ “oyuwa nɩɩ kʋlʋkwa” nɩɩ “sɩnɩ viyiam viyiam mɔɔ ɩsɩkɛ dɩyɛ.” (Ndw. 84:11; Hib. 12:29) Bayɩbʋlʋ ɛhɛlɛlɛvʋlɔ Izikɩyɛlɩ hanlɩ Gyehova nwʋ odwokɔ wɔ anyɩnlɩzʋdɩyɛnwʋnlɛ nu kɛɛ, ɩdɩ kɛɛ safɩya bʋlɔ, bulalɛ hyelenyii, nɩɩ nyankʋntʋnɩ mɔɔ ɩyɛ pɩkɛ. (Izi. 1:​26-28) Ndwokɔ eyimmɔ kɔhʋla kɛma yɛkɛdɩ nɣanlɩ kɛɛ Gyehova nwʋ yɛ ɛyɛlɛ sʋ̃maa anzɛnyɩɩ yɛlɔ́kʋla yekeɣike yi.

2. Mɩnla yɛ ɩkɔhʋla ɩkɛma ɩkɛyɛ sɩ ɩkɛma yɛ kɛɛ yɛkɔhwɩ̃ yekeɣike Gyehova a?

² Iluwakɛɛ yɛánwʋ Gyehova ti, ɩkɔhʋla kɛyɛ sɩ kɛɛ yekele yekeli kɛɛ ɩdɔ yɛ. Ɩyɛ sɩ ɩma abiyemmɔ kɛɛ bekele bekeli kɛɛ Gyehova dɔ bɛ iluwa ndwokɔzɩzɩbɛ anzɛnyɩɩ amanɩyɛ mɔɔ bɔnwʋ yɩ wɔ ɛbɩlawɔlɛ nu nɩ ti. Bɛtɩ nɣanlɩ zɔ iluwakɛɛ ebiye a bo nnwuakula nu nɩ, bɛányia ɛzɩlɛ mɔɔ ɩdɔ bɛ. Gyehova tɩ nɣanlɩdɩlɛ mɔɔ ɩdɩ zɛ nɩ tʋ na izi kezimɔ eyi ɩha yɛ. Mɔɔ ɩkɔwʋwa yɛ ma yɛkɔnwʋ kɛɛ ɩdɔ yɛ nɩ, ɩma bɛhɛlɛ yi subanɩ ngɩnlɩma azʋlɔtʋ yɩ nwʋ odwokɔ wɔ Bayɩbʋlʋ yɩ nu.

3. Mɩnla ti mɔɔ ɩsɛ kɛɛ yesunzu Gyehova yɩ ɔlɔlɛ nwʋ yɛkɔ aɣinzi a?

³ Odwokɔpɔkɔ ɔkʋ̃ mɔɔ ɩma yɛnwʋ kezimɔ Gyehova dɩ paa yɛ lɛ ɔlɔlɛ. (1 Dwɔ. 4:8) Gyehova yɩzayɩ munli yi yɛ lɛ ɔlɔlɛ. Ɔlɔlɛ yɛ ɩkã yɩ ma ɩyɛ dɩyɛ bela a. Nyamɩnlɩ yɩ ɔlɔlɛ dɩ kezi na numɔ yɛ sɩ nkʋ̃ʋ̃ ma ɩda yɩ ali ikile bɛzabɛ mɔɔ bɛálɔ yɩ po. (Mt. 5:​44, 45) Wɔ dɩyɛzumanlɛ eyi nu nɩ, sa yesunzu Gyehova yɩ ɔlɔlɛ nwʋ yɛkɔ aɣinzi. Mbɔmɩ sʋ̃maa mɔɔ yesumaa Nyamɩnlɩ yɩ nwʋ dɩyɛ nɩ, nɩ ɔlɔlɛ mɔɔ yɛwɔ yɛma yɩ nɩ ɩyɛɛ kezi.

 GYEHOVA ƖDƆ YƐ BAABA

4. Kɛ ɛtɩ nɣanlɩ ese wɔ Gyehova yi kunlumiyɩbalɛ nwʋ a? (Kila mfonyini yi sʋ̃.)

⁴ “Gyehova dɩ baaba sʋ̃maa anzɛnyɩɩ ɩwɔ kunlumiyɩbalɛ.” (Gye. 5:11) Wɔ Bayɩbʋlʋ nu nɩ, ɩfa yɩ nwʋ itindiã enlilɛ mɔɔ ɩwɔ kunlumiyɩbalɛ nwʋ. (Ayɩ. 66:​12, 13) Mɔwʋ tua enlilɛ be mɔɔ ɩzʋ̃ ɔlɔlɛ nu ikilaa yɩ ɣa nwʋ mfonyini kila. Ɩdɩdagyɩ ɩfa yɩ itiã yɩ agyia zʋ, na ɩfa nnɩ mɔɔ ɩla azɩ bɔkɔɔ ɩtɩndɛ ikile yi. Sɛ yɩ ɣa yɩ isũũ anzɛnyɩɩ ɩtɩɩ ɛyɛkɛ a, ɩfa mɔɔ ihyinyia nɩ ɩma yɩ. Sɛ yɛzayɛ sʋ̃ yɛtɩɩ ɛyɛkɛ a, sa yɛkʋla yenyia anwʋlazʋ kɛɛ Gyehova kɛla ɔlɔlɛ ali ikehile yɛ. Ndwomidʋlɛvʋlɔ yɩ hɛlɛlɩ kɛɛ: “Mɔɔ adwɩnɩndwɩnɩ hyɛlɩ mʋ zʋ nɩ, ɛyɩkyɩlɩ mɩ ɛɣɛɛlɛ na ɛhanlɩ mɩ ahʋnlɩnɩ edianlɩ mu kunlu.”—Ndw. 94:19.

5. Mɩnla yɛ Gyehova yɩ ɔlɔlɛ mɔɔ nnahɩlɩbɛ íni numɔ nɩ ɩkɔhʋla ɩkɛyɛ kɛma wʋ a?

⁵ Gyehova dɩ nɔhʋanlɛvʋlɔ. (Ndw. 103:8) Sɛ yedi mfʋmɩ a, iáyiaki kɛɛ ɩkɔlɔ yɛ. Yizilayamaa yɩ yɛlɩ Gyehova zʋ azʋ̃nzɩzɩbɛ mbɔmɩ sʋ̃maa; naasʋ̃ iluwalɩ ndwokɔ eyimmɔ zʋ ɩlalɩ ɔlɔlɛ kanyɩɩ ali ihileli bɛzabɛ mɔɔ bonlunli bɔ nwʋ nɩ, ɩhanlɩ kɛɛ: “Ɔtʋ bʋlɔ wɔ mɩ anyɩ zʋ ti midi wʋ nni, na mʋdɔ wʋ.” (Ayɩ. 43:​4, 5) Nyamɩnlɩ yɩ ɔlɔlɛ ɩlɛ́sɩnzanlɩ. Sa yɛkʋla yɛfa yɛ nwʋ yetiã zʋlɔ mmɩlɩ bela. Sɛ yedi mfʋmɩ mɔɔ anyɩnlɩbʋlʋ wɔ numɔ po a, Gyehova ɩábʋ yɛ. Sɛ yenu yɛ nwʋ na yesia yɛkɔ Gyehova pɛ a, yɛkɔnwʋ kɛɛ ɩlanwʋ la ɩdɔ yɛ. Ɩbɔ anʋhʋba kɛɛ, ‘ɩkɛva yɛ tanɩ ɩkɛhyɛ yɛ ma ikowulu zʋlɔ.’ (Ayɩ. 55:7) Bayɩbʋlʋ yɩ kã tanɩfakyɛ eyi nwʋ odwokɔ kɛɛ ɩdɩ ‘anwʋdɔlɛ mɔɔ ɩzʋ̃ Nyamɩnlɩ kɛnɩ.’—Egy. 3:19.

6. Mɩnla yɛ Zakalɩya 2:8 ɩma yɛnwʋ yɛfalɩ Gyehova nwʋ a?

⁶ Kɩnga Zakalɩya 2:8. Iluwakɛɛ Gyehova dɔ yɛ ti, ɩtɩ yɛ nɣanlɩdɩlɛ tʋ na ɩpɛ paa kɛɛ ɩbɔ yɛ nwʋ banɩ. Sɛ yedii ɛyɛkɛ a, ɩyɛ ɛyɛkɛ yɩ. Iluwa eyi ti sa yɛkʋla yɛfa anwʋlazʋ yɛbɔ mpayɩ kɛɛ: “Bɔ́ mʋ nwʋ banɩ dɩkɛɛ wʋ anyɩ kolomviyia yɩ.” (Ndw. 17:8) Anyɩnlɩ yɩ dɩ eniiwudo yɩ ɔfʋã be mɔɔ ɩyɛ ngyɩlakɛ na nwʋmɔ hyinyia baaba. Meti mmɩlɩ mɔ Gyehova valɩ yɛ dindianlɩ yɩ anyɩ kolomviyia nwʋ nɩ, nɩ ɩdɩkɛɛ mɔɔ ɩkã kɛɛ, ‘Abiyela mɔɔ ɩkɛva yɩ sa ɩkɛhã mi mmenii nɩ, ɩva yɩ sa ɩhã dɩyɛ mɔɔ ɩtʋ bʋlɔ ɩma mɩ.’

7. Mɩnla ti mɔɔ ɩsɛ kɛɛ yɛhyɛ anwʋlazʋ mɔɔ yɛwɔ wɔ Gyehova yɩ ɔlɔlɛ nu nɩ ɛzɩzɩbɛ a?

⁷ Gyehova pɛ kɛɛ enyia anwʋlazʋ kɛɛ ɩdɔ wʋ. Naasʋ̃ izi kɛɛ iluwa mɔɔ ɩdʋ yɛ wɔ yɛ  ɛbɩlawɔlɛ nu nɩ ti, ebiye a yɛkɛdɩ nɣanlɩ kɛɛ ɩálɔ yɛ. Anzɛnyɩɩ ebiye a, yeyiyiaa atɩɩtɩɩ be kakɩ yɩ mɔɔ ɩkɔhʋla ɩkɛma ɩkɛyɛ sɩ kɛɛ yekenyia anwʋlazʋ kɛɛ Gyehova dɔ yɛ. Mɩnla yɛ ɩkɔhʋla ɩkɛhyɛ anwʋlazʋ eyi nu ɛzɩzɩbɛ a? Ɩsɛ kɛɛ yesuma kezimɔ Gyehova da ɔlɔlɛ ali ikile Gyisɛsɩ, bɛzabɛ mɔɔ bɔvɔ ngɔlɔ bɛ, nɩɩ ye munwala nɩ nwʋ dɩyɛ.

KEZIMƆ GYEHOVA DA YƖ ƆLƆLƐ ALI

8. Mɩnla ti mɔɔ nɩ Gyisɛsɩ wɔ anwʋlazʋ kɛɛ yɩ Zɩ dɔ yɩ a?

⁸ Alʋbɔ sʋ̃maa yɛ dɩ yɛ Gyehova nɩɩ Gyisɛsɩ benyia abusunwawɔlɛ mɔɔ ɔlɔlɛ wɔ numɔ a. Bɛ abusunwawɔlɛ yɩ yɛ ɩhyɛ paa wɔ amansɔnɩ eyi nu a. Wɔ Matiyu 17:5 nɩ, Gyehova lalɩ ɔlɔlɛ mɔɔ ɩwɔ ɩma Gyisɛsɩ nɩ ali petee. Ankɩ Gyehova kɔhʋla kɛhã yɩ kɛkɛ kɛɛ, ‘Eyi yɛ mile yi midiã nu a.’ Naasʋ̃, iluwakɛɛ nɩ ɩpɛ kɛɛ yɛnwʋ kezimɔ nɩ ɩdɔ Gyisɛsɩ nɩ ti, ɩvʋlɔlɩ yɩ kɛɛ “mʋ ɔdɔɣalɛ.” Nɩ Gyehova anyɩ deli Gyisɛsɩ nɩɩ egyima mɔɔ nɩ ɩbayɛ yɩ nwʋ baaba. (Ɛfɩ. 1:7) Na nɩ Gyisɛsɩ sʋ̃ wɔ anwʋlazʋ kɛɛ yɩ Zɩ dɔ yɩ amba. Ɩzʋ̃ anwʋlazʋ nu ɩhanlɩ yɩ mbɔmɩ sʋ̃maa kɛɛ Ɛzɩlɛ nɩ dɔ yɩ.—Dwɔ. 3:35; 10:17; 17:24.

9. Mɩnla odwokɔ yɛ ɩma yɛnwʋ kezimɔ Gyehova dɔ bɛzabɛ mɔɔ bɔvɔ ngɔlɔ bɛ nɩ a? Kilehile numɔ. (Wulomimaa 5:5)

⁹ Gyehova da yɩ ɔlɔlɛ ali kile Kilisinyiamaa mɔɔ bɔvɔ ngɔlɔ bɛ nɩ. (Kɩnga Wulomimaa 5:5.) Yɛ́ odwokɔ mɔɔ bɛva belili egyima wɔ Bayɩbʋlʋ yi nu mɔɔ ɩma yɛnwʋ kezimɔ Gyehova dɔ bɛ nɩ ndwɩ. Ɩkã kɛɛ Gyehova “ɩva yɩ ɔlɔlɛ nɩ iwula yɛ ahʋnlɩnɩ nu.” Buuku be fa ɔlɔlɛ mɔɔ Nyamɩnlɩ wɔ ma bɛ nɩ itindiã azudɩnlɩ nwʋ. Ɔzɔ odwokɔ yɩ ma yɛnwʋ ɔlɔlɛ kezile mɔɔ Gyehova ɩwɔ ɩma bɛzabɛ mɔɔ bɔvɔ ngɔlɔ bɛ nɩ! Bɛzabɛ mɔɔ bɔvɔ ngɔlɔ bɛ nɩ bɔwɔ anwʋlazʋ kɛɛ “bɛda yɛ Zɩ Nyamɩnlɩ yɩ ɔlɔlɛ nu.” (Dwu. 1) Sʋ̃mavʋlɔ Dwɔɔnʋ hanlɩ kezimɔ bɛtɩ nɣanlɩ nɩ nwʋ odwokɔ kɛɛ: “Behilá Ɛzɩlɛ nɩ kɛ izi ɩlɔ yɛ a! Yɩ ɔlɔlɛ kezile nɩ ti bɔfʋlɛ yɛ Nyamɩnlɩ mmalɛ!” (1 Dwɔ. 3:1) Asʋ̃ Gyehova ɩdɔ bɛzabɛ mɔɔ bɔvɔ ngɔlɔ bɛ nɩ nkʋ̃ la a? Anhã, Gyehova ɩla yɩ ali kɛɛ ɩdɔ ye munwatĩĩ sʋ̃.

10. Mɩnla yɛ lɛ dɩyɛ titili mɔɔ Gyehova ɩva ihile kɛɛ ɩdɔ wʋ a?

¹⁰ Mɩnla dɩyɛ titili yɛ Gyehova ɩva ihile kɛɛ ɩdɔ yɛ a? Ɩdɩ elelɛdɩyɛ yɩ! Mɛyɩ yɛ lɛ ɔlɔlɛ mɔɔ ɩtɛla ebiyela mɔɔ bɛla yɩ ali wɔ amansɔnɩ yi nu a. (Dwɔ. 3:16; Wul. 5:8) Gyehova ɩmanlɩ ɔhʋanɩ ma yɩ Ɣa mɔɔ ɩla yɩ ahʋnlɩnɩ zʋ nɩ iwuli ɩmanlɩ mmenii munwatĩĩ na ama ɩahʋla ɩava yɛ tanɩ ɩahyɛ yɛ na yɛaɣa yɛayɛ yɩ ɔhɔnwʋmmɔ. (1 Dwɔ. 4:10) Sɛ yɛkɔ zʋ yɛdwɩnɩndwɩnɩ mɔɔ Gyehova nɩɩ Gyisɛsɩ bɛva bɔwɔlɩ afɔlɩ na ama bɛahʋla bɛaduwa elelɛdɩyɛ nɩ nwʋ a, ɩkɛma yɛkɔnwʋ kɛɛ bɔdɔ ye nu ɔkʋ̃ bela baaba. (Gal. 2:20) Gyehova ɩáfa yɩ Ɣa yɩ bɔ afɔlɩ iluwakɛɛ ɩdɩ pɛlɩpɛlɩ Nyamɩnlɩ la ti, mfomi ɩdɩ akyɛdɩ mɔɔ ɩzʋ̃ ɔlɔlɛ nu. Gyehova ɩva yɩ Ɣa Gyisɛsɩ mɔɔ ɩla yɩ ahʋnlɩnɩ zʋ nɩ ɩwɔ afɔlɩ ɩva ihile kɛɛ ɩdɔ yɛ. Gyehova manlɩ ɔhʋanɩ ma yɩ Ɣa yɩ nwʋnlɩ amanɩyɛ na iwuli ɩmanlɩ yɛ.

11. Mɩnla yɛ yesuma wɔ Gyɛlɩmaya 31:3 yi nu a?

¹¹ Kɛmɔ yɛnwʋ yɩ nɩ, Gyehova ɩáva kezimɔ ɩtɩ nɣanlɩ wɔ yɛ nwʋ nɩ isiye yɛ, mfomi ɩkã ikile yɛ kɛɛ ɩdɔ yɛ. (Kɩnga Gyɛlɩmaya 31:3.) Gyehova ɩhwɩ̃ yɛ iɣike yɩ nwʋ iluwakɛɛ ɩdɔ yɛ. (Fa tindiã Ditilonɔmi 7:​7, 8 nwʋ.) Dɩyɛ bela ɩlɔ́kʋla ɩkɔhwɩ̃ yɛ wɔ ɔzɔ ɔlɔlɛ yɩ nwʋ. (Wul. 8:​38, 39) Kɛ ɔlɔlɛ eyi ɩma ɛtɩ nɣanlɩ ese a? Kɩnga Ndwomi 23, na kila kezimɔ Gyehova yɩ ɔlɔlɛ nɩɩ yi kunlumiyɩbalɛ yɩ inyianlɩ tumi wɔ Devidi zʋ nɩɩ kezimɔ ɩkɔhʋla kenyia ye munwatĩĩ yɛ zʋ tumi.

KƐ GYEHOVA YƖ ƆLƆLƐ ƖMA ƐTƖ NƔANLƖ ESE A?

12. Kɛ ɔkɔwɔ Ndwomi 23 yɩ dɔkɔ ekeze a?

¹² Kɩnga Ndwomi 23:​1-6. Wɔ Ndwomi 23 nɩ, Devidi hanlɩ anwʋlazʋ mɔɔ ɩwɔ kɛɛ Gyehova ɩdɔ yɩ na ɩdwɩnɩ yɩ nwʋ nɩ nwʋ odwokɔ. Ihilehileli abusunwawɔlɛ mɔɔ ɩla mɛyɩ nɩɩ  Gyehova bɛ avinli nɩ, ɩvʋlɔlɩ yɩ po kɛɛ yɩ mmuwanɩzʋhilalɛvʋlɔ, Gyehova. Mmɩlɩ mɔ Devidi manlɩ Gyehova hileli yɩ ɔhʋanɩ nɩ, ɩdɩlɩ nɣanlɩ kɛɛ ɩwɔ banɩwɔlɛ. Nɩ Devidi zi kɛɛ Gyehova kɛla ɔlɔlɛ ali kehile yi wɔ yɩ nnwʋanlɩ eɣile munwatĩĩ. Mɩnla yɛ ɩmanlɩ inyianlɩ ɔzɔ anwʋlazʋ yɩ a?

13. Mɩnla ti mɔɔ nɩ Devidi wɔ anwʋlazʋ kɛɛ Gyehova kehila yɩ a?

¹³ “Dɩyɛ bela iléhyinyia mɩ.” Devidi dɩlɩ nɣanlɩ kɛɛ Gyehova dwɩnɩ yɩ nwʋ, iluwakɛɛ nɩ ɩtɩ nɣanlɩ kɛɛ Gyehova fa mɔɔ ihyinyia nɩ ɩma yɩ eɣile bela. Akʋ̃ sʋ̃, nɩ Devidi zi kɛɛ Gyehova dɩ yɩ ɔhɔnwʋ na ide yi itiã nu. Meti mɔɔ nɩ ɩwɔ anwʋlazʋ kɛɛ ɩávalɩ nwʋmɔ mɔɔ ikezi wɔ eɣile be nɩ, Gyehova kɛva mɔɔ ihyinyia nɩ ɩkɛma yɩ. Iluwakɛɛ nɩ Devidi wɔ anwʋlazʋ kɛɛ Gyehova dɔ yɩ na ɩdwɩnɩ yɩ nwʋ nɩ ti, ɩwʋwalɩ yɩ ma ɩdʋlɩ yɩ adwɩnɩndwɩnɩ munwala igualɩ, yɩ anyɩ leli, na yɩ anyɩ zɔlɩ mɔɔ ɩwɔ nɩ.—Ndw. 16:11.

14. Mɩnla ɔhʋanɩ zʋ yɛ ebiye a Gyehova koluwa zʋlɔ kehile kɛɛ ɩdwɩnɩ yɛ nwʋ a?

¹⁴ Gyehova dwɩnɩ yɛ nwʋ baaba, titili mmɩlɩ mɔ yɛnwʋʋ amanɩyɛ nɩ. Claire a dɩ eliyema baalɛ mɔɔ ɩva alʋbɔ mɔɔ ɩbʋ 20 ɩzʋ̃mɩ wɔ Bɛtɩlɩ. Mmɩlɩ mɔ yɩ abusunwa yiyialɩ ndwokɔzɩzɩbɛ nɩ, nɩ ɩánwʋ kezimɔ ɩwʋwá bɛ. Yɩ papa nyianlɩ stroke ɛyɛlɛ ɛyɛlɛ be, boduli yɩ anlima baalɛ wɔ asafʋ yi nu, bɛ abusunwa egyima guli, na bɛ bangɩ sʋ̃ leli bɛ aliyia wɔ bɛ sa nu. Mɩnla ɔhʋanɩ zʋ yɛ Gyehova hileli kɛɛ ɩdɔ bɛ a? Claire hanlɩ kɛɛ: “Gyehova hilalɩ kɛɛ mɩ abusunwa yɩ bɛ sa kɛhã mɔɔ behyinyia eɣile bela. Mbɔmɩ sʋ̃maa nɩ, nɩ Gyehova ɩma yɛ sa kã mɔɔ yehyinyia nɩ ma ibulu zʋlɔ. Mɩta mʋdwɩnɩndwɩnɩ kezimɔ Gyehova lalɩ ɔlɔlɛ ali hileli yɛ nɩ nwʋ, na mɩ ɛɣɛɛlɛ iléfi ɔlɔlɛ mɔɔ ɩlalɩ yɩ ali ihileli yɛ nɩ kyɩ̃. Ɔzɔ mɔɔ mɩyɛlɩ nɩ, ɩwʋwa mɩ ma sɛ  miyiyiaa ndwokɔzɩzɩbɛ a, mʋkʋla mikyina yi munwa.”

15. Mɩnla ti mɔɔ Devidi yɩ ahʋnlɩnɩ dɔlɩ yi kunlu a? (Kila mfonyini yi sʋ̃.)

¹⁵ “Ɩma mʋ nwʋ ɩtɔ mɩ.”  Nɩ ɩyɛ a, ndwokɔzɩzɩbɛ mɔɔ Devidi yiyia nɩ ɩma ɩtɩɩdɩɩ. (Ndw. 18:​4-6) Naasʋ̃, Gyehova yi kunlumiyɩbalɛ nɩɩ yɩ ɔlɔlɛ manlɩ yɩ ahʋnlɩnɩ dɔlɩ yi kunlu. Gyehova valɩ yɩ ɔhɔnwʋ mɔɔ ɩvɛ nɩ ɩhɔlɩ “aliliyɛdɩka mɔɔ ndibe mɔɔ ɩyɛ ahʋmɩkã” nɩɩ “mmʋnlɩlelɛdɩka mɔɔ nzulo sʋ̃maa wɔ ɛkɛnɩ.” Eyi manlɩ Devidi nyianlɩ anwʋzɩzɩbɛ fʋlɔ, na ɩhɔlɩ zʋlɔ ɩvalɩ anyɩnlɩlelɛ ɩzʋ̃mɩnlɩ Gyehova.—Ndw. 18:​28-32.

16. Mɩnla ɔhʋanɩ zʋ yɛ Gyehova yɩ ɔlɔlɛ ɩma wʋ ahʋnlɩnɩ ɩdɔ wu kunlu a?

¹⁶ Ɔzɔ la yɛ nnɛ sʋ̃, iluwa “Gyehova yɩ ɔlɔlɛ mɔɔ nnahɩlɩbɛ íni numɔ ti, yɛ tʋ ɩlɛ́yɩbalɩ” ɩávalɩ nwʋmɔ kɛɛ yeyiaa ndwokɔzɩzɩbɛ nɩɩ atɩɩtɩɩ nɩ. (An. 3:22; Kol. 1:11) Bɛmá yehila Rachel yi ndianwʋ yɩ. Adwɩnɩndwɩnɩ hyɛlɩ yɩ zʋ mmɩlɩ mɔ yi hũ dianlɩ yɩ kɛnɩ na iyiakili Gyehova ɔzʋ̃mɩnlɛ wɔ COVID-19 adimakɛlɛ mmɩlɩ yɩ nu nɩ. Mɩnla yɛ Gyehova yɛlɩ wʋwalɩ yɩ a? Ɩhanlɩ kɛɛ: “Gyehova manlɩ mɩdɩlɩ nɣanlɩ kɛɛ ɩdɔ mɩ. Ɩmanlɩ minyianlɩ ɔhɔnwʋmmɔ mɔɔ benyianlɩ mmɩlɩ bɛmanlɩ mɩ, bɛɣɩlɛlɩ alɩyɛ mɩ, bɛzɛndɩlɩ mɛsegyi nɩɩ ɛhɛlɛlɛ ndwokɔ mɔɔ ɩhyɛ ɛzɩzɩbɛ mɩ, bɛzɩlɩlɩ behileli mɩ, na bɔhɔlɩ zʋlɔ bɛhakɛlɩ mɩ kɛɛ Gyehova dwɩnɩ mʋ nwʋ. Mɩda Gyehova asɩ eɣile bela kɛɛ ɩma minyia abusunwa kezile mɔɔ ɔlɔlɛ wɔ numɔ.”

17. Mɩnla ti mɔɔ nɩ Devidi ‘yi kunlu iáduli dɩyɛ bela nwʋ’ a?

¹⁷ “Mu kunlu iáduli dɩyɛ bela nwʋ, iluwakɛɛ ɛkɩnla mʋ nwʋ.” Mbɔmɩ sʋ̃maa nɩ, nɩ Devidi yɩ nnwʋanlɩ la asianɩ nu, na nɩ ɩwɔ adamvʋlɔ sʋ̃maa sʋ̃ mɔɔ bɔ nwʋ yɛ sɩ. Naasʋ̃ Gyehova yɩ ɔlɔlɛ manlɩ ɩdɩlɩ nɣanlɩ kɛɛ ɩwɔ banɩwɔlɛ. Devidi dɩlɩ nɣanlɩ kɛɛ Gyehova kɩnla yɩ nwʋ wɔ bʋwabɩlɛ bela nu, na eyi hyɛlɩ yɩ ɛzɩzɩbɛ. Eyi ti, ɩdʋlɩ ndwomi kɛɛ: “[Gyehova] leli mɩ wɔ nninyeni mɔɔ ɩma bɔlɔ kã mɩ nɩ munwatĩĩ nu.” (Ndw. 34:4) Ɩwɔ numɔ, ɩyɛ a nɩ bɔlɔ kezile kʋla kã Devidi, naasʋ̃ nɩ ɔlɔlɛ mɔɔ Gyehova ɩwɔ ɩma yɩ nɩ dɩ kezi tɛla nninyeni mɔɔ ɩma bɔlɔ kã yɩ nɩ.

18. Sɛ bɔlɔ kã wʋ a, mɩnla ɔhʋanɩ zʋ yɛ anwʋlazʋ mɔɔ ɔwɔ kɛɛ Gyehova dɔ wʋ nɩ, ɩkɔhʋla kɛhyɛ wʋ ɛzɩzɩbɛ a?

¹⁸ Sɛ yeyiyiaa bʋwabɩlɛ azʋlɔtʋ mɔɔ ɩma bɔlɔ kã yɛ a, mɩnla ɔhʋanɩ zʋ yɛ anwʋlazʋ mɔɔ yɛwɔ kɛɛ Gyehova dɔ yɛ nɩ kɔhʋla kɛhyɛ yɛ ɛzɩzɩbɛ a? Eliyema baalɛ ɔhʋanɩbukolɛvʋlɔ be mɔɔ bɔfʋlɔ yɩ Susi hanlɩ kezimɔ ɩ nɩɩ yi hũ dɩlɩ nɣanlɩ mmɩlɩ mɔ bɛ ɣa benyia hunli yɩ nwʋ  nɩ. Ɩhanlɩ kɛɛ: “Sɛ odwokɔ be mɔɔ ɩyɛ ɛyɛkɛ paa tʋ wʋ aɣilemvile nu a, ɩkɔhʋla kɛma wʋ ɛbɩlawɔlɛ kɛyɛ basaa na ɛkɛdɩ nɣanlɩ kɛɛ ndwokɔ tanɩ sʋ̃maa kɔdʋ wʋ. Naasʋ̃ kunlumiyɩbalɛ mɔɔ Gyehova da yɩ ali kile yɛ nɩ, ɩma yɛtɩ nɣanlɩ kɛɛ yɛwɔ banɩwɔlɛ.” Rachel mɔɔ yɛhã yɩ nwʋ odwokɔ daada nɩ hanlɩ kɛɛ: “Eɣile ɔkʋ̃ ohunluma be, mɩ ɛɣɛɛlɛ wɔlɩ baaba, na nɩ mɩtɩɩdɩɩ na eyi manlɩ mu kunlu duli, meti mʋwɔlɩ Gyehova mpayɩ. Ɛkɛnɩ la, mɩdɩlɩ nɣanlɩ kɛɛ Gyehova ɩma mɩ ahʋnlɩnɩ ɩdɔ mu kunlu na ɩmanlɩ mʋ nwʋ dwoli mɩ dɩkɛɛ mɔɔ enlilɛ yɛ ma yɩ ɣa nɩ, na ɩmanlɩ mʋhʋla mɩlalɩ. Mɩ ɛɣɛɛlɛ iléfi eyi kyɩ̃.” Asafʋ nu ebani be mɔɔ bɔfʋlɔ yɩ Tasos hɔ lalɩ fiyiadɩ alʋbɔ anlã iluwakɛɛ izili pɔkɔ kɛɛ ɩlɔ́kɔ sogyialilɛ ti. Mɩnla ɔhʋanɩ zʋ yɛ ɩnwʋnlɩ kɛɛ Gyehova dɔ yɩ na ɩdwɩnɩ yɩ nwʋ a? Ɩhanlɩ kɛɛ: “Gyehova manlɩ mɩ sa hanlɩ mɩ ehyinyiadɩ munwala ma iwulu zʋlɔ. Eyi manlɩ minyianlɩ anwʋlazʋ kezile kɛɛ sa mʋkʋla mɩfa mʋ nwʋ mitiã yɩ zʋ bɔkɔbɔkɔ. Akʋ̃ sʋ̃, ɩávalɩ nwʋmɔ kɛɛ nɩ fiyiadɩ kɛnɩ lalɛ yɛ atɩɩtɩɩ nɩ, Gyehova luwalɩ yi sunzuma yɩ zʋ ɩmanlɩ minyianlɩ anyɩnlɩlelɛ. Eyi wʋwalɩ mɩ ma mʋnwʋnlɩ kɛɛ sɛ mʋkɔ zʋ mɩfa mʋ nwʋ mitiã Gyehova zʋ a, yɩzayɩ sʋ̃ ɩkɛla ɔlɔlɛ kezile ali ikehile mɩ. Meti mʋwɔlɩ ɔhʋanɩbukolɛ egyima yɩ tʋ wɔ fiyiadɩ.”

TWƖ̃ BIKE WƲ NYAMƖNLƖ MƆƆ ƖWƆ KUNLUMIYƖBALƐ NƖ

19. (a) Iluwakɛɛ yezi kɛɛ Gyehova dɔ yɛ ti, kɛ ɩsɛ kɛɛ yɛbɔ mpayɩ yese a? (b) Mɔɔ Bayɩbʋlʋ kã falɩ Gyehova yɩ ɔlɔlɛ nwʋ nɩ, numɔ ɛhɩnla dɩyɛ yɛ wʋ anyɩ deli nwʋ a? (Kila alɩka mɔɔ ise “ Ndwokɔ Mɔɔ Ɩma Yɛnwʋ Kezimɔ Gyehova Ɩdɔ Yɛ Kezile.”)

¹⁹ Ozumanlɛnwʋnlɛ azʋlɔtʋ mɔɔ yezunzu nwʋmɔ nɩ, ɩma yɛnwʋ kɛɛ Gyehova, ‘ɔlɔlɛ Nyamɩnlɩ nɩ’ kɩnla yɛ nwʋ! (2 Kɔl. 13:11) Ɩdwɩnɩ ye nu bela nwʋ. Na yɛwɔ anwʋlazʋ kɛɛ “yɩ ɔlɔlɛ mɔɔ nnahɩlɩbɛ íni numɔ nɩ, idua yɛ nwʋ iyiyia.” (Ndw. 32:10) Sɛ yɛkɔ zʋ yɛdwɩnɩndwɩnɩ kezimɔ ɩda ɔlɔlɛ ali ikile yɛ nɩ nwʋ a, ɩma yɛnwʋ kɛɛ ɩwɔ kɛnɩ amba na ɩma yɛtwɩ̃ yebike yi. Sa yɛkʋla yɛzʋ̃ yɛ ahʋnlɩnɩ nu munwala yɛbɔ yɩ mpayɩ, na yɛahã kezimɔ yehyinyia yɩ ɔlɔlɛ nɩ nwʋ odwokɔ yɛahile yi. Sa yɛkʋla yɛkã yɛ ɔhawʋ munwala yekile yi, iluwakɛɛ yɛwɔ anwʋlazʋ kɛɛ ɩtɩ yɛ tʋ na ɩwɔ ɛpɛ kɛɛ ɩkɔwʋwa yɛ.—Ndw. 145:​18, 19.

20. Mɩnla ɔhʋanɩ zʋ yɛ Gyehova yɩ ɔlɔlɛ twɩ̃ yɛ bike yi a?

²⁰ Kɛmɔ ɛyɛbɛ ikũũ yɛ a yɛtwɩ̃ yebike dɩka mɔɔ ɛhyɩmɛ wɔ nɩ, ɔzɔ la yɛ Gyehova yɩ ɔlɔlɛ yɩ sʋ̃ ɩtwɩ̃ yɛ ibike yi a. Gyehova yɩ ɔlɔlɛ dɩ kezi, na ɩwɔ kunlumiyɩbalɛ sʋ̃. Meti ma ɔhʋanɩ ma Gyehova ɩlá yɩ ɔlɔlɛ ali ihile wʋ. Bɛmá ye munwala yɛzʋ̃ yɛ ahʋnlɩnɩ nu yɛdɩnyɩa numɔ kɛɛ: “Mʋdɔ wʋ Gyehova”!—Ndw. 116:1.